Zelohpehat É Yhang zo Byìzô Pé
27
Manase é shuké kup, Mahkira é shuké tsáng, Gile-at é shuké, Hehpera é gashu, Zelohpehat é yhang zo byìzô pé gi, Yosep é yhang zo Manase é a-myû koq pé má bo lom ri. Byìzo haú bâng é myìng gi, Mala, No-aq, Hogala, Milihka eq Tiriza pé nghut akô. Yhángmòq gi, huî lé lô mù, 2 zùphpong zúm hkum má nyi tô é Mosheq, hkyangjong Ele-aza, ushuq pé eq shiwa byù hpúng gón hí má yàp to kôluî, 3 “Ngá-mòq é âwa gi, yòso má shi byùq bê nghut lhê. Yhang gi, haû Yhûmsîng Garai lé gumlau toq é Kora é htâng cháng bang chyáng a bo lom é nghut lhê; nghut kôlhang, yhang gi, yhâng é mara eq yhang shi byùq é nghut lhê; yhang gi, yùqzo le a wó nghut ri. 4 Yhang, yùqzo a wó é yánmai, haî mù ngá-mòq é âwâ é myìng lé, yhâng é a-myû koq mai lhoqhtûm pyám râ lhú? Ngá-mòq é âwâ é gu-mang wuì eq rahá, ngá-mòq lé le silî wunlî maumyî gàm byi keq.” ga taî akô nghut ri.5 Haû mù, Mosheq gi, yhángnhik wui é hkyô lé haû Yhûmsîng Garaî hí má yu lé é nghut mù, 6 haû Yhûmsîng Garai gi, yhang lé, 7 “Haû Zelohpehat é yhang zo byìzô pé taî nyi é gi, jô ri. Gè gè yhang, yhángnhik wui é yhâng wâ é gu-mang wuì eq rahá, yhángmòq lé silî wunlî maumyî gàm ra râ nghut lhê. Yhángnhik wui é yhâng wâ é silî wunlî lé gi, yhángnhik wuî lé àp byi ra râ nghut lhê.
8 Haû Isira-elaq byu pé lé, ‘Yùqgè rayùq, yùqzo a wó é za shi ló byùq é nghut jáng, yhang zo byìzô pé lé yhâng é silî wunlî byi keq. 9 Yhang gi, byìzo le a wó é nghut jáng, yhang gu yhang mâng pé lé yhâng é silî wunlî byi râ dùt lhê. 10 Yhang gi, yhang gu yhang mâng pé a wó é nghut jáng, yhâng wâ é yhang gu yhang mâng pé lé yhâng é silî wunlî byi râ dùt lhê. 11 Yhâng wa gi, yhang gu yhang mâng pé a wó é nghut jáng, yhang eq je chyâng é gyí gòq gu-mang sing yù râ matú, yhang lé yhâng é silî wunlî byi râ dùt lhê. Haû gi, Yhûmsîng Garai mai Mosheq lé hkunmó hkyô tô é eq rajung za, Isira-elaq byu pê é matú cháng râ é târâ dùt ra râ nghut lhê.’ nghû taí aq.” ga taî ri.
Mosheq É Hkô Má Yoshuq Wò Yu É Hkyô
12 Hau htâng, haû Yhûmsîng Garai gi, Mosheq lé, “Abarim Bùm yang mâ é bùm shî má dòq lò mù, Isira-elaq byu pé lé Ngò byî tô é mau lé wú yû àq. 13 Nàng gi, haû lé myang é htâng má, nungmang Arun su, nàng le, náng é byu pê chyáng ló bo zing râ nghut lhê. 14 Hkâsu mù gâ le, Zin Yòso má wuì eq séng luî shiwa byù hpúng gumlau toq kô é hkûn, núngnhik le, yhángmòq é myòq hí má, Ngo lé chyoiyúng Sû dông shigyaú râ matú nghut é Ngá é hkunmó lé a cháng kó nghut ri.” ga taî ri. (Wuìbúm haû gi, Zin Yòso mâ é Meriba Kadesha gâ é wuìbúm nghut ri.)
15 Mosheq gi, haû Yhûmsîng Garai lé, 16-17 “Haû Yhûmsîng Garaî é byu pé gi, sau zúng sû a nyi é sau pé su a dùt kôrâ matú, kângsoq dui é bànshoq lé soq kat byî é Garai Gasang nghut é, haû Yhûmsîng Garai gi, shiwa byù hpúng shí bâng é hí má, htoq htoq wàng wàng wó kut mù, yhángmòq lé shuî htoq shuî wàng wó kut é byù rayùq, yhángmòq lé hkyin masàt to byi sháng gàq.” ga taî ri.
18 Haû mù, haû Yhûmsîng Garai gi, Mosheq lé, “Ushuq kut râ sô a-tsam bo é byù nghut é, Nun é yhang zo Yoshuq lé shuî yù mù, yhang lé lòq ke shimân byi aq. 19 Yhang lé, hkyangjong Ele-aza eq shiwa byù hpúng gón é hí má yàp nhang to mù, yhángmòq é hí má wò mó haû byî to aq. 20 Haû Isira-elaq shiwa byù hpúng gón yhâng é dang gyo kó sháng gàq, yhang lé, náng é ahko ahkáng ra-am àp byi aq. 21 Yhang gi, yhâng é matú râ é hkyô lé, haû Yhûmsîng Garaî hí má Urim dông bo myi byi râ sû, hkyangjong Ele-aza é hí má yàp ra râ nghut lhê. Yhâng é hkunmó eq rajung za, yhang le, Isira-elaq byù hpúng gón le, htoq htoq wàng wàng kut kôrâ nghut lhê.” ga taî ri.