Maumyî Gam Hkoq É Hkyô
45
Núngmòq gi, maumyî haú lé hkyîn shosé shê mù, silî wunlî maumyî dông gàm kô é hkûn, hîng hpyang 25000 dúng eq làm hpyang 20000 dúng bo é maumyî lé, chyoiyúng maumyî gàmbùm dông, haû Yhûmsîng Garai lé nhông byi ra kôrâ nghut lhê; maumyî haû bànshoq gi, chyoiyúng jowò dùt râ nghut lhê. 2 Maumyî hau é agùng má, myí chyun é shut ngo shô dúng dúng bo é myigùng gi, sân-yúng jowò dùt râ nghut lhê; hau é lhînghkyùq má gi, ngo xê dúng lam é myigùng mân to nhâng râ dùt lhê. 3 Haû mù, nàng gi, chyoiyúng maumyî haú má, hîng hpyang 25000 dúng, làm hpyang 10000 dúng kê htoq to luî, hau é ahkaû má, sân-yúng jowò eq chyoiyúng htâng é jowò kut to ra râ nghut lhê. 4 Maumyî haû gi, mîngdán haú mâ é chyoiyúng maumyî gàmbùm dùt râ nghut mù, Yhûmsîng Garaî é hí má dójaú râ matú chyâng htèp lé é eq sân-yúng jowò má dójaú é hkyangjông pê é matú dùt râ nghut lhê. Maumyî haû gi, yhángmòq é matú yhûmgò eq sân-yúng jowò é matú chyoiyúng é wâng dùt râ nghut lhê. 5 Gótû hîng hpyang 25000 dúng, làm hpyang 10000 dúng bo é maumyî gi, noqkuq yhûm má dójaú é Lewiq byu pê é maumyî dùt râ nghut lhê; haû gi, yhángmòq nyì râ wà pé xuq râ maumyî nghut râ nghut lhê.6 Wà mó eq sêng é maumyî lé gi, chyoiyúng maumyî haû eq xoq xoq má, làm hpyang 5000 dúng, hîng hpyang 25000 dúng byî to ra râ nghut lhê; haû gi, Isira-elaq a-myû gón eq sêng é maumyî dùt râ nghut lhê.
7 Hau htoq agó, chyoiyúng maumyî eq wa é matú tô tô é maumyî í hkyam shut gi, zau hpô é maumyî nghut râ nghut lhê; maumyî haû gi, buìwàng hkyam mai buìwàng hkyam shut lam ló, buìhtoq hkyam mai buìhtoq hkyam shut lam ló mù, buìwàng hkyam mai buìhtoq hkyam jé é maumyî gi, a-myû up hkangmó wó é maumyî gàmbùm eq rajung za nghut râ nghut lhê. 8 Maumyî haû gi, Isira-elaq mîngdán má zau hpô é maumyî dùt râ nghut lhê. Htângnùng má, Ngá é zau zô pé gi, Ngá é byu pé lé zìk zo kôrâ a nghut lo; yhángmòq gi, Isira-elaq byu pé lé, yhûmsing é a-myû up má cháng mù, maumyî tsing sing yù nhâng kôrâ nghut lhê.
9 Haû Ahko Ahkáng lhúnglháng wó Sû Yhûmsîng Garai shî su ga taî ri; Isira-elaq zau wuî ê, gé lo keq hkoi! Lú lhum bàt zìk hkyô eq zìk zo zìk shuq hkyô lé tô pyám mù, târâ ràp-rá hkyô eq jo têng é hkyô lé kut keq. Ngá é byu pé lé zing-rî htoq kat é hkyô nô pyám lo keq; haû gi, Ahko Ahkáng lhúnglháng wó Sû Yhûmsîng Garai taî pyo ri. 10 Núngmòq gi, mán é jàngshi, mán é ehpaa eq mán é bàtb pé chûng ra râ nghut lhê. 11 Ehpa eq bàt pé gi, rajung jung za dùt râ lhê; rabàt gi, ra-homerac mâ é xê gàmbùm mâ é ragàmbùm bò râ dùt é eq rajung za, ra-ehpa le, ra-homera mâ é xê gàmbùm mâ é ragàmbùm bò râ dùt lhê. Homera gi, haû í lhum lé chîn lìk é laké dùt ra râ nghut lhê. 12 Shekelad ralhum gi, gera í xê nghut lhê. Mina ralhum gi, shekela í xê, shekela í xe ngò, shekela raxe ngò nghut mù, bànshoq shekela hkyuq xê nghut ri.
