24
Balam gi, Isira-elaq byu pé lé shimân byi râ lé shèq haû Yhûmsîng Garai myìt nguì ô nau é lé myàng jáng, hí pé lé kut é su bùt hpyit wú hkyô lé a ho é za, yòso shut myòqdong hu to bê nghut ri. 2 Balam gi, wú kat le, Isira-elaq byu pé a-myû up eq a-myû up kut wàp xuq tô bum é lé myang é hkûn, yhâng chyáng Garai Gasâng é Sô jé mù, 3 yhâng é dang lé,“Shî gi, Be-ori é yhang zo Balam é myìqhtoi dang,
san za byu myàng su é myìqhtoi dang,
4 Garai Gasâng é mungdang pé lé wó gyo luî,
haû Wum-o a-tsam dìk shoq bò Su é shing-rán lé myàng mù,
myòq san za hpóng luî, ngóm gòp su é myìqhtoi dang nghut lhê.
5 Yakup ê, náng é zúm pé gi,
Isira-elaq ê, náng é nyì jowò pé gi, hkâ-í yhang yúng ri myhî-nhung!
6 Haú pé gi, langhkaû pé su dam ngón mù,
wuìlàng yàm mâ é hkyâm pé su dùt luî,
haû Yhûmsîng Garaî èq hô tô é achyo gàm pé su dùt mù,
wui yàm pé mâ é kyám gâm pé su nghut ri.
7 Yhâng é wûshang pé mai ûchyam yuì râ nghut lhê;
yhâng é kyô myui gi, wuì myô é jang má hkyó râ nghut lhê.
Yhâng é hkóhkâm gi, Agaq gá su htoq hpúng bo ri;
yhâng é mîngdán gi, kô myhang ri.
8 Garai Gasang gi, yhang lé Egutuq ming mai shuî htoq lô bê nghut ri;
yhang gi, nolám su wum bo ri.
Yhang gi, gyè kut é gótû a-myû wuì lé myhui pyám mù,
haú bâng é showui pé lé ajàp azo kut pyám luî,
haú bang lé, yhâng é laî èq bìk ròt râ nghut ri.
9 Yhang gi, hkanghkyi lo eq hkanghkyi zìng su, myigùng má gyèk mù, lèq up tô ri;
ó yùq wá, yhang lé nyaú dang wám taí râ lhú?
Nang lé shimân byî é sû gi, shimân byî é hui sháng gàq;
nang lé nhîng é sû gi, nhîng pyâm é hui sháng gàq!” ga taî ri.
10 Haú hkûn, Balak gi, Balam lé nhikmó-yo mù, yhâng é lòq bàt luî, yhang lé, “Ngò gi, ngá é gye pé lé nhing râ matú nang lé ji yu é ru nghut lhê; nghut kôlhang, nàng gi, yhángmòq lé shî sum dá yhang shimân byi bê nghut ri. 11 Ahkuî, radá dâm náng é yhûm shut taû ló byùq àq! Ngò gi, nang lé chyûnghuq gyai yhang byi râ nghû taî tô é wá, haû Yhûmsîng Garai gi, nang lé chyûnghuq byi râ mai hkûm pyám bê nghut ri.” ga taî ri.
12 Haû jáng, Balam gi, Balak lé, “Nàng, ngá chyáng nhang kat é lagyô pé lé, 13 ‘Balak gi, yhâng é hkóhkâm wâng mâ é ngùn hîng bànshoq ngo lé byî é nghut kôlhang, ngò gi, haû Yhûmsîng Garaî é hkunmó lé lu lai luî, ngá myìt mai ge é a ge é haí jung le a wó kut. Haû Yhûmsîng Garai taî é lé za ngò kut ra râ nghut lhê.’ nghû, ngò taí bê a nghut lhí? 14 Ahkuî, ngò gi, ngá é byu pê chyáng taû ló berâ nghut lhê; nghut kôlhang, gyô to aq; byù shí bang, jé lô râ buìnyì pé má náng é byu pé lé hkâsu kut râ hkyô, ngò, nang lé tûn shit bá.” ga tû taî ri.
Balam Myí Dam Dàm Taî É Dang Pé
15 Hau htâng, yhang gi, yhâng é dang lé,
“Shî gi, Be-ori é yhang zo Balam é myìqhtoi dang,
san za byu myàng su é myìqhtoi dang,
16 Garai Gasâng é mungdang pé lé wó gyo luî,
Myhang htáng Su chyáng mâ é hpàqchyî wó mù,
haû Wum-o a-tsam dìk shoq bò Su é shing-rán lé myàng luî,
myòq san za hpóng mù, ngóm gòp su é myìqhtoi dang nghut lhê.
17 Ngò gi, yhang lé myàng bê, nghut kôle, ahkuî a nghut;
ngò gi, yhang lé wú bê, nghut kôle, chyáng za má a nghut;
Yakup chyáng mai kyî racham lé lô râ nghut lhê;
Isira-elaq chyáng mai ùp é dumbáng htoq lô râ nghut lhê.
Yhang gi, Moba é ugyap pé lé lhoqhkyop pyám mù,
Shet é awùt ashín bànshoq lé lhoqhtên pyám râ nghut lhê.
18 Edom mau lé sing yù mù,
yhâng é gyè nghut é, Se-ira bùm mau lé sing yù luî,
Isira-elaq gi, wum-o bo jàt lò râ nghut lhê.
19 Yakup chyáng mai ùp râ byù rayùq htoq lô mù,
myìt gyó tô é wà pé mâ é byu pé lé lhoqhtên pyám râ nghut lhê.” ga taî ri.
Balam Ngó Dam Dàm Taî É Dang Pé
20 Hau htâng, Balam gi, Amalek lé myàng mù, yhâng é dang lé,
“Amalek a-myû gi, a-myû wuì mâ é ushuq nghut ri;
nghut kôlhang, yhángmòq é jihtûm gi, bànshoq htên byòq byùq é hkyô nghut ri.” ga taî ri.
Balam Hkyuq Dam Dàm Taî É Dang Pé
21 Hau htâng, yhang gi, Keni byu pé lé myàng mù, yhâng é dang lé,
“Núngmòq é nyì jowò gi, gingtîng ri;
núngmòq é sut gi, lungmó zîng má sut sut tô ri;
22 nghut kôlhang, Keni byù núngmòq gi,
núngmòq lé Ashuri byu pê èq shúm kut yu é hkûn, htên byòq é hui kôrâ nghut lhê.” ga taî ri.
Balam Nyhit Dam Dàm Taî É Dang Pé
23 Hau htâng, yhang gi, yhâng é dang lé,
“Agâ! Garai Gasang shí hkyô kut jáng, ó yùq wó lùt râ lhú?
24 Kupru zinlónga yâm mai wuìsanghpo pé lé lô râ nghut lhê;
yhángmòq gi, Ashuri eq Ebera lé zìk zo kôrâ nghut lhê;
nghut kôlhang, yhángmòq le htên byòq byùq râ nghut lhê.” ga taî ri.
25 Haû mù, Balam gi, toq luî yhûm shut taû ló bê nghut mù, Balak le ló byùq bê nghut ri.