Yhang gu Yhang Mâng Pé Lé Yosep Chyam Wú É Hkyô
44
Hau htâng, Yosep gi, yhâng é yhûm mâ é sùt zum hpó lé, yhang kut râ hkyô pé sang tô ri; haú pé gi, “Byù haú bâng é htûng pé má, yhángmòq wó htô é myhó zoshuq kat byi mù, yhángmòq yùq hkangmó é ngùnhtung lé, ó le ô é htûngnhut má kat to byi aq. 2 Hau htâng, ngá é ngùn gòm lé, je tiq sû yùq é htûngnhut má, yhâng é zoshuq wuì râ matú yu lé é ngùnhtung eq rahá kat to byi aq.” gâ ri. Sùt zum hpó gi, Yosep taî é eq rajung za kut bê nghut ri.3 Nàpkyó myòq myàng jáng, byù haú bang lé, yhángmòq é loze pé eq rahá nhang kat bê nghut ri. 4 Yhángmòq gi, wà mai htoq mù, a lûm we shî é u, Yosep gi, yhâng é sùt zum hpó lé, “Nàng gi, radá dâm byù haú bâng htâng châng ê mù, yhángmòq lé châng hkyit jáng, ‘Núngmòq gi, haî mù, jeju lé, agè ashop é èq taû kut akô lhú? 5 Shî gi, ngá é yhûmsîng hpó shuq é eq yhang bùt hpyit é hkûn chung é gòm nghut lhê, a nghut kó lhí? Núngmòq gi, agè ashop é hkyô kut bekô nghut ri.’ nghû taí aq.” ga taî ri.
6 Sùt zum hpó gi, yhángmòq lé châng hkyit é hkûn, dang haú pé lé roq ê taî ri. 7 Nghut kôlhang, yhángmòq gi, yhang lé, “Ngá é yhûmsîng ê, nàng gi, haî mù haû su nghû taî lhê lhú? Haû sû é hkyô kut é gi, náng é duìnhâng zoshâng wuì ngá-mòq eq wê gâng sháng gàq! 8 Ngá-mòq gi, Hkanan mau mai lháng, ngá-mòq é htûngnhut mai myang yu é ngùnhtung lé, náng chyáng yu taû lé byi bê nghut lhê mhaî. Haû sû é wá, ngá-mòq gi, haî mù luî, náng é yhûmsîng hpô é yhûm mâ é ngùn hîng lé hkaû yù râ lhú? 9 Náng é duìnhâng zoshâng wuì ngá-mòq chyáng mâ é rayùq yùq chyáng haú lé myang ho é nghut jáng, haú yùq gi, shî râ nghut lhê; nyi gyó tô é bang ngá-mòq gi, nàng yhûmsîng hpô é jùn kut râ nghut lhê.” ga taî akô nghut ri.
10 Yhang gi, “Haû jáng nghut bê; núngmòq taî é dông nghut sháng. Haú lé, hká yùq chyáng myang ho le, hká yùq gi, ngá é jùn kut ra râ nghut lhê; núngmòq góbang gi, mara mai lùt râ nghut lhê.” ga taî ri.
11 Yhángmòq yùq hkangmó gi, yhûmsing é htûng lé myigùng má hân wàq hkyô yù mù, hpông wú bekô nghut ri. 12 Haú hkûn, sùt zum hpó haû gi, je ko sû yùq mai je tiq sû yùq jé shoq ho wú jáng, gòm haû gi, Ben-yamin é htûng má myang ho ri. 13 Haú hkûn, yhángnhik wuî gi, myìt myo luî, yhûmsing é mèbu lé lâng cheq pyám kômù, yhángmòq é loze pé má zè buí yû luî, wà shut dum taû wang ló bekô nghut ri.
14 Yudaq eq yhang gu yhang mâng pé wang ló kô é hkûn, Yosep gi, yhúmhkaû má rû nyi tô ashî nghut mù, yhángmòq gi, yhang lé, myigùng jé shoq paî gòp bekô nghut ri. 15 Yosep gi, yhángmòq lé, “Núngmòq gi, haî kut akô lhú? Ngò sû é yùqgè gi, bùt dàt hpyit htoq lhê nghut é hkyô lé, núngmòq a sé kó lhí?” ga taî ri.
16 Haû mù, Yudaq gi, “Nàng yhûmsîng lé, ngá-mòq haî ge tû taí lo râ lhú? Hkâsu nghû taí lo râ lhú? Ngá-mòq mara a bo é hkyô lé, hai sàksé wó shit lo râ lhú? Garai Gasang gi, náng é duìnhâng zoshâng wui é mara lé myàng bê nghut ri. Haû gòm bo to sû yùq le, ngá-mòq bànshoq bang le, ahkuî, náng é jun pé nghut bê.” ga taî ri.
17 Nghut kôlhang, Yosep gi, “Haû su kut é hkyô gi, ngò eq wê gâng byùq sháng gàq! Haû gòm bo tô é sû yùq za shèq, ngá é jùn dut râ nghut lhê. Núngmòq góbang gi, núngmòq é yhâng wâ chyáng ngón za taû ló keq.” ga taî ri.
