Jì-no Gyô É Chyûnghuq
26
Núngmòq gi, yhûmsing é matú, hparà hpôlhô pé hkâsaí kó; alhô nghut kôle, lùqzìng lhô nghut kôle, hkâsaî tsûng kó; noq râ matú núngmòq é maumyî má kyûng tô é lùqgòk lé hkâ-tsûng kó. Hkâsu mù gâ le, Ngò gi, núngmòq é Garai Gasang nghut é, haû Yhûmsîng Garai nghut lhê.2 Ngá é Bánno Buìnyì pé lé châng nyì mù, Ngá é sân-yúng jowò lé hkúngga hpautap keq. Ngò gi, haû Yhûmsîng Garai nghut lhê.
3 Núngmòq gi, Ngá é târâ wàng hkunmó pé lé cháng mù, Ngò hkyô tô é hkunmó pé lé rago châng é nghut jáng, 4 Ngò gi, yhâng é yàm-yòq má yhang, núngmòq é matú mau wo hkyó byi nhâng râ nghut mù, myigùng gi, kyôshi myuishi lhoqhtoq byi luî, hkyâm mâ é shigâm pé gi, ashi tsing zui byi râ nghut lhê. 5 Núngmòq gùq bàt é ahkyíng gi, tsibyiq shi hpyoq yu é hkûn jé shoq myáng mù, tsibyiq shi hpyoq é ahkyíng gi, kyô hkyó yòq jé shoq myáng râ nghut luî, núngmòq gi, gyi gyi dau dau myàng zo mù, núngmòq é maumyî má nguì ngón é eq myang nyì kôrâ nghut lhê.
6 Ngò gi, núngmòq é maumyî má nguì ngón nhâng râ nghut mù, núngmòq gi, ó yùq èq le a kyuq tân é za wó lèq yhup kôrâ nghut lhê. Ngò gi, núngmòq é maumyî mai agè ashop é tân jung yòsô zè lé huî sêng pyám râ nghut lhê; núngmòq é maumyî gi, shâm lhâm mai lùt râ nghut lhê. 7 Núngmòq gi, núngmòq é gye pé lé châng hkat kôrâ nghut mù, yhángmòq gi, núngmòq é shâm má gyòp gyó é hui kôrâ nghut lhê. 8 Núngmòq mâ é ngo yuq gi, byù rashô yùq lé châng hkat râ nghut mù, rashô yùq gi, byù ra-mun lé châng hkat kôrâ nghut luî, núngmòq é gye pé gi, núngmòq é shâm má gyòp gyó é hui kôrâ nghut lhê.
9 Ngò gi, núngmòq lé wú gon mù, núngmòq lé zo myo myhû nhâng luî, myo luq jebe nhâng râ nghut é htoq agó, núngmòq eq Ngò tô tô é dangshikaq lé lhoqdìk râ nghut lhê. 10 Núngmòq gi, kyôshi myuishi asik kat râ matú axau lé gòt htoq pyâm é hkûn jé shoq, hî zan lhê é kyôshi myuishi lé zô nyì shirâ nghut lhê. 11 Ngò gi, núngmòq chyáng Ngá é nyì jowò tô to râ nghut lhê; Ngò gi, núngmòq lé chaq pyám râ a nghut. 12 Ngò gi, núngmòq chyáng sô nyì râ nghut mù, núngmòq é Garai Gasang dùt râ nghut lhê; haú hkûn, núngmòq gi, Ngá é byu pé dùt kôrâ nghut lhê. 13 Ngò gi, núngmòq, Egutuq byu pê é jùn a dùt nyì lo râ matú, núngmòq lé Egutuq ming mai shuî htoq lo é Sû, núngmòq é Garai Gasang nghut é, haû Yhûmsîng Garai nghut lhê; Ngò gi, núngmòq é kyaú lé lhoqhkyuî pyám byi mù, núngmòq lé, ulhum tu ngháng luî só nhang é nghut lhê.
Jì-no A Gyo Mù Dàm Byî É Hkyô
14 Nghut kôlhang, núngmòq gi, Ngá é dang lé a gyo mù, hkunmó haú pé bànshoq lé a châng kut é za, 15 Ngá é târâ wàng hkunmó pé lé he-ngìk pyám luî, Ngá é târâ pé lé chaq pyám mù, Ngá é hkunmó pé bànshoq lé a châng kut luî, Ngá é dangshikaq lé lhoqhpyoq pyâm é nghut jáng, 16 Ngò núngmòq lé kut râ gi, byò dàn tûng é gyùq chiq hpo le, nòlì nòjàng má le, núngmòq é myòq lhoqchit pyám râ nghut é gùng nyé nô hkyô le, núngmòq é chyungxe lhoqpân ló é nò le, núngmòq chyáng jé nhâng râ hkyô nghut lhê. Núngmòq gi, akôm má kyô hkyô pyám râ nghut lhê; haî mù gâ le, núngmòq é gye pé gi, haú lé zo kôrâ nghut lhê. 17 Ngò gi, núngmòq lé gyè taû kut râ nghut mù, núngmòq gi, núngmòq é gye pê é hí má sûm byùq kôrâ nghut lhê; núngmòq lé a ngui é bang gi, núngmòq lé ùp zo kôrâ nghut mù, núngmòq gi, ó a hkat kôlhang hpâng kôrâ nghut lhê.
