Yubàk Mara Wó Sû Lé Dam Byî É Hkyô Pé
20
Haû Yhûmsîng Garai gi, Mosheq lé, 2 “Isira-elaq byu pé lé îsu nghû taí aq; ‘Isira-elaq byu pé mâ é nghut nghut, Isira-elaq ming má lé bíng nyì bang mâ é nghut nghut, yhûmsing é zodù lé, Molek hparà lé nhông byî é sû gi, sat pyâm é hui ra râ nghut lhê. Shiwa hpúng mâ é byu pé gi, haú yùq lé lùqgòk èq dú sat pyám ra râ nghut lhê. 3 Ngò yhang, haú yùq lé Ngá é myòqdong lhoqhpyoq shit mù, yhang lé, yhâng é a-myû mai chyung hpyit pyám râ nghut lhê. Hkâsu mù gâ le, yhang gi, Molek lé yhâng é zodù nhông byî é dông, Ngá é sân-yúng jowò lé agòt a-û kut pyám mù, Ngá é chyoiyúng myîng lé lhoqhpoî pyâm é sû nghut ri. 4 Haú yùq, Molek hparà lé yhang zo nhông byî é lé, shiwa hpúng mâ é byu pé a myàng gùn kut mù, yhang lé a sat pyám kô é nghut jáng, 5 Ngò yhang, haú yùq eq yhâng é yhûmbyù wuì lé Ngá é myòqdong lhoqhpyoq shit mù, yhang lé le, yhâng htâng cháng mù, Molek hparà eq gùngsho shut é bang lé le, yhángmòq é a-myû mai chyung hpyit pyám râ nghut lhê.6 Ngò gi, haû sôbyô dàt ji é hkyô eq bùt hpyit é hkyô má cháng mù, yhûmsing gùng lé shiwa hpó dông kut yu é sû lé, Ngá é myòqdong lhoqhpyoq shit mù, yhang lé, yhâng é a-myû mai chyung hpyit pyám râ nghut lhê.
7 Haû mù, yhûmsing gùng yhûmsîng lhoqchyoi lhoqyúng yû mù, chyoiyúng nyî keq; haî mù gâ le, Ngò gi, núngmòq é Garai Gasang nghut é, haû Yhûmsîng Garai nghut lhê. 8 Ngá é târâ wàng hkunmó pé lé châng nyì keq. Ngò gi, núngmòq lé lhoqchyoi lhoqyúng é Sû Yhûmsîng Garai nghut lhê.
9 Yhûmsing é înu îwa lé nhîng é sû gi, sat pyâm é hui ra râ nghut lhê. Yhang gi, yhâng nu yhâng wa lé nhing bê nghut é yánmai, yhâng é yubàk sui gi, yhâng é u htoq má jé râ nghut lhê.
10 Rayùq yùq, yhâng é chyáng nâm mâ é su é yhang myi eq su-myi sulàng lú hkyô kut shut é nghut jáng, su-myi sulàng lú sû haú nhik gi, sat pyâm é hui ra râ nghut lhê.
11 Rayùq yùq, yhâng wâ é yhang myi eq gùngsho zùm yàp é nghut jáng, yhang gi, yhâng wa lé a hkúngga kut bê nghut ri. Haú yùq gi, myiwe myhí haû eq rahá sat pyâm é hui ra râ nghut lhê; yhángnhik é yubàk sui gi, yhángnhik í yùq é u htoq má jé râ nghut lhê.
12 Rayùq yùq, yhâng é dùmó eq nyì zô lhûm é nghut jáng, yhángnhik gi, sat pyâm é hui ra râ nghut lhê. Yhángnhik kut é hkyô gi, htûnglai lé lhoqbyòk pyâm é mara nghut ri; yhángnhik é yubàk sui gi, yhángnhik é u htoq má jé râ nghut lhê.
13 Rayùq yùq, myiwe eq gùngsho zùm yàp é su, yùqgè eq zùm yàp é nghut jáng, yhángnhik gi, achaq achyut é hkyô kut bekô nghut ri. Yhángnhik gi, sat pyâm é hui ra râ nghut lhê; yhángnhik é yubàk sui gi, yhángnhik é u htoq má jé râ nghut lhê.
14 Rayùq yùq, yhang zo eq yhâng nu lé yhang myi kut yu é nghut jáng, haû gi, agè ashop é hkyô nghut ri. Yhang eq haú me gi, núngmòq chyáng haû sû é agè ashop hkyô a jòq byùq râ matú, myî èq nyhê hkyô pyâm é hui ra râ nghut lhê.
15 Yùqgè rayùq yùq, gaunyhaú eq gùngsho zùm yàp é nghut jáng, yhang gi, sat pyâm é hui ra râ nghut lhê; gaunyhaú haú lé le sat pyám ra râ nghut lhê.
