Dawiq Gyèzo Jihpán Gùq Yu É Hkyô
24
Haû Yhûmsîng Garai gi, Isira-elaq byu pé lé, dum nhik-yo mù, yhángmòq lé shut nhâng râ matú, Dawiq lé, “Isira-elaq eq Yudaq byu pê é jihpán ê gùq aq.” ga taî ri.2 Haû mù, hkóhkâm gi, Yo-ap lé le, yhang eq rahá nghut é gyèzaû pé lé le, “Gyèzô pé hkâ-myhó bo é lé ngò wó sé râ matú, Dan wà mai Berasheba wà jé shoq, Isira-elaq a-myû up hkangmó shut ê luî, gyèzo jihpán ê gùq lò keq.” ga taî ri.
3 Nghut kôlhang, Yo-ap gi, hkóhkâm lé, “Náng é Garai Gasang nghut é, haû Yhûmsîng Garai gi, gyè hpúng lé rashô tú lai shoq lhoqmyo lhoqjàt byi sháng gàq; ngá yhûmsîng hkóhkâm gi, myòqjí èq haú lé wó myâng sháng gàq. Nghut kôlhang, ngá yhûmsîng hkóhkâm gi, haî mù, haû sû é hkyô kut nau lhê lhú?” ga tû taî ri.
4 Nghut kôlhang, hkóhkam é dang gi, Yo-ap eq gyèzaû pê é dang lé ung pyâm ri; haû mù, yhángmòq gi, Isira-elaq byu pê é gyèzo jihpán gùq râ matú, hkóhkam é hí mai htoq e ló bekô nghut ri.
5 Yhángmòq gi, Yodan làng laî byìt é htâng, langhkung mâ é wa é maupyî hkyam shut mâ é, Aro-era wà nàm má wàp xuq tô akô. Hau htâng, yhángmòq gi, Gat pê é mau mai lai luî, Yazera wà má jé ròt ló akô nghut ri. 6 Hau htâng, yhángmòq gi, Gile-at mau eq Tahtim Hotshi mau má ê jé kó luî, Dan Ya-an eq Sidon wà awui ayàm shut e akô nghut ri. 7 Hau htâng, yhángmòq gi, Turuq wà mâ é gingtíng jowò shut ê mù, Hiwi byu pé eq Hkanan byu pê é wà bànshoq shut tsing ê luî, lohtáng má, Yudaq mau mâ é Maupyî Mau mâ é Berasheba wà jé shoq e akô nghut ri.
8 Hau htâng má, yhángmòq gi, ra-mau gón má e to hkó luî, lha-mó gau hkyap èq buìnyì í xê nyí má, Yerusalem wà mó shut dum taû jé lô bekô nghut ri.
9 Yo-ap gi, hkóhkâm lé, gyè wó zân é byù jihpán lé shit ri; haú má, shâm wó chûng bê é, Isira-elaq mau mâ é byù shit sen eq Yudaq mau mâ é byù ngo sen bo ri.
10 Dawiq gi, gyèzo jihpán lé ban gùq yu é htâng má, myìt nùngngham wó bun luî, haû Yhûmsîng Garai lé, “Ngò kut é múzó má, mara mó kut shut pyâm é nghut bê. Yhûmsîng Garai ê, ahkuî, ngò gi, gyai yhang ngòk pyâm é hkyô kut shut bê nghut é yánmai, Náng é duìnhâng zoshâng ngá é mara lé hkyut pyám byi laq nghû dûng tôngbán lhê ô.” ga taî ri.
11 Htang nàpkyó, Dawiq toq lo é hkûn, haû Yhûmsîng Garaî é dang gi, Dawiq é myòq gyeng sû, myìqhtoi Gat chyáng jé lo ri; 12 haû gi, “Nàng, Dawiq chyáng ê mù, ‘Haû Yhûmsîng Garai taî le, “Ngò, nang lé sum hkyô shit bá; nang lé Ngò mara dam byi râ matú, Ngo lé haú mâ é rahkat hkyîn byi aq.” gâ ri.’ nghû ê taî kyo aq.” gâ é nghut ri. 13 Haû mù, Gat gi, Dawiq chyáng ê mù, yhang lé, “Náng é mîngdán má, sum zân mùtmó gyó nhâng nau ri lhú? Haû a nghut jáng, nang lé châng hkat chyup é, náng é gyè pê chyáng mai lha-mó sum hkyap hpang jón wún nau ri lhú? Haû a nghut jáng, náng é mîngdán má, sum nyí nò wúm gyó nhâng nau ri lhú? Haû mù, ngo lé nhang kat sû lé ngò hkâsu nghû tû taí râ hkyô, ahkuî myìt hpyit àq.” ga taî ri.
