A-PÛN AWANG
Laiká
(Genesis)
Nyì Mî-nyî, Jòq Mîjòq Lé Hpan É Hkyô
1
A-nham sânghi má, Garai Gasang gi, mauhkûng eq myigùng lé hpan tô ri. 2 Haû myigùng gi, azòng a htoq shî é nghut mù, pyutlutsut dùt tô é nghut luî, nìk é jang má mauchut tô ri; haû Garai Gasâng é Sô gi, wuì htoq má hup lhing wún ri. 3 Haú hkûn, Garai Gasang gi, “Maubó jòq sháng gàq.” ga taí jáng, maubó jòq bê nghut ri. 4 Garai Gasang gi, maubó haû ge é lé myàng mù, maubó lé, mauchut mai gam hkoq to bê nghut ri. 5 Garai Gasang gi, maubó lé “Nyí”, mauchut lé “Myín” ga myìng myhîng ri. Myín eq nàp nghu é jòq bê; haû gi, sânghî nyí nghut ri.6 Hau htâng, Garai Gasang gi, “Wuì eq wuì gam hkoq pyám râ matú, wui é agyo má maulat kyodum jòq sháng gàq.” ga taî ri. 7 Haû mù, Garai Gasang gi, maulat kyodum lé hpan to bê nghut luî, maulat kyodum ô mâ é wuì eq maulat kyodum htoq mâ é wuì ga gam hkoq tô ri. Haû le dùt to bê nghut ri. 8 Garai Gasang gi, maulat kyodum lé, “mauhkûng” ga myìng myhîng ri. Myín eq nàp nghu é jòq bê; haû gi, í nyí nyí nghut ri.
9 Hau htâng, Garai Gasang gi, “Mauhkûng ô mâ é wuì pé rawò má za tsîng hum ló luî, kyuq huî é myigùng htoq zê sháng gàq.” ga taî ri. Haû le dùt to bê nghut ri. 10 Garai Gasang gi, haû kyuq huî é myigùng lé, “maumyî” ga myìng myhíng luî, haû tsîng hum tô é wuì lé, “wuìshuq lung-aû” ga myìng myhîng ri. Garai Gasang gi, haû ge é lé myang ri. 11 Hau htâng, Garai Gasang gi, “Myigùng mai, yhâng a-myû eq yhang, kyô-myui wó yu é mhan-haq hpoqnòq agàm pé eq, kyô-myui lúng é ashi zuî é sikgâm pé yùq htoq lô sháng gàq.” ga taî ri. Haû le dùt to bê nghut ri. 12 Haû myigùng gi, yhâng a-myû eq yhang, kyô-myui wó yu é mhan-haq hpoqnòq agàm pé lé le, yhâng a-myû eq yhang, kyô-myui lúng é ashi zuî é sikgâm pé lé le, yùq htoq byi bê nghut ri. Garai Gasang gi, haû ge é lé myang ri. 13 Myín eq nàp nghu é jòq bê; haû gi, sum nyí nyí nghut ri.
14 Hau htâng, Garai Gasang gi, “Nyí eq myín gam hkoq râ matú, mauhkûng mâ é maulat kyodum má maubó gùng pé jòq àq; haú pé gi, yàm-yòq pé, buìnyì pé eq zànwut pé lé tûn shit râ alhô agàn dùt nyì sháng gàq. 15 Haú pé gi, mauhkûng mâ é maulat kyodum má jòq é maubó gùng pé nghut mù, myigùng htoq má maubó byi kó sháng gàq.” ga taî ri. Haû le dùt to bê nghut ri. 16 Garai Gasang gi, maubó gùng mó í cham hpân mù, je kô é cham lé gi, nyí lé ùp nhâng luî, tiq é cham lé gi, myín lé ùp nhang ri. Yhang gi, kyî pé lé le hpan to bê nghut ri. 17 Garai Gasang gi, maubó gùng haú pé lé, mauhkûng mâ é maulat kyodum má tô tô ri; haû gi, myigùng htoq má maubó byi nhâng râ matú le, 18 nyí eq myín lé ùp nhâng râ matú le, mauchut eq maubó lé gam hkoq râ matú le nghut ri. Garai Gasang gi, haû ge é lé myang ri. 19 Myín eq nàp nghu é jòq bê; haû gi, myi nyí nyí nghut ri.
