Mara Hkyut Hkungga
4
Haû Yhûmsîng Garai gi, Mosheq lé, 2 “Isira-elaq byu pé lé îsu nghû taí aq; ‘Rayùq yùq, haû Yhûmsîng Garai hkyô tô é hkunmó pé mâ é ralhum lhum lé a bûn nùng má kut shut mù, hkûm zing tô é lé lu laî pyâm é hkûn, a-ô mâ é dông kut ra râ nghut lhê.3 Haû namngón xû but huî é hkyangjong hpó mara shut mù, shiwa byu pé lé mara bò nhang é nghut jáng, yhang gi, yhang kut shut é marâ é matú, haî le a râ é nohtó zo lé, mara hkyut hkungga dông haû Yhûmsîng Garaî chyáng yu lé byi ra râ nghut lhê. 4 Yhang gi, nohtó zo haú lé, Yhûmsîng Garaî é hí nghut é, zùphpong zúm hkum hí má yu lé mù, hau é u htoq má yhâng é lòq ke luî, Yhûmsîng Garaî é hí má sat ra râ nghut lhê. 5 Hau htâng, namngón xû but huî é hkyangjong hpó haû gi, nohtó hau é sui ra-am lé yù mù, zùphpong zúm hkaû má yu wang ló luî, 6 sui haú má yhâng é lòqnyhui jum yù mù, chyoiyúng jowo é pán-gyang shinggan, haû Yhûmsîng Garaî é hí má nyhit dâm tsik gyun ra râ nghut lhê. 7 Hau htâng, hkyangjong hpó haû gi, sui ra-am lé, zùphpong zúm mâ é, Yhûmsîng Garaî é hí nghut é, namngón shôm nyhê é hkungga gyàp é hkyuî pé má bùt râ nghut lhê; haû myìt tô é nohtó sui pé lé gi, zùphpong zúm hkum hí mâ é myi nyhé hkungga gyàp awang má hut hkyó ra râ nghut lhê. 8 Yhang gi, mara hkyut hkungga nohtó mâ é xû bànshoq nghut é, sing û pé má dàp é xû bànshoq, 9 hpyidum nàm mâ é jínlhum í cham eq haú má dàp é xû myhên, haû jínlhum í cham eq rahá hî yù râ nghut é sing long lé hî yù râ nghut lhê. 10 Haû gi, zùmhkaû hkungga dông nhông byî é nohtó mâ é xû hî yu é su kut ra râ nghut lhê. Hau htâng, hkyangjong hpó haû gi, haú pé lé, myi nyhé hkungga gyàp htoq má nyhé ra râ nghut lhê. 11 Nghut kôlhang, nohtó hau é sho-kuq, sho bànshoq, ulhum, hkyî pé, û hkyihpam eq hkyi pé nghut é, 12 nohtó mâ é bànshoq lé gi, xuq tô é wàp shinggan mâ é sân-yúng é jowò nghut é myiwap hut bûm jang má yu ê mù, myiwap hut bum tô é mâ é htang má nyhê pyám ra râ nghut lhê.
13 Isira-elaq shiwa hpûng gón, haû Yhûmsîng Garai hkyô tô é hkunmó pé mâ é ralhum lhum lé a bûn nùng má kut shut mù, hkûm zing tô é lé lu laî pyâm é nghut jang, haú hkyô lé yhángmòq a sê kat é nghut kôle, yhángmòq gi, yhángmòq mara bo é hkyô lé sê gyo luî, 14 yhángmòq kut shut é mara htoq ze lo é hkûn, shiwa hpûng gi, nohtó zo lé mara hkyut hkungga dông yu lé mù, zùphpong zúm hí má hau lé lé byi ra râ nghut lhê. 15 Haû shiwa hpûng mâ é sûwún wuî gi, Yhûmsîng Garaî é hí má, yhángmòq é lòq lé nohtó hau é u htoq má ke mù, Yhûmsîng Garaî é hí má nohtó haú lé sat ra râ nghut lhê. 16 Hau htâng, namngón xû but huî é hkyangjong hpó haû gi, nohtó hau é sui ra-am lé zùphpong zúm hkaû má yu wang ló luî, 17 sui haú má yhâng é lòqnyhui jum yù mù, pán-gyang shinggan, haû Yhûmsîng Garaî é hí má nyhit dâm tsik gyun ra râ nghut lhê. 18 Hau htâng, yhang gi, sui ra-am lé, zùphpong zúm mâ é, Yhûmsîng Garaî é hí nghut é, hkungga gyàp é hkyuî pé má bùt râ nghut lhê; haû myìt tô é sui pé lé gi, zùphpong zúm hkum hí mâ é myi nyhé hkungga gyàp awang má hut hkyó ra râ nghut lhê. 19 Yhang gi, nohtó haú mâ é xû bànshoq lé hî yù mù, hkungga gyàp htoq má nyhé râ nghut luî, 20 mara hkyut hkungga nohtó lé yhang hkyangjông é su, nohtó shi du lé le hkyangjong râ nghut lhê. Hkyangjong hpó haû gi, haú dông mai, shiwa hpûng é matú mara hkô htaí hkungga nhông byi râ nghut luî, yhángmòq gi, mara hkyut pyám byî é hui kôrâ nghut lhê. 21 Hau htâng, yhang gi, nohtó haú lé, xuq tô é wàp shinggan shut yu ê mù, hí lhê é nohtó lé yhang kut é su nyhê pyám râ nghut lhê. Haû gi, shiwa hpûng é matú mara hkyut hkungga nghut ri.