18 Haú mù, Yudaq gi, yhâng chyáng huî dòq ê mù, “Ngá é yhûmsîng ê, náng é duìnhâng zoshâng ngo lé, nàng ngá é yhûmsîng lé dang rahkun taí nhâng laq. Nàng gi, Hpara-uq eq wuí sû nghut kôle, náng é duìnhâng zoshâng ngo lé nhikjum hkâyo. 19 Ngá é yhûmsîng nàng gi, náng é duìnhâng zoshâng wuì ngá-mòq lé, ‘Núngmòq îwa eq gu-mang wó akô lhú?’ ga myi luî, 20 ngá-mòq gi, nang lé, ‘Ngá-mòq, mâng byùq bê îwa wó lhê; yhang, mang bê htâng má wó é yùqzo zohtáng rayùq nyi lhê. Yhang mang gi, shi byùq bê; yhâng nû é ûng gyó mâ é gi, yhang za ru myit gyó tô alô; yhâng wa gi, yhang lé chyitdàp ri.’ nghû tû taî é nghut lhê.
21 Haú hkûn, nàng gi, náng é duìnhâng zoshâng wuì ngá-mòq lé, ‘Ngò yhang, yhang lé wó myâng râ matú yùqzo haú lé ngá chyáng shuî gyó lé keq.’ ga taî ri. 22 Haú hkûn, ngá-mòq gi, ngá é yhûmsîng nang lé, ‘Zoshâng yùqzo haû gi, yhâng wa eq a wó gang; yhang eq yhâng wa gâng é nghut jáng, yhâng wa shi byùq râ nghut lhê.’ nghû tû taî é nghut lhê. 23 Nghut kôlhang, nàng gi, náng é duìnhâng zoshâng wuì ngá-mòq lé, ‘Núngmòq é yhang gu zohtáng lé, núngmòq eq rahá shuî gyó lé é za a nghut jáng, núngmòq gi, ngá é myòqdong lé wó dum myàng kôrâ a nghut.’ ga taî ri. 24 Ngá-mòq gi, náng é duìnhâng zoshâng ngá wâ chyáng dum taû jé ló jáng, ngá é yhûmsîng nàng taî é hkyô, yhang lé ló taî kyo bê nghut lhê. 25 Hau htâng, ngá-mòq é âwa gi, ‘Dum taû gyó ê mù, zoshuq ra-tsuí ê dum wui lò keq.’ ga taî ri. 26 Nghut kôlhang, ngá-mòq gi, yhang lé, ‘Ngá-mòq ge gyó ê râ a nghut. Ngá-mòq é yhang gu zohtáng, ngá-mòq eq rahá châng ê jáng za shèq, ngá-mòq gyó ê râ nghut lhê. Ngá-mòq é yhang gu zohtáng, ngá-mòq eq rahá e é za a nghut jáng, ngá-mòq gi, haú yùq é myòqdong lé ge myàng râ a nghut.’ nghû taî é nghut lhê.
27 Haû mù, náng é duìnhâng zoshâng ngá wa gi, ngá-nhik wuî lé, ‘Ngá é yhûmsîng myhí gi, ngo lé yùqzo í yùq hkû byî é lé núngmòq sê lhê. 28 Rayùq gi, ngá chyáng mai htoq ló byùq luî, “Yhang gi, gè gè yhang, ajàp azo lâng myha pyâm é hui bu-nhung!” nghû ngò taî é nghut lhê. Hau htâng, ngò, yhang lé a myang wú tsik lo nghut ri. 29 Shí yùq lé le, núngmòq, ngá chyáng mai shuî yù luî, yhâng chyáng byò dàn byò sho jé é nghut jáng, núngmòq gi, ngò uhpyû daúdam nghut sû lé, yón kuq é èq mosumhkung má gyó ló nhâng kôrâ nghut lhê.’ ga taî ri.
30 Haû mù, ahkuî, ngò, náng é duìnhâng zoshâng ngá wâ chyáng taû jé ló é hkûn, zoshâng shî ngá-mòq eq rahá a nghut to jáng, ngá wa gi, zoshâng hau é chyungxe eq yhâng é chyungxe tuî lhûm tô é nghut mù, 31 zoshâng haû a bo tô é lé lhom myàng jáng, yhang shi byùq râ nghut lhê. Haû mù, náng é duìnhâng zoshâng wuì ngá-mòq gi, ngá-mòq é âwa uhpyû daúdam nghut sû lé, yón kuq é èq mosumhkung má gyó ló nhâng berâ nghut lhê. 32 Náng é duìnhâng zoshâng ngò gi, ‘Yhang lé, ngò, náng chyáng a shuî taû lò byi jáng gi, ngá wa ê, nàng ngo lé mara hun nyi é lé, ngá é i-pyàt htum shoq hkâm zô nyì râ nghut lhê.’ nghû taí luî, zoshâng shî haî a dùt râ matú, ngá wâ é hí má wò yu tô é nghut lhê.
33 Haû nghut é yánmai, náng é duìnhâng zoshâng ngo lé, shî má, zoshâng shí yùq é gùnglik dông, ngá é yhûmsîng náng é jùn kut nhâng mù, zoshâng shî lé, yhang mâng pé eq rahá taû ló nhâng laq. 34 Zoshâng shî ngò eq rahá a nghut le gi, ngò, ngá wâ chyáng hkâsu kut taû ló râ lhú? A ge taû ló ô! Ngá wa asho awui hpu zô byùq é lé, ngo lé hkâló myâng nhâng ô!” ga taî ri.