Gumlau Toq É Isira-elaq Byu Pé Lé Huî Sêng Pyâm É Hkyô
20
Nyhit zan zàn, lha-mó ngo hkyap, raxê nyí nyí má, Isira-elaq byu pê é sûwún wuî ra-am gi, Yhûmsîng Garai lé myî wú râ matú, lé jé kômù, ngá é hí má zung tô bum akô nghut ri.2 Haú hkûn, haû Yhûmsîng Garaî é mungdang ngá chyáng jé é gi, 3 “Byù zo ê, Isira-elaq byu pê é sûwún wuî lé dang nyô mù, yhángmòq lé, ‘Haû Ahko Ahkáng lhúnglháng wó Sû Yhûmsîng Garai shî su ga taî pyo ri; núngmòq gi, Ngo lé myi kôrâ matú lé jé akô lhú? Ngò rû dui nyi é eq rajung za, Ngò gi, núngmòq lé, Ngá chyáng mai myî yù nhâng râ a nghut; haû gi, Ahko Ahkáng lhúnglháng wó Sû Yhûmsîng Garai taî pyo ri.’ nghû taí aq.
4 Byù zo ê, nàng gi, yhángmòq lé târâ jéyáng râ lhú? Nàng gi, yhángmòq lé târâ jéyáng râ lhú? Haû jáng, yhángmòq é îchyí îwâ pê é achaq achyut hkyô pé lé lhoqhtoq shit mù, 5 yhángmòq lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; haú buìnyì má, Ngò gi, Isira-elaq a-myû lé hkyin yù mù, Yakup é awùt ashîn pé lé Ngá lòq tû luî, dakâm mù, Egutuq ming má yhángmòq lé Ngá gûng htoq shit bê nghut lhê. Ngò gi, Ngá lòq tû mù, yhángmòq lé, “Ngò gi, núngmòq é Garai Gasang nghut é, haû Yhûmsîng Garai nghut lhê.” nghû dakâm bê nghut lhê. 6 Ngò gi, yhángmòq lé Egutuq ming mai shuî htoq lô mù, mîngdán bànshoq htoq má je gè luî, yhángmòq é matú hkyin htoq to byî é, no-naú eq byo-î yui é mau má shuî jé wang ló râ nghut lhê nghû, haú buìnyì má dâkam tô é nghut lhê. 7 Ngò gi, yhángmòq lé, “Núngmòq yùq hkangmó gi, núngmòq é myòq má dàp to bê nghut é achaq achyut é alhô pé lé tô pyám mù, yhûmsing é gùng lé, Egutuq ming mâ é hparà hpôlhô pê èq agòt a-û hkâkut yû kó. Ngò gi, núngmòq é Garai Gasang nghut é, haû Yhûmsîng Garai nghut lhê.” nghû taî é nghut lhê.
8 Nghut kôlhang, yhángmòq gi, Ngo lé gumlau toq kômù, Ngá é dang lé a gyo kó nghut ri; yhángmòq gi, yhángmòq é myòq má dàp to bê nghut é achaq achyut é alhô pé lé a tô pyám kut kô é htoq agó, Egutuq ming mâ é hparà hpôlhô pé lé le a lhuî pyám kó nghut ri. Haû mù, Ngò gi, yhángmòq é ahtoq má Ngá é nhikmó-yo hkyô hut hkyô kat mù, Egutuq ming má yhángmòq lé Ngò nhikjum yo râ nghut lhê nghû taî é nghut lhê. 9 Nghut kôlhang, Ngò gi, yhángmòq lé Egutuq ming mai shuî htoq lo é dông Ngá é gùng htoq shit é lé myang é bang nghut é, yhángmòq jé nyi tô é gótû byù myû wui é myòq hí má lhoqhpoî pyâm é, Ngò a hui sháng gàq nghû, Ngá mying é yánmai haú hkyô lé kut é nghut lhê. 10 Haû mù, Ngò gi, yhángmòq lé Egutuq ming mai shuî htoq lô luî, yòso má shuî wang lo é nghut lhê. 11 Haú má, Ngò gi, yhángmòq lé, Ngá é târâ wàng hkunmó pé lé byi mù, Ngá é târâ pé lé sé nhang é nghut lhê; haú lé cháng sû chyungxe wó duî râ matú nghut lhê. 12 Hau htoq agó, Ngò, haû Yhûmsîng Garai gi, yhángmòq lé lhoqchyoi lhoqyúng byi sû nghut é lé, yhángmòq wó sé sháng gàq nghû, Ngò eq yhángmòq é gyoro mâ é alhô agàn dùt râ matú, Ngá é Bánno Buìnyì pé lé le, Ngò, yhángmòq lé byî to bê nghut lhê.
