Lewiq Byu Pé
3
A-ô mâ é gi, haû Yhûmsîng Garai mai Mosheq lé Sinaq Bùm má dáng nyo é hkun lhê é, Arun eq Mosheq nhiktang é awùt ashín byùxik labaû nghut lhê.2 Arun é yhang zo yùqzô pê é myìng gi, yùqzo zo-mún Nadap eq Abihu, Ele-aza, Ihtama pé nghut akô. 3 Shí bang gi, hkyangjong wò hun é hkûn, namngón xû but huî é, Arun é yùqzo hkyangjông pé nghut akô nghut ri. 4 Nghut kôlhang, Nadap eq Abihu nhik gi, Sinaq Yòso má nghut nyi é hkûn, haû Yhûmsîng Garaî é hí má a masàt tô e myî èq hkungga nhông byi luî, Yhûmsîng Garaî é hí má shî byùq bekô nghut ri. Yháng nhiktâng gi, yùqzo a wó kó nghut é yánmai, Ele-aza eq Ihtama nhik gi, yhángmòq é yhâng wa Arun é i-pyàt má hkyangjong múzó lé wùn wàq akô nghut ri.
5 Haû Yhûmsîng Garai gi, Mosheq lé, 6 “Lewiq up bang lé wùt yù mù, hkyangjong Arun lé htuqbáng râ matú, yhâng é hí má shuî lé byi aq. 7 Yhángmòq gi, sàksé zúm é múzó wùn wàq é dông, Arun é matú le, shiwa hpúng gón é matú le, zùphpong zúm má zui saí râ wò yù ra kôrâ nghut lhê. 8 Yhángmòq gi, Zùphpong Zúm mâ é chûngzè bànshoq lé wú gon mù, sàksé zúm mâ é múzó wùn wàq é dông, Isira-elaq byu pê é wò yù ra kôrâ nghut lhê. 9 Lewiq byu pé lé, Arun eq yhâng é yùqzô pê é lòq má àp byi aq; yhángmòq lé gi, yhâng é matú, Isira-elaq byu pê chyáng mai hkyin htoq byî é nghut lhê. 10 Arun eq yhâng é yùqzô pé lé hkyangjong wò byi mù, wò haû yù nhang to aq; sân-yúng jowò má chyâng htèp e é gótû byù ó yùq nghut kôle, sat pyâm é hui ra râ nghut lhê.” ga taî ri.
11 Haû Yhûmsîng Garai gi, Mosheq lé, 12 “Ngò gi, Lewiq byu pé lé, Isira-elaq myiwe wuì mai hku é yùqzo zo-mún é ahkô má, Isira-elaq byu pê chyáng mai hkyin kat yû bê nghut luî, Lewiq byu pé gi, Ngá é byu pé nghut lhê. 13 Hkâsu mù gâ le, zo-mún bànshoq gi, Ngá é nghut lhê. Ngò gi, Egutuq ming má zo-mún bànshoq lé sat pyâm é hkûn, Isira-elaq byu pé mâ é, byù nghut nghut, gaunyhaú nghut nghut, zo-mún hkangmó lé Ngá é matú san kut hkyin htoq tô é nghut lhê. Yhángmòq gi, Ngá é nghut râ nghut lhê. Ngò gi, haû Yhûmsîng Garai nghut lhê.” ga taî ri.
