Gyung So Laiká 5

Wàp Lé Lhoqsan Lhoqsêng É Hkyô

Haû Yhûmsîng Garai gi, Mosheq lé, 2 “Isira-elaq byu pé lé, yàpjèq nòlì dàp é, mòwìng htoq é, a nghut jáng, màng lé záng luî htûngli dông a sansêng é yùqgè myiwe ó yùq lé nghut kôle, 3 yhángmòq chyáng Ngò nyi é jowò nghut é wàp lé agòt a-û a wó kut kó sháng gàq, wàp mai nhang htoq pyám râ matú hkunmó hkyô aq.” ga taî ri. 4 Haû Isira-elaq byu pé gi, haû eq rajung za kut kômù, yhángmòq lé wàp shinggan shut nhang htoq pyám bekô nghut ri. Yhángmòq gi, haû Yhûmsîng Garai mai Mosheq lé shit kyô tô é eq rajung za kut bekô nghut ri.

Kut Shut Luî Dum Xap É Hkyô

5 Haû Yhûmsîng Garai gi, Mosheq lé, 6 “Isira-elaq byu pé lé îsu nghû taí aq; ‘Yùqgè nghut nghut, myiwe nghut nghut, góyùq lé radông dông kut shut mù, haû Yhûmsîng Garai lé a jujúm pyâm é nghut jáng, yhang gi, mara bò bê nghut mù, 7 yhûmsîng kut shut é mara lé yín yû ra râ nghut lhê. Yhang gi, yhang kut shut é matú, ngo tú mâ é ratú kat jàt luî, yhang kut shut pyám bê sû lé haú pé bànshoq xap ra râ nghut lhê. 8 Nghut kôlhang, haú yùq shi byùq mù, xap é lé lhom hàp yù byi râ suisho chyâng é le a nyi byùq é nghut jáng, xap é zè haû gi, Yhûmsîng Garai eq séng é nghut mù, hkyangjong hpó lé byi ra râ nghut lhê; hau htoq agó, mara kut shut pyám su é matú, mara hkô htaí hkungga kut râ hkungga saulo radu le nhông byi ra râ nghut lhê. 9 Haû Isira-elaq byu pé mai hkyangjông chyáng yu lé é chyoiyúng wàq toq hkungga bànshoq gi, hkyangjong hpô é zè nghut râ nghut lhê. 10 Chyoiyúng zè pé gi, haú pé lé sîng sû eq sêng lhê; nghut kôlhang, hkyangjong hpô chyáng yu lé byî é haí jung le, yhâng é nghut râ nghut lhê.’ nghû àq.” ga taî ri.

A Jujúm É Yhûmsîng Myhí Lé Chyam Wú É Hkyô

11 Haû Yhûmsîng Garai gi, Mosheq lé, 12 “Isira-elaq byu pé lé dang nyô mú, yhángmòq lé, ‘Rayùq yùq é yhang myi hkyô nghoq ló mù, yhang lé a jujúm luî, 13 gótû yùqgè, yhang eq gùngsho zùm yàp kôle, yhang lé mara hun é sàksé le a nyì, yhang haú su kut nyi é má le a myang chyup é nghut luî, yhâng gùng lé lhoqwùq pyám mù, yháng lang é hí má yui zaú zaú tô é nghut jáng le, 14 yhâng gùng wùq byùq to gù má, yhang lâng gi, yhang lé a lum byùq mù, myìt no byùq é nghut jáng le; yhâng gùng a wùq byùq kôle, yhang lâng gi, yhang lé a lum byùq mù, myìt no byùq é nghut jáng le, 15 yùqgè haú yùq gi, yhang myi lé hkyangjong hpô chyáng shuî ê ra râ nghut lhê. Yhang gi, yhang myî é hkô htaí dông mùk-yó gùq mún ngo joí mâ é xê gàmbùm ragàmbùm hkungga lé yu ê ra râ nghut lhê. Yhang gi, haú má tsanlun xû hut kat é le, namngón jung hpyûn kat é le, ge kut râ a nghut; hkâsu mù gâ le, haû gi, kut shut é mara lé lhoqpun râ hkungga nghut é, myìt nò gùqzò hkungga nghut lhê.

