50
Yosep gi, yhâng wâ ahtoq má gòp byên to mù, yón ngaû uchyang bo-puq puq byî ri. 2 Hau htâng, Yosep gi, yhâng wa Isira-elaq lé, gùngsôm a bùp râ namngón jung bùt byi râ matú, chi sará pé lé hkunmó hkyô ri. Haû mù, chi sará pé gi, yhang lé namngón jung bùt byi bekô nghut ri. 3 Namngón jung bùt htûngli jòq é eq rajung za, yhángmòq gi, buìnyì myi xê nyí tô tô ri. Haû Egutuq byu pé le, Yakup é yánmai buìnyì nyhit xê nyí yhang iyon yôn bum akô nghut ri.4 Haû iyon yôn é buìnyì pé lai jáng, Yosep gi, Hpara-uq é yhûm mâ é byu pé lé, “Núngmòq é hí má ngò myòqdong wó é nghut jáng, ngá é matú, Hpara-uq lé, 5 ‘Ngá wa gi, ngo lé dakâm nhâng mù, “Ngò gi, shî râ za nghut bê; ngo lé, Hkanan mau má ngá é matú ngò yhang dû tô é lùp má myhup àq.” ga taî to hkô ri. Haû mù, ahkuî, ngò dòq ló luî, ngá wa lé ló myhup râ ahkáng byi laq; hau htâng má ngò dum taû lò râ nghut lhê.’ nghû bo taí byi kó làq.” ga taî ri.
6 Haú hkûn, Hpara-uq gi, “Náng wa, nang lé dakâm nhang tô é eq rajung za, dòq ló mù, yhang lé ló myhup yhûm pyám aq.” ga taî ri.
7 Haû mù, Yosep gi, yhâng wa lé ló myhup yhum râ matú dòq ló bê nghut ri. Yhang eq rahá, Hpara-uq é duìnhâng zoshâng wuì le, yhâng é yhûm mâ é zaugun wuì le, Egutuq ming mâ é zaugun wuì le, 8 Yosep é yhûmbyù wuì bànshoq bang le, yhang gu yhang mâng pé le, yhâng wâ é yhûmbyù wuì le bo châng dòq ló akô. Yhángmòq é zoshâng wuì, yhángmòq é sau bainám hpúng pé eq no myang pé lé za, Goshen mau má nyhi to hkô akô nghut ri. 9 Myanglhêng ji bang le, myang ji ji bang le, yhang eq rahá châng dòq ló akô. Haû mù, rajùm rayò mó yhang nghut byùq ri. 10 Yhángmòq gi, Yodan làng nàm mâ é Atat é chyârâng má jé kô é hkûn, htê mó o mó yón wùt ngau bum akô nghut ri; haú má, Yosep gi, yhâng wâ é matú, nyhit nyí yhang iyon yôn nyi ri. 11 Haú mau má nyi é Hkanan byu pé gi, Atat é chyârâng má iyon yôn ngau nyi bùm kô é lé myàng kôjáng, “Haû Egutuq byu pé gi, gyai yhang iyon yôn ngau nyi bum akô nhung!” ga taî akô. Haû mù, haû Yodan làng nàm mâ é jowò haú lé, Abela Mizira-ima ga myhîng akô nghut ri.
12 Haû mù, Yakup é yhang zo yùqzô pé gi, yhang hkunmó hkyô tô é eq rajung za kut bekô nghut ri. 13 Yhángnhik wuî gi, lùpdùng kut râ matú, Abraham èq Hiti byù Ehprun chyáng mai yòbun eq rahá jâng wui hpyit yu é, Hkanan mau, Mamre nàm mâ é Makhpela é yò hkaû mâ é lùqhkyûng má wàq jé ló kômù, yhang lé haû má myhup yhûm to bekô nghut ri. 14 Yosep gi, yhâng wa lé myhup yhûm pyâm é htâng má, yhang gu yhang mâng pé eq yhâng wa lé myhup râ matú bo châng dòq lo é góbang bànshoq le mù, Egutuq ming shut taû ló bekô nghut ri.