14 Haû Yhûmsîng Garai gi, Sinaq Yòso má Mosheq lé, 15 “Lewiq byu pé mâ é, chyungxe rahkyap lai bê é yùqzo hkangmó lé, yhángmòq é a-myû koq eq yhûmhtu má cháng luî nghap aq.” ga taî ri. 16 Haû mù, Mosheq gi, yhang lé Yhûmsîng Garai hkunmó hkyô é dang eq rajung za yhángmòq lé nghap bê nghut ri. 17 Lewiq é yhang zo yùqzô pê é myìng gi, Gerishon, Kohat eq Merari nghut ri. 18 Gerishon a-myû koq mâ é yhang zô pê é myìng gi, Lipni eq Shimi nghut ri. 19 Kohat a-myû koq mâ é yhang zô pé gi, Amram, Izihara, Hebron eq Uzi-ela pé nghut akô. 20 Merari a-myû koq mâ é yhang zô nhik gi, Mali eq Mushi nghut ri. Shí pé gi, yhángmòq é yhûmhtu má cháng mù, Lewiq up mâ é a-myû koq pé nghut ri.
21 Gerishon mai nyi lo é, Lipni yhûmhtu eq Shimi yhûmhtu gi, Gerishon a-myû koq mâ é yhûmhtu í htu nghut ri. 22 Haú pé mâ é lé nghap é hkûn, chyungxe rahkyap lai bê é yùqzô pé bànshoq gi, 7500 yùq bo ri. 23 Gerishon a-myû koq pé gi, sàksé zúm é nùnghtáng, buìwàng hkyam shut wàp xuq ra râ nghut lhê. 24 Gerishon a-myû koq mâ é, yhûmhtu pê é ushuq gi, La-ela é yhang zo Eli-asap nghut ri. 25 Zùphpong zúm má Gerishon a-myû koq bang wú gon râ wò pé gi, sàksé zúm eq zúm, haú lé nghop é pánlong pé eq zùphpong zúm hkum mâ é pán-gyang, 26 wâng kyâm go é pán-gyang pé, sàksé zúm eq hkungga gyàp lé kyâm lhîng é wâng hkum mâ é pán-gyang eq tui pé, haú pé eq sêng é chûngzè bànshoq nghut ri.
27 Kohat mai nyi lo é, Amram yhûmhtu, Izihara yhûmhtu, Hebron yhûmhtu eq Uzi-ela yhûmhtu pé gi, Kohat a-myû koq mâ é yhûmhtu pé nghut ri. 28 Haú pé mâ é lé nghap é hkûn, chyungxe lha-mó rahkyap lai bê é yùqzô pé bànshoq gi, 8600 yùq bo ri. Kohat a-myû koq mâ é bang gi, sân-yúng jowò lé wò yu é bang nghut ri. 29 Kohat é a-myû koq pé gi, sàksé zúm é maupyî hkyam shut wàp xuq ra râ nghut lhê. 30 Kohat a-myû koq pé mâ é, yhûmhtu pê é ushuq gi, Uzi-ela é yhang zo Elizahpan nghut ri. 31 Yhángmòq wú gon râ wò pé gi, sàksé dò, mùkgyàp, myi-kok tsûngjang, hkungga gyàp pé, nhông byî é mú zui saî é hkûn sân-yúng jang má chung é zè pé, pán-gyang eq, haú pé eq sêng é má chung é zè jung hkangmó nghut ri. 32 Lewiq up mâ é ushuq mó gi, hkyangjong hpó Arun é yhang zo Ele-aza nghut ri. Yhang gi, sân-yúng jowò lé wú gon bang lé ùp râ matú hkyin yu tô é hui sû nghut ri.
33 Merari mai nyi gyó lo é, Mali yhûmhtu eq Mushi yhûmhtu gi, Merari a-myû koq mâ é yhûmhtu nghut ri. 34 Haú pé mâ é lé nghap é hkûn, chyungxe lha-mó rahkyap lai bê é yùqzô pé bànshoq gi, 6200 yùq bo ri. 35 Merari a-myû koq mâ é, yhûmhtu pê é ushuq gi, Abihaila é yhang zo Zurela nghut ri; yhángmòq gi, sàksé zúm é mautsûng hkyam shut wàp xuq ra râ nghut lhê. 36 Merari a-myû koq pé wú gon râ wò pé gi, sàksé zúm é siklong pé, haú má kyáng râ sik-yang pé, zìng pé, hkoq pé, haú pê é chûngzè bànshoq, haú pé eq sêng é má chung é zè jung hkangmó, 37 wâng lhînghkyùq mâ é zìng pé eq haú pé tsung é hkoq pé, zúm mâ é sangchyam pé eq tui pé nghut ri.