13 Núngmòq nhông byi râ é chyûnghuq hkungga gi, shí dông nghut lhê; súngsô nghut kôle, mùk-yó gùq nghut kôle, ra-homera hkangmó mâ é, ra-ehpa mâ é hkyuq gàmbùm mâ é ragàmbùm byi ra râ nghut lhê. 14 Tsanlun xû nhông byi râ gàmbùm lé gi, bàt mai lìk râ nghut mù, hkyuq xê bàt wang é wúnge mâ é, hkyuq bàt wang é yambú mâ é, xê gàmbùm mâ é ragàmbùm lé nhông byi ra râ nghut lhê. (Ra-hkora gi, raxê bat, a nghut jang, ra-homera bo lhê.) 15 Hau htoq agó, Isira-elaq mau mâ é nyui yúng é mhan nú yô mâ é sau hpúng í shô du mâ é radu lé htoq byi ra râ nghut lhê. Shí pé gi, shiwa byu pê é matú mara hkô htaí hkungga kut byi râ má chûng râ nghut é, gùqzò hkungga pé, myi nyhé hkungga pé eq zùmhkaû hkungga pé nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri. 16 Mingbyû wuì bànshoq bang gi, Isira-elaq é zau lé chyûnghuq hkungga haû byi ra kôrâ nghut lhê. 17 Isira-elaq byu pé masàt tô é poî bànshoq nghut é, Lhôxan Lhôsik poî pé eq Bánno Buìnyì pé mâ é poî buìnyì pé má, myi nyhé hkungga pé, gùqzò hkungga pé eq shuq jung hkungga pé lé htoq byi râ gi, zau hpô é wò nghut ri. Yhang gi, Isira-elaq byu pê é matú hkô htaí hkungga kut byi râ má chûng râ nghut é, mara hkyut hkungga pé, gùqzò hkungga pé, myi nyhé hkungga pé eq zùmhkaû hkungga pé lé htoq byi râ nghut lhê.
18 Haû Ahko Ahkáng lhúnglháng wó Sû Yhûmsîng Garai shî su ga taî ri; sânghî lhôhkyap, lhôxân nyí má, haî le a râ é nohtó râm zo radu yù mù, haû sân-yúng jowò lé lhoq sanséng ra râ nghut lhê. 19 Hkyangjong hpó gi, mara hkyut hkungga sui ra-am lé yù mù, noqkuq yhûm hkum dúnlhum pé má le, hkungga gyàp htoq mâ é myi chyûn má le, ahtê pyâm wânghkaû mâ é hkum dúnlhum pé má le, bùt ra râ nghut lhê. 20 Haû eq rajung za, shi ngé ngé a kut é eq a bûn nùng má mara kut shut su é matú, haú lhôhkyap, nyhit nyí nyí má haú dông kut ra shirâ nghut lhê; haú dông, núngmòq gi, noqkuq yhum é matú hkô htaí hkungga nhông byi ra kôrâ nghut lhê.
21 Sânghî lhôhkyap, raxe myi nyí nyí má, núngmòq gi, nyhit nyí myáng shoq Lhoqlhai Poî kut ra kôrâ nghut lhê; haú gyoro má, núngmòq gi, múnchi a bo é mùk zo ra kôrâ nghut lhê. 22 Haú nyí má, zau hpó gi, yhûmsing é matú le, mingbyû wuì bànshoq é matú lé, mara hkyut hkungga nohtó htoq byi ra râ nghut lhê. 23 Yhang gi, poî haû nyhit nyí má, nyí wuî, haû Yhûmsîng Garaî é matú myi nyhé hkungga kut râ, haî le a râ é, nohtó nyhit du eq saulo nyhit du lé le, mara hkyut hkungga kut râ bainám lo radu lé le, htoq byi ra râ nghut lhê. 24 Hau htoq agó, yhang gi, gùqzò hkungga htoq byi ra râ nghut lhê; nohtó radû é matú ra-ehpa, saulo radû é matú ra-ehpa, gùqzò hkungga ra-ehpa é matú tsanlun xû rachyóng chyóng htoq byi ra râ nghut lhê.
25 Haû lha-mó nyhit hkyap hkyap, raxe ngo nyí nyí má hi é poî nyhit nyí gyoro má le, yhang gi, mara hkyut hkungga pé, myi nyhé hkungga pé, gùqzò hkungga pé eq xû lé, rajung za htoq byi ra râ nghut lhê.