20 Hau htâng, Garai Gasang gi, “Haû wuì má gi, kângsoq bo é dui jung ajà jà byíng zan to mù, myigùng ahtoq, mauhkûng mâ é maulat kyodum má gi, nghoqzô pé dâng yôn wún kó sháng gàq.” ga taî ri. 21 Haû mù, Garai Gasang gi, wuìshuq lung-aû má nyi é kô é dui jung pé lé le, wuì má nyi é, kângsoq bò mù, dui lùp wún é jung pé lé le, yhâng é a-myû eq yhang, dùng dap é nghoq pé jung hkangmó lé le, yhâng é a-myû eq yhang, hpan to bê nghut ri. Garai Gasang gi, haû ge é lé myang ri. 22 Garai Gasang gi, haú pé lé, “Azo shui luî, myô jàt lò mù, wuìshuq lung-aû mâ é wuì pé má lhoqpyíng keq; haû nghoqzô pé le, myigùng htoq má myô jàt lò kó sháng gàq.” ga shimân byî ri. 23 Myín eq nàp nghu é jòq bê; haû gi, ngo nyí nyí nghut ri.
24 Hau htâng, Garai Gasang gi, “Kângsoq bò mù dui jung nghut é, shigu gaunyhaú pé eq myì htoq má dô jung yê jung pé lé le, tân jung gaunyhaû pé lé le, yhâng é a-myû eq yhang, myigùng mai lhoqhtoq sháng gàq.” ga taî ri. Haû le dùt to bê nghut ri. 25 Garai Gasang gi, tân jung gaunyhaû pé lé le, yhâng é a-myû eq yhang, shigu gaunyhaû pé lé le, yhâng é a-myû eq yhang, myì htoq má dô jung yê jung bànshoq lé le, yhâng é a-myû eq yhang kut, hpan to bê nghut ri. Garai Gasang gi, haû ge é lé myang ri.
26 Hau htâng, Garai Gasang gi, “Ngá-nhûng é gùng zòng alhô eq le, ngá-nhûng é sâmlai eq le du é xângzo byù lé, ngá-nhúng hpân sháng; yhángmòq gi, wuìshuq lung-aû má nyi é ngozô pé lé le, maulat má dâng é nghoqzô pé lé le, shigu gaunyhaû pé lé le, myigùng htoq gón lé le, myì htoq má dô jung yê jung bànshoq lé le ùp nyì kó sháng gàq.” ga taî ri. 27 Hau htâng, Garai Gasang gi, yhâng é gùng zòng alhô eq dù shoq xângzo byù lé hpan to bê; Yhang gi, Garai Gasâng é gùng zòng alhô eq dù shoq yhang lé hpan to bê. Yhang gi, xângzo yùqgè eq myiwe lé hpan to bê nghut ri.
28 Garai Gasang gi, yhángnhik lé shimân byi luî, “Zodù hkû mù, byù du myô jàt nhâng luî, myigùng htoq má lhoqpyíng mù, haú lé ùp sîng keq. Wuìshuq lung-aû má nyi é ngozô pé lé le, maulat má dâng é nghoqzô pé lé le, myì htoq má dô jung yê jung hkangmó lé le ùp nyì keq.” ga yhángnhik lé taî ri. 29 Hau htâng, Garai Gasang gi, “Myigùng gón mâ é a-myui wó yu é agàm pé lé le, a-myui lúng é ashi zuî é sikgâm pé lé le, Ngò, núngnhik lé byi bê nghut lhê. Haú pé gi, núngmòq é zoshuq dùt râ nghut lhê. 30 Haû kâng bo é jung hkangmó nghut é, myigùng htoq mâ é tân jung yòsô zè bànshoq é matú le, maulat má dâng é nghoqzô pé bànshoq é matú le, myigùng htoq má dô jung yê jung bànshoq é matú le, zoshuq kut râ matú mhan-haq hpoqnòq jung hkangmó lé, Ngò, byî to bê nghut lhê.” ga taî ri. Haû le dùt to bê nghut ri.
31 Garai Gasang gi, Yhang hpan tô é lhúnglháng lé wú wú ri; haú hkûn, haû gi, ge dik ri. Myín eq nàp nghu é jòq bê; haû gi, hkyuq nyí nyí nghut ri.