Balam Sânghi Taî É Dang Pé
23
Balam gi, “Ngá é matú shî má hkungga gyàp nyhit lhum saí mù, nohtó nyhit du eq saulo nyhit du hên byi aq.” ga Balak lé taî ri. 2 Balak gi, Balam taî é eq rajung za kut é nghut mù, yhángnhik í yùq gi, hkungga gyàp ralhum má nohtó radu eq saulo radu du kut nhong akô nghut ri.3 Haû mù, Balam gi, Balak lé, “Shî, náng é myi nyhé hkungga nàm má yàp to aq; ngò gówô má ê shi bá. Haû Yhûmsîng Garai, ngo lé lé hui râ âbe. Yhang, ngo lé tûn shit é gû, ngò, nang lé taî kyo râ nghut lhê.” ga taî ri. Haû mù, yhang gi, myhang é dánpyut kong shut dòq e ló ri.
4 Garai Gasang gi, yhang lé lhom hui mù, Balam gi, “Ngò gi, hkungga gyàp nyhit lhum hen to mù, ralhum má nohtó radu eq saulo radu du nhông byi bê nghut lhê.” ga taî ri.
5 Haû Yhûmsîng Garai gi, Balam é nhut má dang kat byi luî, “Balak chyáng taû ló mù, dang shî yhang lé ló taí aq.” ga taî ri.
6 Haû mù, yhang gi, Balak chyáng taû e é hkûn, yhang eq Moba byu pê é zaugun sûwún wuî bànshoq bang eq rahá, yhâng é myi nyhé hkungga yàm má yàp tô bum é lé ló myang ri. 7 Haú hkûn, Balam gi, yhâng é dang lé,
“Balak gi, ngo lé Aram mai ji yu ri;
Moba byu pê é hkóhkam gi, buìhtoq hkyam mâ é bùm pé mai ngo lé shuî yu ri.
Yhang gi, ‘Lé aq; ngá é matú Yakup lé bo nhing aq;
lé aq, Isira-elaq lé hkyîm nhing aq.’ ga taî ri.
8 Garai Gasang a nhîng é bang lé,
ngò gi, hkâsu kut nhing râ lhú?
Haû Yhûmsîng Garai a hkyîm nhîng é bang lé,
ngò gi, hkâsu kut hkyîm nhing râ lhú?
9 Ngò gi, lùqgòk bùm nyuq mai yhángmòq lé myàng mù,
myhang é jang pé mai yhángmòq lé byu wú é nghut lhê.
Ngò gi, gótû san nghut é a-myû lé myàng ri;
yhángmòq gi, gótû a-myû wuì má a bo é nghut lhê.
10 Ó yùq wá, hpuílhup su myô é Yakup é awùt ashîn pé lé wó nghap râ lhú?
Ó yùq wá, Isira-elaq é myi tú mâ é ratú lé wó són râ lhú?
Haû díngmán sû shi é su, ngò shî sháng gàq;
ngá é jihtûm gi, yhâng é jihtûm su dùt sháng gàq!” ga taî ri.
11 Haû mù, Balak gi, Balam lé, “Nàng, ngo lé haî kut lhê lhú? Ngá é gye pé lé bo nhing râ matú, ngò, nang lé rû ji yu le nhîng, haî le a kut é za, yhángmòq lé shèq shimân byî nyi ri nhung lhî!” ga taî ri.
12 Balam gi, “Haû Yhûmsîng Garai mai ngá é nhut má kat byî é dang lé, ngò a taî é ge kut râ lhú?” ga tû taî ri.
Balam Í Dam Dàm Taî É Dang Pé
13 Haû mù, Balak gi, yhang lé, “Lé aq; yhángmòq lé wó myang é gówô má ngò eq rahá ê gòq; haú mai, nàng, yhángmòq bànshoq bang lé a myang é za, yhángmòq é wàp yàm pé lé za myàng râ nghut lhê. Ngá é matú haú mai yhángmòq lé bo nhing aq.” ga taî ri. 14 Haû mù, yhang gi, Balam lé, Pisiga bùm gùng mâ é Zohpim é yò má shuî ê mù, haú má hkungga gyàp nyhit lhum saí luî, hkungga gyàp ralhum má nohtó radu eq saulo radu du kut nhông byî ri.
