Hîng No Zo Lhô
32
Haû shiwa byu pé gi, bùm má Mosheq ló nyi myáng byùq é lé myàng kôjáng, Arun é lhînghkyùq má huî lé lô kômù, “Gaì, ngá-mòq é matú, ngá-mòq é hí má bo so byi râ hparà saí byi aq. Ngá-mòq lé Egutuq ming mai shuî htoq lo é Mosheq shí yùq gi, haî dùt byùq bê làq ngá-mòq a sé.” ga taî akô nghut ri.2 Haú hkûn, Arun gi, yhángmòq lé, “Núngmòq é yhûmsîng myhî pé eq núngmòq é yhang zo yùqzo byìzô pé xuî tô é hîng nogóng lé tsing hkyut yû mù, ngá chyáng yu lé keq.” ga taî ri. 3 Haû mù, shiwa byu pé bànshoq bang gi, yhûmsing é no góng lé hkyut yû mù, Arun chyáng yu lé lô byî akô nghut ri. 4 Arun gi, yhángmòq mai lé àp byî é gû lé yù mù, no zo lhô azòng má nyhê yui kat luî, no zo lhô hparà saí bê nghut ri. Haû ban saí jáng, shiwa byu pé gi, “Isira-elaq byu pé ê, shî gi, Egutuq ming mai núngmòq lé shuî htoq lo é sû, núngmòq é hparà nghut bê ô!” ga taî bum akô nghut ri.
5 Arun gi, haú lé myàng jáng, no zo lhô hau é hí má hkungga gyàp ralhum saí luî, “Nàpmá gi, haû Yhûmsîng Garaî é matú poî kut râ nghut lhê.” ga taî pyo kat ri. 6 Haû mù, htang nyí, shiwa byu pé gi, noq le toq kôluî, myi nyhé hkungga nhông byi kômù, zùmhkaû hkungga pé le yu lé bum akô. Hau htâng, yhángmòq gi, zoshuq zùng zo kômù, ladu lai shoq toq hkye lhûm bum akô nghut ri.
7 Haú hkûn, haû Yhûmsîng Garai gi, Mosheq lé, “Nàng gyó ló aq; haî mù gâ le, Egutuq ming mai nàng shuî htoq lo é náng é byu pé gi, htên byòq bùm bekô nghut ri. 8 Yhángmòq gi, Ngò, yhángmòq lé hkyô tô é hkunmó mai hân za nghoq ló byùq kômù, yhángmòq é matú, no zo lhô hparà nyhê yui saî yù kôluî, hau é hí má paî gòp kômù, haú lé hkungga nhông byi kôluî, ‘Isira-elaq ê, shî gi, Egutuq ming mai nang lé shuî htoq lo é sû, núngmòq é hparà nghut bê ô!’ ga taî akô nghut ri.” ga taî ri.
9 Hau htoq agó, haû Yhûmsîng Garai gi, Mosheq lé, “Byù shí bang gi, myìt htân bang nghut é lé Ngò myàng bê. 10 Ahkuî, Ngá é nhikmó-yo hkyô gi, yhángmòq chyáng lé mù, yhángmòq lé Ngò wó lhoqhtûm pyám sháng gàq, Ngo lé baú nyhi to aq. Haú hkûn, Ngò gi, nang lé byù myû mó dùt nhâng râ nghut lhê.” ga taî ri.
11 Nghut kôlhang, Mosheq gi, yhâng é Garai Gasang nghut é, haû Yhûmsîng Garai mai yhang lé myòqdong byi râ matú, “Yhûmsîng Garai ê, Náng é hpungwup a-tsam mó eq wum-o a-tsam mó bo é lòq èq Egutuq ming mai shuî htoq lo é Náng é byu pé lé, Nàng, haî mù nhikmó-yo râ lhú? 12 Haî mù, Egutuq byu pé lé, ‘Garai Gasang gi, ashop é myìt bò luî, bùm pé má yhángmòq lé sat pyám mù, myìdàm htoq mai yhángmòq lé chyut kut pyám râ matú, yhángmòq lé shuî htoq lo é nghut ri.’ nghû taí nhâng râ lhú? Náng é nhikmó-yo hkyô lé lhoqzîm pyám mù, Náng é byu pé lé ihkyùp hkyó nhâng râ mai myìt lhing pyám laq. 13 Náng gûng yhang Nàng, ‘Ngò gi, núngmòq é awùt ashîn pé lé, mauhkûng mâ é kyî pé myhó lhoqmyo byi râ nghut lhê; Ngò gi, núngmòq é awùt ashîn pé lé danghtum htûm tô é maumyî shî bànshoq yhángmòq lé byi râ nghut mù, haû gi, yhángmòq é ahtum abyùq muìzè gàmbùm dùt râ nghut lhê.’ ga dâkam tô é, Náng é duìnhâng zoshâng wuì Abraham, Isak eq Isira-elaq pé lé myìtbun aq.” ga taî ri. 14 Haû mù, haû Yhûmsîng Garai gi, myìt lhîng luî, Yhâng é byu pê chyáng hkyó râ gâ é ihkyùp lé a hkyó lo nghut ri.
15 Haú hkûn, Mosheq gi, gùng lhîng mù, dangshikaq târâ dàp é lùqlong í long lé yhâng é lòq má wàq chûng luî, bùm mai gyó ló bê nghut ri. Lùqlong haû í lông é í lùt shut laiká dàp tô ri. 16 Lùqlong haû í long gi, Garai Gasâng é lòqmú nghut ri; laiká cham gi, Garai Gasâng èq lùqlong haû í long má kyûng kâ tô é laiká cham nghut ri.
