Dawiq É Ló Htâng É Dang Pé
23
Dawiq é ló htâng é dang pé gi, a-ô mâ é eq rajung za nghut lhê;“Yakup é Garai Gasâng èq namngón xû bùt byî é hui mù,
haû Myhang Htáng Sû mai hkya-on wàq toq é hui luî,
Isira-elaq a-myû mâ é ji sé hpaûmang mó nghut sû,
Yese é yhang zo Dawiq é myìtbun bóng dang gi, shí dông nghut ri.
2 Haû Yhûmsîng Garaî é Sô gi, ngò dông mai dáng nyo ri;
Yhâng é dang gi, ngá é nhutshô má bo nyi ri.
3 Isira-elaq byu pê é Garai Gasang gi, dang nyô bê.
Isira-elaq byu pê é Lungmó Zîng gi, ngo lé shî su ga taí bê nghut ri;
‘Byu pé lé, díngmán hkyô mai ùphkâng mù,
Garai Gasang lé gyùq hkúnggâ é mai, ùphkang é sû gi,
4 mhut a jòq mù gyêng yúng é nàpsûn má,
bui htoq lo é u lhê é nàpsûn maubó su le,
myìdàm htoq má wàhu yùq htoq nhang é,
mau hpông htâng mâ é dùq bang é hkyô su le, du ri.’ gâ ri.
5 Ngá é yhûmbyù wuì, Garai Gasang eq a xoq ge tô é ru nghut le gi,
Yhang, ngò eq ahtum abyùq é dangshikaq to râ le a nghut,
hkyô hkat hkangmó lé rago hen lajang luî, lhoq gingtîng to byi râ le a nghut;
Yhang gi, ngá é hkyi yù hkyô lé ashi zui nhâng râ le a nghut;
Ngò myìt ô nau é jung hkangmó lé le, gyo byi râ a nghut.
6 Nghut kôlhang, agè ashop é byu pé gi, lòq èq a wó tsîng yu é zugâm pé lé su,
bànshoq bang dú tâng pyâm é hui kôrâ nghut lhê.
7 Zugâm haú pé lé záng râ sû ó yùq nghut kôle,
jòqtoq zè, a nghut jáng, lhâmloq lé chûng râ dùt lhê;
zugâm haú pé gi, lèq tô é jowò má yhang, chyut nyhê hkyô pyâm é hui râ nghut lhê.” gâ ri.
Dawiq É Wum-o Mó Bo É Sarhê Pé
8 Dawiq é wum-o mó bo é sârhe pê é myìng gi, a-ô mâ é eq rajung za nghut ri;
Tahkamoni akoq mâ é Yoshep-Bashebet gi, Sarhê Sum Yuq é zau nghut ri; yhang gi, majan ralhum má za, byù shit shô yùq lé, yhâng é lham èq htaû sat pyám sû nghut ri.
9 Yhâng é a-ô má, Ahohi akoq mâ é Dodai é yhang zo Ele-aza nghut ri; yhang gi, wum-o mó bo é sarhê sum yuq mâ é rayùq nghut ri. Yhang gi, Hpilisiti byu pé majan zan râ matú, Pasi Damim má zùp zîng nyì kô é hkûn, yhángmòq lé Dawiq pé eq rahá gyáng dang ê taî é sû nghut ri. Haú hkûn, Isira-elaq byu pé zùt taû bum akô nghut ri. 10 Nghut kôlhang, Ele-aza gi, yhâng é jowò má yàp to mù, Hpilisiti byu pé lé, yhâng é lòq myûng byùq luî, lòq gying byùq mù, shâm a wó nhâng lo dùt shoq, tsing sat pyám bê nghut ri. Haú nyí má, haû Yhûmsîng Garai gi, ûngmyuq hkyô mó byi bê nghut ri. Gyè hpúng pé gi, shî màng pé mâ é zè châng yù râ matú za, Ele-aza chyáng taû lé lo bum akô nghut ri.
11 Yhâng é a-ô má gi, Harari akoq mâ é Age é yhang zo Shamma nghut ri. Hpilisiti byu pé gi, nùq yò jòq é jowò má majan zan râ matú zùp zîng nyì kôjáng, Isira-elaq byu pê é gyè hpúng pé gi, Hpilisiti byu pê chyáng mai hpang bum akô nghut ri. 12 Nghut kôlhang, Shamma gi, yò gùng má jowò yù luî, haú mai htuqhtíng luî, Hpilisiti byu pé lé sat pyâm ri. Ûngmyuq hkyô mó haú lé gi, Yhûmsîng Garai byî é nghut ri.