38 Mosheq, Arun eq yhang zo yùqzô pé gi, zùphpong zúm hí nghut é, buìhtoq hkyam shut wàp xuq ra râ nghut lhê. Yhángmòq gi, Isira-elaq byu pê é gùnglik dông sân-yúng jowò lé wú gôn é wò yu é bang nghut akô. Haû sân-yúng jowò má chyâng htèp e é góbang ó yùq nghut kôle, sat pyâm é hui ra râ nghut lhê.
39 Haû Yhûmsîng Garaî é hkunmó eq rajung za, Mosheq eq Arun mai yhángmòq é a-myû koq má cháng luî, chyungxe lha-mó rahkyap lai bê é yùqzô pé lé le nghap lhóm jáng, Lewiq byu pê é yhang zo yùqzô pé bànshoq gi, 22000 yùq bo ri.
40 Haû Yhûmsîng Garai gi, Mosheq lé, “Isira-elaq byu pé mâ é, chyungxe lha-mó rahkyap lai bê é yùqzo zo-mún bànshoq lé nghap mù, myìng jihpán gùq yù àq. 41 Isira-elaq byu pé mâ é zo-mún bànshoq é ahkô má, Ngá é matú Lewiq byu pé lé hkyin kat àq; Isira-elaq byu pê é shigu gaunyhaú mâ é sânghi shuî é bànshoq é ahkô má, Ngá é matú Lewiq byu pê é shigu gaunyhaú lé hkyin kat àq. Ngò gi, haû Yhûmsîng Garai nghut lhê.” ga taî ri.
42 Haû mù, Mosheq gi, yhang lé Yhûmsîng Garai hkunmó hkyô é eq rajung za, Isira-elaq byu pê é zo-mún bànshoq lé nghap ri. 43 Haû chyungxe lha-mó rahkyap lai bê é yùqzo zo-mún bànshoq é myìng jihpán gi, 22273 yùq bo ri.
44 Hau htoq agó, Yhûmsîng Garai gi, Mosheq lé, 45 “Haû Isira-elaq byu pê é zo-mún bànshoq é ahko má Lewiq byu pé lé hkyin kat mù, yhángmòq é shigu gaunyhaú hkô má Lewiq byu pê é shigu gaunyhaú lé le hkyin kat àq. Lewiq byu pé gi, Ngá é nghut ra râ nghut lhê. Ngò gi, haû Yhûmsîng Garai nghut lhê. 46 Lewiq byu pê htoq myô chyan tô é Isira-elaq byu pé mâ é zo-mún 273 yùq lé gi, 47 sân-yúng jowò mâ é jàng má cháng luî, rayùq é matú ngùnhkyí nyhit chê èq ramû mû byi mù, hkyi xe htoq râ dùt lhê. 48 Haû myô chyan tô é Isira-elaq byu pé lé hkyi xe htoq yu é ngùn gi, Arun eq yhâng é yùqzô pé lé byi aq.” ga taî ri.
49 Haû mù, Mosheq gi, myô chyan tô é byù du lé, Lewiq byu pé mai hkyi xe htoq yu é ngùn lé gùq tsîng yù bê nghut ri. 50 Yhang gi, sân-yúng jowò mâ é jàng má cháng luî, Isira-elaq byu pê é zo-mún pé mai ngùnhtung 196 rûng yù mù, 51 yhang lé haû Yhûmsîng Garai hkunmó hkyô tô é dang eq rajung za, Arun eq yhâng é yùqzô pé lé, hkyi xe htoq yu é ngùnhtung haû byi bê nghut ri.