Manase Eq Ehprim Nhiktang É Hkyô
48
Hau htâng a myáng má, “Náng wa gi, no nyi ri.” ga Yosep lé taî kyô akô. Haû mù, yhang gi, yhang zô nhiktâng Manase eq Ehprim lé shuî dòq ló ri. 2 Haú hkûn, “Nungzo Yosep gi, náng chyáng lé jé ri.” ga Yakup lé taî kyo kôjáng, Isira-elaq gi, wum kat shi-kùt toq luî, yhâng é hpyang má zung ri.3 Haû mù, Yakup gi, Yosep lé, “Wum-o a-tsam dìk shoq bò Sû Garai Gasang gi, Hkanan mau mâ é Luza wà má ngo lé htoq shit mù, shimân byi uchyang, 4 ngo lé, ‘Ngò gi, nang lé zo myo myhû nhâng mù, byù du myoluq jebe nhâng râ nghut lhê. Ngò gi, nang lé byù myû myo myo dùt nhâng mù, náng é htâng má nyi lé lô râ nghut é, náng é awùt ashîn pé lé, maumyî shî má ahtum abyùq sing nyì râ matú, maumyî shî byi râ nghut lhê.’ gâ ri.
5 Haû mù, ahkuî, shî Egutuq ming má ngò a jé lé shi-má, Egutuq ming má nàng wó é yùqzô nhiktâng gi, ngò eq séng kôrâ nghut lhê; Ehprim eq Manase gi, Rubin eq Sime-on su, ngò eq séng kôrâ nghut lhê. 6 Yhángnhik é htâng má, nàng dum wó é zoshâng wuì gi, náng é nghut râ nghut lhê; yhángmòq wó sîng râ maumyî pé gi, yhángmòq é yhang mâng nhiktang é myìng ô má nghut râ nghut lhê. 7 Ngò gi, Hpadan mau mai taû lo é hkûn, Hkanan mau mâ é Ehprat wà eq hkâ-í a wê é hkyôwuì má nghut nyi é u lé, Rahkela shi byùq é nghut luî, gyai yón pyám mù, Betlehem le gâ é Ehprat wà shut ló é hkyô yàm má yhang lé myhup pyâm é nghut lhê.” ga taî ri. 8 Isira-elaq gi, Yosep é yhang zô nhiktâng lé myàng jáng, “Shí nhik gi, ô nhik nghut akô?” ga myî ri.
9 Haû jáng, Yosep gi, yhâng wa lé, “Yhángnhik gi, shí mau má, Garai Gasang èq ngo lé byî é ngá zo yùqzô nhiktâng nghut lhê.” ga taî kyô ri.
Haú hkûn, Isira-elaq gi, “Yháng nhiktâng lé ngá chyáng huî lé nhâng àq; ngò, yhángnhik lé shimân byi bá.” ga taî ri.
10 Isira-elaq gi, lûm mâng byùq mù, myòqmhop mhop dùt lò luî, wùp wùp za ru myang alô nghut ri. Haû mù, Yosep gi, yhang zô nhiktâng lé, yhang chyáng shuî huî ê jáng, yhâng wa gi, yháng nhiktâng lé lhom pô mù, bo-puq puq byî ri.
11 Isira-elaq gi, Yosep lé, “Ngò gi, náng é myòqdong lé myàng râ lháng a myìt to lô é nghut lhê; nghut kôle, Garai Gasang gi, ahkuî, nungzô nhiktâng lé le myàng nhâng bê nghut ri.” ga taî ri.
12 Haú hkûn, Yosep gi, yhang zô nhiktâng lé, yhâng wâ é tanghkoí mai shuî yù luî, yhâng é myòqdong myigùng jé shoq ngóm gòp ri. 13 Hau htâng, Yosep gi, yháng nhiktâng lé shuî yù mù, yhâng é lòqyo lòq èq Ehprim lé zui luî, Isira-elaq é lòqpaî lòq shut kut mù, yhâng é lòqpaî lòq èq Manase lé zui luî, Isira-elaq é lòqyo lòq shut kut, shuî huî e ri. 14 Nghut kôlhang, Isira-elaq gi, yhâng é lòqyo lòq lhâm kat mù, Ehprim tiq sû yùq nghut kôle, u htoq má ke byi luî, yhâng é lòqpaî lòq lé shikshaî kut lhâm kat mù, Manase zo-mún yùq nghut kôle, u htoq má ke byî ri.
15 Hau htâng, yhang, Yosep lé shimân byî é gi,
“Ngá chyí Abraham eq ngá wa Isak hpe,
jujúm myìt mai châng nyi é Garai Gasang,
hkû-nyí jé shoq, ngá é chyungxe duì hkyô bànshoq má,
ngò sau zo lé zúng byî nyi é Garai Gasang,
16 byò dàn byò sho hkyô bànshoq mai, ngo lé hkyi xe yu nyi é haû Maumang Lagyo gi,
zoshâng shí nhiktâng lé shimân byi sháng gàq.
Ngá é myìng le, ngá chyí Abraham eq ngá wa Isak é myìng le,
yhángnhik chyáng ru wut nyî kó sháng gàq;
yháng nhiktâng gi, myìdàm htoq má,
myoluq jebe kó sháng gàq.” gâ ri.
17 Yhâng wa gi, yhâng é lòqyo lòq, Ehprim é ulhum má ke byî é lé, Yosep myàng jáng, yhang gi, myìt a wú ngón byùq mù, yhâng wâ é lòq lé zui luî, Ehprim é ulhum mai Manase é ulhum má htòt ke byi uchyang, 18 “Âwa ê, a nghut; shí yùq shèq zo-mún ru nghut lhê; yhâng é ulhum má, náng é lòqyo lòq ke byi aq.” ga yhang lé taî ri.
19 Nghut kôlhang, yhâng wa gi, he pyám luî, “Ngò sê lhê, ngá zo ê, ngò sê lhê. Yhang le, byù myû ra-myû dùt mù, kô myhang lò râ nghut lhê. Nghut kôle, yhang gu gi, yhâng htoq kô myhâng râ nghut luî, yhâng é awùt ashín pé gi, byù myû myo myo dùt htoq kôrâ nghut lhê.” ga taî ri. 20 Hau htâng, yhang gi,
“Náng é myìng mai,
‘Garai Gasang gi, Ehprim eq Manase lé su, nang lé dùt nhâng sháng gàq!’ ga,
Isira-elaq byu pé taî nyì bekô râ nghut lhê.” ga,
haú nyí, yhang nhiktâng lé shimân byî ri.
Haû mù, yhang gi, Manase é hkô má, Ehprim lé to bê nghut ri.
21 Hau htâng, Isira-elaq gi, Yosep lé, “Ngò gi, shî berâ za nghut bê; nghut kôlhang, Garai Gasang gi, núngmòq eq rahá nghut nyî mù, núngmòq lé, núngmòq é îchyí îwâ pê é mau má shuî taû ló râ nghut lhê. 22 Hau htoq agó, ngò gi, nungmâng pé lé byî é htoq ragàmbùm myo shoq, nang lé, ngá é shâm eq laî èq Amori byu pê chyáng mai wó lú yu é maumyîa lé byî é nghut lhê.” ga taî ri.