47
Hau htâng, Yosep gi, Hpara-uq chyáng ê mù, “Ngá wa eq ngá gu ngá mâng pé gi, yhángmòq é sau bainám hpúng pé eq no pé lé le, yhángmòq wó é lhúnglháng lé le, kôn chûng yu chûng kômù, Hkanan mau mai lé jé kôluî, ahkuî Goshen mau má nyi tô akô nghut ri.” ga ê taî kyô ri. 2 Yhang gi, yhang gu yhang mang ngo yuq lé hkyin yù mù, Hpara-uq chyáng ê shuî shit ri.3 Haú hkûn, Hpara-uq gi, haû yhang gu yhang mâng pé lé, “Núngmòq gi, haî kut zo bang nghut akô?” ga myî ri.
Haû jáng, yhángnhik wuî gi, “Ngá-mòq é îchyí îwâ pé su, náng é duìnhâng zoshâng wuì ngá-mòq gi, sau zúng bang nghut lhê.” ga Hpara-uq lé tû taî akô nghut ri. 4 Hau htoq agó, yhángmòq gi, yhang lé, “Ngá-mòq gi, shî má rayòq rabun za nyì râ matú jé lé é nghut lhê; haî mù gâ le, Hkanan ming má mùtmó góng gyó nyi é nghut mù, náng é duìnhâng zoshâng wuì ngá-mòq é sau bainám hpúng pé zo râ mhan yô a jòq dùt byùq bê nghut ri. Haû mù, ahkuî, jeju mai, náng é duìnhâng zoshâng wuì ngá-mòq lé, Goshen mau má nyì nhâng laq.” ga le taî akô nghut ri.
5 Hpara-uq gi, Yosep lé, “Náng wa eq nunggu nungmâng pé gi, náng chyáng jé lé bekô; 6 haû Egutuq maumyî gi, náng é myòq hí má nghut nyi ri; náng wa eq nunggu nungmâng pé lé, maumyî shî mâ é je ge é jowò nghut é, Goshen mau má nyì nhâng àq. Yhángmòq chyáng mâ é laksan a-tsam bo é bang lé nàng myàng jáng, haú bang lé, ngá é shigu gaunyhaú zúng zau kut râ matú wò byi aq.” ga taî ri.
7 Hau htâng, Yosep gi, yhâng wa Yakup lé, Hpara-uq é hí má shuî wang e ri. Yakup gi, Hpara-uq lé shimân dang taí byî é htâng má, 8 Hpara-uq gi, yhang lé, “Nàng, chyungxe zànwut hkâ-í bò bê lhú?” ga myî ri.
9 Haú hkûn, Yakup gi, Hpara-uq lé, “Ngò, myìdam byù bíng kut laî lo é chyungxe zànwut gi, 130 zàn bò bê nghut lhê. Ngá é chyungxe zànwut gi, shaû é eq wuîhkê é nghut mù, ngá é îchyí îwâ pé myìdam byù bíng kut laî lo é chyungxe zànwut lé a hkyit nghut ri.” ga taî ri. 10 Hau htâng, Yakup gi, Hpara-uq lé shimân byi mù, yhâng é hí mai htoq ló bê nghut ri.
11 Haû mù, Yosep gi, yhâng wa eq yhang gu yhang mâng pé lé, Egutuq ming má nyì nhâng mù, Hpara-uq shit kyô tô é eq rajung za, Egutuq ming mâ é je ge é maumyî nghut é, Ramese mau mâ é maumyî má, yhángmòq lé nyì nhâng bê nghut ri. 12 Hau htoq agó, Yosep gi, yhâng wa lé le, yhang gu yhang mâng pé lé le, yhâng wâ é yhûmbyù wuì bànshoq bang lé le, yhángmòq é zodù wui é byù du má cháng luî, zoshuq tsing htuqbáng byî ri.
Yosep Eq Mùtmó Gyó É Hkyô
13 Mùtmó gyó é ladu laî byùq mù, ra-mau ramyì gón má zoshuq langhpyùt byùq bê nghut ri; Egutuq ming eq Hkanan mau mâ é byu pé gi, mùtmó gyó é yánmai, mùtyùt yùt ló bûm bekô nghut ri. 14 Yosep gi, Egutuq ming eq Hkanan mau má, mingbyû wuì wui yu é gùqzò muilhum ahpau ngùn myàng mî-myàng lé, Hpara-uq é hkóhkâm wâng má ló tsîng kat tô ri. 15 Egutuq ming eq Hkanan mau mâ é byu pê é ngùn ban byùq kô é hkûn, Egutuq ming mâ é byu pé bànshoq bang gi, Yosep chyáng lé jé kômù, “Ngá-mòq lé zoshuq byi aq. Ngá-mòq gi, haî mù náng é myòq hí má shi byùq râ lhú? Ngá-mòq é ngùn ban byùq bê nghut ri.” ga taî akô.
16 Haú hkûn, Yosep gi, yhángmòq lé, “Núngmòq é shigu gaunyhaú she lé keq; núngmòq é ngùn ban byùq bekô nghut é yánmai, ngò gi, núngmòq lé, shigu gaunyhaú haú pê èq zoshuq htaí byi râ nghut lhê.” ga taî ri. 17 Haû mù, yhángmòq gi, yhángmòq é shigu gaunyhaú lé, Yosep chyáng she lé kô é nghut mù, Yosep gi, yhángmòq é myang pê é matú le, yhángmòq é sau eq bainám pê é matú le, yhángmòq é no pé eq loze pê é matú le, zoshuq htaí byî ri. Haú dông, yhang gi, razàn gón yhángmòq é shigu gaunyhaú pé bànshoq èq zoshuq htaí byi bê nghut ri.
