HTOQ LÓ
Laiká
(Exodus)
Isira-elaq Byu Pé Zìk Zo Huî É Hkyô
1
A-ô mâ é gi, Egutuq ming má gyó e é, Isira-elaq é yhang zo yùqzô pê é myìng nghut mù, Yakup eq rahá ó le ô é yhûmbyù wuì eq kut gyó e é bang gi, 2 Rubin, Sime-on, Lewiq, Yudaq, 3 Yisahka, Zebulun, Ben-yamin, 4 Dan, Naphtali, Gat eq Asheri pé nghut akô. 5 Yakup é awùt ashín pé bànshoq gi, 70 yùq nghut akô. Yosep kúm gi, Egutuq ming má nyi to gù nghut ri.6 Htâng má, Yosep eq yhang gu yhang mâng pé bànshoq le, yhángmòq eq ra-kyám zâ é bang bànshoq le, shi byùq bekô nghut ri; 7 nghut kôlhang, Isira-elaq byu pé gi, zo-myo myhu bùm mù, myoluq jebe lò luî, byù du myô jàt lò kômù, a ung nghap loshoq myô lò bekô nghut luî, haú mau má byíng zan to bekô nghut ri.
8 Haú hkûn, Egutuq ming má, Yosep é hkyô haî le a sê é hkóhkâm asik rayùq htaî dòq lo ri. 9 Hkóhkâm haú yùq gi, yhâng é byu pé lé, “Wú keq; haû Isira-elaq byu pé gi, ngá-nhûng htoq a ung nghap loshoq myo mù wúm bo byùq bekô nghut ri. 10 Gaì, lé keq, ngá-nhúng gi, yhángmòq lé hpàqchyî dông kut ra râ dùt bê; haû a nghut jáng, yhángmòq gi, ahkui lhê htoq je riyhang myoluq jebe lò mù, majan du htoq lo le, ngá-nhûng é gye pê hkyam shut bo dàp kôluî, ngá-nhúng lé majan zan mù, yhángmòq shí mau mai htoq ló byùq kôrâ nghut lhê.” ga taî ri.
11 Haû mù, yhángmòq gi, Isira-elaq byu pé lé, mú htân zìk kut nhang é dông ûngzô nyì râ matú, yhángmòq lé ùp râ byù nyhi to bekô nghut mù, haû Isira-elaq byu pé gi, Hpara-uq é matú, zè hkong to byi râ wà mó Pihtum eq Ramese lé xuq to bekô nghut ri. 12 Nghut kôlhang, yhángmòq je zìk zo kôjáng, haû Isira-elaq byu pé gi, je myô jàt lò kômù, je byo jam lò bekô nghut ri; haû mù, Egutuq byu pé gi, Isira-elaq byu pê é yánmai myìt myo myìt chiq nyi bùm bekô. 13 Haû mù, yhángmòq gi, Isira-elaq byu pé lé, shogyo myìt a bo é za mú hko mú nòq mó zui saí nhâng bekô nghut ri. 14 Yhángmòq gi, tsohtung hput é mú má le, tso-kyín chung é mú má le, yò mú jung hkangmó má le, ahkyik anòq zìk zuí nhang é dông, Isira-elaq byu pé lé zo-ngê hpyik nhang nyi akô; Egutuq byu pé gi, yhángmòq zìk zuí nhang é mú htân pé bànshoq má, shogyo myìt a bo é za mú hko mú nòq mó zui saí nhang akô nghut ri.
15 Egutuq hkóhkâm hpó gi, Hebre myhî pé lé zo bo hku garúm é Shihpira eq Hpu-a gá su nhik lé, 16 “Núngnhik, Hebre myhî pé zohkû tánghkuq má zùng mù zô hku nyi é u garúm kô é hkûn, nyheqnú gi, yùqzo nghut é lé myàng jáng, nyheqnú haú lé sat pyám keq; nghut kôlhang, nyheqnú gi, byìzo nghut é lé myàng jáng, chyungxe lhut to keq.” ga taî ri. 17 Nghut kôle, zô bo hku garúm é su nhik gi, Garai Gasang lé gyùq hkúngga kô é nghut mù, haû Egutuq hkóhkâm hpô èq yhángnhik lé taî é dông a kut kô é za, yùqzô pé lé chyungxe dui nhang tô akô nghut ri. 18 Haû mù, Egutuq hkóhkâm hpó gi, zô bo hku garúm é su nhik lé ji yù mù, “Núngnhik, haî mù îsu kut akô? Núngnhik, haî mù yùqzô pé lé chyungxe lhoqlhut tô akô?” ga yhángnhik lé myî ri.
19 Haû zô bo hku garúm é su nhik gi, Hpara-uq lé, “Hebre myiwe myhî pé gi, Egutuq myiwe wuì eq a pûng kó nghut ri. Yhángmòq gi, a-tsam bo akô nghut mù, zô bo hku garúm é sû a jé shi-má hkû hkû dùt akô nghut ri.” ga tû taî akô.
20 Haû mù, Garai Gasang gi, zô bo hku garúm é su nhik lé jeju byî ri; a-myû haú bang le myô jàt lò kômù, je riyhang, myoluq jebe lò bekô nghut ri. 21 Haû zô bo hku garúm é su nhik gi, Garai Gasang lé gyùq hkúngga kô é nghut mù, Yhang gi, yhángnhik lé, ó le ô é i-kun kô myhâng nhang ri.
22 Hau htâng, Hpara-uq gi, yhâng é byù bànshoq bang lé, “Núngmòq, Hebre byu pé hku é yùqzo bànshoq lé Nile Wuìlàng má dú kat pyám keq; nghut kôlhang, byìzo yùq hkangmó lé gi, chyungxe lhoqlhut to keq.” ga hkunmó hkyô ri.