39
Hau htoq agó, “Byù zo ê, Goga lé htuqhtîng é myìqhtoi htoi mù, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; Meshek mau eq Tubala mau mâ é zau mó nghut sû, Goga ê, Ngò gi, nang lé htuqhtîng lhê. 2 Ngò gi, nang lé lhing tau nhâng mù, nang lé lâng she yù luî, mau we mautsûng hkyam mai shuî-û yù luî, Isira-elaq bùm pé lé htuqhtíng râ matú nang lé ê jé nhâng râ nghut lhê. 3 Haú hkûn, Ngò gi, náng é lòqpaî lòq mâ é lai lé bàt hkyô pyám byi mù, náng é lòqyo lòq mâ é myoshi pé lé lhoqhkyô pyám nhâng râ nghut lhê. 4 Nàng eq náng é gyè hpúng bànshoq lé le, nàng eq rahá nghut é byù myû wuì lé le, Isira-elaq é bùm pé má shi lêng byùq nhâng râ nghut lhê. Ngò gi, nang lé, htîm jung nghoq a-myû bànshoq eq tân jung yòsô zè pê é matú zoshuq dông àp pyám râ nghut lhê. 5 Ngò gi, haú hkyô lé taí bê nghut é yánmai, nàng gi, yòso pá má shi lêng byùq râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri. 6 Ngò gi, Magoga mau eq wuimau yàm pé má nyì ngón yùqyo nyì bâng chyáng myi hkyô kat râ nghut lhê; haú hkûn, Ngò gi, haû Yhûmsîng Garai nghut é lé, yhángmòq sé kôrâ nghut lhê.7 Ngò gi, Ngá é chyoiyúng myìng lé, Ngá é Isira-elaq byu pê chyáng hu nhâng râ nghut lhê. Ngò gi, Ngá é chyoiyúng myìng lé dum taî hpoi nhâng râ a nghut lo; haú hkûn, Ngò, Yhûmsîng Garai gi, Isira-elaq a-myû má Chyoiyúng Sû nghut é lé, byù myû wuì sé kôrâ nghut lhê. 8 Ahkyíng haû jé lo nyì bê nghut ri! Haû gi, hkyak dùt htoq râ za nghut lhê; haû gi, Ngò taî tô é buìnyì nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.
9 Haú hkûn, Isira-elaq wà pé má nyi é bang gi, htoq e ló mù, gyèhking nghut é, tiq é kô é gòlong pé, lai eq myoshi pé, dumbáng pé eq lhâm pé lé hkyom yù luî, myi nyhé kôrâ nghut lhê. Yhángmòq gi, nyhit zân yhang haú pé lé htang dông nyhé kôrâ nghut lhê. 10 Yhángmòq gi, gyèhking zè pé lé htang dông chûng kôrâ nghut mù, yò pé mai htang ho yù ra kôrâ le a nghut, sik mó yô pé mai htang zân yù ra kôrâ le a nghut. Yhángmòq gi, yhángmòq lé lú zo lú shuq é bang lé, myàq zo myàq shuq kôrâ nghut mù, yhángmòq lé hpyoq zo hpyoq shuq bang lé, hpyoq zo hpyoq shuq kôrâ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.
11 Haú buìnyì má, Ngò gi, Isira-elaq ming má, Xo Nhông buìhtoq hkyam mâ é Gyung so Langhkaû má, Goga lé myhup râ matú lùpgò byi râ nghut lhê. Goga eq yhâng é byù ajùm ayò bànshoq lé haú jowò má myhup yhum kôrâ nghut mù, gyung so bâng é hkyô xaû byùq râ nghut lhê. Haû mù, jowò haú lé, Hamon Goga Langhkaû ga myhíng kôrâ nghut lhê.
12 Isira-elaq byu pé gi, mîngdán haú lé lhoq sansêng pyám râ matú, lha-mó nyhit hkyap yhang, yhángmòq lé myhup yhum kôrâ nghut lhê. 13 Haú ming mâ é byù bànshoq gi, yhángmòq lé myhup yhum kôrâ nghut lhê; Ngá é hpungwup shingkang lé Ngò lhoqhû é buìnyì má, haû gi, yhángmòq é matú xûm nyì râ hkyô dùt byùq râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri. 14 Byu pé gi, mîngdán lé xoq luî lhoq sân-yúng nyî râ matú ji yu é hui kôrâ nghut lhê; yhángmòq gi, jowò hkangmó má châng hô râ byù nhâng kôrâ nghut mù, haú bang gi, góbang eq rahá, myigùng htoq má lèq tô bum é màng lé myhup yhum kôrâ nghut lhê.
Yhángmòq gi, lha-mó nyhit hkyap laî é htâng má je riyhang châng hô kôrâ nghut lhê. 15 Yhángmòq ra-mau gón e ló é hkûn, shi byùq su é showui lé myang záng jáng, màng myhup é bang mai haú lé Hamon Goga Langhkaû má myhup pyâm é hkûn jé shoq, haú nâm má masàt lhô xuq to ra kôrâ nghut lhê; 16 haú jowò gi, Hamona gâ é wà eq chyâng é jang nghut ri. Haû mù, yhángmòq gi, mîngdán lé lhoq sân-yúng kôrâ nghut lhê.’ nghû taí aq.
