Bánno Zànwut
25
Haû Yhûmsîng Garai gi, Sinaq Bûm má Mosheq lé, 2 “Isira-elaq byu pé lé dang nyô mù, yhángmòq lé, ‘Ngò, núngmòq lé byî é maumyî má núngmòq wang jé ló kô é hkûn, maumyî haû le, Yhûmsîng Garaî é matú bánnô yù ra râ nghut lhê. 3 Hkyuq zân yhang núngmòq é yò pé saí luî, tsibyiq hkyâm pé gôn lajang mù, haú pé mâ é kyôshi myuishi shû tsîng yù râ nghut lhê. 4 Nghut kôlhang, nyhit zan zàn gi, Yhûmsîng Garaî é matú ra-mau gón nô yu é Bánno zànwut nghut lhê. Núngmòq é yò le hkâsaí kó; núngmòq é tsibyiq hkyâm le hkâ lajang kó. 5 Yò pé má yhang baú gyó yùq mù zuî é le a ge shû yù; a lajâng é tsibyiq hkyâm mâ é tsibyiq shi lé le a ge shû yù râ nghut lhê. Ra-mau gón gi, nô yu é zànwut nghut lhê. 6 Bánno zànwut má zuî lo é haî nghut kôlhang, núngmòq eq núngmòq é duìnhâng zoshâng yùqgè myiwe wuì, núngmòq é langchyáng eq núngmòq chyáng lé byam nyi yù su é matú le, 7 núngmòq é shigu gaunyhaú eq núngmòq é maumyî má nyi é tân jung yòsô zè pê é matú le, zoshuq dùt râ nghut lhê. Maumyî haû hai gùqzò muilhum htoq kôle, ge zo râ nghut lhê.Gabú Tut Htê Mùt Myhíng Zànwut
8 Bánno zànwut nyhit dâm nghap mù, nyhit zân zân nyhit dâm nghut jáng, myí xe gau zân bò bê nghut ri. 9 Haú hkûn, nyhit hkyap raxê nyí nyí má, jowò hkangmó tut mùt myhíng ra râ nghut lhê; haû gi, Mara hkô htaí Buìnyì nghut mù, núngmòq é ra-mau gón tut mùt myhíng nhâng ra râ nghut lhê. 10 Haû mù, ngo xê zàn nghut é zàn jé jáng, núngmòq gi, haú lé lhoqchyoi lhoqyúng mù, maumyî haú má nyi é lhúnglháng lùt hkyô wó bê lé taî pyô ra râ nghut lhê. Haû gi, núngmòq é matú gabú tut htê mùt myhîng é zànwut nghut ri; ó yùq lé, hí lhê é yhâng é maumyî eq hí lhê é yhâng é a-myû koq má dum wó taû ló râ nghut lhê. 11 Ngo xê zàn nghu é zàn gi, núngmòq é matú gabú tut htê mùt myhîng é zànwut nghut lhê; haú zân má, kyó hkâhkyó kó, yhang baú yùq mù zuî é lé hkâshû yù kó, a gôn lajâng é tsibyiq nuî mâ é le hkâshû yù kó. 12 Hkâsu mù gâ le, haû gi, gabú tut htê mùt myhîng é zànwut nghut mù, núngmòq é matú chyoiyúng ri; yò mai yhang baú zuî lo é lé za ge zo râ nghut lhê.
