Yosep, Yhang Ó Nghut É Lé Sé Nhang É Hkyô
45
Haú hkûn, Yosep gi, haú má nyi to bang bànshoq é hí má a wó jân to lo mù, “Yùq hkangmó, ngá hí mai htoq ló byùq keq.” ga garû taî kat ri. Haû mù, Yosep gi, yhang gu yhang mâng pé lé, yhang ó nghut é hkyô lé sé nhang é hkûn, yhang eq rahá góbang a nyi to nghut ri. 2 Haú hkûn, Yosep gi, Egutuq byu pé wó gyo shoq wùt garû ngau é nghut mù, Hpara-uq é yhûmbyù wuì le, haú hkyô lé wó gyô akô nghut ri.3 Yosep gi, yhang gu yhang mâng pé lé, “Ngò gi, Yosep nghut lhê! Ngá wa gi, chyungxe dui nyi ashi kô lhú?” ga taî ri. Nghut kôlhang, yhang gu yhang mâng pé gi, yhâng é hí má gyùq dan hong byùq bùm kô é yánmai, yhang lé a wó tû taí kó nghut ri.
4 Haú hkûn, Yosep gi, yhang gu yhang mâng pé lé, “Ngá chyáng huî lé keq.” ga taî ri. Yhángmòq huî ê kôjáng, “Ngò gi, núngmòq èq Egutuq mau shut ung zô kat é sû, núngmòq é yhang gu Yosep nghut lhê! 5 Ahkuî, núngmòq gi, ngo lé shî má ung zô kat kô é nghut mù, myìt myo nhik hkyik é eq yhûmsing gùng yhûmsîng nhikjum yô é hkyô hkâbô kó; haî mù gâ le, byu é chyungxe hkyî râ matú, núngmòq é hí má, ngo lé, Garai Gasang nhang kat é shèq ru nghut lhê. 6 Shî má mùtmó gyó é í zân bò bê; ahkuî mai ngo zân yhang, yò a wó hpuq, kyó a wó shu dùt shirâ nghut lhê. 7 Nghut kôlhang, myìdàm htoq má núngmòq wó nyi myìt gyó to râ matú le, hkyi xe yù hkyô mó èq núngmòq é chyungxe lé hkyi yù râ matú le, núngmòq é hí má, ngo lé, Garai Gasang nhang kat é nghut ri.
8 Haû nghut mù, núngmòq èq ngo lé shî má nhang kat é a nghut, Garai Gasang shèq nhang kat é ru nghut lhê. Yhang gi, ngo lé, Hpara-uq é îwa su dùt râ matú le, yhâng é yhûm gón lé sîng sû dùt râ matú le, Egutuq ming bànshoq lé ùp râ sû dùt râ matú le, hkyin yu é nghut ri. 9 Ahkuî, ngá wâ chyáng hân taû ló luî, yhang lé, ‘Nungzo Yosep gi, îsu gâ ri; Garai Gasang gi, ngo lé, Egutuq ming bànshoq é yhûmsîng kut nhâng bê nghut ri. Ngá chyáng gyó lé aq; razùp lháng hkâ-nô nyì lo. 10 Nàng âwa gi, Goshen mau má lé wó nyî râ nghut lhê; nàng âwa le, nungzo nungshû pé le, náng é sau bainám eq no myang pé bànshoq le, nàng wó mîwó le, ngò eq chyâng é má lé wó nyî râ nghut lhê. 11 Ngo zân yhang mùtmó gyó shirâ nghut é yánmai, ngò gi, núngmòq lé haú má lhom baú râ nghut lhê; haû a nghut jáng, nàng âwa le, náng é yhûmbyù wuì le, nàng eq sêng é bànshoq le, asho awui hpu hkê bùm kôrâ nghut lhê.’ nghû ló taí keq. 12 Ngò Yosep yhang, núngmòq lé gè gè dáng nyo nyi é lé, núngmòq é myòq èq le, ngá gu Ben-yamin é myòq èq le wó myàng bekô nghut lhê. 13 Egutuq ming má ngò xânghpoq nge wó nyi é hkyô lé le, núngmòq myang é jung hkangmó lé le, ngá wa lé ló taî kyo keq. Haû mù, ngá wa lé, shî má hân shuî gyó lô keq.” ga taî ri. 14 Hau htâng, yhang gi, yhang gu Ben-yamin é lìngzing má po zing to mù ngau ri; Ben-yamin le, yhang lé po to mù ngau nyi ri. 15 Hau htâng, yhang gi, yhang gu yhang mâng pé lé bo-puq puq byi luî, ngau ri; hau htâng, yhang gu yhang mâng pé gi, yhang eq dáng nyo kún bekô nghut ri.
