Yosep É Yhang Mâng Pé Egutuq Ming Má E É Hkyô
42
Yakup gi, Egutuq ming má gùqzò muilhum jòq é hkyô lé wó sé jáng, yhâng é yhang zo yùqzô pé lé, “Núngmòq gi, haî mù luî, rayùq eq rayùq za wú lhûm nyi akô lhú? 2 Egutuq ming má gùqzò muilhum jòq é hkyô lé ngò wó gyô ri. Haú má gyó ê mù, ngá-nhûng é matú zoshuq ê wui lò keq; haú hkûn, ngá-nhúng gi, a shi byùq lô é za chyungxe wó duî râ nghut lhê.” ga taî ri.3 Haû mù, Yosep é yhang mâng nhiktâng wuì raxê yùq gi, gùqzò muilhum ê wuî râ ga, Egutuq ming shut gyó e ló akô. 4 Nghut kôlhang, Yakup gi, Yosep é yhang gu Ben-yamin lé, haú bang eq a nhang kat nghut ri; haî mù gâ le, yhang gi, Ben-yamin byò dàn byò sho hui râ lé gyùq é yánmai nghut ri. 5 Haû mù, Isira-elaq é yhang zo yùqzô pé le, gùqzò muilhum ê wuî râ bang eq rahá nghut bum akô; hkâsu mù gâ le, Hkanan mau má le mùtmó gyó é yánmai nghut ri.
6 Yosep gi, haú ming mâ é ming zau nghut mù, haú ming mâ é byù bànshoq bang lé gùqzò muilhum ung byi sû nghut ri. Haû mù, Yosep é yhang gu yhang mâng pé gi, lé jé kôluî, yhang lé myigùng má paî gòp akô nghut ri. 7 Yosep gi, yhang gu yhang mâng pé lé myàng eq yhang, yhángmòq lé wú sé bê nghut ri; nghut kôlhang, yhang gi, myòqno a shû é byù dông kut mhaú mù, yhángmòq lé dang htân taî ri. Yhang gi, “Núngmòq hká mai lé é bang nghut akô?” ga myî ri.
Yhángmòq gi, “Ngá-mòq, zoshuq wuì râ matú, Hkanan mau mai lé é nghut lhê.” ga tû taî akô nghut ri.
8 Yosep gi, yhang mâng pé lé wú sé kôlhang, yhángmòq gi, yhang lé a wú sé kó nghut ri. 9 Haú hkûn, yhang gi, yhángmòq eq séng luî, yháng myang é yhupmòq pé lé myìtbun mù, yhángmòq lé, “Núngmòq gi, jówú bang nghut akô! Ngá-mòq é mau má wum nyhôm é jowò lé wú râ matú, núngmòq lé é nghut ri.” ga taî ri.
10 Haú hkûn, yhángmòq gi, “Ngá yhûmsîng ê, a nghut ô! Náng é duìnhâng zoshâng wuì ngá-mòq gi, zoshuq wuì râ matú lé lo é ru nghut lhê. 11 Ngá-mòq bànshoq bang gi, rayùq é yhang zo yùqzô pé chyat nghut lhê. Náng é duìnhâng zoshâng wuì ngá-mòq gi, myìt díng é bang ru nghut lhê; jówú lé é a nghut.” ga tû taî akô nghut ri.
12 Yhang gi, yhángmòq lé, “A nghut! Núngmòq gi, ngá-mòq é mau má wum nyhôm é jowò lé wú râ matú lé é nghut ri.” ga taî ri.
13 Nghut kôlhang, yhángmòq gi, “Náng é duìnhâng zoshâng wuì ngá-mòq gi, Hkanan mau má nyi é, îwa rayùq é yhang zo yùqzô pé chyat nghut mù, nhiktâng wuì raxe í yùq nghut lhê. Zohtáng yùq gi, ahkuî, ngá-mòq é âwa eq rahá nyi gyó tô ri; rayùq gi, a nyi byùq lo.” ga tû taî akô nghut ri.
