Dani-elaq Myang É Byù Rayùq É Shing-rán
10
Perisi hkóhkâm Kuru ùp é súm zan zàn má, Beliteshaza le gâ é Dani-elaq gi, shing-rán ralhum myang hkam yu ri. Shing-rán haû gi, têng é nghut mù, majan mó eq sêng é nghut ri. Yhang gi, shing-rán hau é lichyúm lé, shing-rán má wó sê gyô yu ri.2 Haú ahkyíng má, ngò, Dani-elaq gi, sum bat yhang yón pyâm é nghut lhê. 3 Ngò gi, sum bat haû byíng shoq, nghâm é zoshuq le a zo, sho eq tsibyiq wing lé le a chyam é htoq agó, gùng má xû le a bùt é nghut lhê.
4 Ngò gi, sânghî lhoqhkyap í xe myi nyí nyí má, Taigri wuìlàng mó yàm má yàp tô é u, 5 wú kat le, nú nhâm é mèbu wùt mù, Uhpaza hîng gyíng hpyihit hit é byù rayùq ngá é hí má yàp tô é lé myang ri. 6 Yhâng é gùngdu gi, bó huî hui é jung lungsêng nghut é utohpaya su, yhâng é myòqdong gi, maulhap su, yhâng é myòqjí gi, dùq tô é myihu su, yhâng é hkyî eq lòq gi, dùq wìk é gyi su dùt mù, yhâng é htê gi, ajùm ayo é htê su gâ ri.
7 Ngò, Dani-elaq za shing-rán haú lé myang é nghut lhê; ngò eq rahá nyi tô é bang gi, shing-rán haú lé a myàng kôlhang, gyùq nán é hui zo kômù, yhûmsîng yhang hpang haq bûm bekô nghut ri. 8 Haû mù, ngò baú myìt gyó to luî, shing-rán mó haú lé wú tsuq tô é nghut lhê; ngò gi, wum a bo byùq lo mù, ngá é myòqdong abósôm mâ é dùt byùq luî, wum gyuî byùq bê nghut ri. 9 Haú hkûn, ngò gi, yhang dáng nyo nyi é htê lé wó gyo mù, yhâng é dang lé gyô nyì uchyang yhup mó myí byùq ló luî, myòqdong myigùng má gòp byùq é nghut lhê.
10 Wú aq; lòq ralòq gi, ngo lé lé záng mù, ngá é lòq eq hkyîhput lé htuq to nhâng luî, kòk kòk nán nhang ri. 11 Haû mù, yhang gi, ngo lé, “Dani-elaq ê, nàng gi, gyai yhang chyitdàp é hui sû nghut mù, ngò, nang lé taí râ nghut é dang pé lé rago myìt tû wú mù, toq yàp àq; hkâsu mù gâ le, ahkuî, náng chyáng ngo lé nhang kat é nghut ri.” ga taî ri. Haû mù, yhang, ngo lé dang taî nyi é hkûn, ngò gi, nán uchyang toq yàp é nghut lhê.
12 Hau htoq agó, yhang gi, “Dani-elaq ê, hkâgyùq. Náng é Garai Gasâng é hí má náng gûng nàng myìt lhoqnyhûm mù, sê gyô é u-nuq wó râ matú, náng é i-myìt má bo hi é nyí mai, náng é dang pé lé gyo byi bê nghut mù, ngò gi, náng é dang haú pê é yánmai lé é nghut lhê. 13 Nghut kôlhang, Perisi mîngdán mâ é zau hpó gi, ngo lé buìnyì í xe ra-nyí yhang lhom hkûm zing tô ri. Hau htâng, zau mó pé mâ é rayùq nghut é, Mihka-elaq ga sû gi, Perisi hkóhkam èq hkûm zing tô é lé ngò hui zô nyi é yánmai, ngo lé lé garúm yu ri. 14 Ahkuî, ngò gi, nang lé, htângnùng má náng é byu pê chyáng dùt htoq râ nghut é hkyô lé taî sân kyo râ matú lé jé é nghut lhê; hkâsu mù gâ le, shing-rán haû gi, jé lô râ buìnyì pé eq sêng é nghut ri.” ga xoq taî ri.
15 Ngò gi, yhang, ngo lé haû su ga taî nyi é u, myòqdong myigùng má ngóm gòp luî, dang a wó nyo byùq lo nghut ri. 16 Haú hkûn, byù su dùt sû rayùq gi, ngá é nhutwuî má záng byî é nghut mù, ngò gi, nhuthkum bóng byùq mù, dang wó nyo hî bê nghut lhê. Ngò gi, ngá é hí má yàp tô é sû lé, “Ngá yhûmsîng ê, ngò gi, shing-rán hau é yánmai dìk shoq hpu zô nyi mù, wum gyai nyhôm byùq é su gâ ri. 17 Ngá é yhûmsîng ê, náng é duìnhâng zoshâng ngò gi, nàng eq hkâsu wó nyô râ lhú? Ngá é wum a bo byùq lo mù, ngò gi, soq za ru shê wuî nyi alô nghut ri.” nghû taî é nghut lhê.
18 Haú hkûn, haû byù su dùt sû gi, ngo lé dum záng mù, wum-o lhoqkíng byî ri. 19 Haû mù, yhang gi, “Hkâgyùq; nàng gi, gyai yhang chyitdàp é hui sû nghut ri; nàng nguì ngón sháng gàq! Ahkuî, wum-o lhoqhtân aq; wum-o lhoqhtân aq.” ga taî ri.
Yhang, ngo lé nyo nyi é u, ngò gi, wúm bo byùq mù, “Ngá é yhûmsîng ê, nàng, ngo lé wum-o byi bê nghut é yánmai, dang nyô lo aq.” nghû taî é nghut lhê.
20 Haû mù, yhang gi, “Ngò haî mù náng chyáng lé é hkyô lé, nàng sê lhê lhú? Ngò gi, Perisi zau lé gyè zan râ matú hân taû ló râ nghut lhê; ngò ló byùq jáng, Grik zau nyi htoq lô râ nghut lhê. 21 Nghut kôlhang, ngò gi, nang lé, Tengmán Laiká Bùk má haî kâ tô é hkyô lé hí taî kyo râ nghut lhê. (Náng é zau Mihka-elaq mai lai luî, zau shí nhik lé bo htuqhtíng râ byù a nyì nghut ri.