Ben-yamin Eq Rahá Egutuq Ming Má Dum Taû Gyó É Hkyô
43
Haú mau má, mùtmó gyó é gi, je riyhang htan byùq bê nghut ri. 2 Haû mù, Egutuq ming mai yu lo é gùqzò muilhum bànshoq ban zô pyám kôjáng, yhángnhik wui é yhâng wa gi, yhángmòq lé, “Dum taû ê mù, ngá-nhûng é matú zoshuq ra-tsuí ê wui lò keq.” ga taî ri.3 Nghut kôlhang, Yudaq gi, yhang lé, “Byù haú yùq, ngá-mòq lé htân htân taî kat é gi, ‘Núngmòq é yhang gu eq rahá za a nghut kôjáng, núngmòq gi, ngá é myòqdong lé dum wó myâng kôrâ a nghut.’ gâ ri. 4 Nàng, ngá-mòq é yhang gu lé, ngá-mòq eq rahá nhang kat é nghut le gi, ngá-mòq gyó ê mù, náng é matú zoshuq ê wui lò byi râ nghut lhê. 5 Nghut kôlhang, nàng, yhang lé a bo nhang é nghut jáng, ngá-mòq gi, gyó ê râ a nghut; haî mù gâ le, byù haú yùq gi, ngá-mòq lé, ‘Núngmòq é yhang gu eq rahá za a nghut kôjáng, núngmòq gi, ngá é myòqdong lé dum wó myâng kôrâ a nghut.’ ga taî kat ri.” ga taî ri.
6 Isira-elaq gi, “Núngnhik wui é yhang gu gótû rayùq nyi ashî nghû taî kyô é dông, haî mù, ngo lé wuîhke jamjau shî hô byî akô lhú?” ga myî ri. 7 Yhángmòq gi, “Byù haú yùq shèq, ngá-mòq lé, ‘Núngmòq é yhâng wa gi, chyungxe dui nyi ashî kó lhú? Núngmòq é gu-mang nhiktâng gótû nyi ashi kô lhú?’ ga ngá-mòq é hkyô lé le, ngá-nhûng é i-kun hkyô lé le azó tung myî lo ri. Haû mù, ngá-mòq gi, yhang myî lo é dangmyi má cháng luî za tû taî é ru nghut lhê. ‘Núngmòq é yhang gu lé shî má shuî gyó lô keq.’ gâ lò râ lé gi, ngá-mòq hkâsu wó sê to râ lhú?” ga tû taî akô nghut ri.
8 Hau htâng, Yudaq gi, yhâng wa Isira-elaq lé, “Zoshâng lé, ngò eq rahá nhang kat àq; haú hkûn, ngá-mòq gi, ngá-mòq le, nàng le, ngá-nhûng é yhang zô pé le, a shi byùq é za, wó byun to râ matú, radá dâm ê râ nghut lhê. 9 Ngò yhang, yhang haî a dùt râ matú wò yu lhê; yhang eq séng luî, nàng, ngo lé yhang wó ho lhê; ngò gi, yhang lé, náng chyáng a shuî lò mù, shî náng é hí má a lo shuî háng byî é nghut jáng, nàng gi, ngá é i-pyàt htum shoq, ngo lé mara wó hun nyì râ nghut lhê. 10 Ngá-mòq shî su a nhûnghkut nyi é ru nghut le gi, ê luî, lháng dum taû jé lô nám bê nghut ri.” ga taî ri.
11 Haú hkûn, yhángmòq é yhâng wa Isira-elaq gi, yhángnhik wuî lé, “Haú hkyô a kut a gè ga jáng, shî su kut keq; byù haú yùq lé chyûnghuq râ matú, shí mau má htoq é je ge dik é chi gâm agyi pé ra-tsuí, byo-î ra-tsuí, namngón jung agyi pé, mura, batan ají eq alamon shi pé lé, núngmòq é htûng pé má kat chûng keq. 12 Ngùnhtung lé ratú kat jàt wun chûng keq; hkâsu mù gâ le, núngmòq é htûngnhut má dum taû kat byî kat é ngùnhtûng lé ê dum tau byi ra râ nghut lhê. Haû gi, kat shut kat é haî ru nghut lhê âbe. 13 Núngmòq é yhang gu lé le shuî chûng mù, radá dâm byù haú yùq chyáng taû gyó ê keq. 14 Byù haú yùq gi, núngmòq é yhang gu yhang mang gótû rayùq eq Ben-yamin lé, núngmòq eq rahá dum taû nhâng byi râ matú, haû Wum-o a-tsam dìk shoq bò Sû Garai Gasang gi, núngmòq lé, yhâng é hí má shogyo nhikmyîn yù sháng gàq. Ngò kúm gi, zo sum byùq kôlhang, sûm byùq lo sháng gàq.” ga taî ri.
15 Haû mù, yhángnhik wuî gi, chyûnghuq pé eq ngùnhtung ratú kat jàt yù mù, Ben-yamin lé le shuî chûng luî, Egutuq ming má hân za yhang gyó ê kômù, Yosep é hí má ê jé bekô nghut ri. 16 Yosep gi, yhángmòq eq rahá Ben-yamin le bo é lé myàng jáng, yhâng yhûm mâ é sùt zum sû lé, “Shí bang lé, ngá é yhûm má shuî ló aq; yhángmòq gi, ngò eq rahá nyízang zo râ nghut lhê; shigu zo radu lé sat mù, zoshuq hên àq.” ga taî ri.