15 Balam gi, Balak lé, “Ngò, hê má Yhûmsîng Garai eq ê huî é u, nàng, shî, náng é myi nyhé hkungga nàm má yàp to aq.” ga taî ri.
16 Haû Yhûmsîng Garai gi, Balam lé lhom hui mù, yhâng é nhut má dang kat byi luî, “Balak chyáng taû ló mù, dang shî yhang lé ló taí aq.” ga taî ri.
17 Haû mù, yhang, yhâng chyáng ló é hkûn, yhang eq Moba byu pê é zaugun sûwún wuî bànshoq bang eq rahá, yhâng é myi nyhé hkungga yàm má yàp tô bum é lé ló myang ri. Haú hkûn, Balak gi, yhang lé, “Haû Yhûmsîng Garai haî taî ri lhú?” ga lhom myî ri.
18 Haû mù, Balam gi, yhâng é dang lé,
“Balak hkóhkâm ê, toq mù, gyo aq;
Zipora é yhang zo ê, ngá é dang lé gyo aq.
19 Garai Gasang gi, byù a nghut é yánmai,
mhaú râ a nghut;
Yhang gi, xângzo byù a nghut é yánmai,
myìt htaí râ a nghut.
Yhang taí luî, a kut é nghut lhê lhú?
Yhang danghtum htûm to luî, a lhoqdìk é nghut lhê lhú?
20 Shimân byi aq gâ é hkunmó lé ngò hàp yu to bê nghut lhê;
Yhang shimân byi bê nghut lhê; haú lé ngò wó ge htaí râ a nghut lo.
21 Yakup chyáng yubàk mara a myàng,
Isira-elaq chyáng wuîhke jamjau hkyô a jòq nghut ri.
Yhángmòq é Garai Gasang nghut é, haû Yhûmsîng Garai gi, yhángmòq eq rahá nghut nyi ri;
hkóhkâm ga garû é htê yhángmòq chyáng htoq nyi ri.
22 Garai Gasang gi, yhángmòq lé Egutuq ming mai shuî htoq lo é nghut ri;
yhángmòq gi, nolám su wum-o bo ri.
23 Bùt hpyit wú hkyô gi, Yakup lé wó záng râ a nghut;
lòng kat é hkyô gi, Isira-elaq lé wó záng râ a nghut.
‘Garai Gasang haî kut bê nghu é hkyô lé wú keq.’ ga,
Yakup eq séng luî le,
Isira-elaq eq séng luî le, taí kôrâ nghut lhê.
24 Byù shí bang gi, hkanghkyi zìng su toq râ nghut lhê;
yhángmòq gi, hkanghkyi lo su lâng nyhang kat râ nghut lhê;
yhang gi, wó yu lo é zè lé a zo shî é htoq agó,
ngàt zing tô é shô é sui lé a shuq shi-má, hkyîng no râ a nghut.” ga taî ri.
25 Haú hkûn, Balak gi, Balam lé, “Yhángmòq lé nhing le hkâ-nhing, shimân le hkâ shimân byi.” ga taî ri.
26 Balam gi, “Ngò gi, Yhûmsîng Garai mai haî taî le haî kut ra râ nghut lhê nghû, nang lé taí bê a nghut lhí?” ga tû taî ri.
Balam Súm Dam Dàm Taî É Dang Pé
27 Haú hkûn, Balak gi, Balam lé, “Lé aq, ngò, nang lé gówô má dum shuî ê bá. Garai Gasang gi, nang lé, haû mai, ngá é matú yhángmòq lé nhing nhâng âbe.” ga taî ri. 28 Haû mù, Balak gi, yòso lé byu myang é Pe-ora bùm gùng má Balam lé shuî dòq e ri.