Kohat A-myû Koq Bang
4
Haû Yhûmsîng Garai gi, Mosheq eq Arun nhiktâng lé, 2 “Lewiq up mâ é Kohat a-myû koq lé, yhángmòq é a-myû koq pé eq yhûmhtu pé má cháng luî, 3 zùphpong zúm má mú lé wó dójaú râ nghut é sum xê zàn mai ngo xê zàn gyoro mâ é yùqgè wuì bànshoq lé jihpán nghap yû keq.4 Chyoiyúng htâng é zè pé lé wú gon râ eq séng luî, zùphpong zúm má Kohat a-myû koq mâ é bang wùn wàq râ múzó gi, 5 xuq tô é wàp lé htòt râ nghut jáng, Arun eq yhâng é yùqzô pé wang ló mù, wàp kyô pán-gyang lé yu hkyó luî, dangshikaq târâ kat tô é sàksé dò lé hau èq nghop ra râ nghut lhê. 6 Hau htâng, yhángmòq gi, hau é ahtoq má gîng é sho-kuq long nghop mù, mauhkûng nyuì pán htû long lé puq nghop luî, wàq râ gán-yang pé chyoî ra râ nghut lhê.
7 Hau htâng, yhángmòq gi, nhông byî é mùk Tô Shit é mùkgyàp má mauhkûng nyuì pán htû long hkang luî, hau é ahtoq má hkoq hpyén pé, gòmhtung pé, hkoq pé eq shuq jung hkungga kat é yambú pé ke ra râ nghut lhê; ayang Tô Shit é mùk le mùkgyàp haú má jâng tô to ra râ nghut lhê. 8 Yhángmòq gi, haú pé má zam zam ne é pán nghop mù, gîng é sho-kuq long dum nghop luî, wàq râ gán-yang pé chyoi to ra râ nghut lhê.
9 Yhángmòq gi, mauhkûng nyuì pán lé yù mù, myòq myàng râ matú nghut é myi-kok tsûngjang eq hau é myi-kok pé, nyàp pé, nyàp kat hkoq pé eq haú má chûng râ tsanlun xû kat é yambú pé bànshoq lé nghop ra râ nghut lhê. 10 Yhángmòq gi, haú lé le, haú mâ é chûngzè pé bànshoq lé le, gîng é sho-kuq lông èq htup luî, haú lé wàq é azòng má kat ra râ nghut lhê.
11 Hau htâng, yhángmòq gi, hîng hkungga gyàp lé mauhkûng nyuì pán hkang luî, gîng é sho-kuq long nghop mù, wàq râ gán-yang pé lé chyoi to ra râ nghut lhê.
12 Yhángmòq gi, nhông byî é mú zui saî é hkûn sân-yúng jang má chung é zè pé bànshoq lé yù mù, mauhkûng nyuì pân èq htup luî, gîng é sho-kuq long nghop mù, haú pé lé wàq râ azòng má kat to ra râ nghut lhê.
13 Yhángmòq gi, gyi hkungga gyàp mâ é myiwap lé gòt pyám mù, me mê é pán nghop luî, 14 hkungga gyàp má nhong é múzó zui saî é hkûn chung é zè nghut é, myi hpan pé, akó mâ é sho htau dun pé, gòt zè pé, hkoq mó pé bànshoq lé, hau é ahtoq má ke mù, gîng é sho-kuq lông èq nghop luî, wàq râ gán-yang pé lé chyoî ra râ nghut lhê.
15 Arun eq yhâng é yùqzô pé mai chyoiyúng jowò eq haú mâ é chûngzè bànshoq lé ban nghop é htâng, xuq tô é wàp htòt râ za nghut é hkûn shèq, Kohat a-myû koq mâ é bang wàng mù, haú pé lé ge wàq râ nghut lhê. Nghut kôlhang, yhángmòq gi, chyoiyúng zè pé lé ge záng râ a nghut; záng é nghut jáng, yhángmòq shî râ nghut lhê. Kohat a-myû koq mâ é bang gi, zùphpong zúm mâ é zè haú pé lé wàq ra râ nghut lhê.
16 Hkyangjong Arun é yhang zo Ele-aza wú gon râ gi, myi tuq râ xû, namngón shôm, ayang nhong é gùqzò hkungga eq bùt râ namngón xû pé nghut é htoq agó, yhang gi, sàksé zúm gón eq haú mâ é jung hkangmó lé le, chyoiyúng jowò eq haú mâ é chûngzè pé lé le, wú gôn é sû dùt râ nghut lhê.” ga taî ri.
17 Haû Yhûmsîng Garai gi, Mosheq eq Arun lé, 18 “Kohat a-myû koq lé Lewiq up mai hkâ lhoqhtûm pyám kó. 19 Chyoiyúng htâng é zè pé má yhángmòq chyâng lé lo é hkûn, yhángmòq a shi byùq é za chyungxe wó dui nyì kó sháng gàq, shí dông kut keq; Arun eq yhâng é yùqzô pé hí sân-yúng jowò má wàng mù, ó le ó wùn wàq zui saí râ múzó lé gam yù ra râ nghut lhê. 20 Nghut kôlhang, Kohat a-myû koq bang gi, haû chyoiyúng htâng é zè pé lé wú râ ga razùp lháng ge wàng râ a nghut, wàng jáng, yhángmòq shî byùq râ nghut lhê.” ga taî ri.
Gerishon A-myû Koq Bang
21 Haû Yhûmsîng Garai gi, Mosheq lé, 22 “Gerishon a-myû koq lé, yhángmòq é a-myû koq pé eq yhûmhtu pé má cháng luî, 23 zùphpong zúm má mú lé wó dójaú râ nghut é chyungxe zànwut sum xê zàn mai ngo xê zàn gyoro mâ é yùqgè wuì bànshoq lé jihpán nghap yù keq.
