23
Haû Yhûmsîng Garai gi, Mosheq lé, 2 “Isira-elaq byu pé lé dang nyô mù, yhángmòq lé, ‘Shí pé gi, chyoiyúng zùphpong ayòq má, haû Yhûmsîng Garaî é masàt poî pé nghû núngmòq taî pyô râ nghut é, Ngá é masàt poî pé nghut lhê.Bánno Buìnyì
3 Hkyuq nyí yhang núngmòq mú zui ji saí ra râ nghut lhê. Nyhit nyí nyí kúm gi, nô yu é Bánno Buìnyì eq chyoiyúng zùphpong buìnyì nghut lhê; núngmòq haî le ge zui saí râ a nghut; haû gi, núngmòq nyi é jowò hkangmó má, Yhûmsîng Garaî é matú Bánno Buìnyì nghut lhê.
Lhoqlhai Poî Eq Múnchi A Bo É Mùk Zo Poî
4 A-ô mâ é hkyô pé gi, yhâng é ahkyíng má núngmòq taî pyô râ nghut é, chyoiyúng zùphpong ayòq nghu é, Yhûmsîng Garaî é masàt poî pê é hkyô nghut lhê. 5 Haû Yhûmsîng Garaî é Lhoqlhai Poî gi, sânghî lhôhkyap, raxe myi nyí nyí, myínhtâng chutshúm zó mai hî râ nghut lhê. 6 Haú hkyap raxe ngo nyí nyí má, Yhûmsîng Garaî é Múnchi a bo é Mùk Zo Poî hî râ nghut mù, nyhit nyí yhang múnchi a bo é mùk zo ra râ nghut lhê. 7 Sânghî nyí gi, chyoiyúng zùphpong hpong râ nghut mù, hai amû le ge zui saí râ a nghut. 8 Nyhit nyí yhang, Yhûmsîng Garaî é matú myi nyhé hkungga nhông byi râ nghut lhê. Nyhit nyí nyí má gi, chyoiyúng zùphpong hpong râ nghut mù, hai amû le ge zui saí râ a nghut.’ nghû àq.” ga taî ri.
Sânghi Myhîng É Ashi Pé
9 Haû Yhûmsîng Garai gi, Mosheq lé, 10 “Isira-elaq byu pé lé dang nyô mù, yhángmòq lé, ‘Núngmòq gi, Ngò, núngmòq lé byi râ nghut é mau má wang ló mù, kyô shu kô é hkûn, sânghi myhíng luî yâm yu é kyô ding lé, hkyangjong hpô chyáng yu lé byi râ dùt lhê. 11 Hkyangjong hpó gi, kyô ding haú lé, núngmòq é gùnglik dông lhom hàp yù byi râ matú, Yhûmsîng Garaî é hí má, Bánno Buìnyì é htang nyí wàq hê ra râ nghut lhê. 12 Haû kyô ding lé wàq he é nyí má, núngmòq gi, Yhûmsîng Garaî é matú, haî le a râ é, razàn bo é sau zo lé myi nyhé hkungga dông nhông byi ra râ nghut lhê. 13 Haû eq rahá, Yhûmsîng Garaî é matú namngón shôm nghut é, myi nyhé hkungga nhông râ matú, xû eq nyhô tô é, je nú é mún rajoí gùqzò hkungga eq tsibyiq wing raxe myi rûng kô bo é shuq jung hkungga lé nhông byi ra râ nghut lhê. 14 Núngmòq gi, núngmòq é Garai Gasâng chyáng hkungga haû yu lé byî é buìnyì jé shoq, mùk le, nyhîn nyhoq é kyôshi le, kyôshi ajum le ge zo râ a nghut. Haû gi, núngmòq nyi é jowò hkangmó má, jé lô râ pyàt bán hkangmó é matú, ahtum abyùq hkyô tô é hkunmó nghut lhê.
