Isira-elaq A-myû Lé Goga Ga Sû Majan Zân É Hkyô
38
Haû Yhûmsîng Garaî é mungdang ngá chyáng jé é gi, 2 “Byù zo ê, Meshek mau eq Tubala mau mâ é zau mó nghut sû, Magoga mau mâ é Goga shut náng é myòqdong hû mù, yhang lé htuqhtîng é myìqhtoi htoi luî, 3 ‘Haû Ahko Ahkáng lhúnglháng wó Sû Yhûmsîng Garai shî su ga taî ri; Meshek mau eq Tubala mau mâ é zau nghut sû, Goga ê, Ngò gi, nang lé htuqhtîng lhê. 4 Ngò gi, nang lé lhing tau nhâng mù, gòknghê èq náng é âm mai nghê yù luî, náng é gyè hpúng gón nghut é, náng é myang jûm, gyèhking chung é náng é myang ji ji bang, gòlong mó gòlong zo chung é ajùm ayò eq yhûmsing é shâm she é byù hpúng bànshoq eq rahá, nang lé shuî htoq yû râ nghut lhê. 5 Perisi mau, Ehti-opi mau eq Put mau byu pé bànshoq le, gòlong pé eq jòqtoq mùq pé chûng mù, yhángmòq chyáng bo lom tô bum ri; 6 hau htoq agó, Gomera mau eq haú mâ é gyèhpúng pé bànshoq, mautsûng hkyam ló htáng mâ é, Bet Togarima mau eq haú mâ é gyèhpúng pé bànshoq nghut é, byù myû myo myo le nàng eq rahá nghut nyi ri.7 Rì rì kut to aq; nàng le, náng chyáng lé zùp zîng tô é bànshoq bang le hen lajâng to keq; nàng gi, yhángmòq lé wú zúng sû kut àq. 8 Buìnyì tsómra myáng jáng, nàng gi, majan zan nhâng râ matú wùt yu é hui râ nghut lhê. Haû mù, majan mai wó lùt luî, byù myû myo myo mai shuî tsîng yu é hui mù, myáng myáng chamchyuîyuì dùt tô é Isira-elaq é bùm pê é ahtoq má nyi tô é byu pê é mau lé, htângnùng lhê é zànwut pé má nàng majan ê zan râ nghut lhê. Yhángmòq gi, byù myû pê chyáng mai shuî htoq yu é hui mù, ahkuî, yhángmòq bànshoq bang nyì ngón yùqyo nyi bum akô nghut ri. 9 Nàng eq náng é gyè hpúng pé bànshoq le, gótû byù myû wuì myo myo le, nàng eq rahá bo dòq ê kôrâ nghut mù, laìdun mó su yán dòq ê kôrâ nghut lhê; núngmòq gi, mhut su mîngdán haú lé nghop pyám kôrâ nghut lhê.
10 Haû Ahko Ahkáng lhúnglháng wó Sû Yhûmsîng Garai shî su ga taî ri; haú buìnyì má, nàng gi, myìt wú mù, agè ashop é hpàqchyî htoq râ nghut lhê. 11 Nàng gi, “Wàhkûm a wam é wà pé jòq é mau má ngò ê dòq htim râ nghut lhê; ngò gi, nyì ngón yùqyo nyi bùm mù, xêwâm le a wàm, hkum pé eq hkumkyáng pé le a râ é mau lé majan ê dòq zan râ nghut lhê. 12 Ngò gi, haú mâ é zè pé eq sùtzè pé lú yû râ nghut lhê; htên byòq tô é má byù dum nyi é jang má le, byù myû wui chyáng mai shuî tsîng yu é hui mù, shigu gaunyhaú eq sùtzè pé myo myo wó luî, mîngdán agùng má nyi é bang lé le, ngò majan ê dòq zan râ nghut lhê.” ga taí râ nghut lhê. 13 Sheba wà eq Dedan wà byu pé, Tarishi wà mó mâ é wuìloq kut bang eq hkanghkyi râm zo pé su nghut é haú mâ é wà pé mâ é byu pé gi, nang lé, “Zè lú yû râ matú nàng lé lo é nghut lhê lhú? Nàng gi, ngùn, hîng, shigu gaunyhaú eq zè pé, sùtzè pé ajung jung lú yû râ matú, náng é byù ajùm ayò lé shuî tsîng tô lhê lhú?” ga taí kôrâ nghut lhê.’ nghû taí aq.