22 Zau rayùq, yhâng é Garai Gasang nghut é haû Yhûmsîng Garai hkyô tô é hkunmó pé mâ é ralhum lhum lé a bûn nùng má kut shut mù, hkûm zing tô é lé lu laî pyám luî, yhang mara bo é nghut mù, 23 yhang kut shut é mara lé bûn sê kat é hkûn, yhang gi, haî le a râ é bainám lo lé, yhâng é hkungga dông yu lé ra râ nghut lhê. 24 Yhang gi, bainám hau é u htoq má, yhâng é lòq ke mù, Yhûmsîng Garaî é hí nghut é, haû myi nyhé hkungga sat é jang má sat ra râ nghut lhê. Haû gi, mara hkyut hkungga nghut lhê. 25 Haú hkûn, hkyangjong hpó gi, mara hkyut hkungga sui ra-am lé yhâng é lòqnyhuî èq htaû yù mù, myi nyhé hkungga gyàp é hkyuî pé má bùt luî, myìt tô é sui lé, myi nyhé hkungga gyàp awang má hut hkyó ra râ nghut lhê. 26 Yhang gi, xû bànshoq lé, zùmhkaû hkunggâ é xû lé nyhê é su, hkungga gyàp má nyhé râ nghut lhê. Hkyangjong hpó haû gi, haú dông mai, zau hpô é marâ é matú mara hkô htaí hkungga nhông byi râ nghut luî, zau hpó haû gi, mara hkyut pyám byî é hui râ nghut lhê.
27 Shiwa hpúng mâ é rayùq yùq, haû Yhûmsîng Garai hkyô tô é hkunmó pé mâ é ralhum lhum lé a bûn nùng má kut shut mù, hkûm zing tô é lé lu laî pyám é nghut jáng, yhang mara bo é nghut luî, 28 yhang kut shut é mara lé bûn sê kat é hkûn, yhang gi, yhang kut shut é marâ é matú, haî le a râ é bainám zîng lé, yhâng é hkungga dông yu lé ra râ nghut lhê. 29 Yhang gi, mara hkyut hkungga hau é u htoq má, yhâng é lòq ke mù, haû myi nyhé hkungga sat é jang má sat ra râ nghut lhê. 30 Haú hkûn, hkyangjong hpó gi, sui ra-am lé yhâng é lòqnyhuî èq htaû yù mù, myi nyhé hkungga gyàp é hkyuî pé má bùt luî, myìt tô é sui lé, myi nyhé hkungga gyàp awang má hut hkyó ra râ nghut lhê. 31 Mara kut shut sû gi, zùmhkaû hkungga mâ é xû lé hî yu é su, haú mâ é xû bànshoq lé hî yù râ nghut mù, hkyangjong hpó gi, haú pé lé, Yhûmsîng Garaî é matú namngón shôm dông hkungga gyàp má nyhé râ nghut lhê. Hkyangjong hpó haû gi, haú dông mai, yhâng é matú mara hkô htaí hkungga nhông byi râ nghut luî, yhang gi, mara hkyut pyám byî é hui râ nghut lhê.
32 Rayùq yùq, sau zo lé, yhâng é mara hkyut hkungga dông yu lé é nghut jáng, yhang gi, haî le a râ é azìng lé yu lé ra râ nghut lhê. 33 Yhang gi, hau é u htoq má yhâng é lòq ke byi mù, myi nyhé hkungga lé sat é jowò má, haú lé mara hkyut hkungga dông sat ra râ nghut lhê. 34 Haú hkûn, hkyangjong hpó gi, mara hkyut hkungga sui ra-am lé yhâng é lòqnyhuî èq htaû yù mù, myi nyhé hkungga gyàp é hkyuî pé má bùt luî, myìt tô é sui lé, myi nyhé hkungga gyàp awang má hut hkyó ra râ nghut lhê. 35 Yhang gi, zùmhkaû hkungga sau zo mâ é xû lé hî yu é su, haú mâ é xû bànshoq lé hî yù râ nghut mù, hkyangjong hpó gi, haú pé lé, hkungga gyàp má Yhûmsîng Garai lé nyhê nhông byî é hkungga htoq má nyhé râ nghut lhê. Hkyangjong hpó gi, haú dông mai, yhang kut shut é marâ é matú mara hkô htaí hkungga nhông byi râ nghut luî, yhang gi, mara hkyut pyám byî é hui râ nghut lhê.