Nyhit Bàt Poî
15 Wàq hê hkungga kyô ding yu lé é buìnyì nghut é, Bánno Buìnyi é htang nyí mai nyhit bàt yhang nghap ra râ nghut lhê. 16 Nyhit bàt bàt jé é Bánno Buìnyi é htang nyí jé shoq ngo xê nyí nghap jé mù, Yhûmsîng Garai lé kyôshi asik hkungga nhông byi ra râ nghut lhê. 17 Núngmòq nyi é jowò hkangmó má, Yhûmsîng Garaî é matú, sânghi myhîng é kyôshî é wàq hê hkungga dông, múnchi eq bûng é, je nú é mún rajoí lé saî é mùk long í long lé yu lé ra râ nghut lhê. 18 Mùk haû eq rahá, haî le a râ é, razàn bo é saulo zo nyhit du, nohtó zo radu eq saulo í du lé yu lé byi ra râ nghut lhê. Haú pé gi, Yhûmsîng Garaî é matú namngón shôm nghut é, myî èq nyhê nhong é gùqzò hkungga pé eq shuq jung hkungga pé eq rahá, Yhûmsîng Garaî é matú myi nyhé hkungga dùt râ nghut lhê. 19 Hau htâng, bainám lo zo radu lé gi, mara hkyut hkunggâ é matú nhông byi mù, razàn bo é saulo zo í du lé gi, zùmhkaû hkunggâ é matú nhông byi ra râ nghut lhê. 20 Hkyangjong hpó gi, sânghi myhîng é kyôshî é mùk eq rahá, sau zo í du lé, Yhûmsîng Garaî é hí má wàq hê hkungga dông wàq hê ra râ nghut lhê. Haú pé gi, hkyangjong hpô é matú, Yhûmsîng Garaî é hí má chyoiyúng hkungga nghut nyi ri. 21 Haú nyí mîyhang, núngmòq gi, chyoiyúng zùphpong eq séng luî, taî pyô mù, hai amû le a ge zui saí râ nghut lhê. Haû gi, núngmòq nyi é jowò hkangmó má, jé lô râ pyàt bán hkangmó é matú, ahtum abyùq hkyô tô é hkunmó dùt râ nghut lhê.
22 Núngmòq é yò má kyô shû yu é hkûn, yò yàm yò chyûn hkangmó mâ é sháng shoq a ge shû yù râ nghut é htoq agó, gùqgyó lé le a ge tsîng yù ra nghut lhê. Haû lé gi, asho awuî é bang eq lé bíng nyî bâng é matú myhit to byi keq. Ngò gi, núngmòq é Garai Gasang nghut é, haû Yhûmsîng Garai nghut lhê.’ nghû àq.” ga taî ri.
Tut Mùt Poî
23 Haû Yhûmsîng Garai gi, Mosheq lé, 24 “Isira-elaq byu pé lé, ‘Nyhit hkyap hkyap sânghî nyí má, núngmòq, bánnô é buìnyì yù râ nghut lhê; haú nyí gi, tut htê mó mùt myhîng é dông kut é chyoiyúng zùphpong dùt râ nghut lhê. 25 Hai amû le a ge zui saí râ nghut lhê; nghut kôlhang, Yhûmsîng Garaî é matú myi nyhé hkungga nhông byi ra râ nghut lhê.’ nghû àq.” ga taî ri.
Mara Hkô Htaí Hkungga Byi Buìnyì
26 Haû Yhûmsîng Garai gi, Mosheq lé, 27 “Nyhit hkyap hkyap raxê nyí gi, Mara hkô htaí hkungga byi Buìnyì nghut lhê. Haû mù, chyoiyúng zùphpong kut luî, yhûmsing gùng zoshuq túm mù, Yhûmsîng Garaî é matú myi nyhé hkungga nhông byi ra râ nghut lhê. 28 Haú nyí má hai amû le hkâzui saí kó; hkâsu mù gâ le, haú nyí gi, núngmòq é Garai Gasang nghut é, haû Yhûmsîng Garaî é hí má núngmòq é matú mara hkô htaí hkungga nhông byî é, Mara hkô htaí hkungga byi Buìnyì nghut ri. 29 Haú buìnyì má yhûmsîng gùng a lhoqnyhum pyâm é sû gi, yhâng é a-myû mai chyung hpyit pyâm é hui râ nghut lhê. 30 Haú buìnyì má mú rajung jung zui saî é sû lé gi, Ngò, yhâng é a-myû mai lhoqhtûm pyám râ nghut lhê. 31 Núngmòq gi, hai amû le ge kut râ a nghut. Haû gi, núngmòq nyi é jowò hkangmó má, jé lô râ pyàt bán hkangmó é matú, ahtum abyùq hkyô tô é hkunmó dùt râ nghut lhê. 32 Haû gi, núngmòq é matú nô yù râ Bánno Buìnyì nghut mù, núngmòq gi, yhûmsing gùng lhoqnyhum pyám ra râ nghut lhê. Núngmòq gi, haú hkyap gau nyí myínhtâng mai htang nyí myínhtâng jé shoq, Bánno Buìnyì haú má nô yù ra râ nghut lhê.” ga taî ri.