18 Núngmòq gi, shí pé bànshoq hui zo kôlhang, Ngá é dang a gyo kô é nghut jáng, Ngò gi, núngmòq é marâ é matú, yubàk dam nyhit dâm puq byi râ nghut lhê. 19 Ngò gi, núngmòq é myìt htân nghutbûn é hkyô lé lhoqhkyuî pyám byi mù, ahtoq mâ é mauhkûng lé jòqtoq su, a-ô mâ é myigùng lé gyi su kut pyám râ nghut lhê. 20 Núngmòq é wum-o gi, akôm má lhoqpân pyám râ nghut lhê; hkâsu mù gâ le, núngmòq é maumyî gi, gùqzò muilhum a lhoqhtoq byi râ nghut é htoq agó, haú mâ é shigâm pé le, ashi zui byi râ a nghut.
21 Núngmòq gi, xoq luî, Ngo lé gyè taû dùt kômù, Ngá é dang lé a gyo kô é nghut jáng, Ngò gi, núngmòq é mara eq rajung za, núngmòq lé gyai yhang no hpu nhang é hkyô pé nyhit dâm puq byi râ nghut lhê. 22 Ngò gi, núngmòq lé gyè kut râ yòsô zè pé nhang kat râ nghut mù, haú pé gi, núngmòq é zodù wuì lé shê zo mù, núngmòq é no pé lé myàq zô pyám luî, núngmòq é byù du lhoqyom pyám kôrâ nghut mù, núngmòq é hkyô pé gi, chamchyuîyuì dùt byùq râ nghut lhê.
23 Núngmòq gi, haú pé hui zo kôlhang, myìt a htaî lhik é za, xoq luî, Ngo lé gyè taû dùt nyì kô é nghut jáng, 24 Ngò yhang, núngmòq lé gyè taû kut râ nghut mù, núngmòq é marâ é matú, yubàk dam nyhit dâm puq no hpu nhâng râ nghut lhê. 25 Ngò gi, Ngá é dangshikaq lhoqhpyoq pyâm é lé lató hpuq râ matú, núngmòq chyáng shâm nhang kat râ nghut lhê. Núngmòq gi, núngmòq é wà mó pé má hpang zîng ló kô e hkûn, Ngò gi, núngmòq chyáng wúm mó nhang kat mù, núngmòq lé, núngmòq é gye pê é lòq má àp pyám râ nghut lhê. 26 Núngmòq lé htuqbáng nyi é zoshuq lé Ngò hpyit pyám byî é hkûn, myiwe wuì raxê yùq gi, myi bunghkyûng ralhum má za mùk chôm bung luî, jang èq lìk mù, núngmòq lé tsing gàm byi râ nghut lhê; núngmòq gi, zo kôlhang wam gyi kôrâ a nghut.
27 Núngmòq gi, haú lé hui zo kôlhang, Ngá é dang lé a gyo kô é za, xoq luî, Ngo lé gyè taû dùt nyì kô é nghut jáng, 28 Ngò gi, nhikjum yo luî, núngmòq lé gyè taû kut mù, Ngò yhang, núngmòq é marâ é matú, yubàk dam nyhit dâm puq byi râ nghut lhê. 29 Núngmòq gi, yhûmsing é yùqzo byìzô pê é gùngsho lé zo kôrâ nghut lhê. 30 Ngò gi, núngmòq é myhang é hparà noq jowò pé lé lhoqhpyoq lhoqhtên pyám mù, núngmòq é namngón jung nyhé hkungga gyàp pé lé zân hkyop pyám luî, núngmòq é shî màng pé lé, núngmòq é kângsoq a dui é hparà hpôlhô pê htoq má bum zàng râ nghut lhê; Ngò gi, núngmòq lé chaq pyám râ nghut lhê. 31 Ngò gi, núngmòq é wà mó pé lé lhoqhtên pyám mù, núngmòq é sân-yúng jowò pé lé a-pyâng bùm kut pyám râ nghut lhê; Ngò gi, núngmòq é namngón hkungga pé lé le ô nguì râ a nghut. 32 Ngò gi, maumyî haú lé a-pyâng bùm kut pyám râ nghut mù, haú má nyi é núngmòq é gye pé gi, haú hkyô lé maú dan bùm kôrâ nghut lhê. 33 Ngò gi, núngmòq lé gótû byù myû wui pê chyáng lhoqpyo kat mù, Ngá é shâm wing to luî, núngmòq lé châng hkat râ nghut lhê. Núngmòq é maumyî gi, a-pyâng bùm dùt byùq râ nghut luî, núngmòq é wà mó pé gi, htên byòq zang bum to râ nghut lhê. 34 Haû mù, núngmòq gi, núngmòq é gye pê é mau má nyi byùq kô é nghut mù, maumyî haû gi, chamchyuîyuì dùt tô é ahkyíng bànshoq, yhâng é Bánno zànwut má myang gabú nyî râ nghut lhê. Haú hkûn, maumyî haû gi, wó myang nô yù mù, yhâng é Bánno Buìnyì má wó myang gabú râ nghut lhê. 35 Núngmòq nyi nyi é u má, yhang a myang bánnô wú é maumyî haû gi, chamchyuîyuì dùt tô é ahkyíng bànshoq má wó myang nô yù berâ nghut lhê.