13 Nghut kôlhang, Isira-elaq byu pé gi, yòso má Ngo lé gumlau toq akô. Yhángmòq gi, Ngá é târâ wàng hkunmó pé lé a cháng kô é za, Ngá é târâ pé lé he-ngìk pyâm akô; haú pé gi, châng é sû chyungxe duì râ hkyô nghut lhê. Yhángmòq gi, Ngá é Bánno Buìnyì pé lé agòt a-û yhang kut pyám bekô nghut ri. Haû mù, Ngò gi, yhángmòq lé yòso má lhoqhtûm pyám râ matú, yhángmòq é ahtoq má Ngá é nhikmó-yo hkyô hut hkyô kat râ nghû taî é nghut lhê. 14 Nghut kôlhang, yhángmòq lé Ngò shuî htoq lo é lé myang é gótû a-myû wui é myòq hí má, Ngá é myìng taî hpoî pyâm é a hui shoq, hau é matú jân nyi é nghut lhê. 15 Hau htoq agó, mîngdán bànshoq htoq má je gè luî, Ngò, yhángmòq lé byî tô é, no-naú eq byo-î yui é mau má, yhángmòq lé shuî jé râ a nghut nghû, yòso má Ngá é lòq tû mù yhángmòq lé dâkam é nghut lhê. 16 Hkâsu mù gâ le, yhángmòq gi, Ngá é târâ pé lé he-ngìk pyám mù, Ngá é târâ wàng hkunmó pé lé a cháng kut kô é eq Ngá é Bánno Buìnyì pé lé agòt a-û kut pyâm akô nghut ri. Yhángmòq é i-myìt nhiklhum pé gi, yhángmòq é hparà hpôlhô pé má tuî zing to bekô nghut ri. 17 Nghut kôlhang, Ngò gi, yhángmòq lé shogyo myìt mai wú luî, yhángmòq lé, yòso má a lhoqhtên pyám, a lhoqhtûm pyâm é nghut lhê. 18 Ngò gi, yòso má, yhángmòq é zoshâng wuì lé, “Núngmòq é îchyí îwâ pê é sângdang pé eq htûngli pé lé hkâcháng kó; yhángmòq é hparà hpôlhô pê èq núngmòq gùng lé agòt a-û hkâkut yû kó. 19 Ngò gi, núngmòq é Garai Gasang nghut é, haû Yhûmsîng Garai nghut lhê. Ngá é târâ wàng hkunmó pé lé cháng mù, Ngá é târâ pé lé rago châng kut keq. 20 Ngá é Bánno Buìnyì pé lé lhoq chyoiyúng keq; haû gi, Ngò eq núngmòq é gyoro má alhô agàn dùt râ nghut lhê. Haú hkûn, Ngò gi, núngmòq é Garai Gasang, haû Yhûmsîng Garai nghut é lé, núngmòq sé kôrâ nghut lhê.” nghû taî é nghut lhê.
21 Nghut kôlhang, zoshâng haú bang gi, Ngo lé gumlau toq akô; “Haú pé lé châng kut sû gi, haú dông mai chyungxe duì râ nghut lhê.” nghû Ngò taî é, Ngá é târâ wàng hkunmó pé lé yhángmòq a cháng kô é htoq agó, Ngá é târâ pé lé le rago a châng kut kó nghut ri; yhángmòq gi, Ngá é Bánno Buìnyì pé lé le agòt a-û kut pyâm akô. Haû mù, Ngò gi, yòso má, yhángmòq chyáng Ngá é nhikmó-yo hkyô hut hkyô kat mù, yhángmòq lé Ngò nhikjum yo râ nghut lhê nghû taî é nghut lhê. 22 Nghut kôlhang, Ngò gi, yhángmòq lé Ngò shuî htoq lo é lé myang é gótû a-myû wui é myòq hí má, Ngá é myìng taî hpoî pyâm é a hui shoq, hau é matú Ngò jân pyám luî, Ngá é lòq wùp yu pyâm é nghut lhê. 23 Hau htoq agó, yhángmòq lé gótû byù myû wui chyáng hkat pyo kat mù, yhángmòq lé mîngdán pé má lhoqpyo hâng kat râ nghû, yòso má, Ngá lòq tû luî yhángmòq lé dâkam é nghut lhê. 24 Hkâsu mù gâ le, yhángmòq gi, Ngá é târâ pé lé a châng kut kô é za, Ngá é târâ wàng hkunmó pé lé he-ngìk pyám kôluî, Ngá é Bánno Buìnyì pé lé agòt a-û kut pyám kômù, yhángmòq é myòqjí gi, yhángmòq é îchyí îwâ pê é hparà hpôlhô pé lé wú tsuq nyi akô nghut ri. 25 Haû mù, Ngò gi, yhángmòq lé, a ge é cháng ra târâ eq chyungxe a wó duî nhang é târâ pé lé byi bê nghut lhê. 26 Ngò gi, haû Yhûmsîng Garai nghut é lé, yhángmòq wó sé sháng gàq nghû, yhángmòq lé gyùq chiq myìt mó wó kat pyíng byi râ matú, zo-mún lé myi nyhé hkungga nhông byî é, yhángmòq é chyûnghuq pé dông, yhángmòq lé agòt a-û kut pyâm é nghut lhê.’ nghû taí aq.