16 Haú hkûn, Yosep é yhang gu yhang mâng pé jé nyi bum ri gâ é lùdang gi, Hpara-uq é hkóhkâm wâng má hkyang jé ló jáng, Hpara-uq eq yhâng é zaugun wuì bànshoq bang gi, gyô gabú bûm bekô nghut ri. 17 Haû mù luî, Hpara-uq gi, Yosep lé, “Nunggu nungmâng pé lé, ‘Shi dông kut keq; núngmòq é gaunyhaú pé má zè buí mù, Hkanan mau má taû ló luî, 18 núngmòq é yhâng wa eq núngmòq é i-kun byu pé lé, ngá chyáng shuî gyó lé keq. Ngò gi, núngmòq lé, Egutuq ming mâ é je ge é maumyî lé lhom byi râ nghut mù, núngmòq gi, myixû bo é maumyî shî má myang ngón kôrâ nghut lhê.’ gâ ri nghû taî kyo aq.
19 Hau htoq agó, nàng gi, yhángmòq lé, ‘Shí dông kut keq; núngmòq é zodù wuì eq núngmòq é yhûmsîng myhî pê é matú, Egutuq ming mâ é lhêng she chûng mù, núngmòq é yhâng wa lé ló shuî gyó lô keq. 20 Núngmòq eq sêng é azíng zê pé lé hkâhâ nyì kó; haî mù gâ le, Egutuq ming mâ é je ge é pé bànshoq gi, núngmòq é dùt byùq râ nghut lhê.’ gâ ri nghû shit hkyô aq.” ga taî ri.
21 Haû mù, Isira-elaq é yhang zo yùqzô pé gi, haú dông kut bekô; Yosep gi, Hpara-uq hkunmó hkyô é eq rajung za, yhángmòq lé, lhêng pé byi mù, hkyôwui é matú zoshuq le byî kat bê nghut ri. 22 Hau htoq agó, yhang gi, yùq hkangmó lé, mèbu sik byî ri; nghut kôlhang, Ben-yamin lé gi, ngùnhtung rajoí eq mèbu ngo zúm byî ri. 23 Yhâng wâ é matú le, Egutuq ming mâ é je réng é azíng zê pé htô é loze raxê du eq, yhâng é hkyôwuì má zo râ matú, gùqzò muilhum le, mùk pé le, gótû zoshuq pé le htô é loze zìng raxê du lé byî kat ri. 24 Hau htâng, yhang gi, yhang gu yhang mâng pé lé nhang kat mù, yhángmòq htoq ló nyi é u má, “Hkyôwuì má hkâbyòq lhum kó!” ga châng taî kat ri.
25 Haû mù, yhángmòq gi, Egutuq ming mai dòq ló luî, Hkanan mau má nyi é yhángmòq é yhâng wâ Yakup chyáng lo jé bekô nghut ri. 26 Haú hkûn, yhángmòq gi, yhang lé, “Yosep gi, chyungxe dui nyi ashî. Yhang gi, Egutuq ming gón lé ùp nyi é zau nghut nyi ri.” ga taî kyô akô. Haú hkûn, Yakup gi, maú dan hong byùq mù, yhángmòq é dang lé a jíng nghut ri. 27 Nghut kôlhang, yhángmòq gi, yhángmòq lé Yosep taî é dang bànshoq, yhang lé taî kyo kô é nghut luî le, yhang gi, yhang ji râ matú, Yosep dé kat é lhêng pé lé lhom myang é nghut luî le, yhángmòq é yhâng wâ é i-myìt gi, dum byán byùq bê nghut ri. 28 Haú hkûn, Isira-elaq gi, “Nghut bê ô! Ngá zo Yosep gi, chyungxe dui nyi ashî myhî-nhung. Ngò a shî shi-má, yhang lé ê hui râ matú gyó ê râ nghut lhê.” ga taî ri.