17 Byù zo ê, haû Ahko Ahkáng lhúnglháng wó Sû Yhûmsîng Garai shî su ga taî ri; nghoq a-myû jung hkangmó eq tân jung yòsô zè bànshoq lé, ‘Isira-elaq bùm pé má jòq é shigu hkungga mó nghut é, núngmòq é matú Ngò hen to byî é shigu hkungga má lhînghkyùq mai lé zùp zing keq; núngmòq gi, haú má sho myàng zo mù, sui myàng shuq kôrâ nghut lhê. 18 Núngmòq gi, Bashan mau mâ é xu yúng é shigu gaunyhaú bànshoq nghut é, saulo pé, sau zô pé, bainám pé eq nohtó pê é sui sho lé zô é su, sarhê mó pê é sho lé zo mù, myìdàm htoq mâ é zaú wui é sui lé shuq kôrâ nghut lhê. 19 Núngmòq gi, núngmòq é matú Ngò hen to byî é hkungga pé mai, gyi gyi dau dau sho xû zo mù, ngíng byùq shoq sui shuq kôrâ nghut lhê. 20 Núngmòq gi, Ngá é zohpoq mai, myang pé, myang ji ji bang, sarhê mó pé eq gyèzô pé a-myû myû lé, gyi gyi dau dau myàng zo kôrâ nghut lhê.’ nghû wùt garû taí aq; haû gi, Ahko Ahkáng lhúnglháng wó Sû Yhûmsîng Garai taî pyo ri.
21 Ngò gi, gótû byù myû wui chyáng Ngá é hpungwup shingkang lé lhoqhu râ nghut mù, gótû byù myû bànshoq bang gi, Ngò, yhángmòq lé mara dàm hpu zo nhang é hkyô lé le, yhángmòq é ahtoq má Ngá é lòq jé é hkyô lé le, myàng kôrâ nghut lhê. 22 Haû mù, Ngò gi, Isira-elaq byu pê é Garai Gasang, haû Yhûmsîng Garai nghut é lé, haú nyí mai, Isira-elaq byu pé sé kôrâ nghut lhê. 23 Haû Isira-elaq byu pé gi, Ngo lé yhángmòq a jujúm kô é yánmai, yhángmòq é yubàk marâ é matú shúm zung é hui zo kô é hkyô lé, gótû byù myû wuì sé kôrâ nghut lhê. Yhángmòq é yubàk marâ é yánmai, Ngò gi, yhángmòq chyáng mai Ngá é myòqdong lé haq pyám mù, yhángmòq é gye pê é lòq má yhángmòq lé àp byî pyám é nghut mù, yhángmòq gi, sham èq sat lheq pyâm é hui zo bekô nghut ri. 24 Ngò gi, yhángmòq é a sansêng é hkyô pé eq yhángmòq kut shut é hkyô pé má cháng mù, yhángmòq lé lató hpuq luî, yhángmòq chyáng mai Ngá é myòqdong lé haq pyâm é nghut lhê.
25 Haû mù, Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, Yakup é a-myû wuì lé, shúm zung é mai shuî taû lò mù, Isira-elaq byù bànshoq lé shogyo nhikmyin râ nghut lhê; Ngò gi, Ngá é chyoiyúng myìng lé hung yù râ nghut lhê. 26 Yhángmòq gi, yhángmòq é hoq hpu hkyô lé le, yhángmòq lé ô èq kyuq é a huî é za, yhûmsing é mîngdán má nyì ngón yùqyo nyì kô é hkûn, Ngo lé yhángmòq tûn shit é a jujúm hkyô bànshoq lé le, tô-myhî pyám kôrâ nghut lhê. 27 Ngò, yhángmòq lé byù myû wui chyáng mai shuî taû yù mù, yhángmòq é gye pê é mîngdán mai yhángmòq lé shuî tsîng yu é hkûn, Ngò gi, byù myû myo myô é myòq hí má, yhángmòq dông Ngò chyoiyúng é hkyô lé shit râ nghut lhê. 28 Haú hkûn, Ngò, yhángmòq lé byù myû wui chyáng shúm zûng nhâng kôle, rayùq lé lháng haú má a nyhi hkyô tô é za, yhángmòq é mîngdán má dum shuî tsîng yù râ nghut é yánmai, Ngò gi, yhángmòq é Garai Gasang, haû Yhûmsîng Garai nghut é lé, yhángmòq sé kôrâ nghut lhê. 29 Ngò gi, yhángmòq chyáng mai Ngá é myòqdong haq pyám râ a nghut lo; hkâsu mù gâ le, Ngò gi, Isira-elaq byu pê chyáng Ngá é Sô hut hkyô kat râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.” le gâ ri.