Garai Gasâng É Târâ Jéyáng Shâm Babelon
21
Haû Yhûmsîng Garaî é mungdang ngá chyáng jé é gi, 2 “Byù zo ê, Yerusalem wà mó shut náng é myòqdong hû mù, sân-yúng jowò lé htuqhtîng é mungdang hko taí aq. Isira-elaq é mau lé htuqhtîng é myìqhtoi dang lé, 3 ‘Haû Yhûmsîng Garai shî su ga taî ri; wú aq; Ngò gi, nang lé htuqhtíng râ nghut mù, shámbyâng mai Ngá é shâm lé she htoq luî, díngmán bang eq agè ashop bang lé náng chyáng mai sat pyám râ nghut lhê. 4 Ngò gi, díngmán bang eq agè ashop bang lé sat pyám râ nghut é yánmai, Ngá é shâm lé she htoq yû mù, maupyî mai mautsûng jé shoq mâ é yùq hkangmó lé htim râ nghut lhê. 5 Haú hkûn, Ngò, Yhûmsîng Garai gi, shámbyâng mai Ngá shâm she htoq Sû nghut é lé, byù bànshoq bang sé kôrâ nghut lhê; shâm haú lé shámbyâng má dum taû xâng pyám râ a nghut.’ nghû taí aq.6 Haû mù, byù zo ê, myìt yón soq mó shê àq! Yhángmòq é hí má myìt htûm byùq é eq yón kuq é èq myìt yón soq mó shê àq. 7 Haú hkûn, yhángmòq mai nang lé, ‘Haî mù myìt yón soq mó she lhê lhú?’ ga myi kôjáng, nàng gi, ‘Danglù jé é yánmai nghut lhê. Byu é i-myìt nhiklhum hkangmó gi, gyùq luî ròp ròp gâ byùq mù, lòq hkangmó gi, nyhuî lhâng byùq râ nghut lhê; sô hkangmó gi, gyùq ngha byùq mù, hkyî hkangmó gi, ishî pup byùq é hui râ nghut lhê.’ nghû tû taí râ nghut lhê. Haû gi, jé lo nyì bê nghut ri; hkyak yhang dùt htoq râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.” gâ ri.
8 Haû Yhûmsîng Garaî é mungdang ngá chyáng jé é gi, 9 “Byù zo ê, myìqhtoi dang lé, ‘Haû Yhûmsîng Garai shî su ga taî ri;
shâm ô, shâm ô,
suî htoq to mù, wìk wìk dùq to bê nghut ri;
10 zân sat râ matú suî htoq to bê nghut mù,
lhap hpyat é su wìk wìk dùq nhang to bê nghut ri nhung!
Ngá é hkóhkâm zô é ùp é dumbáng má wó gabú râ lhú? Shâm haû gi, haû sû é sik yang lé wú tiq pyâm é nghut ri.
11 Shâm gi, suî htoq mù wìk wìk dùt râ matú àp tô é hui bê nghut mù,
chûng râ matú lòq èq wó myhik zîng râ matú àp tô hui bê nghut ri.
Haû gi, suî htoq to mù, wìk wìk dùt to bê nghut luî,
byù sat sû chûng râ matú rì rì dùt to bê nghut ri.
12 Byù zo ê, wùt garû ngaù mù yón gyi ngaù aq;
hkâsu mù gâ le, Ngá é byu pé lé shâm hau èq htim berâ nghut lhê;
Isira-elaq zau zo bànshoq bang lé shâm hau èq htim berâ nghut lhê;
yhángmòq gi, Ngá é byu pé eq rahá shâm ô má àp pyâm é hui râ nghut lhê.
Haû mù, náng é wànggàng kyaq bàt àq hkoi.
13 Chyam lìk é hkyô hkyak jé râ nghut lhê. Ùp é dumbáng lé shâm hau èq wú tiq pyâm é nghut jáng, hkâsu dùt râ lhú? Ùp é dumbáng haû wó lùt râ a nghut; haû gi, Ahko Ahkáng lhúnglháng wó Sû Yhûmsîng Garai taî pyo ri.’ nghû taí aq.
14 Haû mù, byù zo ê,
lòqpyuq bàt mù, myìqhtoi htoi aq.
Shâm haú lé í dá sum dá jé nhâng àq.
Haû gi, byù sat râ shâm nghut lhê;
lhînghkyùq mai byù lé lhôm râ nghut é,
byù myo myo sat râ shâm nghut lhê.
15 Haû mù, byu é i-myìt nhiklhum pé gi, gyùq luî ròp ròp za gâ byùq mù,
byù myo myo shi lèq byùq râ nghut lhê;
Ngò gi, yhángmòq é hkum bànshoq má,
byù sat râ matú shâm haú lé tô to bê nghut lhê.
Wú keq; haû gi, lhap su hpyat shoq suî htoq to bê nghut mù,
byù sat râ matú rì rì dùt to bê nghut ri.
16 Shâm nàng ê, náng é shámsó hká shut hu le hká shut,
lòqyò shut zân e ló mù,
lòqpai shut dum zân e ló aq.
17 Ngò le, Ngá é lòqpyuq bàt mù,
Ngò nhikmó-yô é lé lhoqzîm pyám râ nghut lhê.
Haú hkyô lé Ngò Yhûmsîng Garai taî é nghut lhê.” gâ ri.