13 Gabú tut htê mùt myhîng é zànwut shî má gi, yùq hkangmó, ó le ô é maumyî shut taû ló ra râ nghut lhê.
14 Núngmòq yhangchang zè wuì zè ung kut lhûm é má, hkârhoî zo lhum kó. 15 Náng é luzúm hpô chyáng mâ é maumyî wui yu é nghut jáng, gabú tut htê mùt myhîng é zànwut htâng mâ é zànwut lé tû wú mù, wui yù ra râ nghut lhê; yhang, nang lé ung byî é nghut jáng, kyôshi wó shû yù râ zànwut lé tû wú mù, wui yù ra râ nghut lhê. 16 Zànwut myo jáng gi, myô é su, zànwut shau jáng gi, shaû é su, gù dòq gyó kut ra râ nghut lhê. Hkâsu mù gâ le, yhang, nang lé ung byî é gi, kyôshi myuishi wó shû yù râ zànwut lé tú mù, ung byî é nghut ri. 17 Núngmòq yhangchang hkârhoî zô lhum kó; núngmòq é Garai Gasang lé gyùq hkúngga keq. Ngò gi, núngmòq é Garai Gasang nghut é, haû Yhûmsîng Garai nghut lhê.
18 Ngá é târâ wàng hkunmó lé, núngmòq cháng mù, Ngá é târâ pé lé, núngmòq rago châng kut keq; haú hkûn, núngmòq gi, maumyî haú má nguì ngón é èq myang nyì kôrâ nghut lhê. 19 Maumyî haû le kyôshi myuishi zui byi mù, núngmòq gyi gyi dau dau myàng zo luî, nguì ngón é eq myang nyì kôrâ nghut lhê. 20 Núngmòq gi, “Nyhit zan zàn nghu é má ngá-mòq kyô hkyó kyô shu a kut é nghut jáng, ngá-mòq haî zo râ lhú?” ga myi kôrâ nghut lhê. 21 Ngò gi, hkyuq zân nghu é zàn má núngmòq lé shimân byi râ nghut mù, maumyî gi, haú zân má, súm zan é matú kyôshi myuishi lhoqhtoq byi râ nghut lhê. 22 Núngmòq gi, shit zân nghu é zàn má kyô hkyô é u lé, kyôshi myuishi axau zo mù, gau zân nghu é zàn kyô shû yu é hkûn jé shoq, xoq luî zô nyì râ nghut lhê.
23 Maumyî lé ûng hpyit pyâm é dông ge kut râ a nghut; hkâsu mù gâ le, maumyî gi, Ngá é nghut mù, núngmòq gi, Ngá chyáng byam nyi é bang nghut luî, byù bíng pé za nghut lhê. 24 Ra-mau gón má, núngmòq, maumyî wó sing yu é jowò hkangmó má, maumyî lé hkyi htoq yû râ hkyô htông to byi ra râ nghut lhê.
25 Nunggu nungmang rayùq yùq, myung byùq luî, yhang wó é yò ra-am lé ûng é nghut jáng, yhang eq je chyâng é gu-mang hpó mai, yhang ûngzô pyâm é lé ge wui yù râ nghut lhê. 26 Nghut kôle, yhâng é matú haú lé bo hkyi htoq byi râ byù a nyi é nghut mù, yhang wó lô sùt lò luî, haú lé hkyi htoq yû râ nghut jáng, 27 yhang gi, yhang ung byî é zànwut mai laî ló bê zànwut lé nghap wú mù, râ tô ashî nghut é gù lé sôn lhóm luî, wui yù sû lé tau byi ra râ nghut lhê; haú hkûn, yhang gi, yhâng é maumyî má ge taû ló bê nghut lhê. 28 Nghut kôlhang, yhang a wó hkyi htoq yû lô é nghut jáng, gabú tut htê mùt myhîng é zànwut jé shoq, haû wui yù su é maumyî nghut nyî râ nghut lhê. Gabú tut htê mùt myhîng é zànwut má gi, haú lé tau byi berâ nghut mù, yhang gi, yhâng é maumyî shut dum ge taû ló berâ nghut lhê.