13 Sarhê mó sum xê yùq má bo é sarhê sum yuq gi, kyô shu yòq má, Adulam lùqhkyûng hkaû má nyi tô é Dawiq chyáng jé lé lo akô. Haú u, Hpilisiti byù mòqmó gi, Rehpim Langhkaû má wàp xuq mù, nyi tô akô nghut ri. 14 Dawiq gi, gingtíng jowò hkaû má lúng nyi é u, Hpilisiti byu pé gi, Betlehem wà mó má wàp xuq nyi tô bum akô nghut ri. 15 Haú hkûn, Dawiq gi, wuì lé shuq nau nyì mù, “Ô, Betlehem wà hkum nàm mâ é wuìhtúng mâ é wuì lé, ó yùq wá, ngá é matú ê hkam lò byi râ lhú!” ga taî ri. 16 Haû mù, haû wum-o mó bo é sarhê sum yuq gi, Hpilisiti gyèwap lé zân hpyoq wang ê mù, Betlehem wà hkum nàm mâ é wuìhtúng mâ é ûchyam ê hkû yù luî, Dawiq chyáng yu lò byî akô nghut ri. Nghut kôlhang, Dawiq gi, ûchyam haú lé a shuq é za, haû Yhûmsîng Garaî é hí má hut hkyô pyâm ri. 17 Yhang gi, “Yhûmsîng Garai ê, wuì shî lé shuq râ hkyô gi, ngá chyáng mai wê gâng byùq sháng gàq! Haû gi, yhûmsing é chyungxe lé àp pyám mù, wuì ê hkâm bâng é sui nghut lhê, a nghut lhí?” ga taî ri. Haû mù, Dawiq gi, wuì haú lé a shuq byùq lo nghut ri.
Haú hkyô lé gi, wum-o mó bo é Sarhê Sum Yuq shí bang kut é múzó pé nghut ri.
18 Zerui-a é yhang zo, Yo-ap é yhang gu Abishai gi, gótû Sarhê Sum Yuq pê é ushuq nghut ri. Yhang gi, byù sum shô yùq lé, yhâng é lham èq wó htaû sat pyám bê nghut é yánmai, haû Sarhê Sum Yuq su myìng hu sû dùt bê nghut ri. 19 Yhang gi, Sarhê Sum Yuq htoq má je riyhang xânghpoq nge wó é nghut lhê, a nghut lhí? Haû mù, yhang gi, Sarhê Sum Yuq haú má a bo lòm shî é nghut kôle, haú bâng é zau dùt bê nghut ri.
20 Kapzela wà mâ é, Yehoi-ada é yhang zo Benai-a gi, gyai kûng é sarhê rayùq nghut mù, a gyùq a wàm mú mó kut sû nghut ri. Yhang gi, Moba mau mâ é wum-o mó bo dik é sarhê hpó í yùq lé sat pyâm ri. Hau htoq agó, gyo gyó é buìnyì ra-nyí má, donghkong shut wang ê mù, hkanghkyi radu lé sat pyâm ri. 21 Hau htâng, yhang gi, gyai kô myhang é Egutuq byù rayùq lé le sat pyâm ri. Egutuq byù haú yùq gi, yhâng é lòq má lhâm chung to kôlhang, Benai-a gi, alhum mâ é byù bàt sik yang rahkat èq za yhang lé ê htîm ri. Yhang gi, Egutuq byù haú yùq é lòq mai lhâm lú yu pyám byi mù, lhâm hau èq yhang, yhang lé htaû sat pyám bê nghut ri. 22 Shí pé gi, Yehoi-ada é yhang zo Benai-a é a gyùq a wàm kut é múzó pé nghut luî, yhang le, Sarhê Mó Sum Yuq su myìng hû é sû nghut ri. 23 Yhang gi, haû Sarhê Sum Xê Yùq htoq gyai yhang hkúngga hpautap é hui kôlhang, haû Sarhê Sum Yuq má bo lhoqlhôm é a hui shi nghut ri. Haû mù, Dawiq gi, yhang lé, yhâng é chyungxe zúng bâng é ushuq kut nhâng bê nghut ri.
24 Haû Sarhê Sum Xê Yùq mâ é bang gi,
Yo-ap é yhang gu Asahela,
Betlehem wà mâ é Dodo é yhang zo Elihanan,
25 Harot jowò mâ é Shama eq Elika nhik,
26 Palati jowò mâ é Heleza,
Teko-a wà mâ é Ikesha é yhang zo Ira,
27 Anahtot jowò mâ é Abi-ezara,
Husha koq mâ é Sibekai,
28 Ahohi koq mâ é Zalamon,
Netohpat koq mâ é Maharai,
29 Netohpat koq mâ é Bana é yhang zo Helep,
Ben-yamin up, Gibe-a wà mâ é Ribai é yhang zo Ihtai,
30 Pirahton koq mâ é Benai-a,
Gasha langhkaû pé mâ é Hidai,
31 Arabahti koq mâ é Abi-alabon,
Barahumi koq mâ é Azimawet,
32-33 Shalabon koq mâ é Eli-aba,
Yashen é yhang zô pé,
Harari koq mâ é Shama é yhang zo Yonahtan,
Harari koq mâ é, Sharara é yhang zo Ahi-am,
34 Mahkahti koq mâ é Ahasibai é yhang zo Elihpelet,
Gilo koq mâ é, Ahihtohpela é yhang zo Eli-am,
35 Hkarimela koq mâ é Heziro,
Araba koq mâ é Parai,
36 Zoba wà mâ é Nahtan é yhang zo Igala,
Gat wà mâ é Bani,
37 Ammon byù Zelek,
Zerui-a é yhang zo Yo-ap é shâm lhâm bo wàq sû, Berot koq mâ é Naharai,
38 Ihtari koq mâ é Ira,
Ihtari koq mâ é Garep,
39 Hiti koq byù Uri-a pé nghut akô.
Yhángmòq bànshoq bang gi, súm xe nyhit yùq bo akô nghut ri.