24
Agè ashop é bang lé hkâ manôn;yhángmòq eq zùm yàp râ lé,
hkâ‑ô naù.
2 Hkâsu mù gâ le, yhángmòq gi,
ashop é dông htân htân kut râ da kômù,
yhángmòq é nhutwuî gi,
jamjau lhoqhtoq hkyô taî akô nghut ri.
3 Yhûm ralhum lé gi,
hpàqchyî byéng-yá èq saî tô é nghut mù,
sê gyô é u-nuq èq lhoqgîng tô é nghut lhê.
4 Yhûm wàp pé má gi,
hpàqchyî dông, gù bo é eq yúng é
sùtzè pé lhoqpyîng tô é nghut lhê.
5 Hpàqchyî byéng-yá bò sû gi,
a-tsam mó bo ri;
hpàqchyî bò sû gi,
wum-o wó jàt lo nyi ri.
6 Ge é dông hkyô shit é wó jáng shèq,
nàng majan hpóng aq;
hpàqchyî byî é byù myo myo nyì jáng shèq,
ûngmyuq hkyô wó râ nghut lhê.
7 Hpàqchyî byéng-yá gi,
nghâ su é matú gyaí myhang ri;
yhang gi, byù zîng é wà hkum má,
haî le a dàt taí nghut ri.
8 Agè ashop hkyô haq da sû gi,
hpuq lô lhik lô kut sû gâ é myìng
hu râ nghut lhê.
9 Nghâ sû myìt hen é hkyô gi,
mara nghut ri;
byù rhoî sû lé gi,
byu pê èq chaq pyâm ri.
10 Wuîhke jamjau huî é u lé
i‑myìt tiq jáng gi, náng é wum-o,
gyai yhang nyhôm ri.
11 Sat pyám râ matú she htoq ló hui sû lé, châng hkyi xe yù àq;
shî hkám râ matú gyùq wún sû lé,
châng hkyi yù àq.
12 Nàng gi, “Shí hkyô lé ngò haî a sé.”
ga taî é nghut jáng, náng é myìt lé
chîn wú nyi é sû gi, a sé byî é nghut lhê lhú?
Náng é chyungxe lé wú zúng byi sû gi,
a sê é nghut lhê lhú?
Yhang gi, yùq hkangmó lé,
yhûmsîng kut é eq rajung za,
a taû kut râ nghut lhê lhú?
13 Ngá zo ê, byo-î gi,
ge é nghut lhê mù, zo aq;
byo-ûm mâ é byo-î gi,
náng é matú gyai chuî nghâm é nghut lhê.
14 Haû eq rajung za, hpàqchyî byéng-yá gi,
náng é i‑myìt nhiklhum lé
chuî ngón nhang é lé sé aq;
nàng haú lé myang hô jáng gi,
náng é matú myòqbyù hkyô jòq râ nghut mù,
náng é myòqbyù hkyô haû gi,
htûm byùq râ a nghut.
15 Agè ashop sû su,
díngmán su é yhûm lé htim râ matú,
hkâhaq gyám nyî;
yhâng é nyì jowò lé hkâ lhoqhtên pyám.
16 Hkâsu mù gâ le, díngmán sû rayùq gi,
nyhit dâm lèqbàt kôlhang,
dum wó toq râ nghut lhê;
nghut kôlhang, haû agè ashop sû gi, ihkyùp hui zo mù,
htên byòq byùq râ nghut lhê.
17 Nang lé gyè kut sû lèqbàt jáng,
hkâ gabú; yhang htûng lèqbàt é hkûn,
náng é i‑myìt lé hkâhkye gabú nhâng.
18 Haû su kut jáng, haû Yhûmsîng Garai gi,
haú lé myàng mù, a wú gabú luî,
haú yùq lé nhikmó-yô é mai,
lhing pyám râ nghut lhê.
19 Ashop bâng é yánmai,
náng é myìt achyî a-ku hkâdùt;
haû agè ashop bang lé hkâ manôn.
20 Hkâsu mù gâ le, ashop bang gi,
myìt myòqbyu to jang a jòq;
haû agè ashop bâng é myibung gi
shi byùq râ nghut lhê.
21 Ngá zo ê, haû Yhûmsîng Garai eq
hkóhkâm lé gyùq hkúngga aq;
ahpuq alhik kut é bang eq hkâzûm yap;
22 hkâsu mù gâ le, yháng í yùq gi,
haú bâng chyáng byò dàn htik
htên byòq hkyô jé nhâng râ nghut lhê;
yháng í yùq mai,
hkâsû é wuîhke jamjau hpuzo hkyô
nhang kat râ lé, ó yùq wá wó sé râ lhú?
Gótû Hpàqchyî Byéng-yá Dang Pé
23 A‑ô mâ é pé le, hpàqchyî bò bâng é
myhîhpô dang pé nghut ashî.
Târâ jéyáng é hkûn myòqdong hkyin é gi, a gè nghut ri.
24 Mara bò sû rayùq lé,
“Nàng mara a bò nghut ri.” ga taî é sû lé,
byu pê èq nhing râ nghut luî,
a-myû wuì èq chaq pyám kôrâ nghut lhê.
25 Nghut kôlhang, haû mara bò sû lé
tân é bang gi, nguì ngón râ nghut mù, shimân jeju mó gi,
haú bâng chyáng jé râ nghut lhê.
26 Tengmán é dông tû taî é gi,
bo-puq puq lhûm é eq du ri.
27 Náng é shinggan mû bàn luî,
náng é yò mû jìn jáng shèq,
náng é yhûm saí aq.
28 Hai mara le a bo é náng é yhûmkyochang lé,
mara hûn sàksé hkâhkám;
náng é nhutwuî mai hkâ-mhaú.
29 “Ngò gi, yhang, ngo lé kut é eq rajung za,
yhang lé taû kut râ;
ngò gi, yhang kut é eq rajung za,
yhang lé lató hpuq râ.” nghû hkâtaí.
30 Ngò gi, lagon su é yò mai le,
u-nuq a bò su é tsibyiq hkyam mai le, laî ló wú é hkûn,
31 jowò hkangmó zu byap yùq tô é le,
myigùng byíng shoq hpepat hup tô é le,
lùqgòk xêwâm htên byòq byùq é le dùt tô ri.
32 Ngò gi, wú mù, myìt tû wú luî,
byu myang é hkyô mai
hpàqchyî wó mhoq yu é nghut lhê.
33 Razùp zo byam yhup to, razùp zo byam yhupmuî luî,
lòqpyik htik razùp zo byam lèq nô nyi é hkûn,
34 asho awui dùt é hkyô gi,
da-myàq su,
sùtzè lhoqhpyuq é hkyô gi,
gyè hpó su, jé râ nghut lhê.