6
Haû Yhûmsîng Garai gi, Mosheq lé, 2 “Rayùq yùq, mara kut shut luî, haû Yhûmsîng Garai lé a jujúm pyâm é gi, luzúm hpó àp tô é zè, a nghut jáng, tâng tô é zè lé mhaú zô yu é dông le, luzúm hpô é zè lé lú hkaû yu é dông le, luzúm hpó lé zìk zô yu é dông le, 3 lhoqhpyuq tô é zè lé myàng mù mhaû yu é dông le, byu pé lhaq kut shut é haû sû é mara pé lé a têng é za dâkam é dông le nghut é nghut jáng, 4 yhang, haú sû é hkyô pé rahkat hkat kut shut mù, mara bò bê hkyô lé bûn sê kat é hkûn, yhang gi, yhang lú hkaû yu tô é zè nghut nghut, zìk yu tô é zè nghut nghut, yhang lé àp byî tô é zè nghut nghut, lhoqhpyuq to bê lé myang yu é zè nghut nghut, 5 a têng é dông dâkam tô é haî nghut nghut, tau byi ra râ nghut lhê. Yhang gi, zè haú pé bànshoq lé tau byi mù, gù sôn wú luî, ngo tú mâ é ratú jàt mù, yhang, mara hpyî hkungga nhong é buìnyì má zè yhûmsîng lé bànshoq byi ra râ nghut lhê. 6 Yhang gi, mara dàm hkam yu é dông mai, âng é myhó sôn wú mù, haî le a râ é, sau hpúng mâ é saulo lé, yhâng é mara hpyî hkungga dông, haû Yhûmsîng Garaî hí má, hkyangjong hpô chyáng yu lé byi ra râ nghut lhê. 7 Hkyangjong hpó gi, haú dông mai, haû Yhûmsîng Garaî é hí má, yhâng é matú mara hkô htaí hkungga nhông byi râ nghut mù, yhang lé mara bò nhang é hkyô haî nghut kôle, mara hkyut pyám byî é hui râ nghut lhê.” ga taî ri.Myi Nyhé Hkungga
8 Haû Yhûmsîng Garai gi, Mosheq lé, 9 “Arun eq yhâng é yùqzô pé lé a-ô mâ é hkunmó hkyô aq; ‘Myi nyhé hkunggâ é matú cháng ra târâ pé gi, myi nyhé hkungga lé, hkungga gyàp é htang htoq má ra-myin mau htang nàpkyó jé shoq nyhê to ra râ nghut lhê; hkungga gyàp mâ é myi le ayang gyúng nyî ra râ nghut lhê. 10 Haû mù, hkyangjong hpó gi, yhâng é nú nhám mèbu eq nú nhâm é ahte buhîng zo wùt mù, hkungga gyàp htoq má nyé gyó byùq é myi nyhé hkunggâ é myiwap lé hkû yù mù, hkungga gyàp nàm má tô to râ nghut lhê. 11 Hau htâng, yhang gi, gótû mèbu dum htaî wùt mù, myiwap lé, xuq tô é wàp shinggan shut wàq htoq ê luî, htûngli dông sansêng é jowò má ê dé pyám ra râ nghut lhê. 12 Hkungga gyàp mâ é myi gi, a shi byùq é za, ayang gyúng nyî ra râ nghut lhê. Hkyangjong hpó haû gi, nàp wuì htang ê jàt mù, myi nyhé hkungga lé myi htoq má rago saî ke luî, hau é ahtoq má, zùmhkaû hkunggâ é xû lé nyé ra râ nghut lhê. 13 Hkungga gyàp htoq mâ é myi gi, a shi byùq é za, ayang gyúng nyî ra râ nghut lhê.