17 Yoshuq gi, haû shiwa byu pé wùt garû myhîng é htê lé wó gyo jáng, Mosheq lé, “Wàp hkaû má majan zan htê htoq myhîng ri.” ga taî ri.
18 Haû jáng, Mosheq gi,
“Haû gi, ûngmyuq hkyô wó htê le a nghut;
majan sum htê le a nghut;
ngò gyô le, mahkôn hkôn htê shèq ru nghut nyo ri.” ga tû taî ri.
19 Mosheq gi, wàp má gyó chyâng lo nyi é hkûn, haû no zo lhô lé le, mahkôn gó nyî kô é lé le myàng luî, nhikmó-yo mù, yhâng é lòq mâ é lùqlong í long lé, bùm hkyî má dú hkyop kat bê nghut ri. 20 Hau htâng, yhang gi, haû shiwa byu pé saî tô é no zo lhô lé yù mù, myi má nyhé luî, a-mùn dùt shoq mhun yù mù, wuì má hpyûn nyhó luî, Isira-elaq byu pé lé shuq nhang ri.
21 Mosheq gi, Arun lé, “Shiwa byu pé lé, shî í kô é târâ lu lai hkyô shuî kut shut shoq, yhángmòq, nàng lé haî kut kô é lhú?” ga taî ri.
22 Haú hkûn, Arun gi, “Ngá é yhûmsîng ê, nhikjum hkâyo. Byù shí bang agè ashop é myìt bo é hkyô lé, nàng sê lhê. 23 Yhángmòq gi, ngo lé, ‘Ngá-mòq lé, ngá-mòq é hí má bo so byi râ hparà saí byi aq. Ngá-mòq lé Egutuq ming mai shuî htoq lo é Mosheq shí yùq gi, haî dùt byùq bê làq ngá-mòq a sé.’ ga taî akô. 24 Haû mù, ngò gi, yhángmòq lé, ‘Hîng zè wó sû ó yùq le hkyut keq.’ nghû taí jáng, yhángmòq gi, ngo lé hîng zè byi kô é nghut mù, ngò gi, haú lé myi má du kat luî, no zo lhô shî htoq lo é nghut lhê!” ga tû taî ri.
25 Mosheq gi, haû shiwa byu pé lé Arun a wó hkûm zìng mù, yhángmòq yùt yùt ô nau é lé kut gabyong nhâng luî, yhángmòq é gye pê hí má lùmù gànsâng jang dùt byùq é lé myàng ri. 26 Haû mù, yhang gi, wàp wàng hkum hí má yàp to mù, “Haû Yhûmsîng Garaî é matú nghut râ sû ó yùq nghut kôle, ngá chyáng lé keq.” ga taî ri. Haû jáng, Lewiq byu pé bànshoq bang gi, yhâng chyáng zîng lé bum akô nghut ri.
27 Haú hkûn, yhang gi, yhángmòq lé, “Isira-elaq é Garai Gasang, haû Yhûmsîng Garai taî le, ‘Yùq hkangmó gi, yhûmsing é shâm wun chûng mù, wàp rahtâng mai góhtâng jé shoq, yhûmsing é gu-mang, yhûmsing é luzúm eq yhûmkyochang pé lé ê ê lô lô sat pyám keq.’ gâ ri.” ga taî kyô ri. 28 Haû Lewiq byu pé gi, Mosheq hkunmó hkyô é eq rajung za kut kó mù, haú nyí má shiwa byu pé sum hkyîng kô shi byùq bê nghut ri. 29 Hau htâng, Mosheq gi, “Hkû-nyí, núngmòq gi, haû Yhûmsîng Garaî é matú sanséng bang dông hkyin masàt tô é hui bekô nghut ri. Hkâsu mù gâ le, núngmòq gi, yhûmsing é yhang zo yùqzô pé eq gu-mang wuì lé gyè kut bekô nghut mù, Yhang gi, núngmòq lé hkû-nyí shimân byi bê nghut ri.” ga taî ri.
30 Hau htang nyí, Mosheq gi, shiwa byu pé lé, “Núngmòq gi, mara mó kut shut bekô nghut ri. Nghut kôlhang, ngò gi, ahkuî, haû Yhûmsîng Garaî chyáng dòq ê râ nghut lhê; núngmòq é marâ é matú hkô htaí hkungga wó byi âbe.” ga taî ri.
31 Haû mù, Mosheq gi, haû Yhûmsîng Garaî chyáng taû dòq ê mù, “Byù shí bang gi, mara mó yhang kut shut bu-nhung! Yhángmòq gi, yhángmòq é matú hîng hparà pé saî yù bekô nghut ri. 32 Nghut kôlhang, yhángmòq é mara lé hkyut pyám byi râ nghut jáng, hkyut pyám byi aq; haû a nghut jáng, ngá é myìng lé, Nàng kâ tô é laiká bùk mai bùt sut pyám aq.” ga taî ri.
33 Haú hkûn, haû Yhûmsîng Garai gi, Mosheq lé, “Ngo lé shut é sû ó yùq é myìng lé nghut kôle, Ngò, Ngá é laiká bùk mai bùt sut pyám râ nghut lhê. 34 Ahkuî taû ló mù, haû shiwa byu pé lé, Ngò taî é jowò má shuî ê àq; Ngá é maumang lagyo gi, náng é hí má e ló byi râ nghut lhê. Nghut kôlhang, Ngò mai mara dam byi râ ahkyíng jé jáng, yhángmòq lé, yhángmòq é marâ é matú mara dam byi râ nghut lhê.” ga taî ri.
35 Haû Yhûmsîng Garai gi, shiwa byù haú bang lé, yhángmòq, Arun eq no zo lhô saí kô é yánmai, wúm èq dam byi bê nghut ri.