16 Hkyangjong hpó gi, myiwe myhí haú lé shuî yù mù, haû Yhûmsîng Garaî é hí má shap to râ nghut lhê. 17 Haû mù, yhang gi, tso-yambú mâ é chyoiyúng wuì lé hut yû mù, sàksé zúm mâ é hpuílhup lé wuì haú má kat râ nghut lhê. 18 Hkyangjong hpó gi, myiwe myhí haú lé Yhûmsîng Garaî é hí má shap tô é htâng, yhâng é xâm lé lhoqhpyap hkyó byi mù, myìt nò hkungga nghut é mara lhoqpun hkungga lé yhâng é lòq má chûng nhâng râ nghut lhê; haú u, nhinghkun zùq nhang é hkô é wuì lé gi, hkyangjông é lòq má chung to râ nghut lhê. 19 Hau htâng, hkyangjong hpó gi, myiwe myhí haú lé dakâm nhâng luî, yhang lé, “Gótû yùqgè le nàng eq gùngsho a zùm yàp, nang le, náng é yhûmsîng hpó mai lai luî, hkyô a sô nghoq é htoq agó, náng chyáng le agòt a-û a dùt é nghut jáng, nhinghkun zùq nhang é hkô é wuì shî gi, náng lé a záng sháng gàq. 20 Nghut kôlhang, nàng gi, náng é yhûmsîng hpó mai lai luî, hkyô nghoq ló mù, gótû yùqgè eq gùngsho zùm yàp luî, náng chyáng agòt a-û dùt bê nghut jáng, 21 (Shí má, hkyangjong hpó gi, myiwe myhí haú lé nhing dang taî ri.) haû Yhûmsîng Garai gi, nang lé, náng é zoyhûm shibó shum byùq nhâng luî, náng é wamdau wâm bung nhang é dông, náng é byu pê chyáng nhîng é hui sû dùt nhâng sháng gàq. 22 Náng é wamdau wâm bung mù, náng é zoyhûm shibó shum byùq râ matú, nhinghkun zùq nhang é hkô é wuì shî gi, náng é gùngdu má wàng sháng gàq.” ga dakâm dang taí râ nghut lhê.

Haú hkûn, myiwe myhí haû gi, “Amen. Haú dông nghut sháng gàq.” ga yín yû ra râ nghut lhê.

23 Hau htâng, hkyangjong hpó gi, nhinghkun haú pé lé laiká ding má kâ tap luî, hkô é wuì haú má chî yù ra râ nghut lhê. 24 Yhang gi, myiwe myhí haú lé, nhinghkun zùq nhang é hkô é wuì haû shuq nhâng râ nghut mù, no hpu zó nhang é eq nhinghkun zùq nhang é wuì haû gi, yhâng chyáng wàng râ nghut lhê. 25 Hkyangjong hpó gi, yhâng é lòq mâ é myìt nò gùqzò hkungga lé yù mù, haû Yhûmsîng Garaî é hí má wàq hê luî, hkungga gyàp má yu to ra râ nghut lhê. 26 Hau htâng, yhang gi, bûn nyì gàmbùm dông gùqzò hkungga lé ra-tsup tsup yû mù, hkungga gyàp má nyhê pyám ra râ nghut lhê; hau htâng, myiwe myhí haú lé wuì haû shuq nhâng ra râ nghut lhê. 27 Myiwe myhí haû yhâng gùng lé agòt a-û kut luî, yhâng é yhûmsîng hpó lé a jujúm é nghut jáng, nhinghkun zùq nhang é eq no hpu nhang é wuì haû lé yhang shuq kat é hkûn, wuì haû yhâng chyáng wang ló mù, yhâng é wamdau wâm é eq yhâng é zoyhûm shibó shum ló râ nghut luî, yhang gi, nhîng é hui sû dùt byùq râ nghut lhê. 28 Nghut kôle, myiwe myhí haû yhâng gùng lé agòt a-û a kut tô é nghut jáng, yhang gi, sanséng luî, mara a bò mù, zo wó dàp râ nghut lhê.

29 Shî gi, myiwe rayùq, yhang lâng mai lai luî, sô nghoq ló mù, yhâng gùng lé agòt a-û kut yu é hkûn lhê é, 30 a nghut jáng, yùqgè rayùq, yhang myi lé a lùm mù, myìt no é hkun lhê é, myìt nò târâ nghut lhê. Haû hkyangjong hpó gi, myiwe myhí haú lé Yhûmsîng Garaî é hí má shap to luî, târâ haú pé bànshoq èq yhang lé jéyáng ra râ nghut lhê. 31 Haú hkûn, yhûmsîng hpó gi, mara mai lùt luî, myiwe myhí haû gi, yhâng é mara dàm hkam yù ra râ nghut lhê.’ nghû àq.” ga taî ri.