14 Haû mù, byù zo ê, myìqhtoi htoi luî, Goga lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; Ngá é Isira-elaq byu pé nyì ngón yùqyo nyi é buìnyì má, nàng gi, haú hkyô lé sé râ a nghut lhí? 15 Nàng gi, mau we mautsûng hkyam mâ é náng é jowò mai, nàng eq rahá, byù myû myo myo nghut é, bànshoq bang myang ji jî é ajùm ayò, wúm htan é gyè hpúng mó lé, shuî lé lô râ nghut lhê. 16 Nàng gi, mîngdán lé mhut èq nghop pyâm é su, Ngá é Isira-elaq byu pé lé htim râ nghut lhê. Haû mù, Goga ê, gótû byù myû wui é hí má, náng chyáng dùt htoq é hkyo pê é yánmai Ngò chyoiyúng é hkyô lé wó tûn shit é hkûn, yhángmòq, Ngo lé wó sé kôrâ matú, Ngò, nang lé, Ngá é mîngdán lé shuî htuqhtîng é buìnyì jé râ nghut lhê.
17 Haû Ahko Ahkáng lhúnglháng wó Sû Yhûmsîng Garai shî su ga taî ri; laî ló bê buìnyì pé má, Ngò, Ngá é duìnhâng zoshâng Isira-elaq myìqhtoî pé dông taî é sû gi, nàng nghut lhê. Haú hkûn, yhángmòq gi, nang lé, Ngò, yhángmòq chyáng htim nhâng râ nghut lhê ga zànwut myo myo myìqhtoi htoî akô nghut ri. 18 Nghut kôlhang, Isira-elaq mîngdán lé Goga ê htîm é buìnyì má, Ngá é nhikmó-yo hkyô toq htoq lô râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri. 19 Gè gè yhang, haú buìnyì lé, Isira-elaq mau má layàng mó nún râ nghut lhê nghû, Ngò, myi su nyé luî nhikmó-yô é mai taî pyo é nghut lhê. 20 Wuìshuq lung-aû mâ é ngozo, maulat nghoqzô pé, yòso mâ é tân jung yòsô zè pé, myigùng htoq má dô yê é jung hkangmó eq myìdàm htoq mâ é byù lhúnglhâng bang gi, Ngá é hí má gyùq nán byùq bùm kôrâ nghut lhê. Bùm pé gi, byòq byùq mù, langpyoq pé gi, gyùt gyó byùq luî, wàhkûm hkangmó gi, myigùng htoq má lêng gyòp bùm râ nghut lhê. 21 Ngò gi, Ngá é bùm pé bànshoq má Goga lé htim râ matú shâm lé ji to râ nghut mù, yùq hkangmó é shâm gi, yhang gu yhang mang lé htim râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri. 22 Ngò gi, wúm gyó é eq suí shun pyâm é hkyo èq yhang lé târâ jéyáng râ nghut lhê; Ngò gi, yhâng é ahtoq má le, yhâng é gyè hpúng pê é ahtoq má le, yhang eq rahá nghut nyi é byù myû myo myô é ahtoq má le, mau mó, lìkwò mó eq hang myi pé wo úm nhâng râ nghut lhê. 23 Haû mù, Ngò gi, Ngá é kô làm hkyô eq Ngá é chyoiyúng hkyô lé tûn shit râ nghut mù, byù myû myo myô é hí má yhûmsing gùng lé sé nhâng râ nghut lhê. Haú hkûn, Ngò gi, haû Yhûmsîng Garai nghut é lé, yhángmòq wó sé kôrâ nghut lhê.’ nghû taí aq.” gâ ri.