14 Yosep gi, yhángmòq lé, “Ngò taî é eq rajung za, núngmòq gi, jówú bang nghut akô! 15 Núngmòq lé shí dông chyam wú râ; Hpara-uq rû dui nyi é eq rajung za, núngmòq gi, núngmòq é yhang gu zohtáng yùq lé, shî má shuî lé é za a nghut jáng, shí jowò mai wó htoq ló râ a nghut. 16 Núngmòq mâ é rayùq lé, núngmòq é yhang gu ló shui nhâng keq; myìt gyó tô é bang lé gi, núngmòq taî é dang teng a têng é lé wó sé râ dông, núngmòq é dang pé lé wó chyam wú râ matú, htóng má lhûng to râ nghut lhê. Haú dông a nghut jáng, Hpara-uq rû dui nyi é eq rajung za, núngmòq gi, jówú bang yhang nghut bê!” ga taî ri. 17 Haû mù, yhang gi, yhángmòq bànshoq bang lé sum nyí chyup lhûng tô ri.
18 Sum nyí nyí má, Yosep gi, yhángmòq lé, “Ngò gi, Garai Gasang lé gyùq hkúnggâ é sû nghut é yánmai, núngmòq chyungxe wó dui nyì râ matú shí dông kut keq; 19 Núngmòq gi, myìt díng bang nghut é nghut jáng, núng nhiktâng wuì mâ é rayùq lé, shî mâ é htóng má lúng nhang to mù, góbang gi, zò-mut huî nyi é núngmòq é yhûmbyù wui é matú gùqzò muilhum yu ló byi keq. 20 Nghut kôlhang, núngmòq gi, núngmòq é dang pé têng é lé wó chyam htoq mù, núngmòq a shi byùq râ matú, núngmòq é yhang gu zohtáng lé, ngá chyáng shuî lé lô ra râ nghut lhê.” ga taî ri. Yhángmòq gi, haú lé myìt hui bekô nghut ri.
21 Yhángmòq gi, rayùq eq rayùq, “Gè gè yhang, ngá-nhúng gi, ngá-nhûng é gu-mang hpô é yánmai, dam byî é hui zô nyì bu-nhung! Ngá-nhúng gi, yhâng é chyungxe wó lùt râ matú, yhang, ngá-nhúng lé dûng tôngbán é hkûn, hkâ-í yhang myìt myo ûngwôm é lé, ngá-nhúng myàng kôlhang, yhang lé a gyo byi kut pyám é nghut lhê; hau é yánmai, myìt myo ûng wom hkyô shî, ngá-nhûng chyáng jé bê nghut ri.” ga taî lhûm akô nghut ri.
22 Haú hkûn, Rubin gi, “Zoshâng haú lé hkâshut kó nghû, núngmòq lé ngò taí bê a nghut kô lhú? Nghut kôlhang, núngmòq gi, a gyo kut akô mhaî! Ahkuî, ngá-nhúng gi, yhâng é sui yuichyîn a xap a gè lo nghut ri.” ga tû taî ri. 23 Yosep gi, dang hpuq byi sû rayùq chung é nghut mù, yhángmòq taî é dang lé sê gyô é hkyô lé, yhángmòq a sé kó nghut ri.
24 Yosep gi, yhángmòq chyáng mai lhing htoq ló mù, ê ngau ri; nghut kôlhang, hau htâng má dum taû ló mù, yhángmòq lé ló dum nyo ri. Yhang gi, yhángmòq chyáng mai Sime-on lé she htoq yû luî, yhángmòq é myòq hí má tuî kup ri.
25 Yosep gi, yhángmòq é htûng má gùqzò muilhum kat pyíng râ matú le, yhángmòq é gùq htûng má, ó le ô é ngùn htung dum taû kat byi râ matú le, yhángmòq é hkyôwuì má zoshuq byî kat râ matú le, hkunmó hkyô ri. Yhángmòq lé haû su kut byî é htâng má, 26 yhángmòq gi, yhángmòq é loze pé má gùqzò muilhum buí chûng mù, htoq ló bekô nghut ri.
27 Myín lé yhángmòq ló nô é jowò má, yhángmòq mâ é rayùq gi, yhâng é loze lé tso râ matú, gùqhtûng lé hpông é hkûn, yhâng é htûngnhut má, yhâng é ngùn htung bo tô é lé myang ri. 28 Haû mù, yhang gi, yhang gu yhang mâng pé lé, “Ngá é ngùnhtung dum tau byî kat ri nhung; shî, ngá é htûngnhut má bo tô ri.” ga taî kyô ri.