27 Haû mù, byù zo ê, Isira-elaq byu pé lé dang nyô mù, yhángmòq lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; núngmòq é îchyí îwâ pé gi, Ngo lé a jujúm kó kut é dông, shí hkyô má Ngo lé rhoi akô nghut ri. 28 Yhángmòq lé byi râ nghû Ngò dâkam tô é mau má yhángmòq lé shuî jé wang é hkûn, yhángmòq gi, yhángmòq myang é bùm hkangmó eq sikgâm wúm é bùm hkangmó má, yhángmòq é shigu hkungga pé nhông byi mù, Ngo lé nhikjum lhoqyô é hkungga pé àp nhông luî, yhángmòq é namngón shôm nyhê nhông byi mù, yhángmòq é shuq jung hkungga lé hut nhông byî akô nghut ri. 29 Haú hkûn, núngmòq e é myhang é jowò shî gi, haî nghut lhê lhú nghû, Ngò, yhángmòq lé taî é nghut lhê.’ nghû taí aq. (Hkû-nyí jé shoq, haú lé Bamaa gâ nyi ri.)
Mara Dam Byî É Eq Mara Hkyut Byî É Hkyô
30 Haû mù, Isira-elaq byu pé lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; núngmòq gi, núngmòq é îchyí îwâ pê é shú yû luî, yhûmsing gùng lé agòt a-û kut yû mù, yhángmòq é agè ashop é alhô pé lé châng myìt tuî nyì kôrâ lhú? 31 Isira-elaq byu pé ê, núngmòq gi, núngmòq é zoshâng wuì lé myi má shigu hkungga kut byî é, núngmòq é chyûnghuq pé lé àp nhông byî é nghut jang, hkû-nyí jé shoq, núngmòq hparà hpôlhô bànshoq èq yhûmsing gùng lé agòt a-û kut yu nyì bekô nghut ri. Ngò gi, Ngo lé núngmòq èq myî é hkam yù râ lhú? Ngò gi, Ngò rû dui nyi é eq rajung za, Ngo lé núngmòq èq myî é hkam yù râ a nghut; haû gi, Ahko Ahkáng lhúnglháng wó Sû Yhûmsîng Garai taî pyo ri.
32 “Ngá-mòq gi, sik eq lùqgòk lé dójaú é, gótû byù myû wuì su le, mingkan byu pé su le dùt nau ri.” ga núngmòq taî akô. Nghut kôlhang, núngmòq é myìt má lúng é hkyô gi, hkâ-nhám le dùt htoq râ a nghut. 33 Haû Ahko Ahkáng lhúnglháng wó Sû Yhûmsîng Garai shî su ga taî pyo ri; Ngò gi, Ngò rû dui nyi é eq rajung za, wum-o bo é lòq èq le, lhâm tô é lòqbú èq le, nhikmó-yo hkyô lé hut hkyô kat é èq le, núngmòq lé ùp râ nghut lhê. 34 Ngò gi, wum-o bo é lòq èq le, lhâm tô é lòqbú èq le, nhikmó-yo hkyô lé hut hkyô kat é èq le, núngmòq lé, byù myû wui chyáng mai shuî htoq yû mù, núngmòq byo myín nyi tô é mîngdán pé mai shuî tsîng yù râ nghut lhê. 35 Ngò gi, núngmòq lé, gótû byù myû wui é yòso má shuî wàng mù, haú má myòqdong hkyúm kut târâ jéyáng râ nghut lhê. 36 Ngò gi, Egutuq ming mâ é yòso má núngmòq é îchyí îwâ pé lé jéyáng myìt hpyit é su, núngmòq lé jéyáng myìt hpyit byi râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri. 37 Ngò gi, núngmòq lé Ngá é dumbáng ô mai lai nhâng râ nghut mù, dangshikaq èq núngmòq lé tuî zing to râ nghut lhê. 38 Ngò gi, núngmòq chyáng mai, Ngo lé gumlaû é eq târâ lu laî é bang lé shang pyám byi râ nghut lhê. Ngò gi, yhángmòq lé, yhángmòq nyi tô é mau mai shuî htoq lô kôlhang, yhángmòq gi, Isira-elaq ming má wó wâng kôrâ a nghut. Haú hkûn, Ngò gi, haû Yhûmsîng Garai nghut é lé, núngmòq sé kôrâ nghut lhê.