14 Haú hkûn, Dawiq gi, Gat lé, “Ngò gi, gyai yhang myìt myo ûng wôm nyi ri. Ngo lé, haû Yhûmsîng Garaî é lòq má shèq wàng nhâng àq; hkâsu mù gâ le, Yhâng é shogyo nhikmyin hkyô gi, kô dik é nghut ri; byu pê é lòq má kúm gi, ngo lé hkâwâng nhâng.” ga taî ri.
15 Haû mù, Yhûmsîng Garai gi, haû nàpsûn mai ding tô é ahkyíng htum shoq, Isira-elaq byu pê é ahtoq má wúm gyó nhang é nghut mù, Dan wà mai Berasheba wà jé shoq, byù nyhit mun shi byùq bê nghut ri. 16 Haû maumang lagyo gi, Yerusalem wà mó lé lhoqhtên pyám râ matú, yhâng é lòq lhâm kat é hkûn, haû Yhûmsîng Garai gi, wuîhke jamjau hpu zô nyi bum é eq séng luî, myìt lhîng mù, byu pé lé lhoqhpyoq lhoqhtên nyi é maumang lagyo lé, “Gé bê! Náng é lòq lé wùp taû yù lo aq.” ga taî ri; haú hkûn, Yhûmsîng Garaî é maumang lagyo haû gi, Yebusi byù Arauna é gùq chyârâng má nyi tô ri.
17 Dawiq gi, byu pé lé dam byî nyi é, maumang lagyo lé myàng jáng, haû Yhûmsîng Garai lé, “Ngò mara kut shut bê; ngò, sau zúng sû shèq ashop é hkyô kut shut é ru nghut lhê. Shí bang gi, sau zô pé za nghut lhê; yhángmòq haî kut shut ri lhú? Ngò eq ngá é yhûmbyù wui ahtoq má shèq Náng é lòq jé sháng gàq.” ga taî ri.
Dawiq Hkungga Gyàp Saî É Hkyô
18 Haú nyí, Gat gi, Dawiq chyáng ê mù, yhang lé, “Yebusi byù Arauna é gùq chyârâng má dòq ê luî, haû Yhûmsîng Garaî é matú hkungga gyàp ralhum ê saí aq.” ga taî ri. 19 Haû mù, Dawiq gi, Gat dông mai haû Yhûmsîng Garai hkunmó hkyô é eq rajung za dòq e ló bê nghut ri. 20 Arauna gi, wú kat le, hkóhkâm eq yhâng é zaugun wuì yhâng chyáng lé lo nyì kô é lé myàng jáng, htoq ê mù, hkóhkam é hí má myigùng jé shoq yhâng myòqdong ngóm gòp ri.
21 Haû mù, Arauna gi, “Ngá é yhûmsîng hkóhkâm gi, haî mù náng é duìnhâng zôshang chyáng jé lé lo lhê lhú?” ga taî ri.
Dawiq gi, “Shiwa byu pê chyáng jé tô é nò wúm zîm ló byùq sháng gàq nghû, haû Yhûmsîng Garaî é matú hkungga gyàp ralhum saí nau é yánmai, náng é gùq chyârâng lé wui yù râ nghû jé lé lo é nghut lhê.” ga tû taî ri.
22 Arauna gi, Dawiq lé, “Ngá é yhûmsîng hkóhkâm ê, nàng yù nau é lé yù mù, hkungga nhông byi aq. Myi nyhé hkungga kut râ matú nohtó pé le shí má nghut lhê; htang kut râ matú, gùq bàt zè pé eq nohtó hut kyaú pé le shí má nghut lhê. 23 Ngá hkóhkâm ê, ngò Arauna gi, shí pé bànshoq hkóhkâm nang lé byî lhê.” ga taî ri; hau htoq agó, Arauna gi, “Náng é Garai Gasang nghut é, haû Yhûmsîng Garai gi, náng é hkungga lé hàp yù byi sháng gàq ô.” ga le taî ri.
24 Nghut kôlhang, hkóhkâm gi, Arauna lé, “Haú su a nghut; hau é matú, ngò, nang lé ahpau byi mù, wui yù râ nghut lhê. Ngò ahpau a gyó é za wó é myi nyhé hkungga pé lé, ngá é Garai Gasang nghut é, haû Yhûmsîng Garaî é matú, ngò nhông byi râ a nghut.” ga tû taî ri.
Haû mù, Dawiq gi, gùq chyârâng eq nohtó pê é matú ngùnhtung nyhit rûng kô byi mù, wui hpyit yû bê nghut ri. 25 Dawiq gi, haú jowò má, haû Yhûmsîng Garaî é matú hkungga gyàp ralhum saí mù, myi nyhé hkungga eq zùmhkaû hkungga pé lé, nhông byî ri. Haú hkûn, Yhûmsîng Garai gi, mîngdán é gùnglik dông yhang kyûdung é dang lé gyo byî é nghut mù, Isira-elaq mau mâ é nò wúm gi, zîm ló byùq bê nghut ri.