17 Sùt zum hpó haû gi, Yosep taî é eq rajung za kut mù, haú bang lé, Yosep é yhûm má shuî ló bê nghut ri. 18 Yosep é yhûm má yhángmòq lé shuî ló é hkûn, haú bang gi, gyùq dan byùq bùm bekô. Yhángmòq gi, “Ngá-nhúng lé shî má shuî lo é gi, ra-nyí dá ngá-nhûng é htûng pé má ngùnhtung dum taû byî kat é hkyô eq sêng é yánmai nghut berâ. Yhang gi, ngá-nhúng lé mara hô luî, kyuq mù, jùn kut nhang é eq ngá-nhûng é loze pé lé yu pyám byi berâ nghut lhê.” ga myìt yu akô nghut ri.
19 Haû mù, yhángmòq gi, Yosep é sùt zum su chyáng dòq é kômù, yhûm hau é hkum má, yhang lé, 20 “Yhûmsîng ê, ngá-mòq gi, sânghî dàm, zoshuq wuì râ matú shî má gyó lé é nghut lhê. 21 Nghut kôlhang, ngá-mòq ra-myìn ló nô é jowò má, ngá-mòq é htûng pé lé hpông é hkûn, yùq hkangmó gi, ó le ô é htûngnhut má, yhûmsîng wun chung é ngùnhtung roq bo tô é myang ri. Haû mù, ngá-mòq gi, haú lé dum yu taû lé bê nghut lhê. 22 Hau htoq agó, ngá-mòq gi, zoshuq wuì râ matú gótû ngùnhtung le yu jàt lé é nghut lhê. Ngá-mòq é ngùnhtung haú pé lé, ngá-mòq é htûng pé má ó yùq kat kat é làq, ngá-mòq a sé.” ga taî akô nghut ri.
23 Haú hkûn, yhang gi, “Haî a ra, hkâgyùq kó; núngmòq é Garai Gasang, haû núngmòq é yhâng wâ é Garai Gasang gi, núngmòq é htûng má sùtzè châng kat byî é nghut ri; núngmòq é ngùnhtung lé ngò myang hàp yù bê nghut lhê.” ga taî ri. Hau htâng, yhang gi, Sime-on lé, yhángmòq chyáng shuî htoq ê byî ri.
24 Sùt zum hpó haû gi, haú bang lé, Yosep é yhûm má shuî wang ê mù, yhángmòq é hkyî chi râ matú wuì hkâm byi luî, yhángmòq é loze pé lé mhan wàq byî ri. 25 Yhángmòq gi, haû má, yhángmòq nyízang zo râ nghut lhê gâ é lé wó gyo bekô nghut é yánmai, nyí-káng lé, Yosep jé lô jáng lhom byi râ matú, yhángmòq é chyûnghuq lé hen to bekô nghut ri.
26 Yosep, yhûm má jé wang lo é hkûn, yhángmòq gi, yhúmhkaû má yhángmòq yu wang lo é chyûnghuq pé lé, yhang lé lhom byi kômù, myigùng jé shoq yhang lé paî gòp akô nghut ri. 27 Yosep gi, yhángmòq lé, wángzán hkyô myi mù, “Núngmòq ngo lé taî kyô wú é, núngmòq é îwa mangzo gi, wángzán nyi akô lhú? Yhang gi, chyungxe dui nyi ashî lhú?” ga myî ri.
28 Yhángmòq gi, “Náng é duìnhâng zoshâng, ngá-mòq é âwa gi, wángzán luî, chyungxe dui nyi ashî nghut ri.” ga tû taí kômù, hkyîhput htuq luî, yhang lé paî gòp bekô nghut ri.
29 Yhang gi, tu wú kat le, yhang eq înu hûm é yùqzo, yhang gu Ben-yamin lé myàng mù, “Shí yùq gi, núngmòq ngo lé taî kyô wú é, núngmòq é yhang gu zohtáng yùq a nghut kó lhú?” ga taí luî, “Ngá zo ê, Garai Gasang gi, nang lé shogyo nhikmyîn yù sháng gàq.” ga dum taî ri. 30 Yosep gi, yhang gu lé myàng jáng, nhô-u pyìq pyìq chyîn luî, hân za toq mù, ngaù râ jowò hô luî, yhâng é wàp má wàng mù, haû má ló ngau ri.
31 Yhang gi, myòq chî yu é htâng má, htoq lé lô mù, yhâng é i-myìt lé hkûm zing pyám luî, “Zoshuq htûng keq.” ga taî ri.
32 Haú bang gi, Yosep é matú zangbó ralhûm, yhang gu yhang mâng pé é matú zangbó ralhum, yhang eq rahá zô é Egutuq byu pê é matú ralhum kut htûng byî akô nghut ri; haî mù gâ le, Egutuq byu pé gi, Hebre byu pé eq rahá zoshuq a ge zo nghut ri; haû gi, Egutuq byu pê é matú achaq achyut hkyô nghut ri. 33 Haú nhiktâng wuì gi, chyungxe zànwut tiq ko má cháng luî, je ko sû mai zohtáng yùq jé shoq, yhâng é hí má zùng nhang tô bum akô. Yhángmòq gi, rayùq eq rayùq wú lhum luî, mau nyi bum akô nghut ri. 34 Yhángnhik wuî yùq hkangmó lé, Yosep é zangbó mai zoshuq gàmbùm tsing lhai byî ri; Ben-yamin lé gi, yhang mâng pê htoq gàmbùm ngo tú lhai byî ri. Haû mù, yhángmòq gi, zo luî shuq luî, yhang eq rahá ngón bûm bekô nghut ri.