16 Myiwe rayùq, gaunyhaû chyáng huî ê mù, haû eq gùngsho zùm yàp é nghut jáng, myiwe haû eq gaunyhaú haû gi, sat pyám é hui ra râ nghut lhê. Yhángmòq é yubàk sui gi, shî gíng é nghut mù, sat pyám keq.
17 Rayùq yùq, yhâng wâ é yhang zo byìzo, a nghut jáng, yhâng nû é yhang zo byìzo nghut é, yhâng nhammó lé yù mù, gùngsho zùm yàp é nghut jáng, haû gi, myòqdong pyoq é hkyô nghut bê. Haû mù, yhángnhik gi, yhángnhik é a-myû wui é myòq hí mai chyung hpyit pyâm é hui ra râ nghut lhê. Yhang gi, yhâng nhammó lé a hkúngga kut bê nghut é yánmai, mara wò haû yù ra râ nghut lhê.
18 Rayùq yùq, lhôhking lé nyi é myiwe eq gùngsho zùm yàp é nghut jáng, yhang gi, myiwe haû suí yui é hkyô lé lhoqhtoq shit bê nghut mù, myiwe haû le, haú hkyô lé hpông shit bê nghut luî, yhángnhik gi, yhángnhik é a-myû mai chyung hpyit pyâm é hui ra râ nghut lhê.
19 Náng nû é yhang gu yhâng nhá eq nghut nghut, náng wâ é nhammó eq nghut nghut, gùngsho a ge zùm yap; hkâsu mù gâ le, haû gi, yhûmsing é suisho lé a hkúnggâ é dùt bê nghut ri; núngnhik í yùq é, mara wò haû yù ra râ nghut lhê.
20 Rayùq yùq, yhâng wâ é yhang gu yhang mâng é yhang myi eq yhup zùm yàp é nghut jáng, yhâng wâ é yhang gu yhang mang lé a hkúngga kut bê nghut ri. Yhángnhik í yùq gi, mara wò haû yù ra râ nghut lhê; yhángnhik í yùq gi, zo a wó é za shi byùq kôrâ nghut lhê.
21 Rayùq yùq, yhang gu yhang mâng é yhang myi lé yu é nghut jáng, haû gi, agòt a-û hkyô nghut bê nghut ri; yhang gi, yhang gu yhang mang lé a hkúngga kut bê nghut mù, yhángnhik gi, zo a wó dùt byùq kôrâ nghut lhê.
22 Núngmòq ló nyî râ matú, Ngò, núngmòq lé shuî ló é maumyî gi, núngmòq lé a hpat htoq pyám sháng gàq, Ngá é târâ wàng hkunmó pé eq târâ pé bànshoq lé châng nyì keq. 23 Núngmòq gi, núngmòq é hí mai Ngò ló hkat htoq pyám râ nghut é byù myû wui é htûngli dông ge nyì yàp kôrâ a nghut. Yhángmòq gi, shí hkyô pé bànshoq kut bekô nghut é yánmai, Ngò, yhángmòq lé chaq pyám bê nghut lhê. 24 Nghut kôlhang, Ngò gi, núngmòq lé, “Núngmòq gi, yhángmòq é maumyî lé sîng râ nghut lhê; Ngò gi, no-naú eq byo-î yui é maumyî lé, silî wunlî dông núngmòq lé byi râ nghut lhê.” nghû taî é nghut lhê. Ngò gi, núngmòq lé gótû byù myû wuì mai gam hkoq yu é Sû, núngmòq é Garai Gasang nghut é, haû Yhûmsîng Garai nghut lhê.
25 Haû mù, núngmòq gi, sansêng é yòsô zè eq a sansêng é yòsô zè, sansêng é nghoqzo eq a sansêng é nghoqzô pé lé ge gam hkoq ra râ nghut lhê. Núngmòq é matú a sanséng nghû Ngò gam hkoq to bê nghut é, myigùng má dô yê jung, a nghut jáng, nghoqzo, a nghut jáng, yòsô ze pê èq núngmòq lé agòt a-û hkâdùt nhâng kó. 26 Ngò, Yhûmsîng Garai gi, chyoiyúng lhê nghut mù, núngmòq lé, Ngò sing é bang dùt râ matú, gótû byù myû wuì mai gam hkoq to bê nghut é yánmai, núngmòq gi, Ngá é matú chyoiyúng é bang dùt ra râ nghut lhê.
27 Núngmòq chyáng mâ é, nàt wang júng é, a nghut jáng, bùt hpyit é, yùqgè nghut nghut, myiwe nghut nghut gi, sat pyâm é hui ra râ nghut lhê. Haû sû é byù lé lùqgòk èq dú sat pyám ra râ nghut lhê; yhángmòq é mara sui gi, yhángmòq é u htoq má jé râ nghut lhê.’ nghû àq.” ga taî ri.