Díngmán Sû Hkungsô Wó É Hkyô
112
Yhûmsîng Garai lé hkya-on keq.Yhûmsîng Garai lé gyùq hkúngga mù,
Yhâng é hkunmó lé,
gyai yhang myìt nguì ô nau é sû gi,
hkungsô wó nyi ri.
2 Yhâng é zodù wuì gi,
myìdàm htoq má wum mó bo lò râ nghut lhê;
myìt díng bâng é awùt ashîn pé gi,
shimân jeju wó kôrâ nghut lhê.
3 Yhâng é yhûm má,
sùtzè ngùnzè wó mù,
yhâng é díngmán hkyô gi,
ahtum abyùq gîng nyi é nghut ri.
4 Myìt díng su é matú gi,
mauchut hkaû má lháng,
maubó myàng râ nghut lhê;
yhang gi, jeju kut sê é,
shogyo nhikmyin myìt bo é eq,
díngmán é sû nghut ri.
5 Kâm gàm byî é eq,
kâm chyi kâm ngho byi mù,
târâ ràp-rá é dông kut é sû gi,
ge é hkyô chyat wó râ nghut lhê.
6 Gè gè yhang, haú yùq gi,
hkâ-nhám le lhoqdui nhûn é hui râ a nghut;
díngmán sû lé gi,
ahtum abyùq bûn nyì râ nghut lhê.
7 Yhang gi, a ge é lùdang lé,
gyùq râ a nghut;
yhâng é i‑myìt gi,
Yhûmsîng Garai lé lùmhkau é má,
ayang gingtîng nyì râ nghut lhê.
8 Yhâng gi, i‑myìt wúm bo nyi é nghut mù, gyùq râ a nghut;
ló htáng má, yhang gi,
yhâng é gye pé sûm byùq é lé,
myâng râ nghut lhê.
9 Yhang gi, myùng bang lé,
gàm tso gàm huq bê nghut ri;
yhâng é díngmán hkyô gi,
ahtum abyùq gîng nyi ri;
yhâng é hpungwup shingkang nghut é hkyuî gi,
myhâng shoq wàq toq é hui râ nghut lhê.
10 Agè ashop sû gi, haú lé myàng mù,
nhikjum wú yo luî,
zuì kyik kyik shoq dùt mù,
htûm ló byùq râ nghut lhê;
agè ashop sû myìt ô nau é hkyô gi,
akôm dùt byùq râ nghut lhê.