Nyí Wuî Byi Râ Hkungga Pé
28
Haû Yhûmsîng Garai gi, Mosheq lé, 2 “Haû Isira-elaq byu pé lé shí dông hkunmó hkyó aq; ‘Ngá é matú namngón shôm dùt râ dông, Ngá é zoshuq nghu é myî èq nyhê nhong é hkungga pé lé, masàt tô é ahkyíng má yu lé byi râ dùt lhê.’ nghû àq. 3 Hau htoq agó, yhángmòq lé, ‘Haû Yhûmsîng Garai lé núngmòq nhông byi ra râ nghut é myi nyhé hkungga gi, nyí wuî myi nyhé hkungga dông ayang nhông byi râ matú, haî le a râ é, razàn bò bê é sau zo í du nghut lhê. 4 Sau zo radu lé gi, nàpkyó lé nhông byi mù, gódu lé gi, myínhtâng lé nhông byî é má, 5 je nú é mún ngo joí mâ é xê gàmbùm mâ é ragàmbùm eq tsanlun shi mai pyik htoq yu é xû rachyóng mâ é myi tú mâ é ratú lé nyhô tô é gùqzò hkungga le bo nhông byi ra râ nghut lhê. 6 Shî gi, ayang kut nyî râ matú, Sinaq Bùm má dangmó hkyô tô é myi nyhé hkungga nghut é, haû Yhûmsîng Garaî é matú namngón shôm dùt râ dông myî èq nyhê nhong é hkungga nghut lhê. 7 Sau zo du hkangmó eq rahá, shuq jung hkungga kut râ matú nyhûn tô é î rachyóng mâ é myi tú ratú lé yu lé mù, sân-yúng jowò mâ é Yhûmsîng Garaî é matú shuq jung hkungga lé hut hkyó ra râ nghut lhê. 8 Sau zo gódu lé gi, rajung zâ é, nàpkyó lé nàng nhông byî é gùqzò hkungga eq shuq jung hkungga le mù, myín lé nhông byi ra râ nghut lhê. Shî gi, haû Yhûmsîng Garaî é matú namngón hkungga dông myî èq nyhê é hkungga nghut ri.Bánno Buìnyi É Hkungga Pé
9 Bánno Buìnyì má, haî le a râ é, razàn bò bê é sau zo í du eq rahá, hau é shuq jung hkungga le, tsanlun xû nyhô tô é je nú é mún ngo joí mâ é xê gàmbùm í gâmbùm bo é gùqzò hkungga le, nhông byi ra râ nghut lhê. 10 Shî gi, ayang nhông byî é myi nyhé hkungga eq hau é shuq jung hkungga mai lai luî, Bánno Buìnyì hkangmó é matú myi nyhé hkungga nghut lhê.
Lhôhkyap Hkangmó Lhê É Hkungga Pé
11 Lhôhkyap hkangmó mâ é lhôxân nyí má, haû Yhûmsîng Garaî é matú myi nyhé hkungga nhông byi râ, haî le a râ é, nohtó râm zo í du, saulo radu, razàn bò bê é saulo zo nyhit du yu lé ra râ nghut lhê. 12 Gùqzò hkunggâ é matú, nohtó zo du hkangmó eq rahá, xû nyhô tô é, je nú é mún ngo joí mâ é xê gàmbùm mâ é sum gâmbùm nhông byi mù, saulo eq rahá, xû nyhô tô é, je nú é mún ngo joí mâ é xê gàmbùm mâ é í gâmbùm gùqzò hkungga nhông byi râ dùt lhê; 13 saulo zo du hkangmó eq rahá, xû nyhô tô é, je nú é mún ngo joí mâ é xê gàmbùm mâ é ragàmbùm lé le nhông byi ra râ nghut lhê. Shî gi, Yhûmsîng Garaî é matú, myî èq nyhê nhông byî é, namngón hkungga nghut é myi nyhé hkungga é matú nghut lhê. 14 Shuq jung hkunggâ é matú, nohtó zo du hkangmó eq rahá, tsibyiq wing rachyông é rawuí gû, saulo eq rahá, rachyóng mâ é sum tú ratú, sau zo hkangmó eq rahá, rachyóng mâ é myi tú ratú lé nhông byi ra râ nghut lhê. Shî gi, razàn hkaû mâ é lhôxân nyí hkangmó má nhông byi râ myi nyhé hkungga nghut lhê. 15 Ayang nhông byî é myi nyhé hkungga eq hau é shuq jung hkungga mai lai luî, mara hkyut hkungga dông bainám lo radu lé, haû Yhûmsîng Garaî é matú nhông byi ra râ nghut lhê.