18 Haû Yhûmsîng Garaî é mungdang ngá chyáng jé é gi, 19 “Byù zo ê, Babelon hkóhkam é shâm lé lô râ hkyô í hkat lé masàt lhô tông to byi aq; haû í hkat gi, ra-mau mai za tông htoq lô râ dùt lhê. Wà hkaû shut wang ló é hkyô kang má hkyô shit pyang xuq to byi aq. 20 Hkyô rahkat lé gi, Ammon byu pê é Raba wà chyûng lé lé htim râ sham é matú tông to byi mù, rahkat lé gi, Yudaq mau eq gingtîng é Yerusalem wà mó lé lé htim râ matú tông to byi aq. 21 Hkâsu mù gâ le, Babelon hkóhkâm gi, hkyô tsûm má yàp mù, hkyô kang má bùt hpyit râ nghut lhê; yhang gi, myoshî èq hkyîn shosé shê mù, yhâng é hparà hpôlhô pé lé myî wú luî, singpaí pé lé jó wú râ nghut lhê. 22 Yhâng é lòqyo hkyam mâ é hkyîn shosé gi, Yerusalem wà mó má ang luî, yhang gi, wàhkûm htûng hput râ sik lhêngdum saî to mù, byù sat râ hkunmó hkyó luî, majan htê mó lhoq myhâng mù, wahkum pé lé htûng hput râ sik lhêngdum saî to luî, zùmhtâng mó saî tap lhîng to mù, gingtíng jowò saî toq myhang to râ nghut lhê. 23 Haû jujúm râ matú dâkam to bê bang gi, bùt haû akôm nghut é su ngam pyám kôrâ nghut lhê; nghut kôlhang, yhang gi, yhángmòq é shut mara lé lhoqpun byi mù, yhángmòq lé shúm byû dông chyup yû râ nghut lhê.
24 Haû mù, haû Ahko Ahkáng lhúnglháng wó Sû Yhûmsîng Garai shî su ga taî ri; ‘Núngmòq mara bo é hkyô lé, núngmòq de de gumlau toq é èq núngmòq lé lhoqpun byi luî, núngmòq kut é bànshoq má núngmòq é shut mara lé lhoqhtoq shit byi bê nghut mù, núngmòq gi, haú hkyô kut bekô nghut é yánmai, shúm byû dông chyup yu é hui kôrâ nghut lhê.
25 Nàng, htûngli dông a sansêng é eq agè ashop é Isira-elaq zau ê, mara dam byî é ahkyíng ayòq jé bê nghut mù, náng é ahkyíng le jé bê nghut ri; 26 haû Ahko Ahkáng lhúnglháng wó Sû Yhûmsîng Garai shî su ga taî ri; náng é uhtup lé yu pyám mù, jánmaú lé hkyut pyám aq. Haû gi, hí lhê su dum dùt râ a nghut lo; lhoqnyhûm hui sû gi, wàq toq é hui râ nghut mù, wàq toq hui sû gi, lhoqnyhum pyâm é hui râ nghut lhê. 27 Htên byòq bê! Htên byòq bê! Ngò gi, haú lé htên byòq nhâng râ nghut lhê! Jánmaú haû gi, wó gíng é sû jé lé é hkûn jé shoq, dum wó taû yù râ a nghut; Ngò shèq yhang lé haû byi râ nghut lhê.’ gâ ri.
28 Byù zo ê, nàng gi, myìqhtoi dang lé, ‘Haû Ahko Ahkáng lhúnglháng wó Sû Yhûmsîng Garai gi, Ammon byu pé eq yhángmòq rhoî jihkyoî kut é hkyô eq séng luî shî su ga taî ri;
shâm rahkyam, shâm rahkyam gi,
byù sat râ matú she htoq bê nghut ri;
haû gi, lhoqhtûm pyám râ matú le,
lhap su lam lam hpyat râ matú le, suî htoq to bê nghut ri nhung!
29 Núngmòq eq séng luî shing-rán a-pyoq myàng byi mù,
núngmòq é matú mhaû é bùt hpyit byi kôlhang,
shâm haû gi, mara dàm byi râ hkyíng yàm-yòq jé mù,
ahkyíng jé luî, sat pyâm é hui râ nghut é,
agè ashop su é lìngzing má kê to râ nghut lhê.
30 Shâm haû gi, yhâng é shámbyâng má taû xáng sháng gàq.
Ngò gi, nang lé hpan é mau,
náng é îchyí îwâ pé nyi é mau má,
nang lé târâ jéyáng râ nghut lhê.
31 Ngò gi, náng é ahtoq má Ngá é nhikmó-yo hkyô hut hkyô kat mù,
nang lé Ngò nhikjum mó yô é soq mùt gyûn kat râ nghut lhê.
Ngò gi, nang lé, lhoqhten lhoqhpyoq hkyô kûng é,
shogyo myìt a bo é byù jûm pê é lòq má àp pyám râ nghut lhê.
32 Nàng gi, myi má nyhê é htang dùt râ nghut lhê;
náng é sui gi, náng é maumyî má shun pyám râ nghut lhê;
nang lé myìtbun râ a nghut lo;
hkâsu mù gâ le, Ngò, Yhûmsîng Garai taî é nghut lhê.’ nghû taí aq.” gâ ri.