36 Ngò gi, haû núngmòq é gye pê chyáng nyi myìt tô é bâng é i-myìt má gyùq dan é myìt kat râ nghut luî, sikhaq mùt myhîng é hte èq gyùq dàn nhâng râ nghut lhê; yhángmòq gi, shâm mai hpang é su hpâng kôrâ nghut mù, ó a châng hkat kôlhang, lèqbàt kôrâ nghut lhê. 37 Yhángmòq gi, ó a châng hkat kôlhang, shâm mai hpang é dông hpâng kômù, rayùq ahtoq má rayùq htûng lèqbàt kôrâ nghut lhê. Haû mù, núngmòq gi, núngmòq é gye pê é hí má a wó yàp dùt kôrâ nghut lhê. 38 Núngmòq gi, gótû byù myû wui chyáng htûm byùq kôrâ nghut lhê; núngmòq é gye pê é maumyî gi, núngmòq lé myhui pyám râ nghut lhê. 39 Núngmòq mâ é myìt gyó tô é bang gi, núngmòq é gye pê é maumyî má, yhûmsing é yubàk marâ é yánmai le, yhángmòq îchyí îwâ pê é yubàk marâ é yánmai le, shi jôm ló byùq kôrâ nghut lhê.
40 Nghut kôlhang, yhángmòq gi, yhángmòq é yubàk mara eq yhángmòq é îchyí îwâ pê é yubàk mara nghut é, yhángmòq Ngo lé shut shai é hkyô kut luî, Ngo lé gyè taû kut kômù, 41 Ngò le yhángmòq lé gyè taû kut luî, yhángmòq lé, yhángmòq é gye pê é maumyî má dé pyâm é hkyô pé lé, mara yín yû kôrâ nghut lhê; haú hkûn, yhángmòq gi, haú dông mai, yhángmòq é ahpyo-kuq a hpyit é i-myìt lé lhoqnyhum pyám mù, yhángmòq é marâ é matú dam byî é lé yín yû kô é nghut jáng, 42 Ngò gi, Yakup eq tô tô é Ngá é dangshikaq lé le, Isak eq tô tô é Ngá é dangshikaq lé le, Abraham eq tô tô é Ngá é dangshikaq lé le, myìtbun luî, maumyî haú lé myìtbun râ nghut lhê. 43 Hkâsu mù gâ le, maumyî haû gi, yhángmòq èq tô pyâm to luî, yhángmòq a nyi é za chamchyuîyuì dùt nyi é u lé, yhâng é Bánno Buìnyì pé lé myang gabú nyi é nghut ri. Yhángmòq gi, Ngá é târâ pé lé he-ngìk pyám kômù, Ngá é târâ wàng hkunmó pé lé chaq pyám kô é yánmai, yhángmòq é marâ é matú dam byî é lé yín yû kôrâ nghut lhê. 44 Haû su nghut kôlhang, yhángmòq é gye pê é maumyî má yhángmòq nyi tô é hkûn, Ngò gi, yhángmòq eq Ngò tô tô é dangshikaq lé lhoqhpyoq pyâm é dông le, yhángmòq lé bànshoq lhoqhtûm pyâm é dông le, yhángmòq lé he-ngìk pyám râ a nghut é htoq agó, yhángmòq lé chaq pyám râ le a nghut. Ngò gi, yhángmòq é Garai Gasang nghut é, haû Yhûmsîng Garai nghut lhê. 45 Nghut kôlhang, Ngò gi, yhángmòq é Garai Gasang dùt râ matú, gótû byù myû wui é hí má, Egutuq ming mai shuî htoq lo é yhángmòq é îchyí îwâ pé eq tô tô é dangshikaq lé, yhángmòq é matú myìtbun râ nghut lhê. Ngò gi, haû Yhûmsîng Garai nghut lhê.’ nghû àq.” ga taî ri.
46 Shí pé gi, haû Yhûmsîng Garai mai, Mosheq dông Sinaq Bùm má Yhang eq Isira-elaq byu pê é gyoro má tô tô é târâ wàng hkunmó pé, târâ pé eq cháng ra târâ pé nghut ri.