Lhoqlhai Poî
9
Haû Yhûmsîng Garai gi, Isira-elaq byu pé Egutuq ming mai htoq lo é htâng í zan zàn, sânghî lhôhkyap má, Sinaq Yòso má Mosheq lé dáng nyo ri; Yhang taî é gi, 2 “Haû Isira-elaq byu pé lé, masàt tô é ahkyíng má Lhoqlhai Poî kut nhâng ra râ nghut lhê. 3 Poî haú lé, hau é cháng ra târâ pé eq htûngli bànshoq eq rajung za, masàt tô é ahkyíng nghut é shí hkyap raxe myi nyí nyí chutshúm zó má kut ra râ nghut lhê.” gâ ri.4 Haû mù, Mosheq gi, Lhoqlhai Poî kut râ matú Isira-elaq byu pé lé taî kyô é nghut luî, 5 yhángmòq gi, sânghî lhôhkyap raxe myi nyí nyí chutshúm zó lé, Sinaq Yòso má poî haû kut bekô nghut ri. Isira-elaq byu pé gi, haû Yhûmsîng Garai mai Mosheq lé hkunmó hkyô é eq rajung za, jung hkangmó lé kut bekô nghut ri.
6 Nghut kôlhang, yhángmòq mâ é ra-am gi, shî mang é yánmai htûngli dông a sanséng dùt byùq kô é nghut mù, haú nyí má Lhoqlhai Poî haû a wó kut kó nghut ri. Haû mù, yhángmòq gi, haú nyí yhang, Mosheq eq Arun chyáng lé kôluî, 7 Mosheq lé, “Ngá-mòq gi, shî mang é yánmai a sanséng dùt byùq bê nghut lhê; nghut kôlhang, ngá-mòq, haî mù luî masàt tô é ahkyíng má, gótû Isira-elaq byu pé eq rahá haû Yhûmsîng Garai lé hkungga nhông byi râ mai hkûm pyâm é huî nyi lhê lhú?” ga taî akô nghut ri.
8 Haú hkûn, Mosheq gi, yhángmòq lé, “Hkâhân shi kó; núngmòq eq séng luî haû Yhûmsîng Garai taî é lé hí ngò gyô wú bá.” ga tû taî ri.
9 Haú hkûn, haû Yhûmsîng Garai gi, Mosheq lé, 10 “Isira-elaq byu pé lé îsu nghû taî kyo aq; ‘Núngmòq eq núngmòq é awùt ashín mâ é rayùq yùq, shî mang é yánmai a sanséng dùt byùq é nghut kôle, gyunghkyô htoq nyi é nghut kôle, haû Yhûmsîng Garaî é Lhoqlhai Poî lé kut ra râ nghut lhê. 11 Nghut kôlhang, yhángmòq gi, í hkyap hkyap raxe myi nyí chutshúm zó má poî haû kut ra râ nghut mù, sau zo sho eq rahá, múnchi a bo é mùk eq hkô é mhan-haq hpoqnòq xun lé zo ra râ nghut lhê. 12 Yhángmòq gi, haú pé haî lé le htang nàpkyó jé shoq ge tô to râ a nghut é htoq agó, showui pé lé le ge lhoqhkyui râ a nghut. Yhángmòq gi, Lhoqlhai Poî haû kut é hkûn, cháng ra târâ pé bànshoq lé cháng ra kôrâ nghut lhê. 13 Nghut kôlhang, rayùq yùq, htûngli dông sansêng é htoq agó, gyunghkyô le a htoq é wá, Lhoqlhai Poî a kut é nghut jáng, yhang gi, masàt tô é ahkyíng má, haû Yhûmsîng Garaî é hkungga lé a nhông byî é yánmai, yhûmsing a-myû mai chyung hpyit pyâm é hui ra râ nghut lhê. Yhang gi, yhâng é mara dam hui zo râ nghut lhê.
14 Núngmòq chyáng lé nghêhkau nyi é byù bíng le, haû Yhûmsîng Garaî é Lhoqlhai Poî lé kut nau é nghut jáng, hau é cháng ra târâ pé eq htûngli bànshoq eq rajung za kut ra râ nghut lhê. Haû mù, gótû a-myu é matú nghut nghut, núngmòq a-myu é matú nghut nghut, cháng ra târâ gi, rajung za nghut lhê.’ nghû àq.” ga taî ri.
Sàksé Zúm Htoq Má Mhut Htup Tô É Hkyô
15 Dangshikaq târâ kat tô é zúm nghut é sàksé zúm lé saî shap kat é buìnyì má, zúm haú lé mhut htup tô ri. Mhut haû gi, myínhtâng mai htang nàpkyó jé shoq zúm hau é ahtoq má myi su dùq nyi ri. 16 Haú dông xoq dùt nyì râ nghut mù, zúm haú lé mhut htup to luî, myín lé myi su dùq nyi ri. 17 Zúm htoq mâ é mhut htòt hkangmó, Isira-elaq byu pé gi, châng htoq luî, mhut hká má ló nô le hká má wàp xuq akô nghut ri. 18 Isira-elaq byu pé gi, haû Yhûmsîng Garaî é hkunmó eq rajung za châng htoq ló kômù, Yhâng é hkunmó eq rajung za wàp xuq akô nghut ri. Yhángmòq gi, sàksé zúm má mhut hkâ-myháng htup tô le hkâ-myháng wàp haú má xoq nyi nyi akô nghut ri. 19 Sàksé zúm htoq má mhut myáng myáng htup tô é hkûn, Isira-elaq byu pé gi, Yhûmsîng Garaî é dangmó lé cháng luî, gyunghkyô a htoq ló kó nghut ri. 20 Radá dá, sàksé zúm htoq má mhut myáng shoq a htup to nghut ri; haû mù, yhángmòq gi, haû Yhûmsîng Garaî é hkunmó eq rajung za wàp xuq kômù, Yhâng é hkunmó eq rajung za htoq ló akô nghut ri. 21 Radá dá, mhut gi, myín mai htang nàpkyó jé shoq za htup luî, nàpkyó lé htòt jáng, yhángmòq gi, châng htoq ló akô. Nyí lé nghut nghut, myín lé nghut nghut, mhut htòt é hkûn gi, yhángmòq le châng htoq ló akô nghut ri. 22 Mhut gi, sàksé zúm htoq má, í nyí htup tô é nghut nghut, lha-mó rahkyap htup tô é nghut nghut, razàn htup tô é nghut nghut, Isira-elaq byu pé gi, wàp haú má nyi nyì kômù, a htoq ló nghut ri; nghut kôlhang, mhut htòt jáng gi, yhángmòq le châng htoq ló akô nghut ri. 23 Yhángmòq gi, haû Yhûmsîng Garaî é hkunmó eq rajung za wàp xuq kômù, Yhâng é hkunmó eq rajung za châng htoq ló akô nghut ri. Yhángmòq gi, haû Yhûmsîng Garai mai Mosheq dông hkyô tô é hkunmó eq rajung za, Yhûmsîng Garaî é dangmó lé châng akô nghut ri.