Htoq Ló 33

Haû Yhûmsîng Garai gi, Mosheq lé, “Nàng eq Egutuq ming mai nàng shuî htoq lo é shiwa byu pé gi, shí jowò mai htoq luî, ‘Ngò gi, náng é awùt ashîn pé lé maumyî haû byi ra nghut lhê.’ nghû Abraham, Isak eq Yakup pé lé, Ngò, danghtum htûm tô é maumyî má dòq ló keq. 2 Ngò gi, náng é hí má maumang lagyo lé nhang kat byi mù, Hkanan byù, Amori byù, Hiti byù, Perizi byù, Hiwi byù eq Yebusi byu pé lé hkat htoq pyám byi râ nghut lhê. 3 Haû no-naú eq byo-î yui é mau má shuî dòq ló râ. Nghut kôlhang, núngmòq gi, myìt htân bang nghut kô é yánmai, Ngò, núngmòq lé hkyôwuì má lhoqhtên pyám âbe, Ngò yhang gi, núngmòq eq a bo châng dòq ló râ nghut lhê.” ga taî ri.

4 Haû shiwa byu pé gi, myìt myo ûng wom râ dang haú pé lé wó gyo kôjáng, ó yùq le, gùng mhón zê a chung é za yón kuq bûm bekô nghut ri. 5 Hkâsu mù gâ le, haû Yhûmsîng Garai gi, Mosheq lé, “‘Núngmòq gi, myìt htan é byu pé nghut akô. Ngò, núngmòq eq rahá razùp zo rû bo châng le gi, núngmòq lé lhoqhtên pyám berâ nghut lhê. Ahkuî, núngmòq é gùng mhón zê lé hkyut pyám keq; haú hkûn, Ngò, núngmòq lé hkâsu kut râ hkyô myìt hpyit râ nghut lhê.’ nghû Isira-elaq byu pé lé taî kyo aq.” ga taî é yánmai, 6 haû Isira-elaq byu pé gi, Horep bùm má yhángmòq é gùng mhón zê lé hkyut shang pyám bekô nghut ri.

Zùphpong Zúm Eq Sêng É Hkyô

7 Mosheq gi, zúm lé yù mù, yhángmòq xuq tô é wàp eq ra-tsuí wê é jang má ê saî to to lhaq kut mù, zúm haú lé zùphpong zúm ga myìng myhîng ri. Haû mù, haû Yhûmsîng Garai lé hô nau é sû ó yùq nghut kôle, wàp shinggan mâ é zùphpong zúm haú má e akô nghut ri. 8 Zùphpong zúm haú má Mosheq e ló hkangmó, shiwa byù bànshoq bang gi, toq luî, yhûmsing é zúm hkum hí má tsing yàp to mù, zùphpong zúm haú má Mosheq wang ló é hkûn jé shoq wú to to kut akô nghut ri. 9 Mosheq gi, zùphpong zúm haú má wang ló jáng, mhuthtui zìng gyó lé lô mù, zúm hkum hí má lé jòq tô ri; haú u, Yhûmsîng Garai gi, Mosheq lé dáng nyo ri. 10 Haû shiwa byu pé gi, zùphpong zúm hau é hkum hí má mhuthtui zìng lé jòq tô é lé myàng hkangmó, yhángmòq bànshoq bang toq yàp luî, yhûmsing é zúm hkum hí má noqkuq bum akô nghut ri. 11 Haû Yhûmsîng Garai gi, luzúm rayùq lé su, Mosheq lé myòqdong hkyúm dáng nyo ri. Hau htâng, Mosheq gi, wàp má dum taû ló ri. Nghut kôlhang, Nun é yhang zo yùqzo, yhang lé htuqbáng sû zorâm Yoshuq gi, zúm mai a htoq é za ahkaû má nyi tô ri.

Mosheq Eq Haû Yhûmsîng Garaî É Hpungwup Shingkang

12 Mosheq gi, haû Yhûmsîng Garai lé, “Nàng gi, ngo lé, ‘Byù shí bang lé shuî-u aq.’ ga taî nyì bê nghut ri; nghut kôlhang, ngò eq rahá nhâng râ byù ó yùq nghut é lé, Nàng, ngo lé a sé nhâng shi kut ri. ‘Náng é myìng mai, Ngò, nang lé sê tô é nghut mù, nàng gi, Ngá é hí má myòqdong wó bê nghut ri.’ ga kúm Nàng taí bê nghut ri. 13 Haû mù, Nàng, ngo lé chun é nghut jáng, ngò, Nang lé wó sé mù, Náng é hí má xoq luî myòqdong wó nyî sháng gàq, ngo lé, Náng é hkyô mhoq byi laq. A-myû shî gi, Náng é byu pé nghut é lé myìtbun aq.” ga taî ri.

14 Haú hkûn, haû Yhûmsîng Garai gi, “Ngò yhang nàng eq rahá bo e ló râ nghut mù, nang lé Ngò bánno nhâng râ nghut lhê.” ga tû taî ri.

15 Haû jáng, Mosheq gi, Yhang lé, “Nàng yhang ngá-mòq eq rahá a bo dòq ló râ nghut jáng, shí jowò mai ngá-mòq lé hkâ-nhang toq kat. 16 Nàng, ngá-mòq eq rahá bo dòq ló é za a nghut le gi, Nàng, ngo lé le, náng é byu pé lé le chun é hkyô lé, hkâsu kut wó sé kôrâ lhú? Myìdàm htoq mâ é byù góbang bànshoq eq, ngò le, Náng é byu pé le shai lhûm é hkyô lé, gótû hai èq wó gam hkoq shit shirâ lhú?” ga taî ri.

17 Haú hkûn, haû Yhûmsîng Garai gi, Mosheq lé, “Ngò gi, nàng lé chun é htoq agó, náng é myìng mai nang lé sê lhê nghut é yánmai, ahkuî za nàng taí bê bànshoq lé châng kut byi râ nghut lhê.” ga taî ri.

18 Haú hkûn, Mosheq gi, “Ahkuî, ngo lé, Náng é hpungwup shingkang tûn shit laq.” ga taî ri.

19 Haû Yhûmsîng Garai gi, “Ngò, Ngá é gè hkyô bànshoq lé náng é hí mai lai nhâng mù, haû Yhûmsîng Garai nghut é Ngá é myìng lé, náng é myòq hí má taî pyô râ nghut lhê. Ngò, jeju shit naû sû lé jeju shit mù, Ngò, shogyo nhikmyin naù sû lé shogyo nhikmyîn yù râ nghut lhê. 20 Nghut kôlhang, nàng gi, Ngá é myòqdong lé ge myàng râ a nghut; hkâsu mù gâ le, Ngo lé myàng jáng, ó yùq le chyungxe ge duì râ a nghut.” ga taî ri.

21 Hau htâng, haû Yhûmsîng Garai gi, “Ngò eq chyâng é má jowò ralhum jòq lhê; haú mâ é lungmó zîng má nàng yàp to ra râ nghut lhê. 22 Ngá é hpungwup shingkang laî ló é hkûn, Ngò gi, nang lé lungmó zîng hau é achyap má kat to mù, Ngò laî ló byùq shoq, nang lé, Ngá lòq èq nghop to râ nghut lhê. 23 Hau htâng, Ngò, Ngá é lòq lé she yù jáng, nàng gi, Ngá é nùnghtáng lé myàng râ nghut lhê; Ngá é myòqdong lé kúm myàng râ a nghut.” ga taî ri.