39 Isira-elaq byu pé ê, núngmòq eq séng luî, haû Ahko Ahkáng lhúnglháng wó Sû Yhûmsîng Garai shî su ga taî ri; núngmòq yùq hkangmó gi, ê mù, yhûmsing é hparà hpôlhô pé lé ê dójaú keq! Nghut kôlhang, htâng má, núngmòq gi, hkyak Ngá é dang gyo kôrâ nghut mù, núngmòq é chyûnghuq pé eq hparà hpôlhô pê èq, Ngá é myìng lé agòt a-û kut pyám lo kôrâ a nghut. 40 Hkâsu mù gâ le, haû Ahko Ahkáng lhúnglháng wó Sû Yhûmsîng Garai shî su ga taî pyo ri; Isira-elaq é myhang é bùm nghut é, Ngá é chyoiyúng bùm má, Isira-elaq byù bànshoq bang Ngo lé dójaú kôrâ nghut mù, Ngò gi, yhángmòq lé haú má hàp yù râ nghut lhê. Haú má, Ngò gi, núngmòq é hkungga pé, núngmòq é je réng é chyûnghuq pé eq núngmòq é chyoiyúng zè bànshoq lé dung râ nghut lhê. 41 Ngò gi, núngmòq lé, byù myû wui chyáng mai shuî htoq yû mù, núngmòq byo myín nyi tô é mîngdán pé mai shuî tsîng yu é hkûn, namngón shôm dông hàp yù râ nghut lhê; haú hkûn, Ngò gi, núngmòq dông mai gótû byù myû wui é hí má Ngá é chyoiyúng hkyô lé tûn shit râ nghut lhê. 42 Núngmòq é îchyí îwâ pé lé byi râ nghû Ngò lòq tû mù dâkam tô é Isira-elaq ming má, núngmòq lé Ngò shuî jé wang é hkûn, Ngò gi, haû Yhûmsîng Garai nghut é lé, núngmòq sé kôrâ nghut lhê. 43 Núngmòq gi, yhûmsing gùng lé agòt a-û kut pyâm é hkyîzó lòqzó bànshoq lé haú má myìtbun kôrâ nghut mù, yhûmsîng kut shut é agè ashop hkyô bànshoq é yánmai, yhûmsing gùng lé chaq pyám kôrâ nghut lhê. 44 Isira-elaq byu pé ê, núngmòq é agè ashop hkyô pé eq núngmòq é htên byùq é hkyîzó lòqzó má cháng mù a nghut é za, Ngá é myìng yánmai, Ngò, núngmòq lé jéyáng é hkûn, Ngò gi, haû Yhûmsîng Garai nghut é lé, núngmòq sé kôrâ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.’ nghû taí aq.” gâ ri.
Maupyî Hkyam Lé Htuqhtîng É Myìqhtoi Dang
45 Haû Yhûmsîng Garaî é mungdang ngá chyáng jé é gi, 46 “Byù zo ê, náng é myòqdong lé maupyî hkyam shut hû aq; maupyî hkyam lé htuqhtîng é dang taí mù, maupyî hkyam mau mâ é yòso mó lé htuqhtîng é myìqhtoi dang taí aq. 47 Maupyî hkyam mâ é yòso mó lé, ‘Haû Yhûmsîng Garaî é mungdang lé gyo aq. Haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, náng chyáng myi tap berâ nghut mù, jûm é man é sikgâm bànshoq nyé gyó byùq râ nghut lhê. Myishâm gi, jôm byùq râ a nghut mù, maupyî mai mautsûng jé shoq mâ é yùq hkangmó é myòqdong gi, hkyíng hkyíng nyé byùq râ nghut lhê. 48 Yùq hkangmó gi, myi haú lé, Ngò, Yhûmsîng Garaî èq tuq kat é nghut é hkyô lé myàng kôrâ nghut lhê; myi haû gi, lhoq jôm pyâm é hui râ a nghut.’ nghû taí aq.” gâ ri.
49 Haú hkûn, ngò gi, “Ahko Ahkáng lhúnglháng wó Sû Yhûmsîng Garai ê, yhángmòq gi, ngo lé, ‘Yhang gi, dangtú pé za taî nyi lhê, a nghut lhí?’ ga taî nyi akô nghut ri.” nghû taî é nghut lhê.