Sholumon É Gótû Sânghkyang Pé
25
A‑ô mâ é sânghkyang pé gi,Yudaq hkóhkâm Hezeki-a é byu pé htòt kâ tô é,
Sholumon é sânghkyang pé nghut lhê.
2 Mû rajung jung lé haq nghop pyâm é gi,
Garai Gasâng é hpungwup shingkang nghut ri;
mû rajung jung lé ho gôn htoq é gi,
hkóhkam pê é hpungwup shingkang nghut ri.
3 Mauhkûng gi, myhang é eq
myigùng gi, nìk é su,
hkóhkam pê é i‑myìt nhiklhum lé gi,
a wó gôn wú é nghut lhê.
4 Ngùn htung mâ é ngùn hkyi choq pyám jáng,
ngùn saí zo su é matú ge é ngùn hkoq zê
wó saî yù râ nghut lhê.
5 Hkóhkam chyáng mai,
agè ashop sû lé huî sêng pyám jáng,
yhâng é tángmyhâng lé gi,
díngmán hkyo èq xuq to râ nghut lhê.
6 Hkóhkam é hí má,
yhûmsing gùng lé hkâwaq toq;
byù mó pê é jowò má hkâ-ê yap.
7 Zaugun sûwún é hí má, yhang,
nang lé gùng-yuì hui nhâng râ htoq,
“Shî má dòq lò àq.” ga,
yhang, nang lé taî le gi,
je ge ri.
Náng é myòq èq myang é lé,
8 târâ rûng má hkâ-ê han taí;
hkâsu mù gâ le, náng é yhûmkyochang,
nang lé hoq lhoqhpu jáng,
nàng hkâsu kut râ lhú?
9 Náng é yhûmkyochang eq za,
náng é hkyô lé dangnyhin nyhîn lhum aq;
góyùq haq yhûm tô é hkyô lé,
hkâ lhoqhtoq shit.
10 Haû a nghut jáng, yhang gi,
wó gyo luî, nang lé hoq lhoqhpu râ nghut mù,
nàng gi, hkâ-nhám le
myìng gang wó nyî râ nghut lhê.
11 Yhâng é ahkyíng má htuk é dang taî é gi,
ngùn kyáng má kat tô é
hîng shup mhû-kòk shi eq du ri.
12 Hpàqchyî bò sû rayùq tân mhoqshit é gi,
gyô nyì su é nohkyap má,
hîng nobó su le,
gyíng é hîng zè su le nghut nyi ri.
13 Wó lum é lagyo hpó gi,
yhang lé nhang kat bâng é matú,
kyô shu nám lé gyo gyó luî
châm ngón é su ngón nhang ri;
yhang gi, yhâng é yhûmsing pê é i‑myìt lé, lhoqngón byî ri.
14 Chyûnghuq byi râ ga gyáng é danghtum htûm to luî,
a byî é sû gi, mau a wo é mhut eq le, laì eq le du ri.
15 Myìt hing é hkyô gi,
zaû é i‑myìt lé wó lâng lhing yu é nghut mù,
nú nhám dang taî é shô gi,
showui showang lé wó lhoqhkyop râ nghut lhê.
16 Nàng, byo-î lé myang ho é nghut jáng,
gyi shoq za zo aq;
lûm myô zo jáng,
nàng hpat râ nghut lhê.
17 Náng é yhûmkyochâng é yhûm má,
razùp má razùp hkâ-ê wang,
lûm myô ê jáng,
yhang, wú de lò mù,
nang lé a nguì kut râ nghut lhê.
18 Yhâng é yhûmkyochang lé
a têng é mara hûn sàksé hkám sû gi,
byù nhuq gán-yang su le,
shâm eq zèp zèp chûn é myoshi su le nghut nyi ri.
19 Wuîhke jamjau huî é hkûn
a ge lum é sû lé, lùmhkau é gi,
zuì htên byùq é eq le,
hkyî htên byùq é eq le du nyi ri.
20 Myìt wò laî to sû lé,
mahkôn pé hkon kyô é sû gi,
gyòq é nyí má bumó hkyut yu ló é sû eq le,
sódá htoq má chyînwing hut hpyûn é sû eq le du ri.
21 Nang lé a naù a wom sû zò-mut é nghut jáng,
yhang lé zoshuq byi tso aq;
wuìshit é nghut jáng,
yhang lé wuì byi huq aq.
22 Haû su nghut é nghut jáng,
nàng gi, yhâng é ulhum má,
dùq nyi é myigye ke byî é dùt râ nghut mù,
haû Yhûmsîng Garai gi, nang lé,
hkya-on chyûnghuq byi râ nghut lhê.
23 Mautsûng laì gi, maú lom é su,
a ge é hkyanglù shit é shô gi,
nhikjum yó nhang ri.
24 Mabyòq jishûm ho é yhûmsîng myhí eq
rayhûm má za chôm nyì râ htoq,
yhûmhkûng htúngchyûn má ló nyi le gi, je riyhang ge ri.
25 Mau we mai jé é gabú danglù gi,
mùt shit nyi é i‑myìt sô lé,
gú nghâm é ûchyam byi huq é su nghut nyi ri.
26 Díngmán sû rayùq,
haû agè ashop su hí má myìt lèqbàt shit é gi,
mui byùq é wuìbúm eq
bùp nam byùq é wuìhtung su dùt byùq ri.
27 Byo-î lûm myô zô le le, a gè;
yhûmsing é xânghpoq nge wó hkyô ho le le,
xânghpoq nge wó hkyô a wó nghut ri.
28 Yhûmsing é i‑myìt lé a wó hkang é sû gi,
wàhkûm byòq byùq é wà mó eq du ri.