Egutuq Ming Má Yakup Gyó E É Hkyô
46
Haû mù, Isira-elaq gi, yhang sing é lhúnglháng lé yu chûng mù, htòt htoq e ló luî, Berasheba má jé jáng, yhâng wa Isak é Garai Gasang lé hkungga nhông byî ri.2 Myín lé, Garai Gasang gi, shing-rán má, Isira-elaq lé, “Yakup! Yakup!” ga wùt ri.
Yakup gi, “Ngò shî má nyi lhê.” ga tû taî ri.
3 Haú hkûn, Garai Gasang gi, “Ngò gi, Garai Gasang, haû náng wâ é Garai Gasang nghut lhê; Egutuq ming shut gyó ê râ lé hkâgyùq; hkâsu mù gâ le, Ngò gi, haû má nang lé byù myû mó dùt nhâng râ nghut lhê. 4 Ngò gi, nàng eq rahá Egutuq ming shut gyó ê luî, nang lé, haû mai gè gè yhang dum shuî taû dòq lò râ nghut lhê. Yosep é lòq le, náng é myòqjí lé sop chûm kat râ nghut lhê.” ga taî ri.
5 Hau htâng, Yakup gi, Berasheba mai htòt htoq e ló é nghut mù, yhang Isira-elaq é yhang zô pé gi, yhángmòq é yhâng wa Yakup lé le, yhángmòq é yhang zô pé lé le, yhángmòq é yhûmsîng myhî pé lé le, Yakup ji râ matú Hpara-uq èq nhâng byî é lhêng pé má jí nhang akô nghut ri. 6 Yhángmòq gi, Hkanan mau má yhángmòq wó é shigu gaunyhaú pé eq sùtzè pé kôn chûng yu chung akô; haû mù, Yakup eq yhâng é awùt ashín pé bànshoq bang gi, Egutuq ming má gyó jé ê bekô nghut ri. 7 Haú dông, Yakup gi, yhâng é awùt ashín pé nghut é, yhang zo yùqzo byìzô pé eq yhâng gashu yùqzo byìzô pé lé, yhang eq rahá Egutuq ming má shuî gyó e ri.
8 A-ô mâ é gi, Egutuq ming má gyó e é, Yakup eq yhâng é awùt ashín pé nghut é, Isira-elaq é yhang zo yhang shû pê é myìng nghut lhê. Yakup é yhang zo zo-mún Rubin nghut ri. 9 Rubin é yhang zo yùqzô pé gi, Hanok, Hpalu, Heziron eq Hkarimi pé nghut akô. 10 Sime-on é yhang zo yùqzô pé gi, Yemu-ela, Yamin, Ohat, Yahkin, Zohara eq, Hkanan myhî chyáng mâ é yhang zo Sha-ula pé nghut akô. 11 Lewiq é yhang zo yùqzô pé gi, Gerishon, Kohat eq Merari pé nghut akô. 12 Yudaq é yhang zo yùqzô pé gi, Era, Onan, Shela, Perezi eq Zera pé nghut akô; nghut kôlhang, Era eq Onan gi, Hkanan mau má shi byùq bekô nghut ri. Perezi é yhang zo yùqzô pé gi, Heziron eq Hamula nghut ri. 13 Yisahka é yhang zo yùqzô pé gi, Tola, Hpu-a, Yoba eq Shimron pé nghut akô. 14 Zebulun é yhang zo yùqzô pé gi, Seret, Elon eq Yelela pé nghut akô. 15 Shí bang gi, Hpadan Aram má, Le-a èq Yakup lé hkû byî é, yhang zo byìzo Dina lé a lhôm é yhang zo yùqzô pé nghut akô. Yhâng é yùqzô eq byìzô pé bànshoq bang gi, 33 yùq nghut akô.
16 Gat é yhang zo yùqzô pé gi, Zehpon, Hagi, Shuni, Ezibon, Eri, Arodi eq Areli pé nghut akô. 17 Asheri é yhang zo yùqzô pé gi, Imna, Ishiwa, Ishiwi eq Beri-a pé nghut akô. Yhángmòq é nhammó gi, Sera nghut ri. Beri-a é yhang zo yùqzô nhiktâng gi, Hebera eq Malihkela nghut akô. 18 Shí bang gi, Laban èq yhang zo byìzo Le-a lé byî kat é Zilihpa mai Yakup lé hkû byî é zodù wuì nghut akô. Bànshoq bang gi, 16 yùq nghut ri.
