Isira-elaq Byu Pé Lé Moba Byù Pê Èq Lâng Nghoq Yu É Hkyô
25
Isira-elaq byu pé gi, Shitim jowò má nyi tô é u lé, yùqgè wuì, Moba myiwe wuì eq gùngsho zùm yàp bum akô nghut ri. 2 Myiwe haú bang gi, yhángmòq é hparà lé hkungga sôdun byi râ matú, yhángmòq lé lung yu ri. Isira-elaq byu pé gi, hkungga zoshuq lé bo zo kômù, hparà haú pê é hí má le bo paî gòp akô nghut ri. 3 Haû mù, Isira-elaq byu pé gi, Pe-ora bùm mâ é Balaq hparà é kyaú bo wùn wàq yù bekô nghut mù, haû Yhûmsîng Garai gi, yhángmòq lé nhikjum yo bê nghut ri.4 Haû Yhûmsîng Garai gi, Mosheq lé, “Haû Yhûmsîng Garai, Isira-elaq byu pé lé nhikjum mó yô é hkyô zîm ló byùq sháng gàq, byù shí bâng é ushuq pé bànshoq lé shuî yù mù, sat pyám luî, buì tso yúng é jáng haû Yhûmsîng Garaî é hí má tuî lhâng to aq.” ga taî ri.
5 Haû mù, Mosheq gi, haû Isira-elaq é târâ agyì pé lé, “Núngmòq yùq hkangmó gi, Pe-ora bùm mâ é Balaq hparà é kyaú wùn wàq yu é, núngmòq é yhûmsing byu pé lé sat pyám ra râ nghut lhê.” ga taî ri.
6 Haú hkûn, Isira-elaq byù rayùq gi, Mosheq eq zùphpong zúm hkum má ngau nyi bum é Isira-elaq shiwa byù hpúng gón é hí má, Midi-an myiwe myhí rayùq lé wàp hkaû shut shuî wang ló ri. 7 Hkyangjong Arun é yhang shu, Ele-aza é yhang zo Hpinehasa gi, haú lé myàng jáng, shiwa byù hpúng mai htoq luî, yhâng é lòq má lhâm chung to mù, 8 Isira-elaq byù haú yùq é htâng zúm hkaû má châng wang ló ri. Haû mù, yhang gi, lham èq Isira-elaq byù haú yùq lé htaû ròt mù, myiwe myhí hau é wamdau lé le hkyâng shoq jâng htaû ròt kat ri. Haú hkûn, Isira-elaq byu pé lé htîm nyi é wúm gi, nô byùq bê nghut ri. 9 Nghut kôlhang, wúm haú má shi byùq é byù du gi, 24000 yùq nghut ri.
10 Haû Yhûmsîng Garai gi, Mosheq lé, 11 “Hkyangjong Arun é yhang shu, Ele-aza é yhang zo Hpinehasa gi, Isira-elaq byu pé lé Ngò nhikjum yô é mai lhoqzîm pyám nhâng bê nghut ri. Hkâsu mù gâ le, yhángmòq chyáng mâ é Ngá é hpungwup shingkâng é matú Ngò myìt zùq é su, yhang le myìt zùq byî é nghut mù, Ngò myìt zùq é hkyô mai yhángmòq lé a lhoqhtûm pyâm é nghut lhê. 12 Haû mù, yhang eq Ngá é nguì ngón dangshikaq to râ nghut lhê nghû, yhang lé taî kyo aq. 13 Yhang gi, yhâng é Garai Gasâng é xânghpoq nge wó hkyo é matú myìt zùq byî é eq, Isira-elaq byu pê é matú mara hkô htaí hkungga nhông byî é yánmai, yhang eq yhâng é awùt ashín pé gi, ahtum abyùq é hkyangjong ayá dangshikaq wó kôrâ nghut lhê.” ga taî ri.
14 Haû Midi-an myiwe myhí eq rahá sat huî é Isira-elaq byù é myìng gi, Sime-on yhûmhtu rahtu mâ é ushuq nghut sû, Salu é yhang zo Zimri nghut ri. 15 Haû sat pyám huî é Midi-an byù myiwe myhî é myìng gi, Midi-an yhûmhtu mâ é a-myû koq zau nghut sû, Zura é yhang zo byìzo Kozibi nghut ri.
16 Haû Yhûmsîng Garai gi, Mosheq lé, 17 “Haû Midi-an byu pé lé gyè dông són mù, yhángmòq lé sat pyám keq. 18 Hkâsu mù gâ le, yhángmòq gi, Pe-ora hparà má dùt htoq é hkyo èq le, múzó hau é yánmai wúm jé luî sat pyám huî é myiwe myhí nghut é, Midi-an ushuq hpô é yhang zo byìzo Kozibi é hkyo èq le, núngmòq lé mhaú zo kô é hkûn, núngmòq lé gye pé dông sôn pyâm akô nghut ri.” ga taî ri.