Hkyangjông Pé Cháng Râ É Târâ
21
Haû Yhûmsîng Garai gi, Mosheq lé, “Arun é yùqzo hkyangjông pé lé dang nyô mù, yhángmòq lé, ‘Hkyangjong rayùq gi, yhâng é byu pé mâ é shi byùq su chyáng mai, yhâng gùng lé htûngli dông a sanséng ge kut yû râ a nghut. 2 Nghut kôlhang, yhâng é suisho nghut é, yhâng nu yhâng wa, yhang zo yùqzo byìzo, yhang gu yhang mang, 3 yhang lé za lùmhkau nyi é, zo-myi a ló shî é yhâng nhammó pé mai gi, a sanséng ge kut yu lhê. 4 Yhang gia, mùng mòq rayùq yùq shi é eq sêng é má yhâng gùng lé a sanséng ge kut yû râ a nghut.5 Hkyangjông pé gi, yhángmòq é xâm lé le, yhángmòq é nhutmui lé le, ge wùq pyám râ a nghut é htoq agó, yhángmòq é gùngsho lé le, ge yâm cheq râ a nghut. 6 Yhángmòq gi, yhángmòq é Garai Gasâng é matú chyoiyúng nyî ra râ nghut mù, yhángmòq é Garai Gasâng é myìng lé ge lhoqhpoi râ a nghut. Hkâsu mù gâ le, yhángmòq gi, Yhûmsîng Garai lé myî èq nhông byî é hkungga nghut é, yhángmòq é Garai Gasâng é zoshuq lé nhông byî akô nghut ri; haû mù, yhángmòq gi, chyoiyúng ra râ nghut lhê.
7 Yhángmòq gi, Garai Gasâng é matú chyoiyúng bang nghut é yánmai, shiwa myhí, myìng htên é myiwe, yùqgè eq gâng é myiwe lé ge hâng yù râ a nghut. 8 Yhángmòq gi, núngmòq é Garai Gasâng é zoshuq lé nhông byi kô é yánmai, yhángmòq lé chyoiyúng bang dông sôn yû keq. Ngò, núngmòq lé lhoqchyoi lhoqyúng Sû, Yhûmsîng Garai gi, chyoiyúng é yánmai, yhángmòq lé chyoiyúng bang dông sôn yù keq.
9 Hkyangjong rayùq yùq é byìzo gi, shiwa myhí kut é dông yhâng gùng lé agòt a-û kut yu é nghut jáng, yhang gi, yhâng wa lé lhoqhpoî é nghut mù, myî èq nyhê hkyô pyâm é hui ra râ nghut lhê.
10 Yhûmsing é gu-mang wuì mai hkyangjong mó kut râ matú, ulhum má xû hut gyûn é hkam yù mù, hkyangjong mèbu wùt râ matú wò byî é hkam yù sû gi, yhâng é xâm lé hpyap hkyô é le, yhâng é mèbu lé lâng cheq é le, ge kut râ a nghut. 11 Yhang gi, màng joq é jang má ge wang ê râ a nghut. Yhang gi, yhâng nu yhâng wâ é matú lháng yhûmsing gùng lé a sanséng ge kut yû râ a nghut. 12 Yhang gi, yhâng é Garai Gasâng é sân-yúng jowò mai ge htoq râ a nghut é htoq agó, haú lé ge lhoqhpoi râ a nghut; hkâsu mù gâ le, yhâng é Garai Gasâng é namngón xû but é hàp yù mù, yhang lé àp nhong to bê nghut lhê. Ngò gi, haû Yhûmsîng Garai nghut lhê.
13 Yhâng hâng yù râ myiwe gi, zo-myi gyíng nghut ra râ nghut lhê. 14 Yhang gi, chuimó lé nghut nghut, yùqgè eq gâng é myiwe lé nghut nghut, shiwa myhí kut mù agòt a-û dùt é myiwe lé nghut nghut, ge hâng yù râ a nghut; yhâng é a-myû mâ é zo-myi gyíng lé za ge hâng yù râ nghut lhê. 15 Haû jáng, yhang gi, yhâng é a-myû má yhâng é zodù wuì lé agòt a-û dùt nhâng râ a nghut. Hkâsu mù gâ le, Ngò gi, yhang lé lhoqchyoi lhoqyúng Sû, Yhûmsîng Garai nghut lhê.’ nghû àq.” ga taî ri.
16 Haû Yhûmsîng Garai gi, Mosheq lé, 17 “Arun lé îsu nghû taí aq; ‘Jé lô râ pyàt bán pé mâ é náng é awùt ashín pé mai, gùngsho a hkûm é sû gi, yhâng é Garai Gasâng é zoshuq lé nhông byi râ matú ge huî chyâng lé râ a nghut. 18 A ge huî chyâng lé râ gùngsho a hkûm é bang gi, myòqjìt é, hkyî htên é, nhô dûng é, shobú zuî é, 19 hkyî yùn lòq yun é, 20 dàng ngóm é, gùng tot é, myòqnò no é, yô chap é, dàm jèq é, ají htên byùq é bang nghut râ nghut lhê. 21 Hkyangjong Arun é awùt ashín mâ é gùngsho a hkûm é ó yùq lé, Yhûmsîng Garai lé myî èq nyhê nhông byî é hkungga lé, lé ge nhông byi râ a nghut. Yhang gi, gùngsho a hkûm é yánmai, yhâng é Garai Gasâng é zoshuq lé nhông byi râ matú ge huî chyâng lé râ a nghut. 22 Yhang gi, yhâng é Garai Gasâng é chyoiyúng é zoshuq eq chyoiyúng htâng é zoshuq lé ge zo râ nghut lhê. 23 Nghut kôlhang, yhang gi, yhâng é gùnghkyâng a hkûm é yánmai, Ngá é sân-yúng jowò lé agòt a-û a dùt nhâng sháng gàq, pán-gyang hkaû má le a ge wàng râ nghut é htoq agó, hkungga gyàp má le a ge huî chyâng ê râ nghut lhê. Ngò gi, yhángmòq lé lhoqchyoi lhoqyúng é Sû, Yhûmsîng Garai nghut lhê.’ nghû àq.” ga taî ri.
24 Haû mù, Mosheq gi, Arun eq yhâng é yùqzô pé lé le, Isira-elaq byù bànshoq bang lé lé, haû su ga taî kyô ri.