19 Yakup é yhâng yhûmsîng myhí Rahkela chyáng mâ é yùqzô nhiktâng gi, Yosep eq Ben-yamin nghut akô. 20 Egutuq ming má, Ona wà mâ é hkyangjong Hpotihpera é yhang zo byìzô Asenat èq, Yosep lé hkû byî é yùqzô nhiktâng gi, Manase eq Ehprim nghut akô. 21 Ben-yamin é yhang zo yùqzô pé gi, Bela, Behkara, Ashibela, Gera, Naman, Ehi, Rosha, Muhpim, Hupim eq Arida pé nghut akô. 22 Shí bang gi, Rahkela èq Yakup lé hkû byî é yhang zo yùqzô pé nghut akô. Bànshoq bang gi, 14 yùq nghut ri.
23 Dan é yhang zo yùqzo gi, Hushim nghut ri. 24 Naphtali é yhang zo yùqzô pé gi, Yazela, Gu-ni, Yezera eq Shilem pé nghut akô. 25 Shí bang gi, Laban èq yhang zo byìzo Rahkela lé byî kat é Bila mai Yakup lé hkû byî é yhang zo yùqzô pé nghut akô. Bànshoq bang gi, 7 yùq nghut ri.
26 Yakup é yhâng dùmó pé lé a nghap lhóm jáng, Yakup eq rahá, Egutuq ming má gyó e é yhâng é awùt ashín a-kyîng pê é byù du bànshoq gi, 66 yùq nghut akô. 27 Egutuq ming má Yosep ê wó é yùqzô nhiktânga lé nghap lhóm jáng, Egutuq ming má gyó e é, Yakup é yhûmbyù wui é byù du bànshoq gi, 70 yuqb nghut akô.
28 Yakup gi, Goshen mau shut hkyô lhom shit yû sháng gàq ga, Yosep chyáng Yudaq lé yhâng é hí má nhang kat ri. Yhángmòq gi, Goshen mau má jé kô é hkûn, 29 Yosep gi, yhâng é gyè myanglhêng lé hen yù mù, yhâng wa Isira-elaq lé ê hui râ matú, Goshen mau shut dòq e ri. Yosep gi, yhâng wâ é hí má ê htoq jé eq, yhâng wâ é lìngzing má ê po zing to mù, gyai myáng shoq ngau nyi ri.
30 Isira-elaq gi, Yosep lé, “Ngá myòq èq yhang, nàng chyungxe dui nyi ashî nghut é lé wó myâng bê nghut mù, ahkuî ngo shî kôlhang, haî a ra lo.” ga taî ri.
31 Hau htâng, Yosep gi, yhang gu yhang mâng pé eq yhâng wâ é yhûmbyù wui lé, “Ngò gi, Hpara-uq chyáng dòq ló mù, yhang lé, ‘Hkanan mau má nyi é ngá gu ngá mâng pé eq ngá wâ é yhûmbyù wuì, ngá chyáng jé lé bekô nghut ri. 32 Haú bang gi, sau rém zo bang nghut lhê; yhángmòq gi, shigu gaunyhaú rém zo bang nghut luî, yhángmòq é sau bainám hpúng pé eq no myang pé lé le, yhángmòq wó é lhúnglháng lé le, kôn lé yu lé lô bekô nghut ri.’ nghû taí râ nghut lhê. 33 Haú hkûn, Hpara-uq gi, núngmòq lé wùt hâng yù mù, ‘Núngmòq gi, haî kut zo bang nghut akô?’ ga myi jáng, 34 núngmòq gi, ‘Ngá-mòq é îchyí îwa kut é su, náng é duìnhâng zoshâng wuì ngá-mòq gi, zoshâng hkûn mai shigu gaunyhaú rém zo bang nghut lhê.’ nghû tû taí keq. Haú hkûn, núngmòq gi, Goshen mau má nyì râ ahkáng wó kôrâ nghut lhê; hkâsu mù gâ le, Egutuq byu pé gi, sau zúng bang bànshoq lé chaq akô nghut ri.” ga taî ri.