Gùqzò Hkungga
14 Gùqzò hkunggâ é matú cháng ra târâ pé gi, Arun é yhang zo yùqzô pé, haû hkungga gyàp é hí nghut é, Yhûmsîng Garaî é hí má haú lé lé nhông byi ra râ nghut lhê. 15 Haû hkyangjong hpó gi, gùqzò hkungga mai mún eq xû lé namngón jung bànshoq le mù ra-tsup tsup yû luî, Yhûmsîng Garaî é matú namngón shôm dùt râ dông, haú lé hkungga gyàp htoq má bûn nyì gàmbùm dông nyhê nhông râ nghut lhê. 16 Myìt tô é pé lé gi, Arun eq yhâng é yùqzô pé zo râ nghut lhê; nghut kôle, haú lé, sansêng é jowò má múnchi a kat é za zo ra kôrâ nghut lhê; yhángmòq gi, haú lé, zùphpong zúm é wânghkaû má zo ra kôrâ nghut lhê. 17 Haú lé, múnchi eq wó bung râ a nghut; Ngo lé myî èq nyhê nhông byî é hkungga mâ é yhángmòq é gàmbùm dông haú lé ngò byi bê nghut lhê. Haû gi, mara hkyut hkungga eq mara hpyî hkungga su, chyoiyúng htâng é nghut ri. 18 Arun é awùt ashín yùqzo hkangmó gi, haú lé ge zo râ nghut lhê. Jé lô râ pyàt bán bànshoq é matú, haû gi, Yhûmsîng Garai lé myi nyhê nhông byî é hkúnggâ é ahtum abyùq gàmbùm dùt nyì râ nghut lhê. Haú pé lé záng é haî nghut kôlhang, chyoiyúng byùq râ nghut lhê.’ nghû àq.” ga taî ri.
19 Haû Yhûmsîng Garai gi, Mosheq lé, 20 “Arun eq yhâng é yùqzô pé namngón xû but ayá dáng é buìnyì má, haû Yhûmsîng Garaî chyáng yu lé byi râ gi, ayang lhê é gùqzò hkungga dông, je nú é mún ngo joí mâ é xê gàmbùm ragàmbùm lé, nàpkyó rawuí gû, myínhtâng rawuí gû nghut ra râ nghut lhê. 21 Mún haú lé, auhpyén má xû eq rahá nyhô pâ lông yù ra râ nghut lhê; rago wó nyhô pâ yù jáng, Yhûmsîng Garaî é matú namngón shôm dùt râ dông, gùqzò hkungga haú lé ajàp jàp kut luî nhông byi ra râ nghut lhê. 22 Arun é yhang zo yùqzô pé mâ é, yhâng é hkyangjong wò xoq wùn wàq râ matú, sô kat namngón xû but huî é hkyangjong hpó gi, hkungga haú lé ge hên byi râ nghut lhê. Haû gi, Yhûmsîng Garaî é matú bànshoq nyhê nhông ra râ nghut é, ahtum abyùq é cháng ra târâ nghut ri. 23 Hkyangjong hpó nhong é gùqzò hkungga hkangmó gi, chyut nyhê nhong pyám ra râ nghut lhê; haú lé ge zo râ a nghut.” ga taî ri.
Mara Hkyut Hkungga
24 Haû Yhûmsîng Garai gi, Mosheq lé, 25 “Arun eq yhâng é yùqzô pé lé taí aq; ‘Mara hkyut hkunggâ é matú cháng ra târâ pé gi, mara hkyut hkungga lé, myi nyhé hkungga sat é jowò, haû Yhûmsîng Garaî é hí má sat ra râ nghut lhê. Haû gi, chyoiyúng htâng é nghut ri. 26 Mara hkyut hkungga nhong é hkyangjong hpó gi, hau é hkungga sho lé ge zo râ nghut lhê; sho haú lé gi, zùphpong zúm é wânghkaû mâ é sân-yúng jowò má zo ra râ nghut lhê. 27 Hkungga sho haú lé záng é haî nghut kôle, chyoiyúng byùq râ nghut lhê; hau é sui tsit gyûn é mèbu lé gi, sân-yúng jowò má chî pyám ra râ nghut lhê. 28 Sho haú lé chyoq é tso-au lé gi, lhoqhkyop pyám ra râ nghut lhê; gyi au má chyoq é nghut jáng gi, au haú lé dûn rùt luî, wui èq kyûn chî pyám ra râ nghut lhê. 29 Hkyangjông pê chyáng mâ é yùqzo hkangmó gi, haú lé ge zo râ nghut lhê; haû gi, chyoiyúng htâng é nghut ri. 30 Nghut kôlhang, Chyoiyúng Jowò má mara hkô htaí hkungga kut râ matú, zùphpong zúm má yu wàng bê sui nghut é mara hkyut hkungga lé gi, ge zo râ a nghut; haú lé gi, myî èq nyhê hkyô pyám ra râ nghut lhê.