Yudaq É Gótû A-myû Koq Pé
4
Yudaq é awùt ashín pé gi, Perezi, Heziron, Hkarimi, Hura eq Shobala pé nghut akô. 2 Shobala é yhang zo Re-ai-a gi, Yahat lé hku ri. Yahat gi, Ahumai eq Lahat nhiktâng lé hku ri. Shí bang gi, Zorahti a-myû koq pé nghut akô.3 Etam é yhang zo yùqzôa pé gi, Yezirela, Ishima eq Itbasha pé nghut akô. Yhángmòq é nhammó gi, Hazeleliponi nghut ri. 4 Penu-ela gi, Gedora wà bâng é îwa nghut ri; Ezera gi, Husha wà bâng é îwa nghut ri. Shí bang gi, myiwe myhí Ehprahta é yhang zo zo-mún Hura é awùt ashín, Betlehem wà bâng é îwa nghut ri.
5 Teko-a é yhâng wa Ashihura gi, Hela eq Nara gâ é myiwe í yùq yu ri. 6 Nara hku é zoshâng wuì gi, Ahuzam, Hehpera, Temeni eq Hahashitari pé nghut akô. Shí bang gi, Nara é awùt ashín pé nghut akô. 7 Hela hku é zoshâng wuì gi, Zerehta, Zoharab, Etnan pé nghut akô.
8 Koza gi, Anup eq Hazobeba nhiktâng lé hku é htoq agó, Harum é yhang zo Aharela é a-myû koq bâng é îwa nghut ri.
9 Yabeza gi, yhang gu yhang mâng pê htoq má hkúngga hpautap é je hui sû nghut ri. Yhâng nu gi, “Ngò, no hpû é mai yhang lé hku é nghut lhê.” ga taí mù, yhang lé Yabeza ga myìng myhîng é nghut ri. 10 Yabeza gi, Isira-elaq é Garai Gasang lé, “Nàng, ngo lé shimân byi mù, ngá é maumyî lé lhoqlâm byi aq ô! Ngò gi, no hpû é mai wó lùt sháng gàq, Náng é lòq èq ashop é hkyô mai ngo lé mâgum yù laq ô.” ga wùt dûng ngau ri. Haú hkûn, Garai Gasang gi, yhang dûng é eq rajung za gyo byi bê nghut ri.
11 Shuha é yhang gu Hkelup gi, Eshiton é yhâng wa Mehira lé hku ri. 12 Eshiton gi, Bet Rahpa, Pase-a, Ira Nahashi é yhâng wa Tehina lé hku ri. Shí bang gi, Rehka é a-myû wuì nghut akô.
13 Kenaza é yhang zo yùqzô nhik gi, Otni-ela eq Serai-a nghut akô. Otni-ela é yhang zo yùqzô nhik gi, Hahtat eq Me-onohtaic nghut akô. 14 Me-onohtai gi, Ohpra lé hku ri.
Serai-a gi, Ge Harashim mâ é byu pê é yhâng wa Yo-ap lé hku ri. Byù shí bang gi, lòqmú kung bang nghut kô é yánmai, jowò haú lé Ge Harashim ga myhîng é nghut ri.
15 Yehpuna é yhang zo Hkalep é yhang zo yùqzô pé gi, Iru, Ela eq Na-am pé nghut akô. Ela é yhang zo yùqzo gi, Kenaza nghut ri.
16 Yehalelela é yhang zo yùqzô pé gi, Zip, Zihpa, Tiri-a eq Asarela pé nghut akô.
17 Ezara é yhang zo yùqzô pé gi, Yehtera, Meret, Ehpera eq Yalon pé nghut akô. Meret é yhûmsîng myhí rayùq gi, Miri-am, Shamai eq Eshitemo-a é yhâng wa Ishiba lé hku ri. 18 (Yhâng é yhûmsîng myhí Yudaq byù gi, Gedora é yhâng wa Yeret, Sohko é yhâng wa Hebera eq Zano-a é yhâng wa Yekuhtila pé lé hku ri.) Shí bang gi, Meret yu é Hpara-uq é yhang zo byìzo Bihti-a é zodù wuì nghut akô.
19 Naham é yhâng nhammó, Hodi-a é yhûmsîng myhî é yhang zo yùqzô pé gi, Garimi byù Kila é yhâng wa eq Mahkahti byù Eshitemo-a nghut ri.
20 Shimon é yhang zo yùqzô pé gi, Amnon, Rina, Ben Hanan eq Tilon pé nghut akô.
Ishi é awùt ashín pé gi, Zohet eq Ben Zohet nghut ri.
