Yhang zo Yùqzô Pé Lé Yakup Shimân Byî É Hkyô
49
Hau htâng, Yakup gi, yhang zo yùqzô pé lé wùt yù mù, “Htângnùng má, núngmòq chyáng haî dut lô râ hkyô pé lé, ngò tsing taî kyo kó bá, shî má zîng lò keq.2 Yakup é yhang zo yùqzô pé ê, chôm zîng lò mù, lo gyo keq;
núngmòq é yhâng wa Isira-elaq é dang lé gyô yû keq.
3 Rubin ê, nàng gi, ngá é zo-mún nghut mù,
ngá é wum-o eq ngá é sânghî hpung a-tsam nghut ri;
hkúngga hpautap gíng dik sû eq hpungwup a-tsam bo dik sû nàng nghut ri.
4 Nàng gi, wuìgyùn su gabyông é yánmai, góbâng htoq má je gyaú râ a nghut;
hkâsu mù gâ le, nàng gi, náng wâ é hpyang má dòq luî,
haû ngá é yhupgyàp má agòt a-û lhoqwùq sû nghut ri.
5 Sime-on eq Lewiq gi, myìt isâm du é gu-mang razúm nghut akô;
yhángnhik é shâm gi, agè ashop hkyô kut é gyèzè nghut ri.
6 Ngò gi, yhángnhik haq htung é hpàqchyî má a bo lòm sháng gàq;
ngò gi, yhángnhik ùp é má a bo bò sháng gàq;
hkâsu mù gâ le, yhángnhik gi, nhikjum yô é èq byù sat kômù,
yhángnhik ô nau é dông, nohtô é lahkàp hpyit akô nghut ri.
7 Yhángnhik nhikjum yo kô é gi, ladu laî é nghut mù,
yhángnhik nhik-ûm bùq é gi, ashop kô é nghut luî,
dâkam pyâm é hui kó sháng gàq!
Ngò gi, yhángnhik lé, Yakup é yhûm má lhoqpyo kat mù,
Isira-elaq é maumyî má lhoqpyo pyám râ nghut lhê.
8 Yudaq ê, nang lé gi, nunggu nungmâng pé hkya-on râ nghut lhê;
náng é lòq gi, náng é gye pê é lìngzing má kyaq zui râ nghut lhê;
náng wâ é yhang zô pé gi, nang lé paî gòp kôrâ nghut lhê.
9 Yudaq ê, nàng gi, hkanghkyi râm zo nghut ri;
ngá zo ê, nàng gi, hkat htim zô wún é mai taû lo ri.
Yhang gi, hkanghkyi eq hkanghkyi zìng su, myigùng má gyek mù, up tô ri;
ó yùq wá, yhang lé nyaú dang wám taí râ lhú?
10 Yhang eq sêng é jahkôn, yhang lé byi luî,
byù myû wuì, yhâng é jì-no gyo kô é hkûn jé shoq,
haû ùp é gán-yang gi, Yudaq chyáng mai gâng ló râ a nghut;
haû ùp é dumbáng le, yhâng é hkyîgyoa mai gâng ló râ a nghut.
11 Yhang gi, yhâng é loze lé tsibyiq nuî má,
yhâng é loze zo lé je ge é tsibyiq nuî akoq má tuî to mù,
yhâng é mèbu lé tsibyiq wing má,
yhâng é buhîng lé sui su ne é tsibyiq shiwing má chi râ nghut lhê.
12 Yhâng é myòqjí gi, tsibyiq wing htoq nè râ nghut lhê;
yhâng é zuì gi, no-naú htoq hpyû râ nghut lhê.
13 Zebulun gi, wuimau yàm má nyì râ nghut mù,
wuìsanghpo guhkan dùt râ nghut lhê;
yhâng é maukyo gi, Sidon jé shoq nghut râ nghut lhê.
14 Yisahka gi, sau hkup pê é agyo má up tô é,
wum-o htan é loze nghut ri.
15 Yhang gi, yhâng é nô yù jáng hkâ-í ge é eq,
yhâng é maumyî hkâ-í ngón é lé myàng jáng,
wòlai wàq râ matú yhâng é gòqsân lé ngóm râ nghut é htoq agó,
jùn langchyáng kut râ nghut lhê.
16 Dan gi, Isira-elaq a-myû up mâ é rayùq su,
yhâng é byu pé lé târâ ràp-rá hkyô shit râ nghut lhê.
