Nhông Jaú Laiká 27

Danghtum Htûm Tô É Lé Lhoqdìk É Hkyô

Haû Yhûmsîng Garai gi, Mosheq lé, 2 “Isira-elaq byu pé lé dang nyô mù, yhángmòq lé, ‘Rayùq yùq, góyùq lé Yhûmsîng Garaî chyáng àp nhông râ matú dangshikaq tô tô é nghut jáng, nàng hpyit tô é gù eq rajung za xap ra râ nghut lhê. 3 Í xê zàn eq hkyuq xê zàn gyoro mâ é yùqgè wui é matú gi, sân-yúng jowò mâ é jàng má cháng luî, ngùnhtung nyhit rûng kô gù to mù, 4 myiwe nghut jáng gi, ngùnhtung myi rûng kô gù to râ dùt lhê. 5 Ngo zân eq í xê zàn gyoro mâ é yùqge é matú gi, ngùnhtung sum rûng kô gù to mù, myiwê é matú gi, ngùnhtung rarung èq ngo che kô gù to râ dùt lhê. 6 Lha-mó rahkyap eq ngo zân gyoro mâ é yùqgè zô é matú gi, ngùnhtung nyhit chê èq ngo mû kô gù to mù, myiwe zô é matú gi, ngùnhtung myî chê èq ngo mû kô gù to râ dùt lhê. 7 Hkyuq xê zàn mai ahtoq gû mâ é yùqge é matú gi, ngùnhtung í rung èq rache kô gù to mù, myiwê é matú gi, ngùnhtung rarung èq ngo che kô gù to râ dùt lhê. 8 Rayùq yùq lûm myùng luî, tô tô é gù lé a ung é nghut jáng, haú yùq lé hkyangjong hpô chyáng nhang kat mù, hkyangjong hpó gi, yhang dangshikaq tô é sû wó byî lhê gâ é má sôn wú mù, yhâng é gù lhom hpyit byi ra râ nghut lhê.

9 Yhang danghtum htûm tô é gi, haû Yhûmsîng Garai lé nhông byî é hkungga dông hàp yù gíng é gaunyhaú nghut jáng, haû su nhông byî é gaunyhaú gi, Yhûmsîng Garaî é matú chyoiyúng byùq ri. 10 Yhang gi, ge htaí ge malaî râ a nghut; ge é lé, a ge é htaî kat é nghut nghut, a ge é lé, ge é htaî kat é nghut nghut, ge kut râ a nghut; nghut kôlhang, gaunyhaú radu gi, gódû é malaî htaî é nghut jáng, haû í dû é chyoiyúng byùq ri. 11 Yhang danghtum htûm tô é gi, htûngli dông a sansêng é gaunyhaú nghut mù, haû Yhûmsîng Garai lé nhông byî é, a hàp yù gíng é hkungga gaunyhaú nghut jáng, gaunyhaú haú lé hkyangjong hpô chyáng ê shit ra râ nghut lhê. 12 Hkyangjong hpó gi, haû ge é, a ge é lhom hpyit râ nghut mù, yhang, gù hká dông lhom hpyit byî le hká dông nghut ra râ nghut lhê. 13 Haû gaunyhaú lé yhûmsîng hpó hkyi htoq yû nau é nghut jáng, yhang gi, hau é gù ngo tú mâ é ratú kat jàt byi ra râ nghut lhê.

14 Rayùq yùq, yhâng é yhûm lé, Yhûmsîng Garaî é matú chyoiyúng zè dông àp nhông byî é nghut jáng, hkyangjong hpó gi, haû ge é, a ge é lhom hpyit râ nghut mù, yhang, gù hká dông lhom hpyit byî le hká dông, gù to ra râ nghut lhê. 15 Yhûm haú lé àp nhong é yhûmsîng hpó hkyi htoq yû nau é nghut jáng, yhang gi, hau é gù ngo tú mâ é ratú kat jàt byi ra râ nghut lhê; haú hkûn, yhûm haû gi, yhâng é dum dùt râ nghut lhê.