24 Gerishon a-myû koq bang wàq râ wò eq yhángmòq é gótû múzó pé gi, a-ô mâ é dông nghut lhê. 25 Yhángmòq gi, sàksé zúm é pán-gyang pé nghut é, zùphpong zúm é pán-gyang pé, haú lé nghop é gîng é sho-kuq long, zùphpong zúm hkûm é pán-gyang pé, 26 sàksé zúm eq hkungga gyàp lé kyâm lhîng tô é pán-gyang pé, wâng hkûm é pán-gyang pé, tui pé eq zúm má múzó wùn wàq é hkûn chung é ze pé bànshoq lé tsîng yù mù wàq ra râ nghut lhê. Gerishon a-myû koq bang gi, zè haú pé eq sêng é má râ é bànshoq lé kut ra kôrâ nghut lhê. 27 Yhángmòq gi, zè wàq é hkyô má nghut nghut, gótû múzó kut é má nghut nghut bànshoq lé, Arun eq yhâng é yùqzô pé shit kyô é dông kut ra râ nghut lhê. 28 Haû gi, zùphpong zúm má Gerishon a-myû koq bang wùn wàq râ múzó nghut lhê. Yhángmòq é wò lé gi, hkyangjong Arun é yhang zo Ihtama shit kyô é dông kut ra râ nghut lhê.
Merari A-myû Koq Bang
29 Merari a-myû koq bang lé, yhángmòq é a-myû koq pé eq yhûmhtu pé má cháng luî, 30 zùphpong zúm má mú lé wó dójaú râ nghut é chyungxe zànwut sum xê zàn mai ngo xê zàn gyoro mâ é yùqgè wuì bànshoq lé jihpán nghap yû keq. 31 Zúm má yhángmòq zui saí râ eq wàq râ wò pé gi, sàksé zúm mâ é siklong pé, haú má kyâng é sik-yang pé, zìng pé, hkoq pé, 32 wâng lhînghkyùq mâ é zìng pé eq haú pé tsung é hkoq pé, zúm mâ é sangchyam pé eq tui pé, haú pé eq sêng é má chung é zè jung hkangmó nghut ri. Ó le ó wàq râ zè pé má masàt to ra râ nghut lhê. 33 Haû gi, hkyangjong Arun é yhang zo Ihtama shit kyô é dông, zùphpong zúm má Merari a-myû koq pé wùn wàq râ múzó nghut lhê.” ga taî ri.
Lewiq Up Mâ É A-myû Koq Pé Lé Nghap É Hkyô
34 Mosheq, Arun eq shiwa hpúng gón mâ é ushuq pé gi, Kohat a-myû koq bang lé, yhángmòq é a-myû koq pé eq yhûmhtu pé má cháng mù, 35 zùphpong zúm má mú lé wó dójaú râ nghut é chyungxe zànwut sum xê zàn mai ngo xê zàn gyoro mâ é yùqgè wuì bànshoq lé jihpán nghap é hkûn, 36 2750 yùq wó nghap htoq ri. 37 Haû gi, zùphpong zúm má mú bo wùn wàq é Kohat a-myû koq pé mâ é bànshoq bang nghut ri. Mosheq eq Arun gi, Yhûmsîng Garai mai Mosheq dông hkyô tô é hkunmó eq rajung za yhángmòq lé nghap kô é nghut lhê.
38 Gerishon a-myû koq bang lé, yhángmòq é a-myû koq pé eq yhûmhtu pé má cháng luî, 39 zùphpong zúm má mú lé wó dójaú râ nghut é chyungxe zànwut sum xê zàn mai ngo xê zàn gyoro mâ é yùqgè wuì bànshoq lé jihpán nghap é hkûn, 40 2630 yùq wó nghap htoq ri. 41 Haû gi, zùphpong zúm má mú bo wùn wàq é Gerishon a-myû koq pé mâ é bànshoq bang nghut ri. Mosheq eq Arun gi, Yhûmsîng Garaî é hkunmó eq rajung za yhángmòq lé nghap kô é nghut lhê.
42 Merari a-myû koq bang lé, yhángmòq é a-myû koq pé eq yhûmhtu pé má cháng luî, 43 zùphpong zúm má mú lé wó dójaú râ nghut é chyungxe zànwut sum xê zàn mai ngo xê zàn gyoro mâ é yùqgè wuì bànshoq lé jihpán nghap é hkûn, 44 3200 yùq wó nghap htoq ri. 45 Haû gi, Merari a-myû koq pé mâ é bànshoq bang nghut ri. Mosheq eq Arun gi, Yhûmsîng Garai mai Mosheq dông hkyô tô é hkunmó eq rajung za yhángmòq lé nghap kô é nghut lhê.
46 Haû mù, Mosheq, Arun eq shiwa hpúng gón é ushuq pé gi, Lewiq up bang lé, yhángmòq é a-myû koq pé eq yhûmhtu pé má cháng luî, bànshoq nghap yu akô nghut ri. 47 Zùphpong zúm má mú lé wó dójaú râ nghut é chyungxe zànwut sum xê zàn mai ngo xê zàn gyoro mâ é yùqgè wuì bànshoq gi, 48 8580 yùq bo ri. 49 Haû Yhûmsîng Garai mai Mosheq dông hkyô tô é hkunmó eq rajung za, ó le ó zui saí râ múzó eq wàq râ wò lé masàt akô nghut ri.
Haú dông, Yhûmsîng Garai mai Mosheq lé hkunmó hkyô é eq rajung za yhángmòq lé nghap akô nghut ri.