17 Dan gi, hkyô yàm mâ é lhângmuì mó,
hkyô zo mâ é dùq htân lhângmuì dùt râ nghut mù,
myàng ji ji bang nùng ngàng làng byìt gyó sháng gàq ga,
myâng é hkyîhtáng la-nhik má hte râ nghut lhê.
18 Yhûmsîng Garai ê, ngò gi, Náng é hkyi yù hkyô lé láng nyi lhê.
19 Gat gi, gyè rahpûng èq yhang lé htîm lô kôlhang,
haú bâng é hkyîhtáng la-nhik má taû htim râ nghut lhê.
20 Asheri é zoshuq gi, gyai réng râ nghut mù,
yhang gi, hkóhkam é matú màn bo é zoshuq lajang byi râ nghut lhê.
21 Naphtali gi, lhoqlhut tô é hui bê xat zîng nghut mù,
dang ngón dang nguî dàt taîb ri.
22 Yosep gi, ashi zuî é tsibyiq nuî nghut luî,
wuìlàng yàm mâ é ashi zuî é tsibyiq nuî nghut ri;
hau é akoq pé gi, wàhkûm má nui dán dòq laî tô ri.
23 Lai chûng sho hô bang gi, yhâng é myìt má no hpuzo shoq htîm akô;
yhángmòq gi, yhang lé a nguì mù, wing bìk zing-rî akô nghut ri.
24 Nghut kôlhang, yhâng é lai gi, gingtîng nyi ri;
yhâng é lòqbú gi, lòqyìn mó bo nyi ri;
haû gi, Yakup é Wum-o a-tsam mó bò Su é lòq wûm é yánmai le,
Isira-elaq é Lungmó Zîng nghut é sau zúng Su é yánmai le,
25 nang lé garúm sû, náng wâ é Garai Gasâng é yánmai le,
hû mauhkûng ahtoq mâ é shimân jeju pé,
mhô nìk é wuìbúm a-ô mâ é shimân jeju pé eq,
xâng shuq naúwang eq xâng lúng ûnghkaû mâ é jeju pê èq,
nang lé shimân byî é, haû Wum-o a-tsam dìk shoq bò Su é yánmai le nghut ri.
26 Náng wâ é shimân jeju gi,
góhkun lhê é bùm mó pê é shimân jeju htoq le,
a-nham lhê é bùm pé mâ é wú chyit wú ngui é zè htoq le je gyaú ri.
Haú pé bànshoq gi, Yosep é u htoq má le,
yhang gu yhang mâng pé eq gâng ló suc é ují lagùng má le, jòq nyì sháng gàq.
27 Ben-yamin gi, lú lhum bàt zìk zô é wàmhkui nghut ri;
wó chyup lo é yòsô sho lé, nàpsûn lé zo mù,
wó lú sing lo é zè lé, myín lé gam ri.” ga taî ri.
28 Shí bang bànshoq gi, Isira-elaq raxe í myû nghut ri; dang shí pé gi, yhángmòq é yhâng wa mai yhángnhik wuî lé shimân byî é hkûn taî é dang nghut ri; yùq hkangmó lé, ó le ó wó yû âng é jeju eq rajung za shimân byî ri.
Yakup Shi Ló Byùq É Hkyô
29 Hau htâng, yhang gi, yhángnhik wuî lé, “Ngò gi, ngá é îchyí îwâ pé eq ló huî lhum râ za nghut bê. Ngo lé, Hiti byù Ehprun é yòbun mâ é lùqhkyûng má, ngá é îchyí îwâ pé eq rahá myhup yhum keq. 30 Lùqhkyûng haû gi, Hkanan mau, Mamre nàm mâ é Makhpela é yò hkaû má nghut ri; haû lé gi, lùpdùng kut râ matú, Abraham èq Hiti byù Ehprun chyáng mai yòbun eq rahá jâng wui yu é nghut ri. 31 Haû má, Abraham eq yhâng yhûmsîng myhí Sara lé le myhup tô lhê; Isak eq yhâng yhûmsîng myhí Rebeka lé le myhup tô lhê; hau htoq agó, ngò, Le-a lé le haú má myhup tô lhê. 32 Yò haû eq haú má jòq é lùqhkyûng lé gi, Hiti byu pê chyáng mai wui yu é nghut lhê.” ga dáng sang tô ri.
33 Yakup gi, yhang zo yùqzô pé lé jíhkúm nùqgùq dáng ban sâng jáng, yhâng é hkyî lé yhupgyàp má she yù mù, kângsoq byìt luî, yhâng é îchyí îwâ pê chyáng ló byùq bê nghut ri.