16 Rayùq yùq, yhâng é yhum maumyî ra-am lé Yhûmsîng Garaî é matú àp nhông byî é nghut jáng, mùk-yó gùq sân hkyô é má cháng luî, hau é gù hpyit ra râ nghut lhê; mùk-yó gùq ngo xê joí kô wang é maumyî lé gi, ngùnhtung nyhit rûng kô gù hpyit to ra râ nghut lhê. 17 Yhâng é yò lé gabú tut htê mùt myhîng é zànwut má àp nhong é nghut jáng, gù gi, hpyit tô é dông za nghut râ nghut lhê. 18 Nghut kôlhang, yhâng é yò lé, gabú tut htê mùt myhîng é zànwut htâng má àp nhong é nghut jáng, hkyangjong hpó gi, dum jé lô râ gabú tut htê mùt myhîng é zànwut é gyoro mâ é zànwut buìnyì lé nghap wú mù, gù hpyit to bê htoq lhoqyôm luî, gù hpyit ra râ nghut lhê. 19 Yò lé àp nhông sû mai, yò haú lé hkyi htoq yû nau é nghut jáng, yhang gi, hau é gù ngo tú mâ é ratú kat jàt byi ra râ nghut lhê; haú hkûn, yò haû gi, yhâng é dum dùt râ nghut lhê. 20 Nghut kôle, yhang gi, yò haú lé a hkyi htoq yu é za, góyùq lé ung byî pyám bê nghut jáng, yò haú lé hkâ-nhám le wo dum hkyi taû yù râ a nghut lo. 21 Yò haû gi, gabú tut htê mùt myhîng é zànwut má wui yù su chyáng mai lùt htoq lo é hkûn, haû Yhûmsîng Garai lé àp nhông bê yò su chyoiyúng râ nghut lhê; yò haû gi, hkyangjông pê é yò dùt byùq râ nghut lhê.

22 Rayùq yùq, yhâng é yhum maumyî mâ é yò a nghut é za, wui yu é yò lé, Yhûmsîng Garaî é matú àp nhong é nghut jáng, 23 hkyangjong hpó gi, gabú tut htê mùt myhîng é zànwut jé shoq é buìnyì lé nghap wú mù, gù hpyit byi ra râ nghut lhê; byù haú yùq gi, Yhûmsîng Garaî é matú chyoiyúng zê nghû, haú nyí má yhang gù haú lé byi ra râ nghut lhê. 24 Gabú tut htê mùt myhîng é zànwut jé jáng, yò haû lé gi, sânghi ûng é yhûmsîng hpó dum yù râ nghut lhê. 25 Hpyit tô é gù bànshoq gi, sân-yúng jowò mâ é jàng má cháng mù hpyit ra râ nghut lhê. Shekela ralhum gi, gera í xê nghut lhê.

26 Nghut kôle, haû sânghi shuî é gaunyhaú gi, Yhûmsîng Garai eq sêng to gù nghut bê mù, ó yùq le, sânghi shuî é gaunyhaú lé ge àp nhông râ a nghut; no nghut kôle, sau nghut kôle, Yhûmsîng Garaî é nghut to bê nghut ri. 27 A sansêng é gaunyhaú nghut é nghut jáng, yhang gi, hpyit tô é gù má ngo tú mâ é ratú kat jàt mù, ge wui taû yu é nghut lhê. Yhang gi, haú lé a hkyi htoq yu é nghut jáng, hpyit tô é gù mai ûng pyám ra râ nghut lhê.

28 Nghut kôlhang, Yhûmsîng Garai lé àp nhong tô é eq hkyin htoq to byi bê é, byù, gaunyhaú eq yhâng yhum é yò pé haî lé nghut kôle, dum ung dum hkyi htoq ge kut râ a nghut; haû su hkyin htoq to bê é zè lhúnglháng gi, Yhûmsîng Garaî é matú chyoiyúng htâng é nghut bê nghut ri.

29 Lhoqhtên pyám râ matú hkyin htoq to bê byù gi, hkyi htoq yu é ge hui râ a nghut; yhang gi, sat pyâm é hui ra râ nghut lhê.

30 Shigâm mâ é shi nghut kôlhang, myì mai htoq é gùqzò muilhum nghut kôlhang, maumyî haû má htoq é jung hkangmó mâ é xê gàmbùm mâ é ragàmbùm gi, Yhûmsîng Garai eq sêng é chyat nghut lhê; haû gi, Yhûmsîng Garaî é matú chyoiyúng ri. 31 Rayùq yùq, yhâng é xê gàmbùm mâ é ragàmbùm lé hkyi htoq yû nau é nghut jáng, yhang gi, hau é gù má ngo tú mâ é ratú kat jàt ra râ nghut lhê. 32 No hpúng sau hpúng má, zúng su é dumbáng ô mai laî é no eq sau nghu é mâ é xê du mâ é radu gi, Yhûmsîng Garaî é matú chyoiyúng râ nghut lhê. 33 Yhang gi, ge é, a ge é nghû le, htaî lhik é dông le, ge kut râ a nghut. Nghut kôlhang, yhang htaî lhik é nghut jáng, haû í dû é chyoiyúng byùq râ nghut mù, ge hkyi htoq yû râ a nghut.’ nghû àq.” ga taî ri.

34 Shí pé gi, haû Yhûmsîng Garai mai, Isira-elaq é matú, Sinaq Bùm má Mosheq lé byî é hkunmó pé nghut ri.