Rubin É Awùt Ashín pé
5
Rubin gi, Isira-elaq é zo-mún nghut ri; nghut kôlhang, yhang gi, yhâng wâ é yhupgyàp lé agòt a-û kut pyâma é yánmai, zo-mún ayá gi, Isira-elaq é yhang zo Yosep é yhang zô pé lé byî pyám bê nghut mù, byùxik labaû gi, zo-mún ayá má cháng mù kâ tô é a nghut. 2 Hau htoq agó, Yudaq gi, yhang gu yhang mâng pê htoq wum-o a-tsam je bo é nghut mù, yhâng chyáng mai hkóhkâm htoq é nghut kôlhang, zo-mún ayá gi, Yosep é shèq nghut byùq ri. 3 Isira-elaq é yhang zo zo-mún Rubin é yhang zo yùqzô pé gi, Hanok, Hpalu, Heziron eq Hkarimi pé nghut akô.4 Yo-ela é awùt ashín pé gi, Yo-ela é yhang zo Shemai-a, Shemai-a é yhang zo Goga, Goga é yhang zo Shimi, 5 Shimi é yhang zo Mihka, Mihka é yhang zo Re-ai-a, Re-ai-a é yhang zo Balaq, 6 Balaq é yhang zo Bera nghut ri. Bera lé gi, Asuri hkóhkâm Tigalat-Pilesera èq shúm byû dông chyup yu é nghut ri. Bera gi, Rubin up bâng é zau nghut ri.
7 Yhâng é gu-mang wuì lé, a-myû koq má cháng luî gôn tô é byùxik labaû gi, zau hpó Yi-ela, Zehkariq eq, 8 Yo-ela é yhâng shuké, Shema é yhâng gashu, Azazi é yhang zo Bela pé nghut akô. Yhángmòq nyi é jowò gi, Aro-era mai Nebo eq Balaq Me-on jé shoq nghut ri. 9 Buìhtoq hkyam shut gi, Uhprat Làng yàm jé shoq nghut é yòso má nyi akô; hkâsu mù gâ le, Gile-at mau má yhángmòq é shigu gaunyhaú gyai myô jàt lo é yánmai nghut ri.
10 Yhángmòq gi, Sholuq é i-pyàt má Hagara byu pé lé majan zân ûng kômù, Gile-at maû é buìhtoq hkyam bànshoq mâ é Hagara byu pé nyi é zúm pé lé sing yu pyâm akô nghut ri.
Gat É Awùt Ashín pé
11 Gat up bang gi, Saleka mau jé shoq, Rubin up bang eq xoq xoq nghut é Bashan mau má nyi akô nghut ri. 12 Haú bang mâ é zau gi, Yo-ela; yhâng é a-ô má é gi, Shahpam; hau htâng mâ é gi, Yanai eq Bashan mau mâ é Shahpat pé nghut akô. 13 Yhángmòq é gu-mang wui é yhûmhtu pé gi, Mihka-elaq, Meshulam, Sheba, Yorai, Yahkan, Zi-a eq Ebera pé bànshoq nyhit u nghut ri. 14 Shí bang gi, Abihaila é yhang zo yùqzô pé nghut ri; Abihaila gi, Huri é yhang zo; Huri gi, Yaro-a é yhang zo; Yaro-a gi, Gile-at é yhang zo; Gile-at gi, Mihka-elaq é yhang zo; Mihka-elaq gi, Yeshishai é yhang zo; Yeshishai gi, Yado é yhang zo; Yado gi, Buza é yhang zo nghut ri. 15 Gu-ni é yhâng gashu, Apdi-ela é yhang zo Ahi gi, yhángmòq akoq mâ é zau nghut ri. 16 Gat up bang gi, Gile-at mau, Bashan mau eq haú mâ é wàhtum pé, Sharon mâ é mhan nú nghâróng yô bànshoq eq hau pê é awui ayàm maukyo pé má nyi akô nghut ri.
17 Yhángmòq é byùxik labaû shí pé bànshoq gi, Yudaq hkóhkâm Yohtam eq Isira-elaq hkóhkâm Yerobo-am é i-pyàt má gôn tô é nghut ri.
18 Rubin up bang, Gat up bang eq Manase koq rahkyam mâ é, gòlong eq shâm wó chûng mù, lai ge bìk luî, majan zan râ matú rì rì nghut bê é rago mhoq tô é wàqngân wuì gi, 44760 yùq bo ri. 19 Yhángmòq gi, Hagara a-myû nghut é, Yetura, Nahpisha eq Nodap pé lé majan zân akô. 20 Yhángmòq gi, Garai Gasâng èq garúm yu é hui kômù, Hagara a-myû wuì eq, yhángmòq eq rahá nghut bang bànshoq lé wó ung pyám bekô nghut ri; hkâsu mù gâ le, yhángmòq gi, majan má Garai Gasang lé wùt dûng ngaù kô é nghut mù, Yhang gi, Yhang lé yhángmòq lùmhkaû bekô nghut é yánmai, yhángmòq é dang lé gyo byî é nghut ri. 21 Yhángmòq gi, Hagara a-myû wui é shigu gaunyhaú nghut é gola-uk ngo mun, sau í sên ngo mun, loze í hkyîng du eq byù rasen lé chyup yu akô. 22 Majan haû gi, Garai Gasâng é majan nghut é yánmai, byu myo myo le sat lhêng pyâm é huî ri; yhángmòq gi, shúm zûng huî é ahkyíng jé shoq haú mau má nyi nyi akô nghut ri.
Manase Koq Rahkyam
23 Manase koq rahkyam bang gi, myoluq jebe lò mù, haú mau mâ é Bashan mai Herimon bùm yang nghut é Senira le gâ é Balaq Herimon jé shoq nyi bum akô nghut ri.
24 Yhángmòq é yhûmhtu pé mâ é ushuq pé gi, Ehpera, Ishi, Eli-ela, Aziri-ela, Yeremi-aq, Hodawi-a eq Yadi-ela pé nghut akô. Haú bang gi, yhángmòq é yhûmhtu pé mâ é a gyùq a wam é sarhê pé nghut é, myìng hû é ushuq pé nghut akô. 25 Nghut kôlhang, yhángmòq gi, yhángmòq é îchyí îwâ pê é Garai Gasang lé a jujúm kut kômù, yhángmòq é hí mai Garai Gasang lhoqhtên pyâm é mau mâ é byu pê é hparà pé eq mara kut shut akô nghut ri. 26 Haû mù, Isira-elaq é Garai Gasang gi, Asuri hkóhkâm Tigalat-Pilesera le gâ é Asuri hkóhkâm Pula é myìt lé nhaû toq byî é nghut mù, yhang gi, Rubin up bang lé le, Gat up bang lé le, Manase koq rahkyam lé le, shúm byû dông chyup shuî ló luî, hkû-nyí jé shoq, Hala, Habora, Hara eq Gozan Wuìlàng yàm pé má shúm zûng nhang tô é nghut ri.