29 Rayùq yùq, gingtíng wàhkûm wam tô é wà mó mâ é yhûm lé ûng é nghut jáng, yhang gi, ûng é htâng razàn gyoro má hkyi htoq yû râ ahkáng tô to ra râ nghut lhê. Haú zân gyoro má yhang ge hkyi htoq yû râ nghut lhê. 30 Haû razàn a byíng shî é gyoro má a wó hkyi htoq yu é nghut jáng, gingtíng wàhkûm wam tô é wà mó mâ é yhûm haú lé gi, wui yù sû eq yhâng é awùt ashín pé mai pyàt pyàt zaí zaí sing to râ nghut lhê. Haú lé gi, gabú tut htê mùt myhîng é zànwut má tau byi râ a nghut. 31 Nghut kôlhang, gingtíng wàhkûm a wam tô é wà pé mâ é yhûm pé lé kúm gi, yò pé lé su ge hkyi htoq yû râ nghut lhê. Haú pé lé gi, gabú tut htê mùt myhîng é zànwut lé le tau byi ra râ nghut lhê.
32 Lewiq a-myû wuì gi, yhángmòq sing é wà mó pé mâ é yhángmòq é yhûm pé lé, hkâ-nhám le ge hkyi htoq yû râ nghut lhê. 33 Haû mù, Lewiq a-myû wui é yhûm pé gi, ge hkyi htoq yu é nghut lhê; yhángmòq nyi é wà mâ é yhûm ûng é nghut jáng, gabú tut htê mùt myhîng é zànwut má tau byi ra râ nghut lhê; hkâsu mù gâ le, Lewiq a-myû wuì nyi é wà pé mâ é yhûm pé gi, Isira-elaq byu pê chyáng mâ é yhángmòq é sùtzè za nghut ri. 34 Nghut kôlhang, Lewiq a-myû wui é wà pé mâ é mhan nú yô pé gi, ge ung râ a nghut; haû gi, yhángmòq ayang sing nyì râ sùtzè nghut lhê.
35 Nunggu nungmâng pé mâ é rayùq yùq myung byùq luî, yhânggùng yhang a wó htuqbáng lô é nghut jáng, gótû a-myû eq lé byam nyi é sû lé kut é su, yhang lé garúm yû àq; haú hkûn, yhang gi, núngmòq chyáng wó xoq nyi nyì râ nghut lhê. 36 Yhâng chyáng mai hai ahpún a-myàt le hkâyû; náng é Garai Gasang lé gyùq hkúngga aq; haú hkûn, nunggu nungmang gi, núngmòq chyáng wó xoq nyi nyì râ nghut lhê. 37 Nàng gi, ngùnhpún yù râ matú yhang lé ngùn ge chyi byi râ a nghut é htoq agó, a-myàt wó râ matú yhang lé zoshuq ge ung byi râ a nghut. 38 Ngò gi, núngmòq lé Hkanan mau byi mù, núngmòq é Garai Gasang dùt râ matú, núngmòq lé Egutuq ming mai shuî htoq lo é Sû, núngmòq é Garai Gasang nghut é, haû Yhûmsîng Garai nghut lhê.
39 Nunggu nungmang mâ é rayùq yùq myung byùq luî, nang lé yhâng gùng ung byî é nghut jáng, jùn lé dông yhang lé mú hkâzui nhâng. 40 Yhang lé gi, langchyáng rayùq dông le, núngmòq chyáng lé byam nyi é sû dông le, kut ra râ nghut lhê; yhang gi, nang lé, gabú tut htê mùt myhîng é zànwut jé shoq zui tso zui huq ra râ nghut lhê. 41 Haú zân má, yhang eq yhâng é zodù wuì lé gi, lhut kat ra râ nghut mù, yhang gi, yhâng é a-myû koq eq yhâng é îchyí îwâ pê é maumyî shut wó taû ló râ nghut lhê. 42 Hkâsu mù gâ le, Isira-elaq byu pé gi, Egutuq ming mai Ngò shuî htoq lo é Ngá é duìnhâng zoshâng wuì nghut é yánmai, jùn dông ung zô é ge hui râ a nghut. 43 Yhángmòq lé htân htân ge ùp zo râ a nghut; náng é Garai Gasang lé gyùq hkúngga aq.
