46
Haû Ahko Ahkáng lhúnglháng wó Sû Yhûmsîng Garai shî su ga taî ri; buìhtoq hkyam shut hu tô é ahtê pyâm wânghkaû hkum lé, mú zuî é hkyuq nyí gyoro má myhî to ra râ nghut lhê; nghut kôlhang, Bánno Buìnyì eq Lhôxan Lhôsik poî nyí gi, hpông to ra râ nghut lhê. 2 Zau hpó gi, sânghî pyâm wânghkaû mâ é wâng hkúmdong laìshînhtâng mai wàng mù, hkum zìng nàm má yàp to ra râ nghut lhê. Hkyangjông pé gi, yhâng é myi nyhé hkungga eq yhâng é zùmhkaû hkungga pé lé nhông byi ra râ nghut lhê. Yhang gi, wâng hkúmdong mâ é hkumtáng má ngóm gòp noqkuq mù, htoq ló ra râ nghut lhê; nghut kôlhang, myín a jé jé, hkum haú lé ge myhi râ a nghut. 3 Mingbyû wuì gi, Bánno Buìnyì pé eq Lhôxan Lhôsik poî pé má le, wâng hkúmdong hau é hí má Yhûmsîng Garai lé noqkuq ra kôrâ nghut lhê. 4 Zau hpó gi, Bánno Buìnyì má, haû Yhûmsîng Garai lé nhông byi râ myi nyhé hkunggâ é matú, haî le a râ é, sau zo hkyuq du eq saulo radu yu lé ra râ nghut lhê. 5 Gùqzò hkungga lé, sau lô é matú ra-ehpa, sau zô pé é matú byí nau é myhó, byi ra râ nghut lhê; gùqzò hkungga ra-ehpa kô má tsanlun xû rachyóng chyóng lhoqlhóm ra râ nghut lhê. 6 Yhang gi, Lhôxan Lhôsik poî má, haî le a râ é, nohtó zo radu, sau zo hkyuq du eq saulo radu htoq byi ra râ nghut lhê. 7 Yhang gi, gùqzò hkungga lé le, nohtó radu eq ra-ehpa kô, saulo radu eq ra-ehpa kô, sau zô pé eq yhûmsîng byí nau é myhó byi mù, gùqzò hkungga ra-ehpa kô má tsanlun xû rachyóng chyóng lhoqlhóm ra râ nghut lhê. 8 Zau hpó wang é hkûn, yhang gi, wâng hkúmdong laìshînhtâng mai wàng mù, haú dông dum htoq lô ra râ nghut lhê.9 Masàt tô é poî pé má, mingbyû wuì gi, haû Yhûmsîng Garaî é hí má lé kô é hkûn, noqkuq râ matú, mautsûng hkum mai wang é sû gi, maupyî hkum mai htoq ló ra râ nghut mù, maupyî hkum mai wang é sû gi, mautsûng hkum mai htoq ló ra râ nghut lhê. Ó yùq le, wang é hkum mai wó dum taû htoq ló râ a nghut é za, hkum haû eq díng díng mâ é hkum mai shèq ge htoq ló râ nghut lhê. 10 Zau hpó gi, mingbyû wui chyáng bo lòm ra râ nghut mù, yhángmòq wàng jáng, yhang le bo wàng, yhángmòq htoq ló jáng, yhang le bo htoq ló kut ra râ nghut lhê. 11 Zoshuq poî pé eq masàt tô é poî pé kut jáng, gùqzò hkungga lé gi, nohtó radû é matú ra-ehpa kô, saulo radû é matú ra-ehpa kô, sau zô pê é matú yhûmsîng byí nau é myhó byi ra râ nghut lhê; gùqzò hkungga ra-ehpa má tsanlun xû rachyóng chyóng lhoqlhóm ra râ nghut lhê.
12 Zau hpó gi, byi naû hkungga nghut é, myi nyhé hkungga nghut nghut, zùmhkaû hkungga pé nghut nghut lé, haû Yhûmsîng Garaî é matú htoq byî é nghut jáng, buìhtoq hkyam shut hu tô é hkum lé, yhâng é matú hpông to byi ra râ nghut lhê. Yhang gi, Bánno Buìnyì má kut é su, yhâng é myi nyé hkungga nghut nghut, yhâng é zùmhkaû hkungga pé nghut nghut lé, àp nhông byi râ nghut lhê. Hau htâng, yhang gi, htoq ló râ nghut mù, yhang htoq ló é htâng má, hkum haû myhî pyám râ nghut lhê.