Yhang gu Yhang Mâng Pé Lé Yosep Nhik Dum Taî Tîng É Hkyô
15 Yosep e yhang gu yhang mâng pé gi, yhángmòq é yhâng wa shi byùq bê lé bûn sé kôjáng, “Yosep gi, ngá-nhúng lé a naù a wom kut mù, ngá-nhúng mai yhang lé kut shut é hkyô bànshoq é matú, lató hpuq âbe.” ga taî lhûm akô. 16 Haû mù, yhángmòq gi, Yosep lé, “Náng wa gi, yhang a shî shi-má, 17 ‘Ngò, nunggu nungmâng pé, nang lé shut é mara eq yhángmòq nang lé agè ashop é dông kut laî lo é hkyô pê lé mara hkyut byi râ matú, nang lé dûng tôngbán lhê nghû, Yosep lé, núngnhik wuî taí keq.’ ga pying to hkô ri. Haû mù, ahkuî, jeju mai, náng wâ é Garai Gasâng é duìnhâng zoshâng wuì é mara lé hkyut byi laq.” ga dang kyô kat akô nghut ri. Yosep gi, dang haú lé wó gyo jáng ngau nyi ri.
18 Yhang gu yhang mâng pé gi, lé mù, yhâng é hí má lé gòp byên to kômù, “Ngá-mòq gi, náng é jun pé nghut lhê.” ga taî akô nghut ri.
19 Nghut kôlhang, Yosep gi, yhángmòq lé, “Hkâgyùq kó. Ngò gi, Garai Gasâng é ahkô mâ é sû nghut lhê lhú? 20 Núngmòq gi, ngo lé ashop é dông kut naû kôlhang, Garai Gasang gi, hkû-nyí núngmòq myang é eq rajung za, byù myo myô é chyungxe lé hkyî râ matú ge é hkyô hen byî é nghut ri. 21 Haú hkûn, hkâgyùq kó. Ngò gi, núngmòq eq núngmòq é zoshâng wuì lé baú nyî râ nghut lhê.” ga taî ri. Haú dông, Yosep gi, yhángmòq lé nhiktíng byi mù, dang ngón dang nguî taî ri.
Yosep Shi Ló Byùq É Hkyô
22 Yosep gi, yhâng wâ é yhûmbyù wuì bànshoq bang eq rahá Egutuq ming má nyi nyi ri. Yhang gi, 110 zàn chyungxe dui ri. 23 Haû mù, yhang gi, Ehprim é yhang zo yhang shû pé sum xik jé shoq myang ri. Hau htoq agó, Manase é yhang zo Mahkira é yhang zô pé lé le, hku é hkûn yhâng é tanghkoí má bún ri.
24 Haú hkûn, Yosep gi, yhang gu yhang mâng pé lé, “Ngò gi, shî râ za nghut bê. Nghut kôlhang, Garai Gasang gi, hkyak yhang, núngmòq lé lé garúm luî, shí mau mai núngmòq lé shuî htoq yû mù, Abraham, Isak eq Yakup pé lé, Yhang byi râ ga danghtum htûm tô é maumyî má shuî ló râ nghut lhê.” ga taî ri. 25 Hau htâng, Yosep gi, Isira-elaq é byu pé lé, “Garai Gasang gi, hkyak yhang, núngmòq lé lé garúm yû râ nghut lhê; haû mù, núngmòq gi, ngá é showui lé, shí jowò mai yu ló ra râ nghut lhê.” ga dakâm nhang ri.
26 Haû mù, Yosep gi, chyungxe zànwut 110 zàn má shi ló byùq bê nghut ri. Haú hkûn, yhángmòq gi, yhang lé, gùngsôm a bùp râ matú namngón jung bùt byi mù, gung má kat luî, Egutuq ming má tô tô ri.