Haú hkûn, yhángmòq gi, maú hong byùq kômù, gyùq nán é èq rayùq eq rayùq lhing wú lhum luî, “Garai Gasang, ngá-nhúng lé shî su kut é gi, haî nghut lhê lhú?” ga taî akô nghut ri.
29 Yhángmòq gi, Hkanan mau má nyi é, yhángmòq yhâng wa Yakup chyáng jé ló kô é hkûn, yhángmòq chyáng dùt é hkyô bànshoq, yhang lé taî kyô akô. Yhángmòq taî kyo kô é gi, 30 “Haú mau lé ùp é sû, ngá-mòq lé dang htân nyô mù, ngá-mòq lé, haú mau má jó lé wú é bang dông lhom tsuq ri. 31 Nghut kôlhang, ngá-mòq gi, yhang lé, ‘Ngá-mòq myìt díng bang ru nghut lhê; jówú bang a nghut. 32 Ngá-mòq gi, îwa rayùq é yhang zo yùqzô pé chyat nghut mù, nhiktâng wuì raxe í yùq nghut lhê. Rayùq gi, a nyi byùq lo. Zohtáng yùq gi, ahkuî, ngá-mòq é âwa eq rahá, Hkanan mau má nyi gyó tô ri.’ nghû taî é nghut lhê.
33 Haú hkûn, haú mau lé ùp é sû gi, ngá-mòq lé, ‘Núngmòq myìt díng bang nghut a nghut é lé wó sé râ gi, shí dông nghut lhê; núngnhik tâng wuì mâ é rayùq lé, shî má ngò eq nyhi hkyô to mù, zò-mut huî nyi é núngmòq é yhûmbyù wui matú zoshuq yu chûng luî, ló keq. 34 Nghut kôlhang, núngmòq gi, jówú bang a nghut é za, myìt díng bang nghut é hkyô lé, ngò wó sé râ matú, núngmòq é yhang gu zohtáng lé, ngá chyáng shuî lé lô keq. Haú hkûn, ngò gi, núngmòq é yhang gu yhang mang lé, núngmòq chyáng dum tau byi râ nghut mù, núngmòq gi, shí mau má wuìloq wó kut kôrâ nghut lhê.’ ga taî ri.” gâ ri.
35 Yhángmòq gi, yhángmòq é gùqhtûng pé hut nghat kô é u lé, yùq hkangmó é gùqhtûng má ngùnhtung chyuq bo tô bum ri! Yhángmòq eq yhángmòq é yhâng wa gi, ngùnhtung chyuq haú pé lé myàng kôjáng, gyùq chiq bûm bekô nghut ri. 36 Yhángmòq é yhâng wa Yakup gi, yhángmòq lé, “Núngnhik wuî gi, ngo lé, zo lhoqhpyuq nhang akô nghut ri. Yosep a nyi byùq lo; Sime-on a nyi byùq lo; ahkuî, núngnhik wuî, Ben-yamin lé dum yù nau bekô nghut ri. Shí pé bànshoq gi, ngo lé htuqhtîng é chyat nghut rô!” ga taî ri.
37 Haú hkûn, Rubin gi, yhâng wa lé, “Ngò, yhang lé náng chyáng a shuî taû lò byî é nghut jáng gi, nàng, ngá zô nhik lé sat pyám aq. Yhang lé, ngá é lòq má lum to aq; ngò, yhang lé shuî taû lò râ nghut lhê.” ga taî ri.
38 Nghut kôlhang, Yakup gi, “Ngá zo lé, núngmòq eq rahá a nhang hkyô kat râ nghut lhê; yhang mang shi byùq bê; yhang za ru myit tô alô nghut ri. Núngmòq shuî gyó ló é hkyôwuì má, yhâng chyáng byò dàn byò sho jé é nghut jáng, núngmòq gi, ngò uhpyû daúdam nghut sû lé, yón kuq é èq mosumhkung má gyó ló nhâng kôrâ nghut lhê.” ga taî ri.