Lhoqlhai Poî
16 Haû sânghî lhôhkyap raxe myi nyí nyí má gi, Yhûmsîng Garaî é Lhoqlhai Poî nghut râ nghut lhê. 17 Haú hkyap raxe ngo nyí nyí má gi, poî kut luî, nyhit nyí yhang, múnchi a bo é mùk zo ra râ nghut lhê. 18 Sânghî nyí gi, chyoiyúng zùphpong hpong râ nghut mù, hai amû le ge zui saí râ a nghut. 19 Haû Yhûmsîng Garaî é matú, myî èq nyhê nhông byî é hkungga nghû râ, haî le a râ é, nohtó râm zo í du, saulo radu eq razàn bò bê é saulo zo nyhit du nhông byi râ dùt lhê. 20 Nohtó zo du hkangmó eq rahá, xû nyhô tô é, je nú é mún ngo joí mâ é xê gàmbùm sum gâmbùm nghut é gùqzò hkungga nhông byi mù, saulo eq rahá, xê gàmbùm mâ é í gâmbùm lé nhông byi luî, 21 saulo zo nyhit du mâ é du hkangmó eq rahá, xê gàmbùm mâ é ragàmbùm nhông byi ra râ nghut lhê. 22 Mara hkyut hkungga dông bainám lo zo radu gi, núngmòq é matú mara hkô htaí hkungga nhông byi ra râ nghut lhê. 23 Ayang nhông byî nyi é, nàpkyó lhê é myi nyhé hkungga mai lai luî, shí pé lé nhông byi râ dùt lhê. 24 Haú dông mai, Yhûmsîng Garaî é matú namngón hkungga dông, nyhit nyí yhang, nyí wuî zoshuq hkungga haû nyhê nhông byi râ dùt lhê. Haû gi, ayang nhông byî é myi nyhé hkungga eq hau é shuq jung hkungga mai lai luî nhông byî é nghut lhê. 25 Nyhit nyí nyí má gi, chyoiyúng zùphpong hpong râ nghut luî, mú ge zui saí râ a nghut.
Nyhit Bàt Poî
26 Haû Nyhit Bàt Poî byíng jáng, Yhûmsîng Garaî é matú kyôshi myuishi asik hkungga nhông byî é buìnyì nghut é, sânghi myhîng é ashi poî buìnyì má, chyoiyúng zùphpong hpong râ nghut mù, mú ge zui saí râ a nghut. 27 Haû Yhûmsîng Garaî é matú namngón shôm dông, myi nyhé hkungga kut râ matú, nohtó râm zo í du, saulo radu eq razàn bò bê é saulo zo nyhit du nhông byi râ dùt lhê. 28 Gùqzò hkunggâ é matú, nohtó zo du hkangmó eq rahá, xû nyhô tô é je nú é mún ngo joí mâ é xê gàmbùm mâ é sum gâmbùm nhông byi mù, saulo eq rahá, xê gàmbùm mâ é í gâmbùm nhông byi luî, 29 saulo zo nyhit du mâ é du hkangmó eq rahá, xê gàmbùm mâ é ragàmbùm nhông byi râ dùt lhê. 30 Bainám lo radu lé gi, núngmòq é matú mara hkô htaí hkungga nhông byi ra râ nghut lhê. 31 Ayang nhông byî é myi nyhé hkungga eq hau é gùqzò hkungga mai lai luî, shí pé eq rahá, yhángmòq é shuq jung hkungga pé lé nhông byi ra râ nghut lhê. Haú pé gi, râ é hkyô haî a bo é chyat nghut ra râ nghut lhê.