44 Nàng jùn zo râ jùn myhí jùn hpó gi, náng é awui ayàm mâ é gótû byù myû wuì mai wui hpyit yu é nghut râ lhê. 45 Hau htoq agó, núngmòq gi, núngmòq chyáng lé byam nyi é bang ra-am eq núngmòq é mau má hku é yhángmòq é a-myû koq mâ é bang lé le ge wui hpyit yu lhê; yhángmòq gi, núngmòq èq sing é bang dùt râ nghut lhê. 46 Núngmòq gi, yhángmòq lé, silî wunlî dông núngmòq é zodù wuì lé ge xoq byî tô é htoq agó, yhángmòq é i-pyàt htum shoq ge jùn zô yù râ nghut lhê; nghut kôlhang, núngmòq gi, nunggu nungmang nghut é Isira-elaq byù lé rhoî jihkyoî kut ge ùp zo râ a nghut.
47 Núngmòq chyáng mâ é, gótû a-myû, a nghut jáng, lé byam nyi é sû wó lô sùt lò mù, nunggu nungmang mâ é rayùq yùq myung byùq luî, yhâng gùng lé, núngmòq chyáng nyi é, haû gótû a-myû chyáng, a nghut jáng, haû gótû a-myu é akoq mâ e su chyáng ung zô pyâm é nghut jáng, 48 yhânggùng yhang ung zô pyâm é htâng má, yhang dum hkyi htoq yû râ ahkáng tô to ra râ nghut lhê. Yhâng é gu-mang wuì mâ é rayùq yùq, yhang lé ge hkyi htoq yû râ nghut lhê. 49 Yhâng é îwâ xik nghut nghut, gyí gòq gu-mang nghut nghut, yhâng é akoq mâ é suisho rayùq yùq nghut nghut, yhang lé ge hkyi htoq yû râ nghut lhê. Haú gyoro má yhang wó lô sùt lo é nghut jáng, yhânggùng yhang le ge hkyi htoq yû râ nghut lhê. 50 Yhang eq yhang lé wuì sû gi, yhânggùng yhang ung zô é zànwut mai gabú tut htê mùt myhîng é zànwut jé shoq lé nghap wú mù, hkâ-myhó zân nghut le hkâ-myhó zan é matú, langchyáng lé byî é ahpau má cháng mù, gù hpyit ra râ nghut lhê. 51 Zui tso saí tso râ zànwut myô ashi nghut jáng, yhang gi, zànwut má cháng mù, yhang hkyi htoq yu é hui râ matú, yhang lé wui hpyit yu é gù mai són byi ra râ nghut lhê. 52 Gabú tut htê mùt myhîng é zànwut jé râ hkâ-myhó zân a bò lô é nghut jáng, yhang gi, zànwut lé sôn wú mù, yhûmsîng hkyi htoq yû râ ahpau má cháng luî, byi ra râ nghut lhê. 53 Haú yùq gi, razan htâng razàn lung tô é langchyáng dông nghut ra râ nghut lhê; yhang lé sîng sû gi, yhang lé rhoî jihkyoî kut ge ùp zo râ a nghut.
54 Haú pé hká dông mai le yhang lé a hkyi htoq yu é nghut jáng, yhang eq yhâng é zodù wuì gi, gabú tut htê mùt myhîng é zànwut má lhoqlhut kat é hui ra râ nghut lhê. 55 Hkâsu mù gâ le, Isira-elaq byu pé gi, Ngá é duìnhâng zoshâng wuì chyat nghut ri. Yhángmòq gi, Egutuq ming mai Ngò shuî htoq lo é, Ngá é duìnhâng zoshâng wuì nghut lhê. Ngò gi, núngmòq é Garai Gasang nghut é, haû Yhûmsîng Garai nghut lhê.