22
Haû Yhûmsîng Garai gi, Mosheq lé, 2 “Arun eq yhâng é yùqzô pé gi, Ngá é chyoiyúng myìng lé a lhoqhpoi kó sháng gàq, Ngo lé Isira-elaq byu pé yu lé byî é chyoiyúng hkungga pé lé hpautap myìt mai rago kut keq nghû taí aq. Ngò gi, haû Yhûmsîng Garai nghut lhê.3 Yhángmòq lé, ‘Jé lô râ pyàt bán pé má, núngmòq é awùt ashín mâ é rayùq yùq, htûngli dông a sanséng kôlhang, haû Yhûmsîng Garai lé Isira-elaq byu pé lhoq chyoiyúng é chyoiyúng hkungga pé eq lé chyâng htèp é nghut jáng, haú yùq gi, Ngá é hí mai chyung hpyit pyâm é hui ra râ nghut lhê. Ngò gi, haû Yhûmsîng Garai nghut lhê.
4 Arun é awùt ashín mâ é rayùq yùq, yàpjèq nòlì dàp é, a nghut jáng, yhâng é yùqgè hking mai shaúwing htoq é nghut jáng, yhang gi, yhang sansêng é hkûn jé shoq, chyoiyúng hkungga pé lé ge zo râ a nghut. Yhang gi, màng záng luî agòt a-û dùt é zè lé záng é nghut jáng le, yhang baú shaúwing htoq sû záng luî agòt a-û dùt é zè lé záng é nghut jáng le, 5 yhang lé a sanséng dùt nhang é dô yê jung lé záng é nghut jáng le, a sansêng é hkyô hai èq le, yhang lé a sanséng kut nhâng sû lé záng é nghut jáng le, a sanséng dùt byùq râ nghut lhê. 6 Haû sû é zè pé lé záng é sû gi, myínhtâng jé shoq a sanséng dùt râ nghut lhê. Yhang gi, gùng chî pyâm é za a nghut jáng, chyoiyúng hkungga pé lé ge zo râ a nghut. 7 Yhang gi, buì wàng jáng shèq sanséng râ nghut lhê; hau htâng má shèq, yhang gi, chyoiyúng hkungga pé lé ge zo râ nghut lhê; haî mù gâ le, haû gi, yhâng é zoshuq nghut ri. 8 Yhang gi, yhang baú shi tô é, a nghut jáng, yòsô ze èq lâng myha sat tô é gaunyhaú haî lé le ge zo râ a nghut; haû gi, yhang lé a sanséng dùt nhang é nghut lhê. Ngò gi, haû Yhûmsîng Garai nghut lhê.
9 Hkyangjông pé gi, Ngò cháng nhang tô é hkyô pé lé wú tiq pyám mù, mara bò kô é eq shi byùq é a hui zo kó sháng gàq, Ngò cháng nhang tô é hkyô pé lé châng nyì ra râ nghut lhê. Ngò gi, yhángmòq lé lhoqchyoi lhoqyúng é Sû, Yhûmsîng Garai nghut lhê.
10 Hkyangjông yhûmbyù mai lai luî, ó yùq le chyoiyúng hkungga lé ge zo râ a nghut; hkyangjông chyáng lé bíng sû le, langchyáng le, ge zo râ a nghut. 11 Nghut kôlhang, hkyangjong hpó ngun èq wui hpyit yu é jùn, a nghut jáng, yhâng é yhûm má hku é jùn nghut jáng, jùn haû gi, yhâng é zoshuq lé ge zo râ nghut lhê. 12 Hkyangjong hpô é byìzo rayùq, hkyangjong wùt a nghut su chyáng ló é nghut jáng, yhang gi, chyoiyúng wàq toq hkungga lé ge zo râ a nghut. 13 Nghut kôlhang, hkyangjong hpô é byìzo gi, chuimó dùt é, a nghut jáng, yùqgè eq gang luî, zodù a dàp é nghut mù, zo-myî pyàt é su, yhâng wâ é yhûm má lo dum taû nyi é nghut jáng, yhang gi, yhâng wâ é zoshuq lé ge zo râ nghut lhê. Nghut kôle, hkyangjong yhûmbyù a nghut é bang gi, haú lé ge zo râ a nghut.
14 Rayùq yùq, a bûn nùng má chyoiyúng é hkungga lé záng zô é nghut jáng, yhang gi, chyoiyúng hkungga lé le, hau é ngo tú mâ é ratú lé le, hkyangjong hpó lé xap ra râ nghut lhê. 15-16 Hkyangjông pé gi, Isira-elaq byu pé lé, chyoiyúng hkungga zo nhâng mù, yhángmòq ahtoq má mara dam shuî hâng yu é dông, Yhûmsîng Garaî chyáng yhángmòq yu lé é chyoiyúng hkungga lé ge lhoqhpoi râ a nghut. Hkâsu mù gâ le, Ngò gi, yhángmòq lé lhoqchyoi lhoqyúng Sû, Yhûmsîng Garai nghut lhê.’ nghû àq.” ga taî ri.