21 Yudaq é yhang zo Shela é yhang zo yùqzô pé gi, Lehka é yhâng wa Era, Maresha é yhâng wa Lada, Bet Ashibe-a má nú nhâm é jihkyîng mú zuî é a-myû koq pé, 22 Yokim, Hkozeba a-myû wuì, Yo-ashi, Moba eq Yashubi Lehem lé ùp é Sarap pé nghut akô. (Góhkûn mai yhang shí pé lé kâ xûm to bê nghut ri.) 23 Yhángmòq gi, Netim eq Gedera má nyì luî, tso-au saí zo bang nghut akô; yhángmòq gi, haú má nyì mù, hkóhkâm hpó lé mú zui byi bang nghut akô.
Sime-on É Awùt Ashín Pé
24 Sime-on é awùt ashín pé gi, Nemu-ela, Yamin, Yarip, Zera eq Sha-ula pé nghut akô. 25 Sha-ula é yhang zo gi, Shalum; Shalum é yhang zo gi, Mipsam; Mipsam é yhang zo gi, Mishima nghut ri. 26 Mishima é awùt ashín pé gi, yhang zo Hamu-ela, Hamu-ela é yhang zo Zahkura, Zahkura é yhang zo Shimi pé nghut akô.
27 Shimi gi, yùqzo raxe hkyuq yùq eq byìzo hkyuq yùq wó ri; nghut kôlhang, yhang gu yhang mâng pé gi, zodù a myo kó nghut ri; haû mù, yhángmòq é a-myû akoq gón gi, Yudaq byu pé myhó a myo kó nghut ri. 28 Yhángmòq nyi é jang gi, Berasheba, Molada, Hazara Shu-ala, 29 Bila, Ezem, Tolat, 30 Behtu-ela, Horama, Ziklak 31 Bet Marahkabot, Hazara Susim, Bet Biri eq Sharim pé nghut akô. Wà haú pé gi, Dawiq ùp é hkûn jé shoq yhángmòq é wà pé nghut ri. 32 Yhángmòq é awui ayàm mâ é wà pé gi, Etam, Ayin, Rimon, Token eq Ashan pé ngo wâ nghut ri. 33 Wà haú pê é lhînghkyùq mâ é wà bànshoq mai Balaq jé shoq yhángmòq ùp akô. Haú pé gi, yhángmòq é nyì jang eq byùxik labaû nghut ri.
34 Hau htoq agó, yhángmòq é zau wuî gi, Meshobap, Yamlek, Amazi-a é yhang zo Yosha, 35 Yo-ela, Asi-ela é yhâng shuké, Serai-a é yhâng gashu, Yoshibi-a é yhang zo Yehu, 36 Eli-onai, Yakoba, Yeshohai-a, Asai-a, Adi-ela, Yesimela, Benai-a, 37 Shemai-a é yhâng shuké kup, Shimri é yhâng shuké tsáng, Yedai-a é yhâng shuké, Alon é yhâng gashu, Shihpi é yhang zo Ziza pé nghut akô.
38 Ahtoq má kâ tô é byù myìng pé gi, yhángmòq é a-myû koq pê é zau wuî chyat nghut ri. Yhángmòq é yhûmhtu pé gi, gyai yhang myô jàt lo é nghut mù, 39 yhángmòq gi, Gedora wà hkum jé shoq ê kôluî, langhkau é buìhtoq hkyam shut, yhángmòq é shigu gaunyhaû pê é matú mhan nú nghâróng yô ho e ló akô. 40 Yhángmòq gi, dam lam é, nyui yúng é eq haî le gyùq chiq nó a râ é mhan nú nghâróng yô myang ho akô nghut ri. Haú má nyi laî lo é bang gi, Ham byu pé nghut akô.
41 Ahtoq má myìng kâ tô é bang gi, Yudaq hkóhkâm Hezeki-a é i-pyàt má lé jé kômù, yhûmsing é zúm má nyi tô é Ham a-myû wuì lé le, haú má nyi é Me-un a-myû wuì lé le, lhúnglháng lé hkû-nyí jé shoq lhoqhtûm pyám kôluî, haú má nyi tô akô nghut ri. Hkâsu mù gâ le, yhángmòq é sau bainám hpúng pê é matú mhan nú nghâróng yô gyai yúng é yánmai nghut ri. 42 Haû Sime-on é a-myû up bang ngo shô yùq gi, Ishi é yhang zo yùqzo Pelati-a, Neri-a, Rehpai-a eq Uzi-ela pé shuî-û é a-ô má, Se-ira bum mau lé lé htîm akô. 43 Yhángmòq gi, wó hpang lùt mù nyi myìt tô é Amalek byu pé lé sat kyop pyám kôluî, hkû-nyí jé shoq haû má nyi tô akô nghut ri.