Nhông Jaú Laiká 5

Rayùq yùq, dâkam é dang lé wó gyô yù luî, sàksé nghut to kôle, myang é sê é hkyô lé a taî htoq é nghut jáng, yhang gi, mara bò bê nghut mù, mara wò haû yù ra râ nghut lhê.

2 Rayùq yùq, htûngli dông a sansêng é zè nghut é, tân jung yòsô ze é màng nghut nghut, shigu gaunyhaû é màng nghut nghut, dô yê jûng é màng nghut nghut lé, a bûn nùng má záng pyám mù, a sanséng dùt byùq bê hkyô lé a sê kat kôle, yhang gi, mara bò bê nghut ri. 3 Yhang gi, xângzo byu pê chyáng dàp é a sansêng é haî lé nghut kôle, a bûn nùng má záng pyám mù a sê kat kôlhang, haú hkyô lé wó sê kat é hkûn, yhang mara bò bê nghut ri. 4 Rayùq yùq, ge é nghut nghut, a ge é nghut nghut kut râ ga, a myìt tû wú é za han dâkam pyám mù, yhang dâkam é lé a bûn sê é nghut jáng, haú hkyô lé yhang wó sê é hkûn, haû dâkam tô é rajung jung má mara bò bê nghut ri. 5 Rayùq yùq, haú hkyô pé mâ é rahkat hkat lé mara shut bê nghut é lé sê kat jáng, yhang gi, hkâsu shut é hkyô lé yín yû ra râ nghut lhê. 6 Yhang gi, yhang kut shut é mara dâm é matú, sau bainám hpúng mâ é sauzîng zo nghut nghut, bainám zîng zo nghut nghut lé, mara hkyut hkungga dông haû Yhûmsîng Garaî é hí má yu lé byi ra râ nghut luî, hkyangjong hpó gi, yhâng é marâ é matú mara hkô htaí hkungga nhông byi ra râ nghut lhê.

7 Sau zo byi râ a wó dùt sû gi, yhâng é mara dâm é matú, haû Yhûmsîng Garaî é hí má, hpûngkyui í du nghut nghut, nghoqmyhû zo í du nghut nghut yu lé byi ra râ nghut lhê; haû radu gi, mara hkyut hkunggâ é matú nghut mù, radu gi, myi nyhé hkunggâ é matú nghut lhê. 8 Yhang gi, haú lé hkyangjong hpô chyáng yu lé râ nghut mù, hkyangjong hpó gi, mara hkyut hkungga lé hí nhông byi râ nghut luî, hau é gùngdu lé a lâng hpyit pyâm é za, lìngzing mai ne sat ra râ nghut lhê. 9 Haû mara hkyut hkungga sui ra-am lé gi, hkungga gyàp ayàm má hpyûn gyun luî, myìt tô é sui lé gi, hkungga gyàp awang má hut hkyó ra râ nghut lhê. Haû gi, mara hkyut hkungga nghut lhê. 10 Hau htâng, hkyangjong hpó gi, shit kyô tô é eq rajung za, gódu lé myi nyhé hkungga dông nhông byi mù, yhang kut shut é marâ é matú mara hkô htaí hkungga nhông byi ra nghut luî, yhang gi, mara hkyut pyám byî é hui râ nghut lhê.

11 Hpûngkyui í du, a nghut jáng, nghoqmyhû zo í du lé byi râ a wó dùt é nghut jáng, yhang gi, mara hkyut hkunggâ é matú, je nú é mún ngo joí mâ é xê gàmbùm ragàmbùm lé, yhang kut shut é marâ é matú hkungga dông yu lé byi ra râ nghut lhê; haû gi, mara hkyut hkungga nghut é yánmai, haú má tsanlun xû eq namngón jung ge kat râ a nghut. 12 Yhang gi, haú lé hkyangjong hpô chyáng yu lé byi râ nghut mù, hkyangjong hpó gi, mún lé ra-tsup tsup yû luî, Yhûmsîng Garaî é matú nhông byî é myi nyhé hkungga gyàp mâ é hkungga htoq má bûn nyì gàmbùm dông nyhê nhông râ nghut lhê. Haû gi, mara hkyut hkungga nghut lhê. 13 Hkyangjong hpó gi, haú dông mai, mara haú pé mâ é yhang kut shut é marâ é matú mara hkô htaí hkungga nhông byi râ nghut luî, yhang gi, mara hkyut pyám byî é hui râ nghut lhê. Myìt tô é hkungga mún gi, gùqzò hkungga mâ é su, hkyangjong hpô é matú nghut râ nghut lhê.’ gâ ri.” ga taî ri.

Mara Hpyî Hkungga

14 Haû Yhûmsîng Garai gi, Mosheq lé, 15 “Rayùq yùq, haû Yhûmsîng Garaî é chyoiyúng zè pé eq sêng é lé, a bûn nùng má mara kut shut é dông Yhûmsîng Garai lé a jujúm pyâm é nghut jáng, yhang gi, haû shut mara hpyî râ matú, sân-yúng jowò mâ é jàng má cháng luî, ngùnhtung gù eq són mù, haî le a râ é, sau hpúng mâ é saulo radu lé, Yhûmsîng Garaî é hí má yu lé byi ra râ nghut lhê. Haû gi, mara hpyî hkungga nghut lhê. 16 Yhang gi, haû chyoiyúng é zè eq sêng é má a záng kut pyâm é lé, saî lhoqnyhâng mù, haû shut pyâm é ngo tú mâ é ratú lé jàt kat byi luî, hkyangjong hpó lé àp byi ra râ nghut lhê. Hkyangjong hpó haû gi, saulo lé mara hpyî hkungga dông, yhâng é matú mara hkô htaí hkungga nhông byi ra nghut luî, yhang gi, mara hkyut pyám byî é hui râ nghut lhê.

17 Rayùq yùq, yhang a sé kôlhang, haû Yhûmsîng Garai hkyô tô é hkunmó pé mâ é ralhum lhum lé kut shut luî, hkûm zing tô é lé lu laî pyâm é nghut jáng, yhang gi, mara bò bê nghut mù, mara wò haû yù ra râ nghut lhê. 18 Yhang gi, gyó âng é myhó sôn wú mù, haî le a râ é, sau hpúng mâ é saulo radu lé, mara hpyî hkungga dông hkyangjong hpô chyáng yu lé byi ra râ nghut lhê. Hkyangjong hpó gi, haú dông mai, a bûn nùng má yhâng kut shut é marâ é matú, mara hkô htaí hkungga nhông byi râ nghut luî, yhang gi, mara hkyut pyám byî é hui râ nghut lhê. 19 Haû gi, mara hpyî hkungga nghut lhê. Gè gè yhang, yhang gi, haû Yhûmsîng Garai lé kut shut é mara wó bê nghut ri.” ga taî ri.