Myi-kok Pé Tuq É Hkyô
8
Haû Yhûmsîng Garai gi, Mosheq lé 2 “Arun lé dang nyô mù, yhang lé, ‘Nàng myi-kok pé hen é hkûn, myi-kok nyhit lhûm é lé myi-kok tsûngjang hí shut dùq râ dông tuq àq.’ nghû àq.” ga taî ri.3 Arun gi, haû Yhûmsîng Garai mai Mosheq lé hkunmó hkyô é eq rajung za kut luî, myi-kok pé mâ é myi lé, myi-kok tsûngjang hí shut dùq râ dông tuq to bê nghut ri. 4 Myi-kok tsûngjang lé gi, hau é achuq mai abó jé shoq hing èq bàt saî htoq yu é nghut lhê. Myi-kok tsûngjang lé gi, haû Yhûmsîng Garai mai Mosheq lé shit kyô é azòng roq saî é nghut ri.
Lewiq Byu Pé Lé Gótû San Kut Gam Hkoq É Hkyô
5 Haû Yhûmsîng Garai gi, Mosheq lé, 6 “Isira-elaq byu pé bànshoq bâng chyáng mai Lewiq byu pé lé hkyin yù mù, yhángmòq lé htûngli dông lhoq sân-yúng byi aq. 7 Yhángmòq lé lhoq sân-yúng byî é hkûn shí dông kut àq; yhángmòq lé lhoq sân-yúng é wuì hpyûn gyun luî, yhángmòq é ragùng gón mâ é sho-maú lé wùq pyám nhâng mù, yhángmòq é mèbu pé lé chî pyám nhâng àq. Haú hkûn, yhángmòq gùng yhángmòq lhoqsan lhoqyúng yû râ nghut lhê. 8 Hau htoq agó, yhángmòq lé, tsanlun xû eq nyhô tô é je nú é mún nghut é gùqzò hkungga eq nohtó zo radu yu lé nhâng mù, nàng gi, mara hkyut hkunggâ é matú nohtó zo gódu lé yu ra râ nghut lhê. 9 Lewiq byu pé lé, haû zùphpong zúm hí má shuî lé mù, Isira-elaq shiwa byù hpúng gón lé ji tsîng to aq. 10 Nàng gi, Lewiq byu pé lé, Yhûmsîng Garaî é hí má shuî lé râ nghut mù, Isira-elaq byu pé gi, yhángmòq é ahtoq má lòq ke byi ra kôrâ nghut lhê. 11 Arun gi, Lewiq byu pé mai haû Yhûmsîng Garaî é múzó lé wó wûn wàq râ matú, Isira-elaq byu pê chyáng mâ é wàq hê hkungga dông, yhángmòq lé Yhûmsîng Garaî é hí má nhông byi ra râ nghut lhê.
12 Hau htâng, Lewiq byu pé gi, nohtó zo í dû é ulhum má yhángmòq é lòq ke byi ra râ nghut lhê; nàng gi, radu lé, mara hkyut hkungga, gódu lé, myi nyhé hkungga kut luî, Lewiq byu pê é matú mara hkô htaí hkungga dông haû Yhûmsîng Garaî é hí má nhông byi aq. 13 Lewiq byu pé lé, Arun eq yhâng é yùqzô pê hí má yàp nhang to luî, yhángmòq lé wàq hê hkungga dông Yhûmsîng Garai lé nhông byi aq. 14 Nàng gi, shí dông mai, Lewiq byu pé lé, gótû Isira-elaq byu pê chyáng san kut gam hkoq yû ra râ nghut luî, Lewiq byu pé gi, Ngá é byu pé dùt râ nghut lhê.
15 Nàng, Lewiq byu pé lé lhoq sân-yúng mù, yhángmòq lé, wàq hê hkungga dông nhông byî é htâng má, yhángmòq gi, zùphpong zúm má múzó lé wó wùn wàq bê nghut lhê. 16 Yhángmòq gi, Isira-elaq byu pê chyáng mai Ngo lé àp byî pyám bê bang yhang nghut mù, Ngò gi, Isira-elaq byu pé mâ é sânghi hku é zo-mún ahkô má, Ngá é byu pé dông yhángmòq lé hkyin kat yû bê nghut lhê. 17 Isira-elaq byu pê chyáng mâ é sânghi hku é, byù nghut nghut, gaunyhaú nghut nghut, Ngá é chyat nghut lhê. Ngò gi, Egutuq ming mâ é sânghi hku é lhúnglháng lé sat pyâm é hkûn, yhángmòq lé gótû san kut Ngá é matú hkyin masàt to bê nghut lhê. 18 Haû mù, Ngò gi, Lewiq byu pé lé, Isira-elaq byu pê é zo-mún bànshoq é ahkô má hkyin kat yû bê nghut lhê. 19 Ngò gi, sân-yúng é jowò má Isira-elaq byu pê chyâng htèp e é hkûn, yubàk wúm a hui zo kó sháng gàq nghû, yhángmòq é matú mara hkô htaí kut râ matú le, Isira-elaq byu pê é gùnglik dông zùphpong zúm má nhông byî é amû kut râ matú le, Arun eq yhâng é yùqzô pé lé, Isira-elaq byù bànshoq bâng chyáng mai Lewiq byu pé lé chyûnghuq dông byi bê nghut lhê.” ga taî ri.
20 Mosheq, Arun eq Isira-elaq byù hpúng gón gi, haû Yhûmsîng Garai mai Mosheq lé hkunmó hkyô é eq rajung za, Lewiq byu pé lé haú dông kut bekô nghut ri. 21 Haû Lewiq byu pé gi, yhûmsing gùng yhûmsîng lhoq sân-yúng yû kôluî, yhángmòq é mèbu lé chi bekô nghut ri. Hau htâng, Arun gi, yhángmòq lé, haû Yhûmsîng Garaî é hí má wàq hê hkungga dông nhông byi luî, yhángmòq lé lhoq sân-yúng râ matú, yhángmòq é mara hkô htaí hkungga nhông byi bê nghut ri. 22 Hau htâng, Lewiq byu pé gi, Arun eq yhâng é yùqzô pé hkyô shit é eq rajung za, zùphpong zúm má nhông byî é amû lé zui saí bekô nghut ri. Isira-elaq byu pé gi, Lewiq byu pé eq séng luî, haû Yhûmsîng Garai mai Mosheq lé hkunmó hkyô é eq rajung za kut bekô nghut ri.
23 Haû Yhûmsîng Garai gi, Mosheq lé, 24 “Lewiq byu pé cháng râ hkyô pé gi, chyungxe zànwut í xe ngo zân lai bê é yùqgè wuì, zùphpong zúm mâ é múzó lé wó bo wùn wàq râ nghut lhê; 25 nghut kôlhang, chyungxe zànwut ngo xê zàn bò jáng gi, wùn wàq nyi é wò hkyut pyám ra râ nghut mù, hai wò le a wùn wàq lô é za, 26 zùphpong zúm má yhángmòq é yhang gu yhang mâng pé múzó wùn wàq nyi é má ge htuqbáng byî lhê; nghut kôlhang, yhángmòq yhang gi, hai mú le ge wùn wàq râ a nghut. Haû mù, nàng gi, Lewiq byu pé wùn wàq râ wò lé shí dông tsing hûn ra râ nghut lhê.” ga taî ri.