13 Yhang gi, nyí wuî, haû Yhûmsîng Garai lé nhông byi râ nghut é myi nyhé hkunggâ é matú, haî le a râ é, razàn bò bê é sau zo radu du htoq byi ra râ nghut lhê; nàp wuì haú lé htoq byi râ dùt lhê. 14 Hau htoq agó, yhang gi, nàp wuì, gùqzò hkungga lé, ra-ehpa é hkyuq gàmbùm mâ é ragàmbùm eq mún má nyhó râ xû rachyóng mâ é sum gâmbùm ragàmbùm lé htoq byi ra râ nghut lhê. Haû Yhûmsîng Garaî é matú gùqzò hkungga shî htoq byî nyì râ hkyô gi, ahtum abyùq é cháng ra târâ nghut lhê. 15 Haû mù, myi nyhé hkunggâ é matú, sau zo le, gùqzò hkungga eq xû lé le, nàp wuì htoq byî nyì ra râ nghut lhê.
16 Haû Ahko Ahkáng lhúnglháng wó Sû Yhûmsîng Garai shî su ga taî ri; zau hpó gi, yhâng é silî wunlî maumyî mai, yhang zo yùqzo rayùq yùq lé chyûnghuq byî é nghut jáng, haû gi, yhâng é awùt ashín pé sing é maumyî dùt râ nghut lhê; haû gi, yhángmòq sing é silî wunlî maumyî dùt râ nghut lhê. 17 Nghut kôlhang, yhang gi, yhâng é silî wunlî maumyî mai, yhâng é duìnhâng zoshâng rayùq yùq lé chyûnghuq byî é nghut jáng, duìnhâng zoshâng haû gi, maumyî haú lé, yhang wó lùt é zànwut jé za wó sing to râ nghut lhê. Haú hkûn, zau hpó gi, maumyî haú lé dum taû sing yù râ nghut lhê. Yhâng é silî wunlî maumyî gi, yhang zô pê èq za sing é nghut mù, haû gi, yhángmòq é nghut lhê. 18 Zau hpó gi, mingbyû wui é silî wunlî maumyî lé wó zìk lú yû râ a nghut é htoq agó, maumyî yhûmsîng lé haú mai wó hkat htoq pyám râ a nghut; Ngá é byù ó yùq le, yhûmsing é maumyî mai hkat htoq pyâm é a hui zo kó sháng gàq, yhang gi, yhûmsing é maumyî mai, yhang zô pé lé silî wunlî maumyî gàm byi ra râ nghut lhê.’ nghû taí aq.” gâ ri.
19 Hau htâng, yhang gi, ngo lé, hkum yâm má jòq é wàng hkyô mai shuî lai luî, mautsûng shut hu tô é, hkyangjông pê é chyoiyúng wàp pé má shuî ê mù, buìwàng hkyam shut ló htâng é jowò rawò lé tûn shit ri. 20 Haú hkûn, yhang gi, ngo lé, “Jowò shî gi, hkyangjông pé mai, mara hpyî hkungga eq mara hkyut hkungga lé chyoq mù, gùqzò hkungga lé bûng é jowò nghut lhê; haû gi, haú pé lé sânghî pyâm wânghkaû má yu wàng mù, shiwa byu pé lé záng lhoq chyoiyúng byi râ lé, koi pyám râ matú nghut lhê.” ga taî ri.
21 Hau htâng, yhang gi, ngo lé, sânghî pyâm wânghkaû má shuî lé mù, wânghkaû hau é myi chyûn má sô lai nhang ri; ngò gi, wânghkaû hau é chyûn hkangmó má wâng zo rawàng wàng jòq tô é lé myang ri. 22 Sânghî pyâm wânghkaû myi chyûn mâ é wâng zo haû myi wâng gi, hîng hpyang myi xê dúng bò mù, làm hpyang sum xê dúng bo é nghut luî, myi chyûn mâ é wâng zo haû myi wâng gi, rajung za lam é chyat nghut ri. 23 Haû myi chyûn mâ é wâng zo ahkaû lhînghkyùq má gi, lùqgòk lé hkâng yán lhing tô ri; lùqgòk hkâng yán lhing tô é a-ô má gi, hkungga lé chyoq é myi mut jang nghut ri. 24 Haú hkûn, yhang gi, ngo lé, “Shí pé gi, noqkuq yhûm má dójaú é bang mai, shiwa byu pê é shigu hkungga pé lé chyoq é jang pé nghut lhê.” ga taî ri.