Zúm Poî
33 Haû Yhûmsîng Garai gi, Mosheq lé, 34 “Isira-elaq byu pé lé îsu nghû taí aq; ‘Nyhit hkyap hkyap raxe ngo nyí nyí má, haû Yhûmsîng Garaî é Zúm Poî hî râ nghut mù, haû gi, nyhit nyí myáng râ nghut lhê. 35 Sânghî nyí gi, chyoiyúng zùphpong buìnyì nghut lhê; hai amû le ge zui saí râ a nghut. 36 Nyhit nyí gyoro má, Yhûmsîng Garaî é matú myi nyhé hkungga nhông byi râ nghut mù, shit nyí nyi gi, chyoiyúng zùphpong kut râ nghut luî, Yhûmsîng Garaî é matú myi nyhé hkungga nhông byi râ nghut lhê. Haû gi, zùphpong lhoqpân é nghut ri; hai amû lé ge zui saí râ a nghut.
37 (Shí pé gi, Yhûmsîng Garaî é matú myî èq nyhê nhông byî é hkungga nghut é, yhâng é nyí mîyhang nhông râ é, myi nyhé hkungga pé, gùqzò hkungga pé, sat hkungga pé eq shuq jung hkungga pê é matú, chyoiyúng zùphpong pé dông núngmòq taî pyô râ nghut é, Yhûmsîng Garaî é masàt tô é poî pé nghut lhê. 38 Hkungga haú pé gi, Yhûmsîng Garaî é Bánno Buìnyì má, núngmòq byî é chyûnghuq pé mai lai luî le, danghtum htûm tô é chyûnghuq pé mai lai luî le, Yhûmsîng Garai lé núngmòq byî é byi naû hkungga bànshoq mai lai luî le, byî é pé nghut lhê.)
39 Haû mù, núngmòq, maumyî haú mâ é kyôshi ban shû yu é htâng, nyhit hkyap hkyap raxe ngo nyí nyí mai hî luî nyhit nyí tup, Yhûmsîng Garaî é poî kut ra kôrâ nghut lhê; sânghî nyí gi, bánnô é buìnyì nghut mù, shit nyí nyí le bánnô é buìnyì nghut lhê. 40 Sânghî nyí má, núngmòq gi, shigâm mâ é je yúng é shi-kông pé, byùm haq pé, hpup yúng é sikkông pé eq sikxû gàm pé lé zân yu chûng mù, núngmòq é Garai Gasang nghut é, haû Yhûmsîng Garaî é hí má nyhit nyí yhang chôm gabú byam chyû nyi bum ra râ nghut lhê. 41 Poî haú lé, zàn wuì nyhit nyí nyí, Yhûmsîng Garaî é matú kut keq. Haû gi, jé lô râ pyàt bán hkangmó é matú, ahtum abyùq hkyô tô é hkunmó dùt râ nghut lhê; poî haú lé, nyhit hkyap hkyap má chyat kut keq. 42 Nyhit nyí yhang zúmdan má nyì ra kôrâ nghut lhê; núngmòq chyáng hku é Isira-elaq byu pé bànshoq bang gi, zúmdan má chyat nyi ra râ nghut lhê; 43 haú hkûn, núngmòq é awùt ashín pé gi, Ngò, núngmòq lé Egutuq ming mai shuî htoq lo é hkûn, Isira-elaq byu pé lé, Ngò, zúmdan má nyì nhang é hkyô lé wó sé kôrâ nghut lhê. Ngò gi, núngmòq é Garai Gasang nghut é, haû Yhûmsîng Garai nghut lhê.’ nghû àq.” ga taî ri.
44 Haú dông, Mosheq gi, Isira-elaq byu pé lé, haû Yhûmsîng Garaî é masàt poî pê é hkyô htòt taî kyô ri.