Htêyung ushuq kut su é matú. “Hkâ lhoqhten” gâ é htê má cháng mù, Asap hkon é jidang rahkat.
Târâ Jéyáng Sû Garai Gasang
75
Garai Gasang ê, ngá-mòq gi,Nang lé jeju hkya-ôn lhê;
ngá-mòq gi, Nang lé jeju hkya-ôn lhê;
hkâsu mù gâ le,
Náng é myìng hu râ hkyíng,
chyáng bê nghut ri;
byu pé gi, Nàng kut é maúhpo hkyô lé,
taî kyô akô nghut ri.
2 Nàng taî le,
“Byìn dìng ding é ahkyíng lé,
Ngò hkyin to bê nghut mù,
jô âng é dông târâ jéyáng é gi,
Ngò nghut lhê.
3 Myìdàm htoq eq
haú má nyi é lhúnglhâng bang,
nún lo bum é hkûn,
hau é a-pûn awang lé zuî gîng tô é gi,
Ngò nghut lhê. Sela
4 ‘Gyáng dang hkâtaî nyi lo.’ nghû,
nghutbun sû lé Ngò taî luî,
haû agè ashop sû lé,
‘A-tsam nghut é náng hkyuî pé lé hkâtu toq.
5 Mauhkûng lé htuqhtîng é dông,
náng hkyuî lé hkâtu toq;
lìngzing lâng jín mù dang hkâtaí.’ nghû, taî é nghut lhê.” gâ ri.
6 Byù rayùq lé,
wó lhoqtoq wó lhoqmyhang é gi,
buìhtoq buìwàng mâ é sû le a nghut,
yòso bum mau mâ é sû le a nghut.
7 Nghut kôlhang, târâ jéyáng sû gi,
Garai Gasang nghut lhê.
Yhang gi, rayùq lé lhoqhkyô pyám mù,
góyùq lé lhoqtoq é Sû nghut lhê.
8 Yhûmsîng Garaî é lòq má,
xunmân pé nyhô tô é,
gùttsû htoq é, Yhang nhikjum yô é tsibyiq wing byíng tô é,
gòm ralhum chung tô ri.
Yhang gi, haú lé hut hkyô kat é nghut luî,
myìdàm htoq mâ é
agè ashop é bang bànshoq gi,
achuq má ding tô é apat lháng,
chyup shuq pyâm akô nghut ri.
9 Nghut kôlhang, ngò gi, haú hkyô lé,
ahtum abyùq taî pyô râ nghut lhê;
ngò gi, Yakup é Garai Gasang lé,
hkya-on mahkôn hkôn râ nghut lhê.
10 Yhang gi, agè ashop bang
bànshoq é hkyuî pé lé,
zân hpyit pyám râ, nghut kôlhang,
díngmán bâng é hkyuî pé gi,
wàq toq é hui kôrâ nghut lhê.