Hàp Yù A Ge É Hkungga Pé
17 Haû Yhûmsîng Garai gi, Mosheq lé, 18 “Arun eq yhâng é yùqzô pé lé le, Isira-elaq byù bànshoq bang lé le, dang nyô mù, yhángmòq lé, ‘Isira-elaq byu pê chyáng mâ é nghut nghut, Isira-elaq byu pê chyáng lé bíng nyi é gótû a-myû mâ é nghut nghut, dangshikaq lhoqdìk chyûnghuq, a nghut jáng, byi naû hkungga lé, myi nyhé hkungga dông Yhûmsîng Garai lé chyûnghuq lé byî é nghut jáng, 19 núngmòq gi, núngmòq é gùnglik dông hàp yù byi râ matú, haî le a râ é, nolo nghut kôle, saulo nghut kôle, bainám lo nghut kô le, nhông byi ra râ nghut lhê. 20 Dàm dap é lé gi, núngmòq é hkô htaí dông lhom hàp yù byi râ a nghut é yánmai, dàm dap é haî le hkâyu lé kó. 21 Rayùq yùq, dangshikaq tô é lhoqdìk râ, a nghut jáng, byi naû hkungga dông byi râ matú, haû Yhûmsîng Garai lé, no hpúng mâ é, a nghut jáng, sau hpúng mâ é, zùmhkaû hkungga yu lé byî é nghut jáng, haú lé lhom hàp yù byi râ matú, haî le a râ é, a nghut jáng, ra a bo é lé yu lé byi ra râ nghut lhê. 22 Myòqjìt é, gyuî htên é, lòq hkyî htên é, bú daû é, yô chap é eq mòwìng yui é pé lé gi, Yhûmsîng Garai lé ge nhông byi râ a nghut. Haú pé haî lé le, Yhûmsîng Garaî é matú myi nyhé hkungga dông hkungga gyàp htoq má ge nhông râ a nghut. 23 Nghut kôle, núngmòq gi, shobú zuî é, a nghut jáng, gùngsho a hkûm é, sau nghut nghut, no nghut nghut lé, byi naû hkungga dông ge nhông byi râ nghut lhê; nghut kôlhang, dangshikaq lhoqdìk é nghut le gi, haú lé lhom hàp yù byi râ a nghut. 24 Núngmòq gi, ají lhoqhtên pyâm é, lhoqchap pyâm é, lhoqcheq pyâm é, a nghut jáng, hpyit pyám bê é gaunyhaú lé, Yhûmsîng Garaî é matú hkâ-nhông byi kó. Núngmòq é mau má îsû é hkyô ge kut râ a nghut. 25 Núngmòq gi, haû sû é gaunyhaû pé lé, gótû a-myû wui é lòq mai hàp yù luî, núngmòq é Garai Gasâng é zoshuq dông ge nhông byi râ a nghut. Haú pé lé gi, shobú zuî é eq dàm pé dàp é yánmai, núngmòq é gùnglik dông lhom hàp yù râ a nghut.’ nghû àq.” ga taî ri.
26 Haû Yhûmsîng Garai gi, Mosheq lé, 27 “No zo, sau zo, a nghut jáng, bainám zo shuî é hkûn, nyhit nyí gyoro má yhâng nu eq za nyi to ra râ nghut lhê. Shit nyí nyí mai gi, haú lé, Yhûmsîng Garaî é matú myi nyhé hkungga dông lhom hàp yù râ nghut lhê. 28 No lé nghut nghut, sau lé nghut nghut, yhâng nu eq yhang zo lé ra-nyí má za ge sat râ a nghut.
29 Núngmòq gi, haû Yhûmsîng Garai lé jeju bun hkungga nhông byî é hkûn, núngmòq é gùnglik dông lhom hàp yù byi râ hkyô mai nhông byi keq. 30 Haú nyí mîyhang haú lé zô pyám keq; htang nàpkyó jé shoq haî le hkâtô to kó. Ngò gi, haû Yhûmsîng Garai nghut lhê.
31 Ngá é hkunmó pé lé rago châng nyì keq. Ngò gi, haû Yhûmsîng Garai nghut lhê. 32 Ngá é chyoiyúng myìng lé hkâ lhoqhpoi kó. Ngò chyoiyúng nyi é lé, haû Isira-elaq pé sê gyo ra râ nghut lhê. Ngò gi, núngmòq lé lhoqchyoi lhoqyúng Sû eq, 33 núngmòq é Garai Gasang dùt râ matú, Egutuq ming mai núngmòq lé shuî htoq lo é Sû, haû Yhûmsîng Garai nghut lhê. Ngò gi, haû Yhûmsîng Garai nghut lhê.” ga taî ri.