Yhûmsîng Garaî Hí Má Yu Lé É Tsanlun Xû Eq Mùk
24
Haû Yhûmsîng Garai gi, Mosheq lé, 2 “Myi-kok pé xoq xoq wó dùq nyì sháng gàq, tsanlun xû gyíng, náng chyáng yu lé lô kôrâ matú Isira-elaq byu pé lé hkunmó hkyó aq. 3 Haú lé, Arun gi, zùphpong zúm mâ é dangshikaq târâ kat tô é sàksé dò lé gyâng kyo tô é pán-gyang shinggan shut, haû Yhûmsîng Garaî é hí má, myi-kok pé hên mù, myín mai nàpkyó jé shoq xoq xoq tuq to ra râ nghut lhê. Haû gi, jé lô râ pyàt bán hkangmó é matú, ahtum abyùq hkyô tô é hkunmó nghut lhê. 4 Haû hîng gyíng myi-kok tsûngjang mâ é myi-kok pé lé, haû Yhûmsîng Garaî é hí má hên mù xoq xoq tuq to ra râ nghut lhê.5 Nàng gi, je nú é mún rajoí lé, ralong long kut luî, mùk raxe í long bung ra râ nghut lhê. 6 Haú pé lé, haû Yhûmsîng Garaî é hí mâ é hîng gyíng mùkgyàp má, hkyuq long lé rayán yán kut, í yán tô to ra râ nghut lhê. 7 Haû Yhûmsîng Garaî é matú myi nyhé hkungga dùt râ dông, mùk lé bûn nyì gàmbùm shit râ matú í yán é má gyíng é namngón jung kat to râ nghut lhê. 8 Bánno Buìnyì hkangmó, Yhûmsîng Garaî é hí má mùk haú lé hen to ra râ nghut lhê; haû gi, Isira-elaq byu pê é matú ahtum abyùq é dangshikaq nghut lhê. 9 Mùk haû lé gi, Arun eq yhâng é yùqzô pé yù mù, chyoiyúng é jowò má zo râ nghut lhê; hkâsu mù gâ le, haû gi, Yhûmsîng Garaî é matú myi nyhé hkungga pé nhong é mâ é, yhángmòq é ahtum abyùq gàmbùm mâ é chyoiyúng htâng é gàmbùm nghut ri.” ga taî ri.
Târâ Ràp-rá É Dông Jéyáng Râ Hkyô
10 Egutuq hpó eq Isira-elaq myhî é yhang zo yùqzo gi, Isira-elaq byu pê chyáng ê lám kún mù, xuq tô é wàp hkaû má Isira-elaq byù rayùq eq byòq lhûm ri. 11 Haú hkûn, Isira-elaq myhî é yhang zo yùqzo gi, haû Myìng lé rhoî dang taí uchyang nhîng ri; haû mù, yhángmòq gi, yhang lé Mosheq chyáng shui lo akô. (Yùqzo hau é yhâng nu gi, Dan up mâ é Dibiri é yhang zo Shelomit gâ é sû nghut ri.) 12 Hau htâng, yhángmòq gi, yhang lé, Yhûmsîng Garai ô nau é hkyô wó sé shoq ga lhûng tô akô nghut ri.
13 Haú hkûn, Yhûmsîng Garai gi, Mosheq lé, 14 “Haû Myìng lé rhoî dang taí sû lé, xuq tô é wàp shinggan shut shuî htoq ê mù, yhâng é dang wó gyô é bang, yhâng é ulhum htoq má lòq ke luî, shiwa hpúng bànshoq bang, yhang lé lùqgòk èq dú sat pyám ra râ nghut lhê. 15 Isira-elaq byu pé lé îsu nghû taí aq; ‘Rayùq yùq, yhâng é Garai Gasang lé nhîng é nghut jáng, haú yùq gi, mara wò haû yù ra râ nghut lhê; 16 rayùq yùq, haû Yhûmsîng Garaî é myìng lé rhoî dang taî é nghut jáng, yhang gi, sat pyâm é hui ra râ nghut lhê. Shiwa hpúng gón gi, yhang lé lùqgòk èq dú sat ra râ nghut lhê. Gótû a-myû mâ é nghut nghut, Isira-elaq byu pé mâ é nghut nghut, haû Myìng lé rhoî dang taî é sû gi, sat pyâm é hui ra râ nghut lhê.
17 Byù lé sat é sû gi, sat pyâm é hui ra râ nghut lhê. 18 Góyuq é shigu gaunyhaú lé sat pyám byî é sû gi, radû é matú radu, xap ra râ nghut lhê. 19 Yhâng é chyáng nâm má é sû lé dàm dap zu záng nhang é sû gi, yhang le haú í yhang hui zo ra râ nghut lhê. 20 Haû gi, lhoqhten lhoqhkyuî é matú lhoqhten lhoqhkyui, myòqjí é matú myòqjí, zui é matú zuì nghut ra râ nghut lhê. Yhang, góyùq lé kut byî é eq rajung za, yhang le haû su kut é hui zo ra râ nghut lhê. 21 Shigu gaunyhaú lé sat é sû gi, xap ra râ nghut lhê; nghut kôlhang, byù sat é sû gi, sat pyâm é hui ra râ nghut lhê. 22 Gótû a-myû wui é matú nghut kôle, núngmòq a-myû wui é matú nghut kôle, târâ gi, rahkat za to ra râ nghut lhê. Ngò gi, núngmòq é Garai Gasang nghut é, haû Yhûmsîng Garai nghut lhê.’ nghû àq.” ga taî ri.
23 Hau htâng, Mosheq gi, Isira-elaq byu pé lé haú hkyô htòt taî kyô é nghut luî, yhángmòq gi, haû Myìng lé rhoî dang taí sû lé xuq tô é wàp shinggan shut shuî htoq ê mù, lùqgòk èq dú sat pyám bekô nghut ri. Isira-elaq byu pé gi, haû Yhûmsîng Garai mai Mosheq lé hkunmó hkyô tô é eq rajung za kut bekô nghut ri.