18 Haú zân zànhtâng sat jáng, yhángmòq gi, htang zan é matú, Yosep chyáng lé jé kômù, “Ngá-mòq é yhûmsîng ê, a zaú tô é za ngá-mòq taí bá, ngá-mòq é ngùn le ban byùq bê; ngá-mòq é shigu gaunyhaú le náng é dùt byùq bê nghut lhê. Ngá-mòq gi, ngá-mòq é yhûmsîng náng é matú, ngá-mòq é gùngdu eq ngá-mòq maumyî mai lai luî, gótû haî le a myìt to lo nghut ri. 19 Ngá-mòq gi, haî mù, náng é hí má, byù shi lhê, yô hâm byùq lhê dùt râ lhú? Ngá-mòq lé le, ngá-mòq é maumyî lé le, zoshuq é matú wui yû àq; haú hkûn, ngá-mòq gi, Hpara-uq é jùn dut luî, ngá-mòq é maumyî gi, yhâng é lòqhkaû má dùt byùq râ nghut lhê. Ngá-mòq gi, a shi é za, chyungxe wó dui nyì mù, maumyî gi, chamchyuîyuì a dùt byùq sháng gàq, ngá-mòq lé kyô-myui byi laq.” ga taî akô nghut ri.
20 Haû mù, Yosep gi, Egutuq ming mâ é maumyî bànshoq, Hpara-uq é matú wui hpyit yû bê nghut ri. Haû Egutuq byu pé gi, mùtmó gyó é ladu mó yhang laî byùq é nghut mù, yùq hkangmó, yhûmsing é yò maumyî lé ûng pyám bekô nghut luî, maumyî haû bànshoq gi, Hpara-uq é dùt byùq bê nghut ri. 21 Yosep gi, shiwa byu pé lé, Egutuq ming rahkyam shut mâ é bang lé, góhkyam shut mâ é wà pé má htòt nyì nhang ri. 22 Nghut kôlhang, yhang gi, hkyangjông pê é maumyî lé a wui yù nghut ri; haî mù gâ le, haú bang gi, Hpara-uq htuqbáng byî nyi é zoshuq gàmbùm lùq zô nyi akô; haû mù, yhángmòq gi, yhángmòq é maumyî lé a ung kó nghut ri.
23 Yosep gi, shiwa byu pé lé, “Wú keq, ngò gi, Hpara-uq é matú, hkû-nyí, núngmòq eq núngmòq é maumyî lé wui hpyit yû bê nghut lhê; núngmòq gi, myigùng má kyô hkyó gàn wó hkan kó sháng gàq, núngmòq é matú kyô-myui gi, shî nghut lhê. 24 Nghut kôlhang, kyô shû yu é hkûn, ngo gâmbùm mâ é ragàmbùm lé gi, Hpara-uq lé byi ra râ nghut lhê. Ngo gâmbùm mâ é myi gâmbùm lé gi, yò mâ é matú a-myui tô to mù, núngmòq é matú le, núngmòq é yhûmbyù wui matú le, núngmòq é zodù wui matú le, zoshuq kut keq.” ga taî ri.
25 Haú hkûn, yhángmòq gi, “Nàng gi, ngá-mòq é chyungxe lé hkyî bê nghut lhê. Ngá-mòq gi, ngá-mòq é yhûmsîng náng é hí má myòqdong wó sháng gàq; ngá-mòq gi, Hpara-uq é lòqhkaû má jùn kut râ nghut lhê.” ga taî akô nghut ri.
26 Haû mù, Yosep gi, wó shû yu é kyôshi myuishi mâ é, ngo gâmbùm mâ é ragàmbùm lé, Hpara-uq hkyui yù sháng gàq ga, hkû-nyí jé shoq, Egutuq ming má maumyî eq sêng é târâ dông hkyô to byi bê nghut ri. Haû hkyangjông pê é maumyî za, Hpara-uq é maumyî a dùt byùq nghut ri.
27 Haû Isira-elaq byu pé gi, Egutuq ming mâ é Goshen mau má nyì mù, wó lô sùt lò kôluî, zo myo myhû kômù, byù du myoluq jebe lò bekô nghut ri.
28 Yakup gi, Egutuq ming má 17 zân nyì jáng, yhâng é chyungxe zànwut 147 zân bò bê nghut ri. 29 Yhang Isira-elaq gi, shî râ buìnyì chyâng lo nyi é nghut mù, yhang zo Yosep lé ji yù luî, yhang lé, “Náng é hí má ngò myòqdong wó é nghut jáng, náng é lòq lé, ngá é tangkyó má kat mù, ngo lé, jeju eq jujúm hkyô shit râ matú, danghtum htûm to mù, ngo lé, Egutuq ming má hkâ-myhup pyâm to; 30 nghut kôlhang, ngò, ngá é îchyí îwâ pé eq yhup ngón ló é hkûn, ngo lé, Egutuq ming mai wàq htoq ló mù, yhángmòq lé myhup é jáng má, ngo lé ló myhup àq.” ga taî ri.
Yosep gi, “Nàng taî é su, ngò kut râ nghut lhê.” ga taî ri.
31 Haú hkûn, Yakup gi, “Ngo lé dakâm àq.” ga taî ri. Haû mù, Yosep gi, yhang lé dakâm jáng, Isira-elaq gi, yhâng é dumbáng-u má lèq nghê mù, noqkuq bêa nghut ri.