29
Adàm dàm mhoqshit wú kôlhang,myìt rû htan nyì sû gi,
a wó dum lhoqge yù loshoq,
byò dàn tung lhoqhtên pyâm é hui râ nghut lhê.
2 Haû díngmán bang ùp jáng,
byu pé gabú byam chyû bum akô;
agè ashop sû ùp jáng gi,
mingbyû wuì yón kuq bum akô nghut ri.
3 Hpàqchyî byéng-yá lé chyitdàp sû gi,
yhâng wa lé gabú nhang ri;
nghut kôlhang, shiwa myhî pé eq zùm yàp sû gi,
yhâng é sùtzè lé lhoqpân pyám râ nghut lhê.
4 Hkóhkâm rayùq gi, târâ ràp-rá é hkyô dông mai,
mîngdán lé wó gingtíng nhang ri;
nghut kôlhang, lòqhkaû lang zê lé myòqnòq sû gi,
mîngdán haú lé lhoqhpyoq hpyi pyâm ri.
5 Yhâng é yhûmkyochang lé
hkya-on dang taî mhaû é sû gi,
yhûmsîng e ló é hkyô má gùn hkâng to é sû nghut ri.
6 Agè ashop sû gi, yhûmsing é yubàk mara èq,
myhî yu é hui sû nghut ri;
nghut kôlhang, díngmán sû gi,
mahkôn wó hkon é eq myang gabú é sû nghut ri.
7 Haû díngmán sû gi, myùng bâng é matú,
târâ ràp-rá hkyô bo myìt byî ri;
nghut kôlhang, haû agè ashop sû gi,
haû su bo myìt chiq byî é hkyô a bò nghut ri.
8 Ahpau ayum é bang gi,
wà lé myi lhoqtuq sê ri;
nghut kôlhang, hpàqchyî bò bang gi,
nhikjum yô é lé wó lhoqzîm pyâm ri.
9 Hpàqchyî bò sû rayùq,
nghâ sû eq târâ rûng má mû ê taî é nghut jáng,
nghâ sû gi, nhikjum yo mù,
rhoî wuì wuì luî,
nguì ngón hkyô a wó kó nghut ri.
10 Byu sui lhoqhtoq nau é bang gi,
jô é têng é hkyô cháng sû lé a nguì kut mù,
i‑myìt díng bâng é chyungxe lé gyám akô nghut ri.
11 Nghâ sû gi, yhang nhikjum yô é hkyô
bànshoq lhoqhtoq shit ri;
nghut kôlhang, hpàqchyî bò sû gi,
haú lé wó zaú pyâm ri.
12 Zau rayùq, mhaû é dang lé gyô é nghut jáng,
yhâng é a‑ô mâ é zau wuî bànshoq,
agè ashop é bang dùt byùq râ nghut lhê.
13 Myùng sû eq zìk zo sû lé myòq myàng nhang é gi,
haû Yhûmsîng Garai za nghut ri;
haú hkyô má ó le rajung za nghut akô.
14 Hkóhkâm rayùq gi,
myùng bang lé tengmán é dông
târâ jéyáng é nghut jáng,
yhâng é hkóhkâm tángmyhâng gi,
rû gingtîng nyì râ nghut lhê.
15 Tân mhoqshit é dumbáng gi,
hpàqchyî byéng-yá kat byî é nghut ri;
nghut kôlhang, yhûmsing myìt za châng é zoshâng gi,
yhâng nu lé hoq hpu nhang ri.
16 Haû agè ashop é bang myô lò jáng,
yubàk mara le myô lo ri;
nghut kôlhang, díngmán bang gi,
haú bang gyòp gyó byùq é lé myàng kôrâ nghut lhê.
17 Nungzo lé mhoqshit àq;
haû jáng, yhang,
nang lé nguì ngón hkyô byi mù,
náng é i‑myìt lé,
gabú nhâng râ nghut lhê.
18 Shing-rán dang a jòq é jang má,
mingbyû wuì gi, kâm é dông dùt byùq akô nghut ri;
nghut kôlhang, târâ châng é sû gi, hkungsô wó nyi ri.
19 Dang dông mai za gi, duìnhâng zoshâng lé
a-kyang a wó htaí nhâng nghut ri;
yhang gi, sê gyô to kôlhang,
a gyo byi râ nghut lhê.
20 Dang taí han é byù lé myang wú lhê a nghut lhí?
Haú yùq lé myòqbyù râ htoq,
nghâ sû lé myòqbyu le je ge ri.
21 Duìnhâng zoshâng lé,
anú za mai yháng o é kut byi sû gi,
ló htáng má yón kuq é hui zo râ nghut lhê.
22 Nhikjum yô é sû gi,
mabyòq jishûm lhoqhtoq ri;
i‑myìt tot é sû gi,
târâ lu lai hkyô myo myo kut ri.
23 Nghutbûn é sû gi,
lhoqnyhum pyâm é hui râ nghut lhê;
nghut kôlhang, i‑myìt lhoqnyhum é sû gi,
xânghpoq nge wó râ nghut lhê.
24 Hkau sû eq mû húm sû gi,
yhûmsing chyungxe lé a ngui é sû nghut ri;
yhang gi, dakâm nhang é hui kôlhang,
sàksé a wám hkám nghut ri.
25 Byù lé gyùq é myìt gi,
lhaí htung tô é dông nghut ri;
nghut kôlhang, haû Yhûmsîng Garai lé lùmhkau nyi é gi,
nguì ngón yùqyò hkyô nghut ri.
26 Byù myo myo gi,
zaû é myòqdong ho bum akô;
nghut kôlhang, byù gi,
haû Yhûmsîng Garaî chyáng mai za,
târâ ràp-rá hkyô wó é nghut lhê.
27 Díngmán bang gi,
târâ a chûng bang lé chaq pyâm akô;
agè ashop é bang gi,
i‑myìt díng bang lé chaq pyâm akô nghut ri.